Mt 15

Mëtum bëtara

Mk 7,1-23

1Ndò bëfarisea ai bësaṅa bëkalara bëngasò abë Yesus bësòò a Yerusalem, bò na: 2Asu dze bëyègè boe badaṅ mvende ya bëtara bëngalig? Bënë ha të sob mò eyòṅ badi bidi#15,2Yuden bëngabë bëlë abui mëmvende asu e mam mazu ai eboe. Asu yë na mod wavaè eboe te, hë otari wòbò ngë asob nyòl kan ziṅ.. 3Ndò angafèd, nyè ai bò na: Asu dze miadaṅ mvende Zamba hë asu mvende dzaan? 4Amu Zamba angadzo na: Olugu esoa ban nyoa#15,4Mb 20,12, adzo fë na, e mod akòbò abe ai esya ngë nyia ayean ai awu#15,4Bl 20,9. Ebug ya Mfufub Ntilan yadzo ki hë na akòbò abe, yadzo na «akag» ngë ki na «ayòg».. 5Ndò hm mina miadzo na: Ngë mod akad esya ngë nyia na: E dzi esë mëhë yi wa vë enë kòrban#15,5Eyòṅ mod adzo na dzom enë «korban», nala watyan na afubu dzò Zamba. Mbol hm mod osë angabë abëlë na atòṅ bëbonde boe eyòṅ bëngatëg ya, ngë ahë kad bò na e dzom ahë yean bò tòṅ ete enë korban, mvende etòṅ bëbonde yabi ki fë nyè. 6abëlë ki esya nguma dzom ziṅ. Nala ngò miandaman mvende Zamba hë asu mëtum man. 7A bod mëdugan, Isaias angatoan fò yen asu dan eyòṅ adzoo na: 8E bod ba balugu ma ai biyè bi anyu, Nnëm waban otoa abim oyab te ai ma! 9Olugu ya bavë ma anë evoe, E dòkten ya bayëgëlë anë hë mëmvende më bod#15,9Is 29,13. 10Ndò angaloe nkunda bod, nyè ai bò na: Vogëlan, mibindi. 11Së ki e dzom yanyiian mod a anyu endzò yabòli nyè, e dzi yakui mod a anyu#15,11Nsëm osë watye a nnëm., endzò hm yavë nyè eboe. 12Ndò bëyègè bëngasubu nyè babi bò na: Yë wayëm fò na bëfarisea bawog nkòbò hi abe? 13Ndò angayalan na: Ele esë ya tara ya yob andzëki bè, yayi tieban a si. 14Dzogan bò. Bënë e kan mindindim yalëdë bod zen. Ngë ndindim olëdë e hi mbòg zen, bësë bëkuu a ebe! 15Ndò Petrus angafèd, nyè na: Fëlan bia nkana te. 16Nyè na: Dze, yë mingëne të wog? 17Miawog ki na e dzom esë yanyian mod a anyu, yakë a abum, engakë woban a edug nga? 18E dzi ki yakui a anyu, yasò a nnëm, endzò yabòli mod. 19Bëbe mintsogan, ewoe bod, endaman mëlug, bibòn, wub, ebugu mëdzo, bikag, bisë biatie a nnëm. 20E mam mala mmò mavë mod eboe. Adi bidi, mod të sob mò, nala wavëvëë mod eboe.

Ṅyëbë mininga Kananea

Mk 7,24-30

21Akodo angakodo hala, ndò Yesus angakë a nkòṅ nnam Tir ai Sidon. 22Mininga Kananea ya nnam te ahama, angayon, nyè na: Kudu ma ngòl a Nti, a man David. Ngò dzam ebëlë abe ai mbë nsisim andëgëlë nyè. 23Ndò andzëki nyè vë eyalan. Bëyègè bësòò, bëngakogëlan ai nyè na: Soege nyè amu azu ayon bia a mvus. 24Ndò angayalan na: Mëngalomban hë asu mintomba ya nda-Israel ya mingadzaṅ. 25Mininga te asò fò laban ai asu a si, nyè na: A Nti, ka ma. 26Nyè na: Bayean ki nòṅ bidi bi bòn, bëwoa mfa mvu enë. 27Mininga nyè na: Owe, a Nti, dzam da, mvu yadi e mënyuṅ maku a tëbële esya nti waban. 28Ndò Yesus angayalan nyè na: A mininga, ṅyëbë woe onë abui. Abò ai wa anë mbol wayi. Ngò dzie ebò hm fò mvoè etye etye te.

Yesus abò abui bod mvoè

29Yesus akodo hala, angakë a ntsag ma më Galilea, ndò angabed a nkol, atòbò a si. 30Bod besòò ai mimbombog, mindindim, mintèt, ai abui afë, bëboe bò a mëkol moe a si, angasye bò. 31Bod bëngakam a bëyënë anë mimvumvug miakòbò, mintèt mibò mvoè, mimbombog miwulugu, mindindim miyënë. Bëngalugu Zamba Israel.

Yesus avë bod bakuda bënyii bidi

Mk 8,1-10

32Ndò Yesus angaloe bëyègè boe, nyè na: Mawog abui bod di ngòl abui amu bëtòbò ya ai ma mëlu mëlè. Eyòṅ dzi, bëntoa ya tègè ai e dzom badi. Ma mayi ki bò soe bëtoa zie. Bëza kë ku a si a zen ai sòm zie. 33Ndò bëyègè bëngadzo ai nyè na: Eyë binë dzam yen abim abui bëmbaṅëla dili a nkod-nnam mu ve na bivë e bod bësë ba? 34Yesus nyè ai bò na: Mibëlë bëmbaṅëla bam? Bò na: Zamgbal, ai ban kòs. 35Ndò angabende na bod bëtòbò a si. 36Ndò anganòṅ bëmbaṅëla zamgbal ai kòs, avëë ngaṅ, abëgë, avëë bëyègè boe, bëyègè boe bëngavë bod. 37Ndò bësë bëngadi, bëdzie. Bitun bingaligi bingadzie minkut zamgbal. 38E bod ki bëngadi bëngabë bakuda bëlè, tègè laṅ bininga ai bòngò. 39Ndò angasoe bod, abëdë a efunga, akëlë a minkol mi Magadan#15,39Azaa kui ana, biabë ki yëm e hom Magadan anë..

Currently Selected:

Mt 15: NTE12

ማድመቅ

Copy