METHIU 15

Leithingna Anpa Anpu Hoongta Amtheihna

(Mak 7:1–13)

1 # Mak 7:1–23 Cheva Jerusalem nata ringjih lulok leh Pharisi in Jisu kuungah thlenga anson, 2“Jarelna nang niroi eiin anpa anpu in ansehna thlou ankhoihme? Alamva anmah in tol ansaaklai ankut silnoh ei.” 3Chuta Jisu in ankuungah amsangei, “Sehna thlouin alamveia jarelna Ringpu vaa trongthuun nankhoihme? 4Alamva Ringpu trongthuun in son, ‘Nannu nanpata injahve,’ che ‘Tunangkhat in anu nohle apata phool tlohle, mahmii khavah thiso.’ 5Chuta nannih in nanson, ‘Tunangkhat in anu nohle apata, kei ningnata akchuung nanphahphuta Ringpu kuungah kakatpei tihleva amah in apa injahna darkaar amnohsa.’ 6Nga tloh a nannih in sehnathlou khanna Ringpu trongta jakhatkho maveinohchou. 7Akthra veisin eio! Ringraan Isaiah in nannih turel thratea aphoongpei: 8‘Mahmii eiin annar avah keita kanjonang, chuta anril avah kikuungnata inlasei; 9Che anmah in miivaa trongsuurta amitheih che keita sulla kamithruunang.’ ”

Sakmangin Ammaang

(Mak 7:14–23)

10Chunna Jisu in miitamta onga asonei, “Rungaia bahab tlave: 11#Noon 10:14–15; 1 Tim 4:3narra akluut trongin miita sakmang maveinoh, chuta narnata anthruh khanna miita sakmang amvei.” 12Chunna amah aroiin akuungah thlenga anson, “Mah nison ita antheih lai Pharisi anril ansok i niromnohme?” 13#Jon 15:2Chuta amah in amsangei, “Ringramma am Pa in alinnoh thing anaamte aktangtu. 14#Luk 6:39; Met 23:16,24; Rom 2:19Nga am eiso; anmahvah mitchoin aching mitchosei, chunna mitcho in mitchota lamchingleva khurra tlatuei.” 15Chunna Pitar in amah kuungah ason, “Mah pandam i kankuunga invuia kanisonro.” 16Chunna Jisu in asonei, “Nannihkho pekphah mah i bahap tlanoh mangchoume? 17Bao suungah akluut naamte vonpiiah luut, che ruungnata inthruh tih a romnoh mangchoume? 18#Met 12:34Chuta baonata anthruhpot anaamte rilsuungnata thlengning, che mii in sakmang amivei. 19#Kal 5:19–21; 1 Kor 6:9–10; Rom 14:14Alamva rilsuungnata akthranoh miithat, kumei kupa laal, miimei miisa laal, inru inraan, chimnoh a sakhi malan, miirilh miiloonna trong. 20Miita sakmang amvei i mah anaamte isa, chuta kut silnoh a saa invah miita sakmang maveinoh.”

Kumei Khat in Malot

(Mak 7:24–30)

21 # Mak 7:24–30 Cheva Jisu in mah chunnata inthurh a Tur leh Sidom ramting sehsa. 22Che anve, Kanaan na kumei khat in thlenga onga Jisu kuungah ason, “O Akpu, Devit vaa Asa kupa, Keita niril kamvolro, alamva kisakumei khousaar chuunga khalmo akchutpei.” 23Chuta Jisu in trong inkhatkho masangnohsa. Che aroiin thlenga akuungah ngenna anson, “Kumei i mathlahrosa, alamva iknungah ong onga amsa.” 24#Met 10:6,23Amah in amsangei, “Israel innsuunga akmaang Sadam khoptua keita kamthlah ang.” 25#Met 8:2; 18:26; 20:20; Jon 9:38Chuta kumei in thlenga amthruunche ason, “Akpu, kamjoomro.” 26Che amah in amsang, “Naoei tolta louva uii ankuungah lon thranoh.” 27Che kumei in ason, “Oi Akpu, uiiluung inkho anmah akpu tebornata aktla akningta ansaak.” 28#Met 9:22,28; Mak 10:52; Luk 7:50; 17:19Chunna Jisu in kumei kuungah amsang, “Kumeio, nangin namlot i khalmoa liin! Nangin nikditkha nangkuungah tlung veiso.” Cheva kak hanga asa kumeita thrasa.

Jisu in Miitam Amthrat

29 # Mak 7:31–37 Che Jisu in mah khannata vanna Kalili tuiiboom akomma sehsa, che muul khat chungah kalla mahchunna inboksa. 30Chunna miitam kehtlik, mitcho, trongtheihnoh, mipuhnoh aktlei jikcha akehkungah thlenna amitlolh mahche Jisu in amthratei, 31chunna trongtheihnoh in trong suuksei, mipuhnoh in mipuhsei, kehtlik in sehsei, che mitcho in muh anphahchuta anmuh in Israel vaa Ringpu ta paar amithratpei.

Mii Akpul Manlita Amsaak

(Mak 8:1–10)

32 # Mak 8:1–10; Met 9:36; 14:13–21 Cheva Jisu in aroita amah kuungah onga asonei, “Keiin miitamta kirilvol hangsei, alamva anmah in ansaaktuphu jakhatkho amnoh a keisoh inruuia nithumkhek amsei, chunna anmahta lamma dem asaaknohna tuei anmahta traamma mathlah indah sangei.” 33Chunna aroiin akuungah anson, “Vachah miitam ita anvahnatu mah rapril in ramna tol iktuuk ume?” 34Jisu in ankuunga asonei, “Nannih tol jikcha nansih mangme?” Che anmah in anson, “Tol sirih leh nga andih ste am.” 35Che miitamta tukleia maboknatu jathang amlanei. 36Che amah in tol sirih leh ngata loua Ringpu ampaakche khoia aroita amlanei, che aroiin miitamta amilanpei. 37Che annaamte in invah a ansaakche, anmah in akirkaar amichun luktoong sirih sip a amilei. 38Mah aksaa eichu kumei maksi leh nao teenpinoh a mii akpul manlivak ei. 39Che Jisu in miitamta amthlah eiche muli inkhat a chuunga Makadan ramma sehsa.

Currently Selected:

METHIU 15: TARAOBSI

ማድመቅ

Copy