Yoohana 12
12
Maariya Yeesso miricchi luhlo kachibta
1Geeddi ibeen lihe ankhantahe ꞌdee daawti Baasakka sootateeh, Yeesso ilkerengeetti Beꞌdaaniya Laassaro yaal yimiy. Laassaro la, a eti goorat Yeesso omoot kasookahche. 2Yeesso intaas ka gololi gelebeet liikarche. Maarta la icho goollisse. Laassaro ꞌdooꞌdi Yeesso leegolossate a leejire. 3Maariya ꞌdeerka miricchihoo gato miigenye geeyoo naad layadeeh kalday lakahaaggiche geeddi kiilo nyuusichee khaatte, Yeesso luhlo kasubahte, toro tintiche ka luhlohiis hiyyaayte. Uyuuggi miricchihaas min tuumman leekahe.
4Iꞌdaasenyi etoo abatti Yeesseenye, Yuuda Iskaariyoot layadeehe, dowwanoha ka Yeesso ꞌdub soogoocho ꞌdiiꞌde wihi us yidah, 5“A iꞌdoh miricchiha liiororinne, ꞌdee chilimme miskiin liisiin? Chilimmeti eti guꞌhoo hil haaggiche laguto iche baha.” 6Jeenteti us miskiino uur ikasoonugleeste mee waha iyidah. Jeenteti us iꞌdaas iyidah, a jeenteti us ugarti chilimme ikhuccho, us chilimme ihato.
7Yeesso wihi us ilaabe, “ꞌDii! Iche miricchiha ibeenki ani liihawwaalo iche meel igelissee. 8Miskiin kol dakkhan goytiinna kakhabtaane, iꞌdaasenyi ani kol dakkhan ma ikhabtaan.”
ꞌDooꞌdi Yaꞌhuud Laassaro ogoos yowta
9Ururoo buurenye Yaꞌhuud Yeessohi ilkerengeetti Beꞌdaaniya kajiro daage, intaas yimiy. Icho la jeenteti icho Yeesso iargaan kalday menye, Laassarohi Yeésso omoot kasookahche laka argine yimaateen. 10Kuhaaniyyohi wewween ꞌdeerka jiti icho Laassaro laka kayagiisiin yowteen. 11Waha a jeenteti ꞌdooꞌdi Yaꞌhuude ittaawe jeente Laassaruu icho ikatabo, Yeesso irummeesti.
Urur Yeesso koolicha
(Mattaayo 21:1-11, Marko 11:1-11, Luuka 19:28-40)
12Ibeenki kaas sooraaho ka, ururi buurenye daawti Baasakka yimiy, saggi Yeesso ilkerengeetti weene Yeerusaleem iyamiit daage. 13Seytohi geeyi baar sookhaateene, baheene, Yeesso or kadoween. Chirra icho or kadowaan la a riiraane,
“Waakh a lakoolicho!”
“Waakh ki magahi Kamur kayamiit a imaale.”#12:13 Sabuur 118:25-26.
“Waakh Karnati Issiraayel a imaale!” iche essaan.
14Yeesso inkuraarruhoo ꞌhele kore, iꞌdi liichiiruu,
15“ꞌDooꞌdi ilkerengeetti Saayon yaal, wohoo rucchul laka akaroorina!
Yeya karnatiin kalla,
inkuraarru fuulaayi soosohtaa.”#12:15 Sakkariiya 9:9.
16Abattitiis laka kolooraat waha tuumman ma aban. Inkoo Yeesso goobi Waakh ka laweynaache on iche saggi yeedaas lachiire usu imiinsanyahe, toro wahaas laka usu iyeeleen kaseen.
17Ururi goorat maanti Yeesso Laassaro goꞌddi lakahawwaale goya kasoowahe omoot kasookahche leejire, wihi yitah tuumman cheeke. 18ꞌDooꞌdi buure jeenteti Yeesso waha miigti Waakh tuso iyeele us idaage, iche ibahe Yeesso iꞌhele. 19Farissaayo ꞌdeerka wihi iche isitidah, “Ma agartaan a, wihi inno yeelin leheet ma yeelloo! ꞌDooꞌd tuumman usu raaha!”
Yeesso omoottiis orey on cheeka
20ꞌDooꞌdi daawti Baasakka ka irte ilkerengeetti weene Yeerusaleem ka Waakh wahte, ꞌdooꞌdoo yaafohi Yaꞌhuud ieheynan laka goycho a kijire. 21ꞌDooꞌdaas la Fiilifhi ilkerengeetti Bessaayda boroofenhi Gaalilaaya kajirto kayimiy iirte, wihi icho iyidaaheen, “Eti ween, nahi Yeesso agarro ꞌdoonna.”
22Fiilif la irte Andereeya icheeke, lammache ba iratte Yeesso icheekte. 23Yeesso wihi us ilaabe, “Sahaꞌddi Ínam Aadam laweynaacho kola a titah. 24Rume atin icheeka, sammata ilinti ꞌdargaayye il ikadihine, iche koloo iumaatan, ilintoo on kafiddiita, gurnaan iche desso mele. Iꞌdaasenyi chiꞌiche wohoo yumuy titah, gurnaanki buurenye dessa. 25Eti jiroti awtiis ꞌdoono, jiroti rummaat a waaya. Eti harrata ka jirotiis ꞌdiiꞌdo la, jirotiis jiroti jirtuu imassan a ikaaya. 26Eti tuummane falfateey itaahan ꞌdoono, ani isooraaha. Meelbaaw an irdi ka ileejira. Aabbaheey la eti tuummane hileey haaggicho, usú a weynaacha.
27“Toolla rubeyteey a suujowte, mehe idaahe? ‘Aabbahaaw, sahaꞌdda sinayyoot ikarib,’ iche adeeh? Mele! An jeentetane sahaꞌdda isooeleele. 28Aabba, magahaah weynaay!”
Hooyoo ꞌdeerka serey ka sooyeede, mehe yidah ya, “Magaheey a weynaache, toro la a inokhda weynaacha.” 29Ururi intaas toolle hooyaas daage gaasoo, “A guuguh,” esse, gaasoo la, “Hertoo Waakhe leeyyeedda,” esse.
30Yeesso wihi us yidah, “Hooya jeenteteey ma isooyeedine, jeentetiinna isooyeede. 31Ibeenki Waakh ꞌdooꞌdi harrata hukkumo kola a yitah. Waakh toolla karnati harrata a riha. 32Iꞌdaasenyi ani maanti massalaaba ka serey liiokkhicho, weeli enenyet tuumman ankaaya keena.” 33Iꞌdane yidahye, omootti us sooyamuut enenyet tusa.
34Urur la wihi us iyidah, “Amurre Muusa ka, Ki Lasubhe jirtuu tuumman a inno leefiddiya iche daagne. Saggoh ꞌdeerka ‘Ínam Aadam serey a liiokkhicha’ itadeeh? ‘Ínam Aadamha,’ a ayyo?”
35Yeesso la wihi us icho iyidah, “Geeddoo rucchul on banay khabtaan. Banay goya kasohda giꞌde, geeddi banay jiraane mugꞌdi ikhaatin. Eti mugꞌdi kasohti, inti us isohti ma garti. 36Anihi banay atin ikeeno, geeddi an atin leejiro irummeesda, ꞌdee atin laka ꞌdooꞌdi banay goya kasohti ateeha.” Inkoo Yeesso waha yidah ka, ꞌdooꞌd katabe, irte dagte.
ꞌDooꞌdi Yaꞌhuud buurtiis Yeesso kakhuufin ꞌdiiꞌda
37Chirri Yeesso wahanyeyyoha miigti Waakh tuso tuumman geedda ꞌdooꞌd leejiro us yeele laka, ꞌdooꞌd usu ma rummeysan. 38Wahaas la a yitaaheene ꞌdee wihi eti Waákh íyeyyeedo Isaaya layadeeh ka lachiire labuuhicha,
“Kamur, ayyo wori nah cheekne rummeeste?
Ayyo miigti Waakh latuse?”#12:38 Isaaya 53:1.
39Jeenteti icho irummeysawwaayeen la, a jeenteti Isaaya intoo addan ka iꞌda iyidah,
40“Waakh icho indo a tire,
uurassicho la dagahnooche,
ꞌdeerka indohicho ka il ma argaane,
ommos uurassicho ka walah ma abtaan,
ommos ani ma isoonokhtaane ꞌdee ma samaacho.”#12:40 Isaaya 6:10.
41Isaaya jeenteti us waha iyidah, a jeenteti us weynaanti Kamur iarge, toro wori usu miinsan ikayeyyeede.
42Chirraas weynaanti Yaꞌhuud buurche laka usu a rummeysatte. Iꞌdaasenyi jeenteti iche Farissaayo ikaroortuu, saggi iche Yeesso ikakhuufte ma cheekin, minki weysiite Yaꞌhuude lakabahcho iche karoortaa. 43Iꞌdi tahe koolohi Waakh icho koolicho menye, koolohi weeli enenyet icho koolicho iche ꞌdoonaan.
Yeed Yeesso enenyet lakahukkuma
44Yeesso riire wihi us yidah, “Eti tuummane ani irummeesti, ani kalday ma irummeesti, iꞌdaasenyi ki ani isooerge laka a rummeesta. 45Eti tuummane ani iargo la, ki ani isooerge laka a arga. 46An iꞌdi banayhi harratane iimiyye, ꞌdee et ani irummeesti mugꞌdi goya fiddiyo mele.
47“Eti yeedeey daago iꞌdaasenyi iraahin an ma hukkumo. Iꞌdi tahe an hukkunnaanki an harra hukkumo ma iimaatan, iꞌdaasenyi ribnaanki ꞌdooꞌdi harra iimiy. 48Eti ani iꞌdiiꞌdo toro yeedeey ikhaatan, wihi hukkumo a jiraan. Yeedaas an idah rubeytiissa ibeenki yomboot etaas sina igoochá. 49A mehe an antoheey ma kaayyeedin. Iꞌdaasenyi Aabbaheeyki isooerge iche amur ibahche, wihi an adeeh ichoow saggi an iadeeh isiiche. 50Anna saggi amuriis jiroti jirtuu imassan ikeeno a garda. Toollaka wihi an eldi tuumman a wihi Aabbaheey dah iyidah on.”
Currently Selected:
Yoohana 12: rel
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2018, Wycliffe Bible Translators, Inc. All rights reserved.