Mattaayo 14
14
Yoohanahi Enenyet Baattissiyo layagiis
(Marko 6:14-29, Luuka 9:7-9)
1Saahka ꞌHeroodhi boroofenhi Gaalilaaya iween wihi Yeesso yeelo daage. 2Ulla wihi us ꞌdooꞌdiiski hil haaggicho iyidah, “Waha a Yoohanahi Enenyet Baattissiyo. Omoote kasookahe, jeentetaase miigti us wihi weeli enenyet yeelin iubaaꞌdan kahaaggicho ikhaba.”
3ꞌHeroode goorat Yoohana sookhabte, jeela ka hide. Waha la a jeente ꞌHeroodiyati makhaabál walaaliiski Fiilif layadeeh. 4A mehe Yoohana mehe ꞌHerood idowe ya, “Amurre ichoow khaatannaanki at iche khaatatti ma israahaan.” 5ꞌHerood Yoohana ogoos a ꞌdoone, iꞌdaasenyi ꞌdooꞌd karoore, jeenteti ꞌdooꞌd Yoohana eti Waákh íyeyyeedo iekkaachuu.
6Maanti seeri goorat ꞌHerood desse soomare ka, inám ꞌHeroodiya ꞌdooꞌd tuumman ortiis ka ꞌdurte, ꞌHerood weyti hamaadisse. 7ꞌHerood ꞌdeerka daato ka inám ꞌHeroodiya walahbaaw iche daahte siin iayyiche. 8Abarche la wihi iche tadeeh icheekte, “Yoohanahi Enenyet Baattissiyo matakkiis karam sookoriche inta ka isii,” itidah. 9Karnat uur suujowe, iꞌdaasenyi jeenteti wihi us idaatte ichoow jeenteti martitiis u, amur bahche ꞌdee wihi iche daahte a lasiicho. 10ꞌDeerka etoo iskareet ergate jeela ka Yoohana matah lasoogooche. 11Matakkiis karam lasookorche inám lasiiche, iche la abarche igeesse. 12Abatti Yoohana timiyye, sartiis khaatte hawwaasse. ꞌDeerka iratte Yeesso wihi yitah icheekte.
Yeesso mejeli elif chane gololicha
(Marko 6:30-44, Luuka 9:10-17, Yoohana 6:1-14)
13Inkoo Yeesso wihi yitah daage ka, koobanhoo gele, intaas katabe, intoo khaawwan irte. Chirri urur waha daage ka, ilkerengeeto kasoobahe, luhlo ka Yeesso raahe. 14Chirri beyti Gaalilaaya afiche ka Yeesso kooban kasooyage ka, urura buure arge, weyti uur inugleeste, toro ꞌdooꞌdichoki khakkhannan laka samaache.
15Chirri il gelebnowe ka, abattitiis itimiyye, “Il kola a ibeennowe, inta la a yibe, ururre laabe ꞌdee goobab a iratti gololoo a soogatteen,” itidah.
16Yeesso la wihi us ilaabe, “Walah icho kanokhtaan mele. Atin rubeytiin wohoo icho yamhiin siicha!”
17Wihi icho ilaabeen, “Wihi nah inta ka khabno a makaate chan ichoow bahag lamma kalday on.”
18Yeesso la wihi us iyidah, “Sookhaata ikeena.” 19Ulla urur amur ibahche hoos koorromiche. Makaateyyohi chane ichoow bahaggi lammee khaate, serey yeye, Waakh kalaꞌd ilaabe, makaateyyo jejjebche. ꞌDeerka abatti idiibe, abatti la enenyet siisse. 20Enenyet tuumman golossate, darge. Abatti la enjel tomon ichoow lamma gololi laajjebche lasoowaache buuhaan soosuunte. 21Mejeli golossate tiriis, deyyeho ichoow nyaakhut la liiekkaan, a geeddi alif chan.
Yeesso bicche sarcho kasohta
(Marko 6:45-52, Yoohana 6:15-21)
22Yeesso chirraas on abattitiis kooban gesse, ꞌdee ortiis bey aficheki ꞌdiri a iratti geeddi us urur kahcho. 23Inkoo us urur kahche ka, burroo sartiis ikore Waakh wahte. Intaas keley kajiraayi, il ibeennowe. 24Iꞌdaasenyi kooban bey goyaka geeddoo a sohteen, ire la kooban kolba ankoo iguꞌdubta. A mehe hafare icho jeychaa.
25Geedda baryo kasoodowwaatte ka, Yeesso bey sarche kasohte abattitiis iirte. 26Chirri abatti usuhi bey sartiis kasohti agarte ka, weyti nahte, “Wooy, waha a meleyka!” tidahye, jeenteti roorruu la, riirte.
27Iꞌdaasenyi Yeesso chirraas on, “Anahina, a ani roorro akhabina!” iyidah.
28Beetero la wihi us ilaabe, “Kamur, chirri rumanka ati tahe, amur ibihiche bicche sarcho a kasoosohdi, a kiimaate.”
29Yeesso la, “Kaale,” iyidah.
Beetero ꞌdeerka kooban goya kasooyage, bicche sarcho kasohte, Yeesso iirte. 30Iꞌdaasenyi chirri us hafari iir kahcho arge ka roorro gesse, bicche goya kadihe riire, “Kamur irib,” iyidah.
31Yeesso chirraas on dahan sooge khabte, wihi us iyidah, “Ati iꞌdaaru marah on ikakhuufta! A iꞌdoh ikamalassa?”
32Chirri icho kooban kidiheen ka, hafar tolossate. 33Abattiti kooban goya kijirte la jilbo il kaguꞌdubte, Yeesso wahatte, “Rumanka ati Weeli Waakhe,” tidah.
Yeesso ili Gennaasaret ka ꞌdooꞌdi khakkhannan samaacha
(Marko 6:53-56)
34Chirri icho beyti Gaalilaaya afichekuus imaaheen ka, intoo Gennaasaret layadeeh yimaateen. 35Chirri ꞌdooꞌdi ilaas Yeesso kase ka, farniin ilaas tuumman iergeene, ꞌdooꞌd ꞌdooꞌdichoki khakkhannan tuumman sookhaate, Yeesso ikeene. 36Hawwaasteene, ꞌdee ꞌdooꞌdi khakkhannan laddi kabuuꞌdiis kalday laka a ꞌdaaro. Eti tuummane ꞌdaare la samaate.
Currently Selected:
Mattaayo 14: rel
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2018, Wycliffe Bible Translators, Inc. All rights reserved.