Matíó 10
10
Yə́susu a nɔ́ bɔŋgəlimə tɛ́fáka
(Mə́l 3.16-19; Lúk 6.14-16)
1Yə́susu a ná niómo na báfandɛ́ nɛ́ báyɛ́á bɔkɔ́nɛna ɛ́lɛ́ákɛ́na, a ná bəə́bu iŋgínə́ índíə́ yɛ́ imbúínyi mɛbɛ́á ufə́miə, mɛɛ́mbɔ mikimə na bɛfɛ́kɛ́ bikimə uniŋəsiə.
2Ɔ́ məə́nyə má niómo na báfandɛ́ má bɔŋgəlimə máama: Wəbusíə́ á Símono ɔwá bá ndɔ ɛ́lɛnɛna bá sɛ́á: «Á Bíə́lə» na Andɛlɛ́ ɔ wayɛ́á munínyə́, Yákɔbɔ na munínyə́ á Yɔhánɛsɛ, baná bá Sɛbɛtɛ́; 3Fílibi na Batələmí; Tɔ́masɛ na Matíó á mɔsɛma bɛtásɛ; Yákɔbɔ á mɔná wa Alafə́ na Tatɛ́; 4Símono á muhikiə wa bɔnɔŋɔ bɔ́ Ísilahɛ́lɛ; Yútasɛ Isikalióto, wɛ́ɛ́yɛ́ ɔwá a ná Yə́susu fiɔtɔ.
Bɔndaka bɔ́ niómo na báfandɛ́
(Mə́l 6.7-13; Lúk 9.1-6)
5Yə́susu a ná niómo na báfandɛ́ nɛ́ báyɛ́á bɔkɔ́nɛna lɔ́má ɔ bɔsɔ́ma, a ná bəə́bu bɛɛ́bɛ bɛtambá lɛ́na a sɛ́á: «Nɔ lɛ ákáná ɔ bɛndɔ ɔbá bá lɛ báá Bɛyútɛnɛ: Nɔ lɛ fínə ɔ bətínə́ ɔ misí yɛ Samália, 6mba, nɔ́ ákáná ɔ miímə yɛ ɛndɔ́mbá yɛ́ baná bá Ísilahɛ́lɛ ɔyɛ́á yɛ́ ná niminə. 7Ɔ ɛnɔ́mɛ, nɔ́ húlə́ bɛndɔ lakɛ́ná nɔ sɛ́á: “Nɛmanɛna nɛ́ nɔɔ́mɛná nɛ́ lɛa hoóyi.” 8Nɔ́ húlə́ bɛnákɛnákɛ niŋəsəkiə, nɔ́ bəwə́nú húŋúə́kíə́, nɔ́ bə́mínú níŋə́sə́kíə́, nɔ́ imbúínyi mɛbɛ́á fə́mə́kíə́ ɔ bɛndɔ. Nɔ ná kusə́nə́ ndəmə, nɔ́ índíə́kínə́ ndəmə.»
9«Nɔ lɛ háá ata kóolo, ɛcácɔ́ mbá ata mɔnɛ́á ɔ uwənú mambalá; 10ikúílí nɔ ná ákáná ɔ mɔkɛnda, nɔ lɛ ɛtá ata ɔmbalá mbá ata mulúmbə, nɔ lɛ bɔlɛŋa bɔ́ níbísə́njiə ɛtá ata bɛtafɛ́ná. Ɔ taká, mɔnyɛna a ná hɔ́ánána ɔ bɔ́áyɛ́á bɔ́labɔ́nɛ́á ukusənə. 11Ikúíli ɔyɛ́á nɔ ŋɔ kafámá ɔ yɛ́mɔtɛ́ bətínə́ ata ɔ bɔ́mɔtɛ́ bɔnɔŋɔ, nɔ́ mɔndɔ siə́kə ɔwá a óso ɔ uwənú ɔkáha, nɔ́ wɛɛ́ya bɔ́ŋɔ́, nɔ́ túə́nə́ na wɛɛ́ya ɔkafámáká ɔ ikúílí ɔyɛ́á nɔ ŋɔ hɔalɛna. 12Ikúílí ɔyɛ́á nɔ ŋɔ fínə ɔ yɛ́mɔtɛ́ miímə, nɔ láá nɔ sɛ́á: “Bumbə́nú bɔ́ báá na bənú.” 13Ábá bɛndɔ bá yɛ́táyɛ́ miímə bá ná búə́núə́ bumbə́nú káhá, búə́núə́ bumbə́nú bɔ́ túə́nə́ na bəə́bu; mba, ábá bá ná kinə́ uwənú bumbə́nú ɔ ɔkáha, bɔ́ nda bənú híánɛ́na. 14Mba, ábá ɔ yɛ́mɔtɛ́ miímə ata ɔ yɛ́mɔtɛ́ bətínə́ bɛndɔ bá ná kinə́ ɔ uwənú ɔkáha, ata ɔwá, bá ná kinə́ ɔ uwənú ɔwɔ́kɔ, nɔ́ hɔalɛ́na umə́, nɔ́ umbunə́ wɔ́ mə́núə́ makɔlɔ́ kútə́kə. 15Ɔ taká, mɛ ndɔ bənú nɔ́yɛ́ lɛna ɔwá, ɔ buɔsɛ́ bɔ́ mikə́lə́kí, bɛndɔ bá yɛ́táyɛ́ bətínə́ bá ŋɔ məsə́kə kusənə mɔŋɛ́ŋa yáyɛ́ná məsə́kə ɔmá bɛndɔ bá bətínə́ yɛ Sótomo na Kɔmɔ́lɔ bá ná kúsə́nə.»
Yə́susu a ndɔ báyɛ́á bɔkɔ́nɛna mətəkəsənə mənyəsiə
(Mə́l 13.9-13; Lúk 12.11-12; 21.12-19)
16«Ə́yə́ə́! Mɛ ndɔ bənú lɔ́ma ɛ́sɛ́á banándɔ́mbá ɔ ətíə́ yɛ mɛkɔ. Nɔ́yɛ́, nɔ́ bá na maŋgɛ́lɛ́ ɛ́sɛ́á miáhɔ, ɛŋaná hɛkɔma ɛ́sɛ́á tubúbə́.»
17«Nɔ́ bɛndɔ bíkókósókíə́ mɔŋɛ́ŋa, bá ŋɔ bənú ákakana ɔ busíə́ bɔ́ bəkə́lə́siə, bá bənú súbə́kə́ ɔ uwəbú məə́bə má mabɛ́kálɛ́na. 18Bá ŋɔ bənú tíníməkiə ɔ mikə́lə́kí ɔ busíə́ bɔ́ bamanɛna na bənəni ɛlɔ́áyɛ́ ámɛ ɔkɛaka ɔwá, nɔ imbóŋi híə́nə́kíníə́ ɔ uwəbú busíə́ na ɔ busíə́ bɔ́ balɛmanyáhuɛlɛ́. 19Ikúílí ɔyɛ́á bá ŋɔ bənú ákánana ɔ busíə́ bɔ́ bəkə́lə́siə, nɔ lɛ sə́híníə́ ata bɔkɔa mbá ata nindínə́ ɔnɛ́á nɔ ŋɔ bɛ́kámɔsɔna, ata nindínə́ nɛ́ ɔbɛ́kɛna ɔnɛ́á nɔ ŋɔ bɛ́kɛakɛna. Yɛ́ báka ɔwá, Huɛlɛ́ a ŋɔ bənú bɛtambá índiə hɔ́ánánátɔ́ ɔ yɛ́táyɛ́ ikúílí. 20Ɔ taká, tátá bənú nɔ ŋɔ bɛ́táyɛ́ bɛtambá fə́mə́kiə, mba, Umbúínyi wɔ́ yənúə́ Isə́ wɔ́ ŋɔ bənú iŋgínə́ yɛ ɔhɔ́ɔ índiə. 21Munínyə́ a ŋɔ wayɛ́á munínyə́ sɛma ɔ nyɛmbɛ́, isə́ a ŋɔ mɔná kɛaka nɔ́yɛ́ hɔ́ánánátɔ, baná bá ŋɔ túə́búə́ tukúlə nuəkiə bá bəə́bu tɔ́mbákɛna ɔ mandaka, bá bəə́bu ɔnɔkɔ. 22Bɛndɔ bəkimə bá ŋɔ bənú bányáka ɛlɔ́áyɛ́ nɛ́ámɛ́á niínyə. Mba, bɔkɔa bɔ́mɔtɛ́, ata ɛ́yánɛ́ ɔwá a ŋɔ indəkəsə ísə́biniə ɔkafámáká ɔ nisúki, Huɛlɛ́ a ŋɔ wɛɛ́ya nuəkəniə. 23Ikúílí ɔyɛ́á bá ŋɔ bənú təkəsəkə ɔ yɛ́mɔtɛ́ bətínə́, nɔ́ tɛbákɛ́ná ɔ bətínə́ minə́minə́. Ɔ taká, mɛ ndɔ bənú lɛna ɔwá, ubusíə́ ɔbɔ́á nɔ hɔ́á ɔ bááyɛ́ bətínə́ bəkimə bá Ísilahɛ́lɛ ɔ ɔkɛnda, Mɔná wa mɔndɔ a ŋɔ báá a nɔ́ ndahiana.»
24«Mɔkɔ́nɛna ata ɔmɔtɛ́ a lɛ ndɔ wayɛ́á mukúniə yáyɛ́na; mɔnyɛna ata ɔmɔtɛ́ a lɛ ndɔ yayɛ́á isə́lúkú yɛ buolí yáyɛ́na. 25Mɔkɔ́nɛna a óso ɔbáá ɛ́sɛ́á wayɛ́á mukúniə; mɔnyɛna ɛ́sɛ́á yayɛ́á isə́lúkú yɛ́ buolí. Ábá bá ndɔ isə́lúkú yɛ ɔmbɛ́la ɛ́lɛnɛna Bɛlɛsɛbúlu, bikúílí bɛ́nɛ́á na bɛndɔ bá yayɛ́á miímə əə́?»
Ɔwanɛ́ nɔ ná hɔ́ánana ɔkɔ́lɔ́ma əə́?
(Mə́l 8.38; Lúk 9.26; 12.2-9)
26Nɔ lɛ bɛndɔ kɔlɔma; bɛkɔa bikimə ɔbɛ́á bɛ́ lɛ́á húə́kə́tɔ́ bɛ́ ŋɔ bífə́mə́ləniə ɔ mianyɔ́, ɔbɛ́á bɛ́ lɛ́á bítə́kə́tɔ́, bɛ́ ŋɔ bá manyánátɔ. 27Nɔ́yɛ́, yatɛ́ ɔyɛ́á mɛ ndɔ bənú lɛna ɔ ibínə́binə, nɔ́ laáka ɔ ɛnjaŋɛnjaŋɛ yɛ́ buɔsɛ́; nɔ́yɛ́, yatɛ́ ɔyɛ́á bá ŋɔ bənú bə́sə́liniə ɔ mulúə́, nɔ́ yɛɛ́ta hɔ́kɔ́ ɔ mianda ɔmbáŋá na nióni nɛŋɛ́ŋa. 28Nɔ lɛ bɛndɔ kɔ́lɔ́má ɔbá bá óso ɔ mɛɛ́lɔ ɔwɔ́nɔ, mba, bá lɛ bá na iŋgínə́ yɛ hɛtányɛ́ ɔwɔ́nɔ; nɔ́ kɔ́lɔ́máka ɔbánɔ́ a Huɛlɛ́ bíbúə́, ɔwayɛ́ ɔwá a óso ɔ mɛɛ́lɔ na hɛtányɛ́ ɔwɔ́nɔ bikimə bɛ́fandɛ́ ɔ hɛfɛa hɛ́ hiwə. 29Ɛbáka bá tɔbátáməhə́ŋə tɔ́fandɛ́ lúə́ ɛcácɔ́ ɛ́mɔtɛ́. Mbá nɔ́yɛ́, yənúə́ Isə́ á Huɛlɛ́ a lɛ ndɔ luminə ɔwá ata hímotí hɛ́ kɔ́á ɔ misí. 30Mba túə́núə́ tuhúínyi tɔ́ mɔlɔ́á tɔ́ lɛa fanákátɔ́ tukimə. 31Nɔ lɛ kɔlɔma! Nɔ báka na mukunə́ mɔŋɛ́ŋa yáyɛ́ná tɔbátáməhə́ŋə tukimə. 32Nɔ́yɛ́, mɔndɔ mukimə ɔwá a ndɔ laa ɔ busíə́ bɔ́ bɛndɔ ɔwá a báka wamɛ́á mɔkɔ́nɛna, mɛaŋɔ́á tɔ́na mɛ ŋɔ laa ɔ busíə́ bɔ́ yamɛ́á Isə́ yɛ nɔɔ́mɛná ɔwá, mɔ́táyɛ́ mɔndɔ a lɛa waamɛ.
33Mba, mɔndɔ mukimə ɔwá a ŋɔ mɛaŋɔ́á bɛ́sáŋɔna ɔ busíə́ bɔ́ bɛndɔ, mɛaŋɔ́á tɔ́na mɛ ŋɔ wɛɛ́ya bɛ́sáŋɔna ɔ busíə́ bɔ́ yamɛ́á Isə́ yɛ nɔɔ́mɛná.
Hɛkɔma hɛ́ muitəniə wɔ́ bɛndɔ
(Lúk 12.51-53; 14.26-27)
34Nɔ lɛ fɛká ɔwá mɛ ná ndasá ɔ misí ɔkɛaka ɔwá bɛndɔ bá ɔ́kɔ́kɛ́nána. Bóo! Mɛ sa ndasá ɔkɛaka ɔwá bá ɔ́kɔ́kɛ́nána, mba, mɛ ka ndásá ɔkɛaka ɔwá bá itə́kə́níə́. 35Mɛ ka ndásɛ́na ɛlɔ́áyɛ́ mɔná ɔ mɛlɛ́mɛndɔ́ na isə́ uwəlúnəniə, mɔná ɔ muəndú na inyə́, na muənyə́mɔná na inyə́kínə́. 36Bəbəniə bá mɔndɔ bá ŋɔ bámɛnɛna bɛndɔ bá híə́yíə́ hikúlə hɛ́ bɛ́múɛ́tɛ́.
37Ábá mɔndɔ a lɛ ndɔ mɛaŋɔ́á hikiə ɔ ɔyáyɛ́na yayɛ́á isə́ ata inyə́, a lɛ bá wɔ́ɔwɔ ɔwá a ná hɔ́ánána ɔbáá waamɛ. Mɔndɔ ɔwá a ŋɔ wayɛ́á mɔná ɔ mɛlɛ́mɛndɔ́ ata wayɛ́á mɔná ɔ muəndú hikə́kiə yáyɛ́ná mɛaŋɔ́á, a sa ndá bámɛ́nɛ́ná hɔ́ánánátɔ́ ɔ ɔbáá waamɛ. 38Ata ɛ́yánɛ́ ɔwá a sɔ́ ŋɔ wə́yíə́ ɔmbásá túána ɔkɛaka ɔwá a mɛaŋɔ́á ɔ́ŋgɔ́kɔ, a lɛ bá wɔ́ɔwɔ ɔwá a ná hɔ́ánána ɔbáá waamɛ.
39Wɛ́ɛ́yɛ́ ɔwá a ndɔ siə ɔwayɛ́ buɔmɔ́ ukókósiə, a ŋɔ bɔɛ́ta nímə́siə; mba, wɛ́ɛ́yɛ́ ɔwá a ŋɔ bɔ́áyɛ́á buɔmɔ́ nímə́siə ɛlɔ́áyɛ́ ámɛ, a ŋɔ manyɔ bɔ́ɛ́ta bɔ́ŋɔ.
Wɛ́ɛ́yɛ́ ɔwá a ná bənú káhá, ɔ ɔwámɛ a ná kaha
(Mə́l 9.37-41; Lúk 9.48; Yɔh 13.20)
40Ata ɛ́yánɛ́ ɔwá a ná bənú káhá, ɔ ɔwámɛ a ná káha; wɛ́ɛ́yɛ́ ɔwá a na mɛaŋɔ́á káhá, a ná wɛ́ɛ́yɛ́ káhá ɔwá a ná mɛaŋɔ́á lɔma. 41Ata ɛ́yánɛ́ mɔndɔ ɔwá a ná mɔhɛ́nátɔtányɛ́ wa Huɛlɛ́ káhá bɔkɔasɛ́á a lɛa mɔhɛ́nátɔtányɛ́, a ŋɔ nɛhánɛna nɛ́ mɔhɛ́nátɔtányɛ́ kusənə; nɔ́yɛ́, ata ɛ́yánɛ́ ɔwá a ŋɔ mɔndɔ wataká káha bɔkɔasɛ́á, a lɛa wataká ɔ busíə́ bɔ́ Huɛlɛ́, a ŋɔ nɛhánɛna kusənə nɛ́ hɔ́ánánátɔ́ nɛ́ mɔndɔ wa tɛ́nɛ́mátɔ. 42Ɔ taká, mɛ ndɔ bənú lɛna ɔwá, Wɛ́ɛ́yɛ́ ɔwá a ŋɔ mɔkɔ́nɛna nyə́siə ata ɛnyɛ́ná ɛ́mɔtɛ́ yɛ́ mənífə́ má tánánákátɔ́ bɔkɔasɛ́á a báká wamɛ́á mɔkɔ́nɛna, wə́yíə́ mɔsábɔ́náná wɔ́ sa ndányɔa.
Currently Selected:
Matíó 10: tvu
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2019, CABTAL
Matíó 10
10
Yə́susu a nɔ́ bɔŋgəlimə tɛ́fáka
(Mə́l 3.16-19; Lúk 6.14-16)
1Yə́susu a ná niómo na báfandɛ́ nɛ́ báyɛ́á bɔkɔ́nɛna ɛ́lɛ́ákɛ́na, a ná bəə́bu iŋgínə́ índíə́ yɛ́ imbúínyi mɛbɛ́á ufə́miə, mɛɛ́mbɔ mikimə na bɛfɛ́kɛ́ bikimə uniŋəsiə.
2Ɔ́ məə́nyə má niómo na báfandɛ́ má bɔŋgəlimə máama: Wəbusíə́ á Símono ɔwá bá ndɔ ɛ́lɛnɛna bá sɛ́á: «Á Bíə́lə» na Andɛlɛ́ ɔ wayɛ́á munínyə́, Yákɔbɔ na munínyə́ á Yɔhánɛsɛ, baná bá Sɛbɛtɛ́; 3Fílibi na Batələmí; Tɔ́masɛ na Matíó á mɔsɛma bɛtásɛ; Yákɔbɔ á mɔná wa Alafə́ na Tatɛ́; 4Símono á muhikiə wa bɔnɔŋɔ bɔ́ Ísilahɛ́lɛ; Yútasɛ Isikalióto, wɛ́ɛ́yɛ́ ɔwá a ná Yə́susu fiɔtɔ.
Bɔndaka bɔ́ niómo na báfandɛ́
(Mə́l 6.7-13; Lúk 9.1-6)
5Yə́susu a ná niómo na báfandɛ́ nɛ́ báyɛ́á bɔkɔ́nɛna lɔ́má ɔ bɔsɔ́ma, a ná bəə́bu bɛɛ́bɛ bɛtambá lɛ́na a sɛ́á: «Nɔ lɛ ákáná ɔ bɛndɔ ɔbá bá lɛ báá Bɛyútɛnɛ: Nɔ lɛ fínə ɔ bətínə́ ɔ misí yɛ Samália, 6mba, nɔ́ ákáná ɔ miímə yɛ ɛndɔ́mbá yɛ́ baná bá Ísilahɛ́lɛ ɔyɛ́á yɛ́ ná niminə. 7Ɔ ɛnɔ́mɛ, nɔ́ húlə́ bɛndɔ lakɛ́ná nɔ sɛ́á: “Nɛmanɛna nɛ́ nɔɔ́mɛná nɛ́ lɛa hoóyi.” 8Nɔ́ húlə́ bɛnákɛnákɛ niŋəsəkiə, nɔ́ bəwə́nú húŋúə́kíə́, nɔ́ bə́mínú níŋə́sə́kíə́, nɔ́ imbúínyi mɛbɛ́á fə́mə́kíə́ ɔ bɛndɔ. Nɔ ná kusə́nə́ ndəmə, nɔ́ índíə́kínə́ ndəmə.»
9«Nɔ lɛ háá ata kóolo, ɛcácɔ́ mbá ata mɔnɛ́á ɔ uwənú mambalá; 10ikúílí nɔ ná ákáná ɔ mɔkɛnda, nɔ lɛ ɛtá ata ɔmbalá mbá ata mulúmbə, nɔ lɛ bɔlɛŋa bɔ́ níbísə́njiə ɛtá ata bɛtafɛ́ná. Ɔ taká, mɔnyɛna a ná hɔ́ánána ɔ bɔ́áyɛ́á bɔ́labɔ́nɛ́á ukusənə. 11Ikúíli ɔyɛ́á nɔ ŋɔ kafámá ɔ yɛ́mɔtɛ́ bətínə́ ata ɔ bɔ́mɔtɛ́ bɔnɔŋɔ, nɔ́ mɔndɔ siə́kə ɔwá a óso ɔ uwənú ɔkáha, nɔ́ wɛɛ́ya bɔ́ŋɔ́, nɔ́ túə́nə́ na wɛɛ́ya ɔkafámáká ɔ ikúílí ɔyɛ́á nɔ ŋɔ hɔalɛna. 12Ikúílí ɔyɛ́á nɔ ŋɔ fínə ɔ yɛ́mɔtɛ́ miímə, nɔ láá nɔ sɛ́á: “Bumbə́nú bɔ́ báá na bənú.” 13Ábá bɛndɔ bá yɛ́táyɛ́ miímə bá ná búə́núə́ bumbə́nú káhá, búə́núə́ bumbə́nú bɔ́ túə́nə́ na bəə́bu; mba, ábá bá ná kinə́ uwənú bumbə́nú ɔ ɔkáha, bɔ́ nda bənú híánɛ́na. 14Mba, ábá ɔ yɛ́mɔtɛ́ miímə ata ɔ yɛ́mɔtɛ́ bətínə́ bɛndɔ bá ná kinə́ ɔ uwənú ɔkáha, ata ɔwá, bá ná kinə́ ɔ uwənú ɔwɔ́kɔ, nɔ́ hɔalɛ́na umə́, nɔ́ umbunə́ wɔ́ mə́núə́ makɔlɔ́ kútə́kə. 15Ɔ taká, mɛ ndɔ bənú nɔ́yɛ́ lɛna ɔwá, ɔ buɔsɛ́ bɔ́ mikə́lə́kí, bɛndɔ bá yɛ́táyɛ́ bətínə́ bá ŋɔ məsə́kə kusənə mɔŋɛ́ŋa yáyɛ́ná məsə́kə ɔmá bɛndɔ bá bətínə́ yɛ Sótomo na Kɔmɔ́lɔ bá ná kúsə́nə.»
Yə́susu a ndɔ báyɛ́á bɔkɔ́nɛna mətəkəsənə mənyəsiə
(Mə́l 13.9-13; Lúk 12.11-12; 21.12-19)
16«Ə́yə́ə́! Mɛ ndɔ bənú lɔ́ma ɛ́sɛ́á banándɔ́mbá ɔ ətíə́ yɛ mɛkɔ. Nɔ́yɛ́, nɔ́ bá na maŋgɛ́lɛ́ ɛ́sɛ́á miáhɔ, ɛŋaná hɛkɔma ɛ́sɛ́á tubúbə́.»
17«Nɔ́ bɛndɔ bíkókósókíə́ mɔŋɛ́ŋa, bá ŋɔ bənú ákakana ɔ busíə́ bɔ́ bəkə́lə́siə, bá bənú súbə́kə́ ɔ uwəbú məə́bə má mabɛ́kálɛ́na. 18Bá ŋɔ bənú tíníməkiə ɔ mikə́lə́kí ɔ busíə́ bɔ́ bamanɛna na bənəni ɛlɔ́áyɛ́ ámɛ ɔkɛaka ɔwá, nɔ imbóŋi híə́nə́kíníə́ ɔ uwəbú busíə́ na ɔ busíə́ bɔ́ balɛmanyáhuɛlɛ́. 19Ikúílí ɔyɛ́á bá ŋɔ bənú ákánana ɔ busíə́ bɔ́ bəkə́lə́siə, nɔ lɛ sə́híníə́ ata bɔkɔa mbá ata nindínə́ ɔnɛ́á nɔ ŋɔ bɛ́kámɔsɔna, ata nindínə́ nɛ́ ɔbɛ́kɛna ɔnɛ́á nɔ ŋɔ bɛ́kɛakɛna. Yɛ́ báka ɔwá, Huɛlɛ́ a ŋɔ bənú bɛtambá índiə hɔ́ánánátɔ́ ɔ yɛ́táyɛ́ ikúílí. 20Ɔ taká, tátá bənú nɔ ŋɔ bɛ́táyɛ́ bɛtambá fə́mə́kiə, mba, Umbúínyi wɔ́ yənúə́ Isə́ wɔ́ ŋɔ bənú iŋgínə́ yɛ ɔhɔ́ɔ índiə. 21Munínyə́ a ŋɔ wayɛ́á munínyə́ sɛma ɔ nyɛmbɛ́, isə́ a ŋɔ mɔná kɛaka nɔ́yɛ́ hɔ́ánánátɔ, baná bá ŋɔ túə́búə́ tukúlə nuəkiə bá bəə́bu tɔ́mbákɛna ɔ mandaka, bá bəə́bu ɔnɔkɔ. 22Bɛndɔ bəkimə bá ŋɔ bənú bányáka ɛlɔ́áyɛ́ nɛ́ámɛ́á niínyə. Mba, bɔkɔa bɔ́mɔtɛ́, ata ɛ́yánɛ́ ɔwá a ŋɔ indəkəsə ísə́biniə ɔkafámáká ɔ nisúki, Huɛlɛ́ a ŋɔ wɛɛ́ya nuəkəniə. 23Ikúílí ɔyɛ́á bá ŋɔ bənú təkəsəkə ɔ yɛ́mɔtɛ́ bətínə́, nɔ́ tɛbákɛ́ná ɔ bətínə́ minə́minə́. Ɔ taká, mɛ ndɔ bənú lɛna ɔwá, ubusíə́ ɔbɔ́á nɔ hɔ́á ɔ bááyɛ́ bətínə́ bəkimə bá Ísilahɛ́lɛ ɔ ɔkɛnda, Mɔná wa mɔndɔ a ŋɔ báá a nɔ́ ndahiana.»
24«Mɔkɔ́nɛna ata ɔmɔtɛ́ a lɛ ndɔ wayɛ́á mukúniə yáyɛ́na; mɔnyɛna ata ɔmɔtɛ́ a lɛ ndɔ yayɛ́á isə́lúkú yɛ buolí yáyɛ́na. 25Mɔkɔ́nɛna a óso ɔbáá ɛ́sɛ́á wayɛ́á mukúniə; mɔnyɛna ɛ́sɛ́á yayɛ́á isə́lúkú yɛ́ buolí. Ábá bá ndɔ isə́lúkú yɛ ɔmbɛ́la ɛ́lɛnɛna Bɛlɛsɛbúlu, bikúílí bɛ́nɛ́á na bɛndɔ bá yayɛ́á miímə əə́?»
Ɔwanɛ́ nɔ ná hɔ́ánana ɔkɔ́lɔ́ma əə́?
(Mə́l 8.38; Lúk 9.26; 12.2-9)
26Nɔ lɛ bɛndɔ kɔlɔma; bɛkɔa bikimə ɔbɛ́á bɛ́ lɛ́á húə́kə́tɔ́ bɛ́ ŋɔ bífə́mə́ləniə ɔ mianyɔ́, ɔbɛ́á bɛ́ lɛ́á bítə́kə́tɔ́, bɛ́ ŋɔ bá manyánátɔ. 27Nɔ́yɛ́, yatɛ́ ɔyɛ́á mɛ ndɔ bənú lɛna ɔ ibínə́binə, nɔ́ laáka ɔ ɛnjaŋɛnjaŋɛ yɛ́ buɔsɛ́; nɔ́yɛ́, yatɛ́ ɔyɛ́á bá ŋɔ bənú bə́sə́liniə ɔ mulúə́, nɔ́ yɛɛ́ta hɔ́kɔ́ ɔ mianda ɔmbáŋá na nióni nɛŋɛ́ŋa. 28Nɔ lɛ bɛndɔ kɔ́lɔ́má ɔbá bá óso ɔ mɛɛ́lɔ ɔwɔ́nɔ, mba, bá lɛ bá na iŋgínə́ yɛ hɛtányɛ́ ɔwɔ́nɔ; nɔ́ kɔ́lɔ́máka ɔbánɔ́ a Huɛlɛ́ bíbúə́, ɔwayɛ́ ɔwá a óso ɔ mɛɛ́lɔ na hɛtányɛ́ ɔwɔ́nɔ bikimə bɛ́fandɛ́ ɔ hɛfɛa hɛ́ hiwə. 29Ɛbáka bá tɔbátáməhə́ŋə tɔ́fandɛ́ lúə́ ɛcácɔ́ ɛ́mɔtɛ́. Mbá nɔ́yɛ́, yənúə́ Isə́ á Huɛlɛ́ a lɛ ndɔ luminə ɔwá ata hímotí hɛ́ kɔ́á ɔ misí. 30Mba túə́núə́ tuhúínyi tɔ́ mɔlɔ́á tɔ́ lɛa fanákátɔ́ tukimə. 31Nɔ lɛ kɔlɔma! Nɔ báka na mukunə́ mɔŋɛ́ŋa yáyɛ́ná tɔbátáməhə́ŋə tukimə. 32Nɔ́yɛ́, mɔndɔ mukimə ɔwá a ndɔ laa ɔ busíə́ bɔ́ bɛndɔ ɔwá a báka wamɛ́á mɔkɔ́nɛna, mɛaŋɔ́á tɔ́na mɛ ŋɔ laa ɔ busíə́ bɔ́ yamɛ́á Isə́ yɛ nɔɔ́mɛná ɔwá, mɔ́táyɛ́ mɔndɔ a lɛa waamɛ.
33Mba, mɔndɔ mukimə ɔwá a ŋɔ mɛaŋɔ́á bɛ́sáŋɔna ɔ busíə́ bɔ́ bɛndɔ, mɛaŋɔ́á tɔ́na mɛ ŋɔ wɛɛ́ya bɛ́sáŋɔna ɔ busíə́ bɔ́ yamɛ́á Isə́ yɛ nɔɔ́mɛná.
Hɛkɔma hɛ́ muitəniə wɔ́ bɛndɔ
(Lúk 12.51-53; 14.26-27)
34Nɔ lɛ fɛká ɔwá mɛ ná ndasá ɔ misí ɔkɛaka ɔwá bɛndɔ bá ɔ́kɔ́kɛ́nána. Bóo! Mɛ sa ndasá ɔkɛaka ɔwá bá ɔ́kɔ́kɛ́nána, mba, mɛ ka ndásá ɔkɛaka ɔwá bá itə́kə́níə́. 35Mɛ ka ndásɛ́na ɛlɔ́áyɛ́ mɔná ɔ mɛlɛ́mɛndɔ́ na isə́ uwəlúnəniə, mɔná ɔ muəndú na inyə́, na muənyə́mɔná na inyə́kínə́. 36Bəbəniə bá mɔndɔ bá ŋɔ bámɛnɛna bɛndɔ bá híə́yíə́ hikúlə hɛ́ bɛ́múɛ́tɛ́.
37Ábá mɔndɔ a lɛ ndɔ mɛaŋɔ́á hikiə ɔ ɔyáyɛ́na yayɛ́á isə́ ata inyə́, a lɛ bá wɔ́ɔwɔ ɔwá a ná hɔ́ánána ɔbáá waamɛ. Mɔndɔ ɔwá a ŋɔ wayɛ́á mɔná ɔ mɛlɛ́mɛndɔ́ ata wayɛ́á mɔná ɔ muəndú hikə́kiə yáyɛ́ná mɛaŋɔ́á, a sa ndá bámɛ́nɛ́ná hɔ́ánánátɔ́ ɔ ɔbáá waamɛ. 38Ata ɛ́yánɛ́ ɔwá a sɔ́ ŋɔ wə́yíə́ ɔmbásá túána ɔkɛaka ɔwá a mɛaŋɔ́á ɔ́ŋgɔ́kɔ, a lɛ bá wɔ́ɔwɔ ɔwá a ná hɔ́ánána ɔbáá waamɛ.
39Wɛ́ɛ́yɛ́ ɔwá a ndɔ siə ɔwayɛ́ buɔmɔ́ ukókósiə, a ŋɔ bɔɛ́ta nímə́siə; mba, wɛ́ɛ́yɛ́ ɔwá a ŋɔ bɔ́áyɛ́á buɔmɔ́ nímə́siə ɛlɔ́áyɛ́ ámɛ, a ŋɔ manyɔ bɔ́ɛ́ta bɔ́ŋɔ.
Wɛ́ɛ́yɛ́ ɔwá a ná bənú káhá, ɔ ɔwámɛ a ná kaha
(Mə́l 9.37-41; Lúk 9.48; Yɔh 13.20)
40Ata ɛ́yánɛ́ ɔwá a ná bənú káhá, ɔ ɔwámɛ a ná káha; wɛ́ɛ́yɛ́ ɔwá a na mɛaŋɔ́á káhá, a ná wɛ́ɛ́yɛ́ káhá ɔwá a ná mɛaŋɔ́á lɔma. 41Ata ɛ́yánɛ́ mɔndɔ ɔwá a ná mɔhɛ́nátɔtányɛ́ wa Huɛlɛ́ káhá bɔkɔasɛ́á a lɛa mɔhɛ́nátɔtányɛ́, a ŋɔ nɛhánɛna nɛ́ mɔhɛ́nátɔtányɛ́ kusənə; nɔ́yɛ́, ata ɛ́yánɛ́ ɔwá a ŋɔ mɔndɔ wataká káha bɔkɔasɛ́á, a lɛa wataká ɔ busíə́ bɔ́ Huɛlɛ́, a ŋɔ nɛhánɛna kusənə nɛ́ hɔ́ánánátɔ́ nɛ́ mɔndɔ wa tɛ́nɛ́mátɔ. 42Ɔ taká, mɛ ndɔ bənú lɛna ɔwá, Wɛ́ɛ́yɛ́ ɔwá a ŋɔ mɔkɔ́nɛna nyə́siə ata ɛnyɛ́ná ɛ́mɔtɛ́ yɛ́ mənífə́ má tánánákátɔ́ bɔkɔasɛ́á a báká wamɛ́á mɔkɔ́nɛna, wə́yíə́ mɔsábɔ́náná wɔ́ sa ndányɔa.
© 2019, CABTAL