Mateu 24
24
Aintaumburi kuri kua templu
1Asui Jesus usu templu sui usu arama aintasui, asui umbuewaita uri ipiri aintaumukame umaa panye kuaita uka turusuwaita templu rupiara.
2Maa Jesus umbeu ainta supe:
—Maitaa pemaa puranga panye kua ukaita? Supiwa hambeu penye arama tikuri yepe ita uiku sendawa upe tiwa aintaumburi.
Aintauyupiru aintaupurara
3Asui Jesus uwapika irumu iwitera rese sera Ulivera aintauri kuaita umbuewaita aintapawantu aintaupurandu ae aintaunyee ixupe:
—Rembeu yande arama mairametaa kuri usasawa kua rembeuwaa? Maataa kuri rexari yamaa nerangawa reyuiri arama yuiri sangawa yuiri kua anyu aramawaa ara?
4Asui Jesus usuaxara ainta:
—Pemaa pesui yawaite amu uganani penye.
5Aintauri kuri siya serera resete yepe, aintaumbeu kuri, Kristute ixe. Ape aintauganani kuri siya miraita.
6Pesendu kuri aintaupurungita kera rese pesendu yuiri aintaumanduari kera, pemaa pesui yawaite maa pesikie nyãse yawe aintaurikute aintaumunya kua mundu upe maa timaare anyu aramawaa ae.
7Asui aintaupuamu kuri aintaruaxara aintauyumuruanyana amu miraita ruaxara, yepe guvernu kuri umuruanyana amu guvernu, aintarimbiu upawa kuri, uriri kuri iwi yepeyepe tetama upe.
8Yawe kuri aintauyupiru aintaupurara.
9Asui aintauxari kuri pepurara, aintauyuká kuri penye, puxi kuri aintaumaa penye serera resewara kuaita mundu puraita panye.
10Asuiwana aintauwari kuri siya, ape kuri aintaumbeu aintarumuaraita resewara, puxi kuri aintauyumaa.
11Aintaupuamu kuri siya utitikawaita ugananiwaita aintauganani kuri siya.
12Aintaumunya kuri aintapuxuwerasawa turusu piri, ape kuri aintakuere aintauyugustari kuaita siyawaita miraita.
13Maa kua santawaa uiku ate anyu aramawaa upe uyumukaturu kuri.
14Aintaurikute aintaumbue kua nyenga purangawaa maye aintaruixawa arama kua Deus panye mundu kiti aintaukuawa arama kuaita miraita panye. Asuiwana kuri upawa kua ara.
Aintaupurara kuri turusu
15Pemaa irumu kuri kua umuaiwawaa puxuwerawa uwapika kuri Deus ruka upe kuaye Daniel utitikawaa yawe, pexari aintaukuawa kuaita uleriwaita.
16Pexari aintauyawawa isui iwitera rese kuaita Judeya upewaita.
17Asui kua uikuwaa uka ipewaa rese tepexari uwiye uwike suka upe urasu arama imaa.
18Kua yuiri uikuwaa kupixawa upe tepexari uyuiri uyuka ikapa.
19Puxuwera kuri usika aintarese kuaita ipuruãwaita kuaita yuiri uxariwaitare aintamembira uu aintakambi nyã ara upe.
20Pepurandu Deus irumu tiarama peyawawaa paranawasu rame tiyuiri sauru rame.
21Nyãse nyã ara upe aintaupurara kuri turusu, mundu uyupirungawa upe tikuera aintaupurara iyawe ate kuiri, asui tiana kuri aintaupurara arirewara iyawe.
22Tirame maa Deus umuatuka kua ara timaa awa uyumukaturu, maa umuatuka kua ara aintaresewara kuaita uparawakawaita.
23Asui amu umbeu rame penye arama:
—Aete Kristu kua u Kristute nyã, teperuyari inyenga.
24Nyãse aintauri kuri siya ugananiwaita umbeuwaita Kristute ainta, siya yuiri utitikawaita ugananiwaita aintaumunya kuri siya milagri siya yuiri purangawaita tirewaita yamaa sã aintaupuderi rame aintauganani kuaita uparawakawaita.
25Hambeuwana penye yawewaa runde.
26Ape aintaumbeu rame kuri:
—Aete Kristu nyã uikuwaa kampu upe tekuri pesu akiti. Aintaumbeu rame:
—Uiku ukapi upe teperuyari aintanyenga.
27Kuaye truvão werawaa yawe umuturi kurasi usemuwaa asui ate kurasi uwikewaa akiti yawete kuri uri rame kua unaseriwaa umaa kua ara.
28Urubuita aintauyumuatiri umanuwaita inemawaita rese.
Uri kuri mukuĩsawa
29Asuiwana kuri aintaupurara rire anyunte kuri pitunawasu kua kurasi asui tikuri umuturi kua yasi, asui aintauwari iwaka sui kuaita estrela, asui aintaukataka kuri kuaita kirimbawawaita kuaita uikuwaita iwaka rese.
30Asuiwana aintaumaa iwaka upe sangawa kua unaseriwaa umaa kua ara asui sasiyara kuri ainta, asui aintaumaa kua unaseriwaa umaa kua ara uri kuri nuvẽ irumu iwaka suiwara, ikirimbawasawa irumu igluria irumu yuiri.
31Asuiwana kuri umundu kuaita anjuita aintaupeyu trumbeta kirimbawa aintaumuatiri arama uparawakawaita panye mundu kiti panye mundu arukanga rupiwaita.
Yarikute yasaru puranga
32Peyumbue sese kua figera pemaa irumu kuri usemu pisasusawa pekuawa kuri kuayentuana kurasi ara.
33Yawete penye, pemaa irumu kuri uri kua hambeuwaa pekuawa kuri kuayentuana ae.
34Supiwa hambeu penye arama:
—Tikuri aintaupawa kuaita miraita kuiriwaraita senundere kua hambeuwaa.
35Aintaupawa kuri panye iwaka panye ara yuiri maa senyenga tikuri upawa.
36Maa tiawa ukuawa mairame sangawa nẽ anjuita iwaka upewaita nẽ Deus raira, maa anyunte sepaya ukuawa.
37Kuaye Nue tempu rame yawete yuiri kuri uri rame kuri kua unaseriwaa umaa kua ara.
38Kuxima senundere parana uwike aintarese anyunte aintaumanduari aintaumbau arama aintauu arama yuiri, aintauyuka aintarimiriku aintauxari aintarayeraita umendari ate Nue uwike batelão upe.
39Timaa aintaumanduari sese ate parana uwike aintarese urasu ainta panye, yawete yuiri kuri uri rame kua unaseriwaa umaa kua ara.
40Mukuĩ kuri upuraki kupixawa upe uyuka kuri yepe uxari kuri yepe.
41Mukuĩ kunya ukitika maniaka uyuka kuri yepe uxari kuri yepe.
42Ape pesaru puranga nyãse tipekuawa mairame uri kua peruixawa.
43Kuiri pesendu kua hambeuwaa sese kua uka iyara ukuawa rame maa sangawa kua mundawasu usaru maa ae tiarama uwike suka kiti.
44Yawete penye pesaru kua unaseriwaa umaa kua ara yawewarawate nyãse uri kuri yepe ara tiwa upe pemanduari.
Upurakiwaa purangawaa puxuwerawa yuiri
45Awataa kua upurakiwaa purangawaa ukuawawaa yawe, suixawa uxari usaru suka puraita uxari arama aintaumbau usika rame sangawa?
46Ape suuri kuri ae suixawa usika rame umaa umunya kuaye umbeuwaa yawe.
47Supiwa hambeu penye:
—Suixawa uxari kuri usaru panye kuaita iyaraita.
48Maa puxuwerawa rame kua upurakiwaa uyupurungita aepawa:
—Seruixawa uikure uikupuku sesui.
49Ape unupa sumuaraita umbau uu yuiri ukauwaita irumu.
50Uri kuri kua suixawa kua upurakiwaa yepe ara upe tiirumu usaru ae, uri kuri yepe ura tiwa upe umanduari ae.
51Asuiwana kuri suixawa uxari upurara umburi kuri ae isui aintairumu kuaita retentuwaita aintauyaxiu akiti aintausuu kuri aintaranya.
Currently Selected:
Mateu 24: BBp
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO