Mateu 26
26
Aintauputari aintauyuká Jesus
1Asui umbue rire ainta kua Jesus umbeuwaa ainta supe kuaita umbuewaita:
2—Pekuawate mukuĩ ara rire aintaumunya kuri kua festa paskua, ape aintauxari kuri suanyanaita supe kua unaseriwaa umaa kua ara aintaunupa arama kuri uyari kurusa rese.
3Asui kuaita saserdutita aintaruixawaita, umpinimawaita yuiri tuyuweita yuiri aintauyumuatiri suka upe kua saserdutita ruixawa sera Kaifa.
4Asui aintauyupurungita aintapawa aintaumprezu arama ae aintaugananisawa irumu aintauyuká arama ae.
5Maa aintauyumbeu aintapawa:
—Tiyapuderi yapisika ae festa ara upe yawaite aintaumaramunya kuaita miraita.
Uyusena sakuenawaa sese
6Asui Jesus uikure Betania upe suka upe kua Simão leprusu.
7Uri ipiri yepe kunya, ururi kua siru aintaumunyawaa alabastru suiwara teresemu ipupe sakuenawaa. Asui uyusena ae Jesus akanga rese uwapikawaa upe meza ruaki.
8Asui puxi aintaumaa ixupe kuaita umbuewaita aintaunyee:
—Marantaa uyusenapawa kua sipiwasuwaa?
9Maa yapuderi maa yavenderi kua sakuenawaa yayuka arama dinyeru turusu sikuyara yamee arama pirasuawaita supe.
10Jesus ukuawa mayetaa aintauyupurungita aintapawa, ape umbeu ainta supe:
—Marantaa peputari pemuapatuka kua kunya? Purangawaa kua umunyawaa ixe arama.
11Kuaita pirasuawaita aintauiku kuri peirumu yawewarawate maa ixe tikuri haiku peirumu yawewarawate kua ara upe.
12Uri uyusena serese kua sakuenawaa umukaturu arama sepira aintaumburi arama ae iwi kuara kiti.
13Supiwa hambeuwaa penye:
—Maa kiti kuri aintaumbue kua nyenga purangawaa panye ara kiti aintaumbeu kuri sesewara kua kunya umunyawaa ixe arama kuayewaa aintaumanduari arama sese.
Juda Iskariute
14Asui yepe aintasuiwara kuaita duziwaita sera Juda Iskariute usu aintapiri kuaita saserdutita ruixawaita.
15Umbeu ainta supe:
—Muiritaa pemee ixe arama dinyeru haentregari arama penye arama kua Jesus? Asui aintaupagari ae trinta dinyeru prata.
16Asui arire usaru sangawa sertuwaa uentregari arama ainta supe Jesus.
Aintaumukaturu aintaumbau arama paskua rame
17Asui festa uyupirungawa upe aintaumbau seẽwaa umbuewaita uri Jesus piri aintaupurandu ae? —Maa kititaa reputari yamukaturu rembau arama paskua rame.
18Asui umbeu ainta supe:
—Pesu tetama kiti ipiri kua yepe apigawa pembeu ixupe, yawe umbeu yaneruixawa, serangawa usikana, kuiri hambau neruka upe paskua rame hambuewaita irumu.
19Asui aintaumunya kuaye Jesus umunduwaa yawe, aintaumukaturu aintaumbau arama paskua rupiara.
Umuyukuawa kua uentregariwaa ae
20Asui pituna irumu Jesus uwapika meza ruaki aintairumu kuaita duziwaita umbuewaita.
21Asui aintaumbau irumu umbeu ainta supe:
—Supiwa hambeu penye yepe kuri pesuiwara uentregari ixe seruanyanaita supe.
22Asui sasiyara aintapia asui aintaupurandu ae aintayaweyawe:
—Seruixawa maitaa ixe será?
23Asui Jesus umbeu ainta supe:
—Uxari kuri ixe seruanyanaita supe kua umundeuwaa ipu seirumu yepe pratu upe.
24Maa kua unaseriwaa umaa kua ara usu kuri kuaye aintaumpinimawaa yawe sese, maa pirasuawaa kua uxariwaa suanyanaita supe kua unaseriwaa umaa kua ara, purangate maa tikuera maa unaseri umaa kua ara.
25Asui kua Juda uentregariwaa ae upurandu ae:
—Inde umbuewaa, maitaa ixe será? Asui Jesus umbeu ixupe:
—Ẽẽ indete kua rembeuwaa.
Santa Seya
26Asui aintaumbau irumu Jesus upisika yepe pão uabensuari ae, asui upartiri ae uxari arama ainta supe ae kuaita umbuewaita, umbeu ainta supe:
—Pepisika pembau aete sepira.
27Asui upisika kupu umee grasa Deus supe sese Asui umee umbuewaita supe ae umbeu ainta supe:
—Peu ae muiri penye.
28Aete seruwi uxari aramawaa santa ipupe kua hambeuwaa penye arama, kua haxariwaa uyusena aintaresewara kuaita siyawaita hamburi arama aintasui aintapekadu.
29Kuiri hambeu penye:
—Tiana mukuĩsawa hau kuri kua mirá iya yukise senundere hau pisasuwaa peirumu peruixawa irumu kua sepaya.
30Asui aintaunyengari rire yepe inu aintausu iwitera rese sera Ulivera.
Aintauyumimi kuri Kristu rese
31Asui Jesus umbeu ainta supe:
—Kua pituna kuri puxi kuri pemaa ixe kuaye aintautitikawaa yawe aintapapera upe kuxima, yawe aintaunyee:
—Hanupa kuri kua usaruwaa uvelya asui aintaumusaĩ kuri panye iuvelyaita usaruwaita.
32Asui hasemu rire kuri iwi kuara sui hasu kuri perunde Galileya kiti.
33Asui Pedru umbeu ixupe:
—Aintaumaa rame puxi inde arama panye kuaita amuita ixe tikuri puxi hamaa inde.
34Jesus umbeu ixupe:
—Supiwa hambeu inde arama kua pitunate musapiri viaji kuri reyumimi seresewara senundere galu unyengari.
35Pedru umbeu ixupe:
—Aintauputari rame aintauyuká ixe neirumu tikuri hayumimi neresewara. Yawepawate aintaumbeu panye kuaita umbuewaita.
Jesus Getisemani upe
36Asui Jesus usika amu kiti sera Getisemani unyee umbuewaita supe:
—Pewapika ike hasu pukusawa hapurandu sepaya irumu mikiti.
37Asui anyunte urasu sumuara kua Pedru kuaita yuiri Zebedeu rairaita mukuĩ, asui sasiyara ae upurara ipia upe.
38Asui umbeu ainta supe:
—Sasiyara sepia turusu yawaite maa hamanu sesewara, kuiri pewapikare ike pesaru seirumu.
39Asui usu aintasui apekatu xinga uyawika uyenu iwi rese upurandu arama ipaya irumu umbeu:
—Inde sepaya reputari rame rexari sekupu usasawa sesui maa teremunya kuaye haputariwaa yawe maa remunya kuaye reputariwaa yawe.
40Asui uyuiri umbuewaita ipiri uwasemu aintaukiri uiku isui, ape umbeu Pedru supe:
—Maitaa tipepuderi pesaru seirumu yepe ura?
41Pesaru pepurandu irumu yawaite Yurupari uganani penye pemunya arama puxi, supiwa pepia uputari maa pepira pituawaa ae.
42Asui Jesus usu upurandu Deus irumu mukuĩsawa umbeu:
—Inde sepaya tirame sekupu upuderi usasawa sesui senundere hau ae remunya kuri kuaye reputariwaa yawe.
43Asui uyuiri uwasemu ainta aintaukiri aintauiku mukuĩsawa nyãse tipusi aintaresa.
44Asui Jesus uyuiri yuiri aintasui upurandu arama musapirisawa kuaye upuranduwaa yawe primeru.
45Asui uyuiri yuiri umaa aintapiri kuaita umbuewaita umbeu ainta supe:
—Maitaa pekirire, maitaa pepiture peiku? Kuiri usikana sangawa aintauxari arama puxuwerawaita ipu upe kua unaseriwaa umaa kua ara.
46Kuiri pepuamu yasuana aikuewana kua uxariwaa ixe seruanyana supe.
Aintaumprezu Jesus
47Jesus upurungita ramere uiku usika ipiri kua Juda kua yepe aintasuiwara kuaita duziwaita, ururi irumu siya apigawaita espada irumu kaseti irumu yuiri aintaumunduwaita kuaita saserdutita aintaruixawaita tuyuweita yuiri.
48Kua uentregariwaa Jesus suanyanaita supe umbeuwana ainta aintaukuawa arama Jesus ae umbeu ainta supe:
—Aete kuri Jesus kua habejariwaa satipi rese, pepisika kuri ae.
49Ape usika irumu Jesus ipiri umusuaki ae umbeu ixupe:
—Inde será, inde umbuewaa; asui ubejari ae satipi rese.
50Maa Jesus unyee ixupe:
—Inde seanama, maataa remunya? Asui aintauri aintaupisika aintaipu irumu Jesus aintaumprezu ae.
51Asui yepe aintasuiwara kuaita Jesus rumuaraita usiki iespada siru sui unupa yepe saserdutita ruixawa ikriadu umunuka isui inambi.
52Asui Jesus umbeu ixupe:
—Remuyuiri neespada siru kiti, aintaukanyemu kuri espada irumu panye kuaita umaramunyawaita espada irumu.
53Maitaa tirekuawa, haputari rame maa hapurandu sepaya irumu umundu arama maa ixe arama kuiri siyapiri maa duzi mili sui anjuita?
54Maa hasenui rame maa ainta, maitaa maa hapuderi hamunya kuaye aintautitikawaa yawe kuxima aintapapera upe?
55Asui aramete Jesus umbeu ainta supe kuaita siyawaita:
—Maitaa peyuiri pepisika ixe espada irumu kaseti irumu yuiri kuaye pepisikawaa yawe mundawasu? Kuxima haiku peirumu muiri ara hambue rame haiku templu upe, asui tikuera pemprezu ixe.
56Maa yawe aintaumunya; aintaumunya arama kuaye aintaumpinimawaa yawe aintapapera upe kuaita utitikawaita. Asui kuaita umbuewaita aintauxari ae muiri ainta, aintauyawawa isui.
Jesus upuamu serakuenawaita umaa
57Asui kuaita upisikawaita Jesus aintaururi ae suka kiti kua saserdutita ruixawa sera Kaifa ape aintauyumuatiriana kuaita umpinimawaita tuyuweita yuiri.
58Asui Pedru usu apekatu xinga Jesus rakakuera suka kiti kua saserdutita ruixawa asui uwike uwapika serakuenawaa ikriaduita irumu umaa arama mayetaa kuri usemu.
59Asui kuaita saserdutita ruixawaita panye serakuenawaita yuiri aintauputari aintausendu gananisawa Jesus rese aintauyuká arama ae.
60Maa timaa nungara aintauwasemu puxuwera sese kua aintaumbeuwaa kuaita ugananiwaita sese. Asui aintauri mukuĩ ugananiwaita aintauganani arama sesewara.
61Aintaunyee:
—Kua apigawa umbeu kuera, hapuderi hamburi kua Deus ruka asui hapuderi yuiri hasupiri ae musapiri ara upe.
62Asui upuamu kua saserdutita ruixawa unyee Jesus supe:
—Maitaa tirepuderi resuaxara ainta sesewara kua aintaumbeuwaa puxi nerese?
63Maa Jesus ukiririntu usendu ainta supe asui kua saserdutita ruixawa umbeu ixupe:
—Kuiri haputari rembeu yande usendu arama kua Deus upakawaa, maitaa inde kua Kristu Deus raira?
64Jesus umbeu ixupe:
—Ixete. Maa hambeu penye:
—Pemaa kuri kua unaseriwaa umaa kua ara uwapika kuri ikatusawa sui kua kirimbawawaa, pemaa kuri uri nuvẽ piterupi iwaka sui.
65Asui ipiaiwa kua saserdutita ruixawa umusuruka ipupekawa umbeu:
—Puxuwera umbeu Deus rese, marantaa yaputari amu umbeu sesewara? Penyete pesendu kuiri kua umbeuwaa puxuwera.
66Mayetaa penye sese? Asui aintaumbeu:
—Urikute umanu.
67Asui aintautumuna Jesus ruwa upe, aintausuapeteka ae, asui aintaunupa ae aintaipu irumu.
68Aintaunyee ixupe:
—Inde Kristu readivinyari awataa unupa inde.
Pedru uyumimi Jesus rese
69Asui Pedru uwapikare uka kuara piterupi kua uka turusuwaa, asui uri yepe kriada unyee ixupe:
—Indete sumuara kua Jesus Galileya suiwara.
70Asui Pedru uyumimi sesewara panye aintasui umbeu ixupe:
—Tihakuawa nyã rembeuwaa.
71Asui Pedru usu kupiara kiti, asui kua amu kriada umaa ae asui umbeu ainta supe kuaita upuamuwaita ape:
—Kua apigawa aete sumuara kua Jesus Nazare suiwara.
72Asui Pedru uyumimi yuiri sesewara nyenga kirimbawawaa irumu; umbeu:
—Tihakunyeseri kua apigawa rembeuwaa.
73Asui uikupuku xinga aintauri aintaumusuaki Pedru kuaita uikuwaita ape aintaunyee ixupe:
—Supiwa indete yepe aintasuiwara nyãse repurungita aintayawe.
74Ape uyupiru umbeu:
—Deus kuri umpurarakari ixe tirame supiwa kua hambeuwaa asui umbeu Deus rese, tihakunyeseri kua apigawa rembeuwaa. Asui aramete galu unyengari.
75Asui Pedru umanduari Jesus umbeuwaa ixupe:
—Musapiri viaji kuri reyumimi seresewara senundere galu unyengari. Asui Pedru usu ukara kiti uyaxiu kirimbawa.
Currently Selected:
Mateu 26: BBp
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO