Marku 1
1
1Yawe uyupiru kua inyenga purangawaa Jesus Kristu rese kua Deus raira.
Juão Batista
2Yawe umpinima kuxima kua utitikawaa Izaia: "Aete kuri hamundu nerunde kiti yepe umbeu aramawaa umukaturu arama nerapee".
3Yawe usasemu kampu upe: "Pemukaturu yaneruixawa rapee, pemusatambika sapee".
4Juão Batista usika kampu upe, umbue miraita ubatizari ainta sasiyara resewara aintaumaa aintapuxuwerasawa Deus umburi arama aintasui ae.
5Asui siya miraita aintausu ipiri panye Judeya suiwaraita panye Jeruzalẽ suiwaraita yuiri aintauxari ubatizari ainta aintaumbeu irumu aintapekadu.
6Juão kamixa kamelu rawa suiwara, isinturão kamelu pirera suiwara, umbau tukura ira yukise yuiri mirá kuara pura.
Juão umbeu Kristu rese
7Yawe unyee Juão umbuewaa upe ainta:
—Kuiri kuri amu uri serakakuera kirimbawa piri sesui uri kuri pepiri serakakuera, tikuri hapuderi hayawika hayurawa arama ipi sui isapatu, nyãse puranga piri sesui ae.
8Habatizari penye ii irumu, maa ae kuri ubatizari penye Espiritu Santu irumu.
Ubatizari Jesus
9Asui Jesus uri Nazare sui Galileya upewara, uxari Juão ubatizari ae parana Jurdão upe.
10Asui usemu irumu parana sui umaa iwaka uyupirari umaa Espiritu Santu uwiye sese kuaye pumba uwiyewaa yawe.
11Asui usendu yepe inyenga iwaka sui, umbewaa:
—Indete seraira haputariwaa, suuri hamaa inde.
Yurupari uganani putari Jesus
12Asui anyunte Espiritu uxari usu kampu kiti.
13Kuarenta ara uiku kampu upe suu uikuwaa upe, asui Yurupari uputari uganani Jesus umunya arama puxuwerawa, asui kuaita anjuita aintawajudari ae.
Uyuiri Galileya kiti
14Asui aintaumprezu rire Juão Jesus usu Galileya kiti umbue kua inyenga purangawaa Deus rese.
15Unyee ainta supe:
—Usikana sangawa peruixawa arama kua Deus, ape sasiyara pemanduari pepekadu, peruyari inyenga purangawaa.
Usenui umbuewaita
16Asui Jesus uwata lagu rimbiwa rupi sera Galileya umaa Simão imu Andre yuiri aintaumburi aintapisa paraname nyãse upisaitikawaita ainta.
17Jesus unyee ainta supe:
—Peyuiriana serakakuera haxari arama pepisaitika apigawaita Yurupari sui.
18Asui aintauxari aintapisa aintausu arama Jesus rakakuera.
19Asui uwata xingare umaa Zebedeu raira Tiagu imu Juão yuiri, aintauwapika aintaigara upe aintaumukaturu aintapisa.
20Asui Jesus usenui ainta, asui aintauxari aintapaya Zebedeu aintairumu kuaita upurakiwaita ixupe, asui aintausu sakakuera.
Umukaturu urikuwaa demuniu
21Asui aintausu Kafarnaum kiti, asui sauru rame uwike sinaguga upe umbue arama ainta.
22Asui aintausikie aintausendu ixupe nyãse umbue puranga maye ukuawawaa yawe tiainta yawe kuaita umpinimawaita.
23Asui yepe apigawa urikuwaa yepe demuniu ikiawaa uwike sinaguga upe.
24Usasemu kirimbawa:
—Maataa resikari yaneirumu, inde Jesus Nazare suiwara? Maitaa reyuiri remukanyemu arama yande? Hakuawate awa inde, indete kua purangawaa Deus suiwara.
25Asui Jesus umukiriri ae, unyee ixupe:
—Rekiririntu inde, resemu isui kua apigawa.
26Asui kua demuniu ikiawaa uxari uriri kirimbawa kua apigawa, asui usasemu rame uiku usemu isui.
27Asui kuaita miraita aintausikie aintaumaa Jesus supe, aintaupurungita aintapawa:
—Maataa kua? Maitaa yepe inyenga pisasuwaa ae? Nyãse kirimbawa umundu kua demuniu ikiawaita asui aintaumunya kuaye umbeuwaa yawe ainta supe arama.
28Asui kutara aintausendu sesewara muiri kuaita Galileyawaraita.
Umukaturu Pedru sugra
29Asui usemu sinaguga sui, asui uwike aintaruka upe kua Simão Andre yuiri, aintairumu Tiagu Juão yuiri.
30Kua Simão sugra imãsi uiku saku ipira, asui aintaumbeu sesewara Jesus supe.
31Asui Jesus uri upisika ipu usupiri ae, asui takua uxariana ae, asui umunya aintaumbau arama.
Umukaturu siya miraita
32Asui kurasi uwike irumu aintaururi Jesus ipiri panye mãsiweraita kuaita yuiri urikuwaita demuniu.
33Asui panye kua tetama puraita aintauyumuatiri ukara kiti.
34Asui Jesus umukaturu siya mãsiweraita, umburi aintasui panye mãsi, umburi siya demuniwita, asui tiuxari aintaupurungita kuaita demuniwita nyãse aintaukuawana ae.
Upurandu Deus irumu
35Asui ara uri irumu pituna xingare Jesus upuamu usu amu kiti anyuira umbeu arama Deus ape.
36Asui Simão usu sakakuera, kuaita yuiri sumuaraita panye.
37Asui aintauwasemu ae, aintaunyee ixupe:
—Aintauputari inde panye kuaita miraita.
38Asui unyee ainta supe:
—Yasuana amu kiti tetama suakintuwaita hambue arama ape yuiri nyãse sesewara hayuiri.
39Asui umbue ainta sinaguga upe panye Galileya kiti, umburi yuiri aintasui demuniwita.
Umukaturu yepe leprusu
40Asui yepe leprusu uri Jesus ipiri upurandu irumu kirimbawa, uwapika sinipia irumu ixupe, unyee:
—Reputari rame repuderi rexari ikiaima ixe.
41Pirasua Jesus umaa ixupe, uxari ipu sese unyee ixupe:
—Haputariana, reiku ikiaimawaa inde.
42Asui aramete iperewa ukai, asui purangana ae.
43Asui umundu rame usu umundu ae inyenga kirimbawa irumu.
44Unyee ixupe:
—Terembeu seresewara ainta supe kuaita miraita, maa resuana remukame saserduti umaa inde, asui remee uferta Deus supe uxari resewara ikiaimawaa inde kuaye Muize umbeuwaa yawe miraita ukuawa arama nerese.
45Asui usu umbeu Jesus resewara panye miraita supe, ape Jesus tiupuderi uwike aintarendawa kiti uyukuawasawa upe, maa usu uiku mame tiwa yamaa miraita, asui miraita uri ipiri panye sui.
Currently Selected:
Marku 1: BBp
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2021 Missão Novas Tribos do Brasil
Todos os direitos são reservados à:
Missão Novas Tribos do Brasil
Rua Itália, Qd. 57 L. 5-7 - Santa Isabel
75083-310 Anápolis, GO