Sélimɛ 14
14
Kapiɛnnɛ 'yɛ̀ kùlo nī lè a pe 'Lɔti cò wè
1Kire lɛ̀lɛ nī lè, a kùlofɔlilɔ sicɛri pálì 'pìye nyaa nɛ̀ juu nɛ̀ bìɛ. Peli pe 'puu:
Amirafɛli, Sinɛyari kùlofɔli wè,
nɛ́ Ariyɔki, Elazari kùlofɔli wè,
nɛ́ Kedɔrilawomɛri, Elami kùlofɔli wè,
nɛ́ Tidɛli ní, Goyimi kùlofɔli wè.
2A pe sɛ́nì kapiɛnnɛ cáan kàʔafɔlilɔ pálì nɛ̄. Peli pe 'puu:
Bera, Sodɔmi kàʔafɔli wè,
nɛ́ Birisa, Gomɔri kàʔafɔli wè,
nɛ́ Sinɛyabi, Adima kàʔafɔli wè,
nɛ́ Sɛmɛberi, Seboyimi kàʔafɔli wè,
nɛ́ kàʔa gíì ní pe 'ye Bɛla wè, ki kàʔafɔli wè,
gàa pe 'yiʔɛ nɛ ye píra ŋáà ni wè Zowari wè.
3Pe kogunɔ bálì bèle, a pe 'pìye pínɛ nɛ̀ sɛ́nì yéri Sidimi jùlɔgɔ nɛ̄ gè. (Kire tiʔɛ kire gī Yasuʔɔniʔɛgɛ kuʔɔjii wè.) 4Pe kàʔafɔlilɔ bálì pe kogunɔ bèle, pe yé puu nɛ màama kúu Kedɔrilawomɛri mɛ́ fúɔ nɛ̀ taa yiʔɛlɛ kiɛ nɛ́ siin. A yiʔɛlɛ kiɛ nɛ́ taanriwoli ni ga yɛ̀ lè, a pe 'cíi péwu ! nɛ́ jo peli sì ní kúɔ màama nɛ̄ʔ.
5Yiʔɛlɛ kiɛ nɛ́ sicɛriwoli nɛ̄ lè, a Kedɔrilawomɛri nɛ́ wi kùlofɔnyɛninɛ ní bèle, a pe 'pìye kɔ́ri nɛ̀ pɛ́nì kapiɛnnɛ cáan siɛnnɛ bálì nɛ̄ bèle: Erefa siɛnnɛ bèle baa Asitarɔti Karinayimi kàʔa nī gè, nɛ́ Zuzimi siɛnnɛ ní bèle baa Ami kàʔa nī gè, nɛ́ Emii siɛnnɛ ní bèle baa Sawe Kiriyatayimi kàʔa nī gè, 6nɛ́ Wori siɛnnɛ bálì pe 'kòri Seyiiri nyaguruyo nɛ̄ yè. A pe 'pe mìɛni jáa fúɔ nɛ̀ kɛ́ nɛ̀ sɛ́nì nɔ̀ Eli Paran tiʔɛ nɛ̄ gè. Ki 'puu waama kùlo táanni lè. 7A pe 'koli baa kire tiʔɛ nī gè nɛ̀ pɛ́nì nɔ̀ kàʔa káà nɛ̄ gàa pe 'puu nɛ yeri faʔa gè Ɛni Misipati wè níɛ ki yeri píra ŋáà nī wè Kadɛsi wè. A pe 'Amalɛki kùlo siɛnnɛ jáa bèle, nɛ́ míɛni Amɔri siɛnnɛ ní bèle bàli pe 'puu Azazɔn Tamari kàʔa wuulo bèle.
8Bà kàʔafɔlilɔ bálì pe kogunɔ pe 'kire nyaa gè,
a Sodɔmi kàʔafɔli wè,
nɛ́ Gomɔri kàʔafɔli wè,
nɛ́ Adima kàʔafɔli wè,
nɛ́ Seboyimi kàʔafɔli wè,
nɛ́ Bɛla kàʔafɔli wè
(kire kàʔa kire gī Zowari wè),
a pe 'yiri nɛ̀ sɛ́nì pìye pínɛ Sidimi jùlɔgɔ nī gè,
nɛ̀ pìye gbòbori bè kapiɛnnɛ kpúɔn lè.
9Pe kogunɔ bálì bèle, a pe 'tuu kùlofɔlilɔ bálì pe sicɛri nɛ̄ bèle:
Kedɔrilawomɛri wè,
Elami kùlofɔli wè,
nɛ́ Tidɛli, Goyimi kùlofɔli wè,
nɛ́ Amirafɛli, Sinɛyari kùlofɔli wè,
nɛ́ Ariyɔki ní, Elazari kùlofɔli wè.
10A ki 'nyaa baa Sidimi jùlɔgɔ nī gè, kàwiiniʔɛrɛ 'puu baa, gidurɔ kùro ní baa yi nī. A Sodɔmi kàʔafɔli nɛ́ Gomɔri kàʔafɔli ní wè, bà kapiɛnnɛ ni kɛ́nì wári lè, a peli 'yɛ̀ nɛ fé nɛ́ pe kapiɛngbuɔnnɔ ní bèle, a pe sɛ́nì tuu kàwiiye nī yè. A pe kapiɛngbuɔnsɛnminɛ peli 'fɛ̀ nɛ̀ tánʔa nyaguruyo nɛ̄ yè nɛ̀ sɛ́nì làri baa.
11Fànʔafɔlilɔ bálì pe 'puu nɛ́ Kedɔrilawomɛri ní wè, a peli 'Sodɔmi nɛ́ Gomɔri fànʔafɔlilɔ jáa bèle, a pe 'jíin pe kàaya nī yè, nɛ̀ pe siɛnnɛ pe yɛrɛ ti mìɛni 'koli nɛ́ pe yaliire ní dè, nɛ̀ kɛ́ nɛ́ ti ní. 12A pe 'Birama cɔni jaa Lɔti míɛni cò wè nɛ̀ kɛ́ nɛ́ wi ní, nɛ́ wi kɔliyɛrɛ ti mìɛni ní. Nɛ́ ki cɛ́n wire 'puu tɛ́niwɛ Sodɔmi kàʔa nī gè.
Birama wi 'Lɔti suɔ wè
13Bàli pe yé fɛ̀ nɛ̀ suɔ kapiɛnnɛ mɛ́ lè, a kire siɛn wáà 'kɔ́n baa kapiɛnnɛ tiʔɛ nī gè, nɛ̀ pɛ́nì ki juu Birama mɛ́, Eburu nàguɔ wè. Birama wi 'puu tɛ́niwɛ tiikpoliyo tiɛliʔɛ nī gè, gàa gī Mambire wuʔu gè. Mambire ŋáà wire wi 'puu Amɔriyé wuu; Mambire wi cɔninɔ pe 'puu Ɛsikɔli nɛ́ Anɛri ní wè. Pe mìɛni taanri pe yé puu Birama nàgorilo nɛ́ bìɛ nigbe nɛ̄.
14A Birama ga ti lúʔu pe 'wire cɔni pùɔ Lɔti cò wè nɛ̀ kɛ́ nɛ́ wi ní wè, a wi 'wi baakuɔlɔ pálì yeri, bàli wi sùkulolo pe yé sii wi mɛ́ bèle á wi 'pe gbòbori nɛ̀ yaʔa wè nɛ́ pe tɛnmɛ kapiɛnnɛ kpúɔngɛnmɛ nɛ̄ bè. Pe 'puu siɛnnɛ sirakeli dabataan nɛ́ kpɔrigɔ nɛ́ kataanri (318). A pe 'yiri nɛ̀ taʔa kùlofɔlilɔ bálì nɛ̄ bèle fúɔ nɛ̀ sɛ́nì nɔ̀ Dan kàʔa nɛ̄. 15A pìlige ki ga wúɔ gè, a Birama wi 'wi kapiɛngbuɔnnɔ tíla bèle gbuʔulo gbuʔulo a pe sɛ́nì tuu kùlofɔlilɔ bálì nɛ̄ bèle, nɛ̀ pe jáa nɛ̀ pe cìra fúɔ nɛ̀ sɛ́nì nɔ̀ Woba kàʔa nɛ̄ gè, gàa gī Damasi kàʔa kàduʔu mɛ́ gè. 16A Birama wi 'wi cɔni pùɔ Lɔti suɔ wè pe mɛ́ nɛ́ wi kɔliyɛrɛ ti mìɛni ní, nɛ́ cɛlilɛ ní bèle nɛ́ siɛnnɛ ní bèle bàli pe yé cò Sodɔmi nɛ́ Gomɔri kàaya nī yè, nɛ́ pe kɔliyɛrɛ ti mìɛni ní dè.
17Bà Birama wi 'koli nɛ báan wè nɛ́ kɔ́n kapiɛnnɛ kpúɔndiʔɛ nī gè, bà wi yé sɛ́nì Kedɔrilawomɛri nɛ́ wi kùlofɔnyɛninɛ jáa bèle, a Sodɔmi kàʔafɔli wi 'yiri nɛ̀ kɛ́ nɛ̀ sɛ́nì wi kpàli Sawe jùlɔgɔ nɛ̄ gè (gàa pe 'ye míɛni Kùlofɔlilɔ jùlɔgɔ gè).
18Mɛlikisedɛki ŋáà wi 'puu Salɛmi kàʔafɔli wè#14.18 Zerizalɛmi míʔɛ ki sélidiʔɛ kire gī náʔa gè. Wéli baa Ŋún 76.3 kaliwɛgɛ ki táanmɛ gè, nɛ́ Eb 7.2., a wire míɛni 'suro nɛ́ diviɛn líɛ nɛ̀ sɛ́nì Birama kpàli wè nɛ́ ti ní. Wire wi 'puu kacuɔnriwɔ wè Kulocɛliɛ mɛ́, wire ŋáà wī Duniya wi Mìɛni Nyùgo nɛ̄ gè.
19A wi 'diba kpíʔile Birama mɛ́ wè nɛ́ jo:
«Kulocɛliɛ ŋáà wī Duniya
wi Mìɛni Nyùgo nɛ̄ gè,
ŋàa wi yē nyìʔɛnɛ nɛ́ dàala
Faanfɔli wè,
wi‑ diba taʔa wè Birama nɛ̄ wè !
20Nɛ́ míɛni Kulocɛliɛ ŋáà wī
Duniya wi Mìɛni
Nyùgo nɛ̄ gè,
‑wi míʔɛ kiri kpóri,
wire ŋáà wi 'muɔ leguulo
le bèle muɔ kɔli nī gè !»
A Birama sí kiɛkiɛwuʔulo láʔala gèle wi kɔli yataara ti mìɛni nɛ̄ nɛ̀ kɛn Mɛlikisedɛki mɛ́ wè.
21A Sodɔmi kàʔafɔli wi 'Birama yɛ: «‑Mi siɛnnɛ kɛn bèle m'mɛ́, má lɔri líɛ dè muɔ wori.»
22A Birama wi sí jo: «Mi 'mi kɔli yɛ̀gɛ gè naamɛ Yewe mɛ́, Kulocɛliɛ ŋáà wī Duniya wi Mìɛni Nyùgo nɛ̄ gè, wire ŋáà wi yē nyìʔɛnɛ nɛ́ dàala Faanfɔli wè, nɛ́ kàli nɛ́ jo, 23miǐ ga tíi yafiɛn líɛʔ gàa gī muɔ wuʔu gè, a ki cɛni yē jèsii bé nɛ́ ga jo màʔanaʔ kire ga laa yafiɛn, gàa gī muɔ wuʔu gèʔ, kire ga buu muɔ fǎa ga jo muɔ ma nyɛ́nì Birama kpíʔile yakaa fɔ́liʔ. 24Miǐ yafiɛn líɛ muɔ yɛrɛ nī dèʔ fúɔ gàa nàgapunminɔ pe 'lìi gè, kire yákuɔ. Bàli pe 'kɛ́ nɛ́ mi ní bèle, Anɛri wè, nɛ́ Ɛsikɔli ní wè, nɛ́ Mambire wè, peli bèle, pe‑ pe liʔɛlɛ suɔ gèle.»
Currently Selected:
Sélimɛ 14: sev
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© (Active), Wycliffe Bible Translators, Inc. All rights reserved.