Mateo 11
11
1Oda 12 kana, oda‑ya Yeso hiyari hawa tohe, mai tabori dami‑kaya oda eyehe tokemarine, mai one‑ya kanawatobonaha.
Yeso tamine‑ya Yowaho Batita mitebona
2Kadeya‑ya Yowaho wai, Yeso Kirisito ene tamine‑ya mite, hika mai da‑daba mai‑ya yosematane.
3Yeso‑ya mai haana,
“‘Deoso‑ka kakibona mai ati namete, fara amatiraniha? Fara tihi awiriya, Deoso‑ka yokana oda nimanaboneni.’ I‑di Yowaho ati nene.” Mai ati namaroni.
4Yeso mai‑ya hiyare,
“I‑di Yowaho‑ya dai towakamiya, owa ene dai kamina, owati dai kamina, dai nahi.
5Yama mai awaramaro yama mai awawaha, mai ka‑kakona‑maro mai yakanamawaha, mai mese towe tohamaro mai mese amosawama, mai narabi hawiramaro ai ati‑ya mai mitawaha, mai abamaro mai kitamawaha, yama mai kihara Deoso ati amosabote‑ya mai mitawaha nineni.
6Owa tamine‑ya mai mitiya, mai yawi awiriya, Deoso mai‑ya kasomebonane.” Yeso ati nemarine.
7Yowaho‑ka mai tokoma, mai nowati‑ya i‑di Yowaho tamine‑ya mai dama mai‑ya Yeso hiyare,
“Hibati‑ya i‑di Yowaho‑ya dai toka, hini yamata dai awabone dai tokiti? Watikoro henerikane dai awabone, dai tokiraniha?
8Bora amosabote‑ya sakone dai awabone, dai ati na awineni. Bora amosabote‑ya mai sakona, kabani‑kaya mai winatera, hidi webote‑ka yobe‑ya mai winateni.
9Deoso ati‑ya mi‑mita‑ya dai awabone, dai ati na, fare Yowaho Deoso ati‑ya mi‑mita amane. Yowaho‑ya Deoso yosemarine.
10Deoso‑ka yama hani ati dai mitahi,
‘Owati timitahi. Oka yo‑yose bofe‑ke oyoseboneni, tiwa hawine‑bone‑ya hawa tonihibonaha.’ Deoso‑ka yama hani ati na,
i‑di Yowaho Batita tamine amane.
11Owati amosa dai mitahi. I‑di Yowaho Batita amosi nafi, hibati‑ka mai nafi amosi bi‑bidi nibisa, Neme‑ke ai nafi‑ka hidi kitabote tohawahe‑ya mai sawiya, mai nafi amosi ba‑basi naboneni.
12Hibati‑ya Neme‑ke ai nafi‑ka hidi kitabote tohawahebona tamine‑ya i‑di Yowaho hiyaremarine. Tamine‑ya mai mita, mai hama, mai hami fawarani.
‘Oda kita, hini oda ene Neme‑ke ai nafi‑ka hidi kitabote tohawahe‑ya oda saweboneni.’ Mai ati nani.
13Yowaho koboni awisareya, Deoso ati‑ya mai mi‑mita‑mete mai toha, i‑di Mose toha ne, Eriya kamebona tamine‑ya mai kanahanameteni.
14I‑di Eriya i‑di Yowaho tamine amane.
15Owati dai mita, owati dai tokadabahi.
16Hini yamata‑nima dai niti? Haa‑nima dai nineni. Madehe nahore, mai ibi
hiyara, haa‑nima mai ati na,
17‘Ka! Kaida oda afona, dai wayomi awirani. Mai tabiyo oda ohina, dai ohini awirani.’ Madehe one ati na,
mai one‑ya mai nofara mai‑nima dai nineni.
18I‑di Yowaho tafi bi‑bidi ne, fino‑ya fawarihi ne,
‘Madi towe i‑di Yowaho‑ya foyane.’ Dai ati teni.
19 # 11:16-19 Madehe one ya‑yai, mai one ohi na, mai one hiniya naho, mai ya‑yaina mai‑ya mai nofarihi, mai o‑ohi mai‑ya mai nofarihi na. Fara mai‑nima fariseo mai toha, Yowaho Batita‑ya mai nofara, i‑di Yeso‑ya mai nofaharirani. Dai‑ka Ayo neme‑ke tafi ba‑basi ne, fino‑ya fawane,
‘Yeso towe amane. Tafi nafi, fino‑ya fawa, kofeno‑ka yinero‑bona‑ya mai ha‑haa mai toha, mai ihi amosara mai toha, mai na, mai‑ya Yeso nofatene.’ Dai ati teni.
Yama‑ya mai wa‑wato mai ihi ai awa, mai ai watoteni.” Yeso ati nemarine.
Mai tabori ababone tamine
20Yeso ene kitabote‑ya mai awamaro, Yeso ati‑ya mai nofara, mai‑ya Yeso weenemarine, mai ihi amosawami watoraro.
21“Ka! Korasi‑ya dai wi‑wina, Besaida‑ya dai wi‑wina, dai na, dai ene manakone wadani. Owa ene kitabote‑ya dai awamaro, owati‑ya dai nofaramaroni. Tiro‑ya mai wi‑wina‑mete, Sidoho‑ya mai wi‑wina‑mete, mai na, Deoso ati‑ya mai tokadabara, tabora fami‑ya Deoso nanahabematamonane. Owa ene kitabote‑ya mai awi bahamete‑mani, mai atibodi amosawama nemeteni.
22 # 11:21-22 Tiro‑ya mai wi‑wina‑mete mai toha, Sidoho‑ya mai wi‑wina‑mete mai toha na, Deoso ati‑ya mai tokadabarametemoneni. Mai amosawahi watora, mai ihi sidadi fami‑ya Deoso nanahabematamonane. Owati dai mitahi. Hibati‑ya Tiro‑ya mai wi‑wina‑mete, Sidoho‑ya mai wi‑wina‑mete, mai na, ai nafi ene‑ya Deoso kadikeya, mai‑ya weenamataseya, mai‑ya weeni bi‑bidi nebona, dai‑ya weeni kitabisebonane.
23Kafanaho‑ya dai wi‑wina, neme‑ya dai winabone dai ati na, yama hirini‑kaya dai sawibisaboneni. Sodoma‑ya mai wi‑wina‑mete owa ene kitabote‑ya mai awi bahamete‑mani, mai abara nemeteni.
24Ai nafi ene‑ya Deoso kadikeya, dai‑ya weeni kitebonane. Ai nafi ene‑ya Deoso kadikeya, hibati‑ya Sodoma‑ya mai wi‑wina‑mete mai‑ya weenamataseya, mai‑ya weeni bi‑bidi nebona, dai‑ya weeni kitabisebonane.” Yeso ati nemarine.
Dai maa toha owa‑kaya dai kamiyahi
25Yeso Badi‑ya hiyare,
“Abi Deoso, bofe‑ka hidi tiha, neme‑ka hidi tiha, yama‑ya mai wa‑wato‑mone mai ati na tiwa ene‑ya mai watorani. Madehe‑nima mai na, yama‑ya mai watoramone mai ati na tiwa ene‑ya mai watobisineni. Tiwa ene ya‑yai·oneni.
26Tiwati‑maro‑nima yama nineni.” Yeso ati nemarine.
27Oda‑ya hiyaramatase,
“Okobi ene yama nafi okayafawahineni. Owa‑ya dai wato nafira, owa‑ya Okobi watobisane. Okobi owato oteni. Owati ihi Okobi‑ya dai one watomakineni. Dai‑ya okasomara‑mani, Okobi‑ya dai watora neni.
28Dai maa tohiya, owa‑kaya dai kamiya, dai okasomaboneni.
29Owa‑nima dai nahi. Hama·oterani. Owati somateni. Owa‑nima dai niya, dai atibodi maa tohamateraboneni.
30Owa‑nima dai niya, dai‑ka yama anini kitara‑nima dai naboneni. Yama kanara dai weyena‑nima dai naboneni.” Yeso ati nemarine.
Currently Selected:
Mateo 11: jaaNT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ