ሰቈቃወ ኤርምያስ 4

በኢየሩሳሌም ላይ ስለሚደርሰው ቅጣት

1ቤተ መቅደስ የታነጸባቸው ድንጋዮች በየመንገዱ ተበታተኑ።

ወርቁ እንዴት ደበዘዘ!

ንጹሑስ ወርቅ እንዴት ተለወጠ!

2የከበሩ የጽዮን ልጆች እንደ ንጹሕ ወርቅ ያኽል ውድ ነበሩ፤

እንዴት አሁን የሸክላ ሠሪ እጅ እንደ ሠራው

እንደ ሸክላ ዕቃ ተቈጠሩ!

3ቀበሮዎች እንኳን የወለዱአቸውን ከጡታቸው ይመግባሉ፤

ሕዝቤ ግን እንደ ምድረ በዳ ሰጎኖች ጨካኞች ሆነዋል።

4በውሃ ጥም ምክንያት የሕፃናት ምላስ ከትናጋቸው ጋር ተጣበቀ፤

ልጆቻቸው ምግብ ይለምናሉ፤

ነገር ግን ምንም ነገር የሚሰጣቸው ሰው የለም።

5ቀደም ብለው ምርጥ ምግብ ይመገቡ የነበሩት፥

አሁን በመንገድ ላይ ወድቀዋል።

ሐምራዊ ልብስ ለብሰው ያደጉት

አሁን በዐመድ ክምር ላይ ተጋደሙ።

6በሕዝቤ ላይ የደረሰው ቅጣት

የማንም እጅ ሳያርፍበት በቅጽበት ከተገለበጠችው

ከሰዶም ቅጣት የበለጠ ነው። #ዘፍ. 19፥24።

7ልዑላን መሳፍንታችን ርኲሰት የማይገኝባቸው፥

ከበረዶ ይልቅ የጠሩ፥ ከወተትም ይልቅ የነጡ ነበሩ፤

መልካቸውም እንደ ሰንፔር ያማረ ነበር፤

8አሁን ግን ፊታቸው እንደ ጥላሸት ስለ ጠቈረ፥

በየመንገዱ ወድቀው ሲገኙ የሚያውቃቸው የለም፤

እንደ እንጨት የደረቀ ቆዳቸው በአጥንታቸው ላይ ተጣብቆአል።

9የምድር ምርትን በማጣት ቀስ በቀስ በራብ ከመሞት ይልቅ

በጦርነት የሚሞቱት የተሻሉ ነበሩ።

10የርኅሩኅ ሴቶች እጆች የገዛ ልጆቻቸውን ቀቀሉ፤

ከተማዋ በተደመሰሰች ጊዜ

እነዚያ የተቀቀሉ ልጆች ለሰዎች ምግብ ሆኑ። #ዘዳ. 28፥57፤ ሕዝ. 5፥10።

11እግዚአብሔር ኀይለኛ ቊጣውን ገለጠ፤

የጽዮንን መሠረት የሚያጠፋ፥

የተቀጣጠለ እሳት የመሰለ መዓቱን አወረደ።

12የምድር ነገሥታትም ሆኑ የዓለም ሕዝቦች

በኢየሩሳሌም የቅጽር በሮች

ጠላት ይገባል ብለው አላመኑም።

13ይህም የሆነው በመካከልዋ የንጹሓንን ደም ባፈሰሱት

በካህናትዋ በደልና በነቢያትዋ ኃጢአት ምክንያት ነው።

14እነርሱ በደም የረከሱ ስለ ሆኑ

ሰው ልብሳቸውን እንኳ ለመንካት አይደፍርም፤

እነርሱ ግን እንደ ዕውሮች በመንገድ ላይ ይንከራተታሉ።

15ስለዚህም ሕዝቡ “ወዲያ ሂዱ!

ስለ ረከሳችሁም አትንኩን!” እያሉ ይጮኹባቸዋል።

ስለዚህ እነርሱ ስደተኞችና ተንከራታቾች ሆኑ

ሕዝቦችም “ከእንግዲህ በመካከላችን አይቈዩም” አሉ።

16እግዚአብሔር ራሱ የበተናቸው ስለ ሆነ፥

ከእንግዲህ ወዲህ ስለ እነርሱ አያስብም፤

ለካህናቱ ክብር አይሰጣቸውም፤

ሽማግሌዎችም ልዩ አስተያየት አይደረግላቸውም።

17በከንቱ ረዳት በመጠበቅ ዐይናችን ደከመ

ሊታደግ ከማይችል ሕዝብ በጒጒት ርዳታ ጠበቅን።

18ጠላትም በየመንገዱ መዘዋወር እንዳንችል

በዐይነ ቊራኛ ይጠባበቀን ነበር፤

ዘመናችን ቀርቦአል፤ ዘመናችን አልቆአል፤

ፍጻሜውም ደርሶአል።

19አሳዳጆቻችን በሰማይ ከሚበርሩ ንስሮች የፈጠኑ ነበሩ፤

በተራሮች ላይ አሳደዱን፤

በበረሓም ሸመቁብን።

20በሕዝቦች መካከል በእርሱ ጥላ ሥር እንኖራለን

ብለን ያሰብነውን እግዚአብሔር የቀባውን

የሕይወት እስትንፋሳችን አጠመዱብን።

21እናንተ በዑፅ ምድር የምትኖሩ የኤዶም ሕዝብ ሆይ

ደስ ይበላችሁ ሐሴትም አድርጉ!

ይሁን እንጂ የእናንተም ጽዋ

ተራውን ጠብቆ በመምጣት ላይ ነው፤

እናንተም ሰክራችሁ ትራቈታላችሁ።

22የኢየሩሳሌም ሕዝብ ሆይ! የበደላችሁ ቅጣት አብቅቶአል፤

ከእንግዲህ ወዲህ በስደት እንድትኖሩ አያደርጋችሁም፤

ነገር ግን የኤዶም ሕዝብ ሆይ! የእናንተን በደል ይቀጣል፤

ኃጢአታችሁንም ያጋልጣል።

Currently Selected:

ሰቈቃወ ኤርምያስ 4: አማ05

ማድመቅ

ያጋሩ

ኮፒ

ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ

ስለ አማርኛ አዲሱ መደበኛ ትርጉም ተጨማሪ ይወቁ