Genesis 29
29
Jakob ma vaza konganda ya Laban
1Jakob arire tja ryama mouyenda we, na i kehi rovandu vokomuhuka. 2Mokamanga arire tja munu ondjombo mokuti notupanda tutatu tozonḓu, nḓa rara meṋe yayo. Otupanda twi aa tu hirwa mondjombo ndji; nu potjinyo tjayo pa ri ewe enene. 3Notupanda tji twa wongara mbo atuhe pamwe, imba ovarise otjaave kunguzurire ewe okuriisa po potjinyo tjondjombo, nave hire ozonḓu. Tjazumba otjaave yarura po indi ewe poruveze rwaro rukwao.
4Jakob arire tja pura ovarise a tja: “Vakwetu, mamu zu pi?”
Nowo ve mu zira ave tja: “Matu zu kOharan.”
5Neye wa pura nai: “Laban, ondekurona ya Nahor, mu mu i?”
Nowo ve mu zira nave tja: “Ii, tu mu i.”
6Neye we ve pura a tja: “Eye u ri nawa?”
Nowo ve mu zira ave tja: “Ii, u ri nawa! Nu tara, omusuko we Rahel eye ngo ngu ma yende nambano nozonyanda.”
7Jakob arire tja tja: “Eyuva ngunda omutenya, nu ngunda karuya rira oruveze rwokuworonganisa ozonyanda. Ze eseye ze nwe, nu mu hinge ze karye.”
8Nowo va zira ave tja: “Nao kamaatu sora nga otupanda atuhe twozonyanda azehe tji twa worongana. Tjazumba ewe mari isiwa po, okutja otji matu hire ozonyanda.”
9Jakob ngunda ama hungire puna wo, Rahel arire tja tukuruka nozonyanda zaihe, eye tjinga a ri omurise. 10Nu Jakob tja munu Rahel, omusuko wongundwe Laban, nozonyanda, arire tja i kondjombo na kunguzura indi ewe okuriisa po potjinyo tjondjombo, na hire ozonyanda. 11Jakob wa hupita Rahel na utu okurira. 12Neye wa raera ku Rahel a tja: “Ami owami omuzandu wa Rebeka, nowami omusya waiho.”
Rahel wa tupuka okukaserekarera ku ihe. 13Nu Laban tja zuva kutja omusya we Jakob u ri mondjira wa tupuka okukemutjakanena, e mu pukata, narire tje mu hupite ne mu hitisa mondjuwo ye. Jakob arire tja serekarerere Laban oviṋa avihe mbya tjitwa. 14Laban wa tja ku ye: “Tjiri, ove oove onyama nombinḓu yandje omuini.” Nu Jakob wa kara mbo oure womueze auhe.
Jakob ma kara okuungurira Laban kutja a pewe ooRahel na Lea
15Laban wa pura Jakob a tja: “Ove ko nokusokuungura uriri nokuhina ondjambi mena rokutja oove omusya wandje. Mo vanga ondjambi, ndji ṱeki pi?” 16Laban wa ri novasuko vevari, erumbi wa ri Lea, nomuangu wa ri Rahel. 17Nu Lea wa ri nomeho omawa, nungwari Rahel wa ri nombunikiro nomuhapo omuwa.
18Jakob wa suverere Rahel, nopa tjera nai: “Ami me ku ungurire ozombura hambombari mena romusuko woye ingwi omuangu Rahel.”
19Nu Laban wa zira nai: “Okokuwa okumuyandja kove pokumuyandja komurumendu wozonganda. Kara puna ami!” 20Komuhingo mbwi Jakob otja ungura ozombura hambombari kutja a pewe Rahel; noruveze ndwi iyaru munika aayo omayuva ouṱiṱi ku ye, eye tjinga e mu suverere tjinene.
21Jakob arire tja tja ku Laban: “Oruveze rwa yenene; ndji pa omusuko woye mbi kupe.” 22Komuhingo mbwi Laban opa tjitira omukandi wongupiro na ṋanga ovandu avehe votjirongo ho. 23Nungwari ouṱuku mbo eye wa twara Lea ku Jakob moruveze rwa Rahel; nu Jakob wa rara pu ye. 24Nu Laban wa yandja omukarere we omusuko wena Silpa komuatje we Lea a rire omukarere we omuini. 25Nomuhuka tji pa tji, Jakob arire tja munu kutja ingwi oLea. Neye opa heera nai ku Laban: “Nambano ove we ndji tjitire tjike nai? Ami hi ku unguririre kutja mbi pewe Rahel are? Nambano ove we ndji wovisire tjike?”
26Laban arire tja ziri nai: “Kamuhingo wetu okutenga okukupisa omusuko omuangu komurungu werumbi re. 27Kara uri na ingwi pu pe ṱa omayuva hambombari worukupo; tjazumba otji me ku pe Rahel wina, tji mo ndji ungurire ozombura zarwe hambombari.”
28Nu Jakob wa tjita nao na kara omayuva hambombari worukupo puna ye. Nu Laban arire tje mu pe omusuko we Rahel a ise po omukazendu we. 29Laban wa yandja omukarere we omusuko wena ra Bilha komuatje we Rahel a rire omukarere we omuini. 30Nu Jakob wina otja rara pu Rahel, ne mu suvere pu Lea. Neye wa ungurira Laban ozombura ozongwao hambombari.
Ovanatje va Jakob
31 Muhona tja muna kutja Lea omuyarwandu, ope mu pera orukwato, Rahel ngunda a kara nokuhinovanatje. 32Nu Lea arire tja rire otjingundi na panduka omuzandu ne mu ruku Ruben; orondu eye tja tja: “Muhona wa ṱondjenda na ami, nambano omurumendu wandje me ndji suvere.” 33Neye wa rira otjingundi rukwao na panduka omuzandu, na tja: “Orondu Muhona tjinga a zuva kutja mba yarwa, neye ope ndji pera omuzandu ngwi rukwao”, nu we mu ruka Simeon. 34Neye wa rira otjingundi rukwao, na panduka omuzandu. Neye wa tja: “Nambano otjikando hi omurumendu wandje me ndji suvere, ami tjinga ambe mu pandukire ovazandu vetatu.” Nope mu rukira Levi. 35Neye wa rira otjingundi rukwao, na panduka omuatje omuzandu; narire tja tja: “Otjikando hi ami me tanga Muhona.” Nope mu rukira Juda. Okuzambo orukwato rwe aru yandere mbo.
Currently Selected:
Genesis 29: HRR-UNI
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Herero Revision Bible © Bible Society in Namibia, 2021.
Genesis 29
29
Jakob ma vaza konganda ya Laban
1Jakob arire tja ryama mouyenda we, na i kehi rovandu vokomuhuka. 2Mokamanga arire tja munu ondjombo mokuti notupanda tutatu tozonḓu, nḓa rara meṋe yayo. Otupanda twi aa tu hirwa mondjombo ndji; nu potjinyo tjayo pa ri ewe enene. 3Notupanda tji twa wongara mbo atuhe pamwe, imba ovarise otjaave kunguzurire ewe okuriisa po potjinyo tjondjombo, nave hire ozonḓu. Tjazumba otjaave yarura po indi ewe poruveze rwaro rukwao.
4Jakob arire tja pura ovarise a tja: “Vakwetu, mamu zu pi?”
Nowo ve mu zira ave tja: “Matu zu kOharan.”
5Neye wa pura nai: “Laban, ondekurona ya Nahor, mu mu i?”
Nowo ve mu zira nave tja: “Ii, tu mu i.”
6Neye we ve pura a tja: “Eye u ri nawa?”
Nowo ve mu zira ave tja: “Ii, u ri nawa! Nu tara, omusuko we Rahel eye ngo ngu ma yende nambano nozonyanda.”
7Jakob arire tja tja: “Eyuva ngunda omutenya, nu ngunda karuya rira oruveze rwokuworonganisa ozonyanda. Ze eseye ze nwe, nu mu hinge ze karye.”
8Nowo va zira ave tja: “Nao kamaatu sora nga otupanda atuhe twozonyanda azehe tji twa worongana. Tjazumba ewe mari isiwa po, okutja otji matu hire ozonyanda.”
9Jakob ngunda ama hungire puna wo, Rahel arire tja tukuruka nozonyanda zaihe, eye tjinga a ri omurise. 10Nu Jakob tja munu Rahel, omusuko wongundwe Laban, nozonyanda, arire tja i kondjombo na kunguzura indi ewe okuriisa po potjinyo tjondjombo, na hire ozonyanda. 11Jakob wa hupita Rahel na utu okurira. 12Neye wa raera ku Rahel a tja: “Ami owami omuzandu wa Rebeka, nowami omusya waiho.”
Rahel wa tupuka okukaserekarera ku ihe. 13Nu Laban tja zuva kutja omusya we Jakob u ri mondjira wa tupuka okukemutjakanena, e mu pukata, narire tje mu hupite ne mu hitisa mondjuwo ye. Jakob arire tja serekarerere Laban oviṋa avihe mbya tjitwa. 14Laban wa tja ku ye: “Tjiri, ove oove onyama nombinḓu yandje omuini.” Nu Jakob wa kara mbo oure womueze auhe.
Jakob ma kara okuungurira Laban kutja a pewe ooRahel na Lea
15Laban wa pura Jakob a tja: “Ove ko nokusokuungura uriri nokuhina ondjambi mena rokutja oove omusya wandje. Mo vanga ondjambi, ndji ṱeki pi?” 16Laban wa ri novasuko vevari, erumbi wa ri Lea, nomuangu wa ri Rahel. 17Nu Lea wa ri nomeho omawa, nungwari Rahel wa ri nombunikiro nomuhapo omuwa.
18Jakob wa suverere Rahel, nopa tjera nai: “Ami me ku ungurire ozombura hambombari mena romusuko woye ingwi omuangu Rahel.”
19Nu Laban wa zira nai: “Okokuwa okumuyandja kove pokumuyandja komurumendu wozonganda. Kara puna ami!” 20Komuhingo mbwi Jakob otja ungura ozombura hambombari kutja a pewe Rahel; noruveze ndwi iyaru munika aayo omayuva ouṱiṱi ku ye, eye tjinga e mu suverere tjinene.
21Jakob arire tja tja ku Laban: “Oruveze rwa yenene; ndji pa omusuko woye mbi kupe.” 22Komuhingo mbwi Laban opa tjitira omukandi wongupiro na ṋanga ovandu avehe votjirongo ho. 23Nungwari ouṱuku mbo eye wa twara Lea ku Jakob moruveze rwa Rahel; nu Jakob wa rara pu ye. 24Nu Laban wa yandja omukarere we omusuko wena Silpa komuatje we Lea a rire omukarere we omuini. 25Nomuhuka tji pa tji, Jakob arire tja munu kutja ingwi oLea. Neye opa heera nai ku Laban: “Nambano ove we ndji tjitire tjike nai? Ami hi ku unguririre kutja mbi pewe Rahel are? Nambano ove we ndji wovisire tjike?”
26Laban arire tja ziri nai: “Kamuhingo wetu okutenga okukupisa omusuko omuangu komurungu werumbi re. 27Kara uri na ingwi pu pe ṱa omayuva hambombari worukupo; tjazumba otji me ku pe Rahel wina, tji mo ndji ungurire ozombura zarwe hambombari.”
28Nu Jakob wa tjita nao na kara omayuva hambombari worukupo puna ye. Nu Laban arire tje mu pe omusuko we Rahel a ise po omukazendu we. 29Laban wa yandja omukarere we omusuko wena ra Bilha komuatje we Rahel a rire omukarere we omuini. 30Nu Jakob wina otja rara pu Rahel, ne mu suvere pu Lea. Neye wa ungurira Laban ozombura ozongwao hambombari.
Ovanatje va Jakob
31 Muhona tja muna kutja Lea omuyarwandu, ope mu pera orukwato, Rahel ngunda a kara nokuhinovanatje. 32Nu Lea arire tja rire otjingundi na panduka omuzandu ne mu ruku Ruben; orondu eye tja tja: “Muhona wa ṱondjenda na ami, nambano omurumendu wandje me ndji suvere.” 33Neye wa rira otjingundi rukwao na panduka omuzandu, na tja: “Orondu Muhona tjinga a zuva kutja mba yarwa, neye ope ndji pera omuzandu ngwi rukwao”, nu we mu ruka Simeon. 34Neye wa rira otjingundi rukwao, na panduka omuzandu. Neye wa tja: “Nambano otjikando hi omurumendu wandje me ndji suvere, ami tjinga ambe mu pandukire ovazandu vetatu.” Nope mu rukira Levi. 35Neye wa rira otjingundi rukwao, na panduka omuatje omuzandu; narire tja tja: “Otjikando hi ami me tanga Muhona.” Nope mu rukira Juda. Okuzambo orukwato rwe aru yandere mbo.
Herero Revision Bible © Bible Society in Namibia, 2021.