UPUTUKILO 11
11
1Mba hashi heswe hapwile limi limuwika ni kuhanjika chimuwika. 2Shimbu machiya ku Chivumbuko awanyine chana mu chifuchi cha Shinare, yatwamako. 3Yaliamba umwe kuli mukwo ni mukwo ngwo, Tuyenu tutenge tijolo tukayoche kanawa. Chocho apwile ni tijolo kusalakana mawe, ni malowa kusalakana ndambo. 4Yamba ngwo, Tuyenu tutunge limbo, ni kaposhi songo lienyi likahete mwe mwilu, tukapwe ni jina kuchina mutumwangana mwamwa hashi heswe. 5Alioze Yehova yahulumuka akamone limbo ni kaposhi yoze ana ja atu machitunga. 6Yehova ngwenyi, Kumanyi hapwa munyachi umuwika ni limi limuwika kashika haputuka kulinga chuma chino. Haliapwila cheswacho mahala kulinga kechi kuhasa kwachinda. 7Tuhulumukenu tukalumbangenye malimi jo hanga kechi kalivwa kuhanjika cha umwe ni mukwo. 8Chocho Yehova yaamwanga kuze mwamwa hashi heswe, mba yalitwamina kutunga limbo lize. 9Kashika yalukako jina ngwo, Mbapele mumu kwenako Yehova yalumbangenya kuhanjika cha akwa hashi eswe. Mba kuze Yehova yaamwanga mwamwa hashi heswe.
10Yisemuko ya Sheme yino; Sheme te yapwa ni kulakaji lia miaka, yasema Apakasha miaka yiali kulutwe lia sanga lia meya. 11Sheme yatwama ni mwono kulutwe lia kusema Apakasha makulakaji atano a miaka nikusema ana a malunga ni ana a mapwo.
12Apakasha yatwama ni mwono makumi atatu a miaka ni miaka yitano yasema Shela. 13Apakasha yatwama ni mwono kulutwe lia kusema Shela makulakaji awana a miaka ni miaka yitatu nikusema ana a malunga ni ana a mapwo.
14Shela yatwama ni mwono makumi atatu a miaka yasema Epere. 15Shela yatwama ni mwono kulutwe lia kusema Epere makulakaji awana a miaka ni miaka yitatu nikusema ana a malunga ni ana a mapwo.
16Epere yatwama makumi atatu a miaka ni miaka yiwana, yasema Pelege. 17Epere yatwama ni mwono kulutwe lia kusema Pelege makulakaji awana a miaka ni makumi atatu a miaka nikusema ana a malunga ni ana a mapwo.
18Pelege yatwama ni mwono makumi atatu a miaka, yasema Reu. 19Pelege yatwama ni mwono kulutwe lia kusema Reu makulakaji aali a miaka ni miaka livwa nikusema ana a malunga ni ana a mapwo.
20Reu yatwama ni mwono makumi atatu a miaka ni miaka yiali yasema Selugu. 21Reu yatwama ni mwono kulutwe lia kusema Selugu makulakaji aali a miaka ni miaka shimbiali nikusema ana a malunga ni ana a mapwo.
22Selugu yatwama makumi atatu a miaka, yasema Nehore. 23Selugu yatwama ni mwono kulutwe lia kusema Nehore makulakaji aali a miaka nikusema ana a malunga ni ana a mapwo.
24Nehore yatwama ni mwono makumi aali a miaka ni miaka livwa, yasema Tera. 25Nehore yatwama ni mwono kulutwe lia kusema Tera kulakaji lia miaka ni kumi lia miaka ni miaka livwa nikusema ana a malunga ni ana a mapwo.
26Tera yatwama ni mwono makumi shimbiali a miaka, yasema Apalama, ni Nehore, ni Harane.
27Yisemuko ya Tera yino; Tera yasema Apalama, ni Nehore, ni Harane. Harane yasema Lote. 28Harane yafwa shimbu tato Tera achili ni mwono, mu chifuchi cha kusemuka chenyi, mu Ure, chihunda cha Kaletea. 29Ni Apalama ni Nehore yambata mapwo. Pwo lia Apalama jina lienyi Serai. Pwo lia Nehore jina lienyi Milika mwana wa Harane, iye kali ni ana aali, mukwo Milika mukwo Iseka. 30Serai te mumba, keshi mwana.
31Mba Tera yatwala mwanenyi Apalama, ni Lote mwana wa Harane mujikulu wenyi, ni Serai tembwa-mwanenyi pwo lia mwanenyi Apalama. Yaya no akatuke ku chifuchi cha Ure wa Kaletea akaye ku chifuchi cha Kanana yeza ku Harane, yatwamako. 32Matangwa a Tera te makulakaji aali a miaka ni miaka yitano. Tera yafwa mu Harane.
Currently Selected:
UPUTUKILO 11: Csa
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Chokwe Bible © Bible Society in Angola, 1975.