JOHON 1

Lamthe po A-ok Chikarlulo

1Kichengke Lamthe si kido, aro Lamthe Arnam pensi kido, aro Lamthe si Arnam kido. 2Anang kicheng amun Arnam pen kido. 3Anang parasi ahuwit apot hel thepmo, aro jipe thepmo, lamehel isita anang aparke chokche yongo, 4anang longsi ajiu kido, aro labang ajiusi arleng aphan katha-ang. 5Katha-angpo kangting long chiklangsi do, aro kangtingpo anangyok hal un-eh yongo. 6Arnam para wang kitol Johon amen ihut arleng kido. 7Anang parasi ahuwit kikrol unyok, labang katha-ang hakhi pisi, anang neng-hong kithan yok kiwang. 8Anang bithang ke katha-ang kalek, manta katha-angpo yok hakhi kipi yoksi kiwang. 9Ahuwit arlengyok katha-ang kipi, khanang katha-angpo, pirthepe yok wangsi kido. 10Anang pirthepe long kido, aro pirthepe anang parasi parjapmo; yongta pirthepe ke anangyok chinine yongot. 11Anang abithang apharan ensi wango, aro anang abithang arleng helsi anangyok chidengde yongot. 12Manta ingho anang menyok krol lo, anang yok kachideng ahuwit yok, Arnam asohel kachiplang apharan pilo, 13anali awi pen, lale a-ok aneng pen, lale arleng kar-ih ateng wang plango ladi kalek, manta Arnam parasi plango. 14Aro labang Lamthe a-ok chiplango aro jinso pen khanang plengthipsi, ili sitem dolo; la-amun Apa ihut det Aso kihlong jortang, ili thek hlongo. 15(Anang lam Johon po hakhi pilo aro hang-wongsi pulo, “Ne phel kiwangpo neyok pango lo, piyok pu tene anang neyok ango kido, ingho alam ne kithan, labangke anango.”) 16Anang chok-pleng ongsi, ili ahuwit kajinso aphuthak kajinso pahlongo. 17Kanong matmat ke Mosi po parasi pilo; jinso aro khanang ke Jisu Khristo pensi wango. 18Kaita Arnam yok thek hlonghle yong. Apa angthin long kido, Arnam Aso si anangyok pachiklango.

Johon Baptist po Hakhi Kipi

(Mot. 3:1-12; Mrk. 1:1-8; Luk. 3:1-20)

19Johon po kipi hakhi labangpo: “Nangke ingho te?” pusi Jihudi hel Jerusalem para bangthe aro Kathar hel Johon po adung yok pathano. 20La-amun anang asisik thanthesi, hoi cholo, lake, “Ne ke Khristo kalek.” 21Aro anali anangyok arjulo, “Laparake pot te? Nang Elija po ma?” Johon po pulo, “Ne ke kalek;” “nang labang turki po ma?” Johon po pulo, “Kalek.” 22Laparake anali anangyok pulo, “Nang ingho te? Haliyok wang kitol helyok kithan dam ayok, hali thanot. Nang bithang alam haliyok pot puye?” 23Johon po pulo, “Jisoya turki po jibadi kipu, lake, Hemphu aduwar kidam chipakengot, ingnam aju kihang-wong ihut po asi kipi, labang asike ne lo.” 24Minonke anali yok Pharisi hel para wang kitol. 25Anali Johon poyok arjulo, “Nang Khristo kalek, Elija pota kalek, turki ta kalek, tene nang piyok baptist otedo?” 26Johon po analiyok pulo, “Ne ke lang pen baptist otedo. Nali sitem anang arajpsi do, anangyok nali chinine, 27nephel kiwang ihut po ke; anang akeng-ob arik kiphlok yokta ne michangche.” 28Jordon langjonpe apar Johon po baptist ka-ote athem long Bethani arong longsi lamehel kachiplang.

Arnam Bherabik Aso

(Mot. 3:13-17; Mrk. 1:9-11; Luk. 3:21-22)

29La-aphel arni Johon po adungyok Jisu yok wangsi kido thekngo, anang pulo, “Pirthe pe apap kikolpon Arnam Bherabik Aso yok, langot! 30Nephel ihut arleng wangsi do, anang neyok thechot, piyok pu tene anang neyok aporong para anang kido, bangpo anango. 31Anang yok nebithang ta chinine yongo; manta ne ke Israyel arleng hel aphan anang kachiklang ayok, ne lang along baptist otesi wango.” 32Aro Johon po hakhi pisi thano, “Ne suneng para Jiuli wothum badi wang kisun, aro anang aphuthak wang kisang thek hlongo. 33Ne bithang anangyok chinine yongo, manta inghosi neyok lang long baptist ka-ote ayok wang tolo, anangsi neyok kithan, “Nang ingho aphuthak Jiuli wang kisun jong theknge, Jiuli-Kangthir long baptist ka-ote anango. 34Aro ne ke anangyok thekngo, aro anangsi Arnam Aso pusi, labang hakhi pilo.”

Jisu Ango Adunhel

35Aphel arni Johon po anang bang-hini adun pen arjapsi kido, 36Aro Johon po damjongne kido amun, Jisu yok langsi thano, “Langot, holek Arnam Bherabik Aso wang do!” 37La bang-hini adun Johon po labadi kipu arjusi, Jisu aphel phel duno. 38Konam Jisu chirtingsi lango aro analiyok aphel-phel kiwang thekngo, anang analiyok pulo, “Nali pot bisarsi wangdo?” Anali anangyok pulo, “Rabbi” (lake Paklang po pusi lam pharlep do) “Nang daklong do man?” 39Anang analiyok pulo, “Wangot, aro tangsi thek hlonge.” Anali damo aro anang kido athem thek hlongo, aro anali labang arni anang pensi dolo. La-amun baji phili apor kichok. 40La bang hini adak ihutpoke Johon po kithan arjusi, Jisu aphel phel duno, anali ihut ke Andriu po, anang Simon Pitor po amuso kido. 41Anang angoke akorte Simon poyok pochaksi pulo, “Ili Khristo yok hlongo (lake Arnam karwalpo pusi lam pharlep do).” 42Anang Simon poyok Jisu adungyok wano. Jisu anangyok lang etsi pulo, “Nang menke Simon, nang Johon po aso. Nang men Kephas pusi nang tarame.” (lake Pitor poyok kaharlek acho alamke, arlong).

Jisu, Philip pen Nathanayel poyok Kataram

43La-aphel arni Jisu Galili kidamyok chipachipsi. Jisu ke Philip po yok thekngo aro anang yok pulo, “Ne phel-phel wangot.” 44Minonke Pitor po aro Andriu po kido Bethsaida arong arleng, Philip po labang arong arleng kido. 45Philip po Nathanayel poyok pochakngo aro anangyok pulo, “Ingho alam Mosi po kanong-alo wilo, aro turki helta wilo, hali anangyok hlongo; anang Najaret para kiwang Jusep po aso Jisu.” 46La-amun Nathanayel po anangyok pulo, “Najaret para penebak akime abihini ole-un ma?” Philip po anangyok pulo, “Wangot aro wang langot.” 47Konam Jisu Nathanayel poyok anang dung kiwang thekngo, anang alam pulo, “Langot, bangpo khanang Israyel arleng, anang longke jatsi akangho ingjong.” 48Nathanayel po anangyok pulo, “Nang neyok pot badi nechini lo?” Jisu anangyok pulo, “Philip po nang kataram ango, nang dumuru arongpe ari kido amunsi, nangyok thekngo.” 49Nathanayel po pulo, “Rabbi, nango Arnam Aso! Nang ngo Israyel Arecho!” 50La-ako Jisu pulo, “Nangyok, dumuru arongpe akangri thekngo pusi ne nali kipu anat neyok kroldo ma? Labang yok akithechot asal nali thek hlonge!” 51Aro anang yok pulo, “khanangsi ne nali thando, nali ethakpe aduwar kachingpu, aro Arleng Aso aphuthak Arnam atharlon helyok ka-uje aro kisun thek hlonge.”

Currently Selected:

JOHON 1: AMRI-BSI

ማድመቅ

Copy