JOHON 13

Jisu Adunhel Akeng Kicham

1Minon Kijoktang-kamai ango arni, Jisu labang pirthepe para aro Apa adung yok tikangsi apor wango pusi than uno. Anang pirthepe long kido anang inghoyok neng kidok, lahelyok kijut yokta analiyok nengdok ngo. 2Jisu yok hutur arideng kichampi ayok, Simon po aso Judas Iskariyot po anenglong si-ik kangho abudhi lut tango. Aro anali anuwe cho-jun apor, 3Jisu yok Apa ahuwit abihini anang ridengsi pekdetno, aro Arnam adungyok aro aporpo wang hlengo pusi than unsi, 4cho-jun ahong para ingthuro, abang apehel bilo, aro ipak pongho ensi abithang amicheng chikokngo. 5Laparake anang suriya ipak long lang dungo, aro adun hel akengpak champono, aro analiyok kiwen aphan amicheng kachikok pongho ape eno. 6Anang Simon Pitor po adungyok wango, Pitor po anangyok pulo, “O Hemphu, nangsi nekeng champiye ma?” 7Jisu pulo, “Ne minon pot tiki do, bangpo nang minon chithan un-eh lang, manta aphel nang abhu hlonge.” 8Pitor po anangyok pulo, “Nang nekeng jatsi cham mek.” Jisu pu phak ngo, “Ne nangkeng nang chamche lengke, ne pen nang adak adun kachiplang abhak ingjong.” 9Simon Pitor po anangyok pulo, “O Hemphu, nekeng detke nechamek, ne-ri ne-phu ta chamot!” 10Jisu anangyok pulo, “Inghosi lang chulu lo anangke akeng aparke, kicham nange ingjong, manta ingthirsi do. 11Piyok pu tene ingho anangyok champiye anang kithan un; labang aronsi anang pulo, “Nali ahuwit kangthir, ladi kalek.” 12Anang anali keng kicham patang aphel, anang bithang ape hel ensi ining phakngo, aro kicho ahongyok wang phakngsi, anang analiyok pulo, “Ne nali phan pot tikilo, nali than undo ma? 13Nali neyok Paklang po aro Hemphu pudo aro nali khanangsi pudo, piyok pu tene lake hane lo. 14Lasi ne, nali Hemphu aro Paklangpo, lake ne nalikeng chamo, nalita ihut para ihut nalikeng champon nange. 15Piyok pu tene ne naliphan katiki badi, nalita la badine tiki, lasi naliphan isi arjan nali paklango. 16Khanangsi ne nali thando, ahemphu yok ke murkiya hel akithechot kalek, aro wang kitol poyok ke murkiya akithe chot kalek. 17Lamehel alam nali abhu hlongdo, mehel nali tiki, tene nali long bor-eh choknge. 18Ne nali ahuwit aphan labang alam thanthe yong; ne inghoyok arwalo ne chinido. Manta lo-kangthir alam kichok penyok, ‘Inghosi ne him cho, labangsi nelang set-setsi akeng rungo.’ 19Labang konam chiplange, la-amun “Ne si anango,” bangpo nali kikrol un, aphan kachiplang ango si, ne minon para naliyok thando. 20Khanangsi ne nali thando, ne inghoyok tolman, anangyok ingho chidengman, anang neyoksi chidengman; aro ingho neyok chidengman, anang neyok wangkitol poyoksi chidengman.”

Jisu yok Kachobel Alam Katurki

(Mot. 26:21-25; Mrk. 14:18-19; Luk. 22:21-23)

21Labang than tangsi, Jisu jiuli long ihik-bihik chiplango aro hakhi pisi pulo, “Khanangsi ne nali thando, nali para ihut neyok chobele.” 22Anang ingho yoksi pulone, adun helke ihut para ihutyok chilango. 23La-amun ingho Jisu yok aneng kidok, bang adun ihutke kicho ahong akung aphu chingdisi kido apot, Simon Pitor po anangyok atewa pisi pulo, 24“Anang ingho yoksi pudo ma, arju not te” 25La-amun anang ladi kido badisi, Jisu anenglong chingdi dam chotsi, anangyok arjulo, “Hemphu, la bangpo ke inghote?” 26Jisu pu phakngo, “Ingho yok labang him ibeng senge long jokplup, aro inghoyok piye, anangsi bangpo.” La-amun anang him abeng ensi jokplupsi, Simon Iskaryotpo aso Judas poyok pilo. 27Labang himpo Judas po en penpano, parake anang long si-ik lutno. Jisu anangyok pulo, “Nang pot katiki yok oledo, tiki sirak.” 28Minonke anang pot chironsi labang alam pulo, bangpo kicho ahong long kangning dun abang ihut ta abhu hlonghle yongot. 29Angkhanke labadi kachiron, piyok pu tene Judas posi nohok achulpo ki-en, lasi Jisu anangyok kipu, “Kamai aphan potsi kanange doma, labang hel kinam yok; lale anang kicho kangwe abangyok penebak pi nange,” pusi Jisu anangyok bangpo thano. 30Lasi Judas po labang ahimpo chidengsi, mokol dam penpano. La-amun anuwe kido.

Akimi Angton Kipi Alam

31Konam anang olene kidam amun, Jisu pulo, “Minon Arleng Aso jortang hlongo aro Arnam ta anangyok jortang pilo. 32Arnam ta abithang anangyok jortang pibo, aro Arnam Arleng Asoyok jortang piye. 33Osohel, nalipen ne aro bekso apor yoksi do. Nali neyok bisare; aro ne Jihudi helyok kithan badi, ‘ne pot athem longyok dam, bang athemyok nali dam un-eh,’ pusi minon nali yokta nalithan do. 34Ne naliyok isi Akimi-Angton pibang, lake nali ke ihut para ihutyok nengdok chipado. Ne jibadi naliyok nengdok ngo, ladine nalita ihut para ihutyok nengdok chipado. 35Nali ihut para ihut yok nengdok chipado, pu tene labangsi ahuwit arleng, nalike ne adun hel pusi nali chiniye.”

Pitor po Hoi Kichoche Alam Jisu Katurki

36Simon Pitor po anangyok pulo, “O Hemphu, nang daklong yok te damsi do?” Jisu pulo, “Ne dak longyok damsi do, lalong nali minon nephel phel wangdun un-eh; manta aphel yok ke nali nephel phel wangdun une.” 37Pitor po anangyok pulo, “O Hemphu, minon jongsi piyokte nangphel phel nangdun un-eh? Nang nat ne jiuta nangpiye.” 38Jisu pulo, “Ne nat si nang ajiu pi-une ma? Khanangsi ne nang thando, nang neyok barthom asisik thanthe lengke, wopo kukeye.

Currently Selected:

JOHON 13: AMRI-BSI

ማድመቅ

Copy