Mateu 8
8
Kurapwa kwo mundhu wayiva no mapere
(Marku 1:40-45; Ruka 5:12-16)
1Kwakati apo obzuka kubva pa dundhu, mbungano huru yakamutevera, 2vonayi mundhu, wayiva no mapere wakaviya kwaari wakamudira, echiti: “Mambo, kudari wechida ungandishambija.” 3Naye wakatambanuja nyara yake, akamupshasa, akati: “Ndinoda, chishambijwa.” Mukuvo wondhowo, mapere ake akashambijwa. 4Na Jesu wakati kwaari: “Ngwarayi kuti usazobvunja mundhu; asi enda, ujipangijire ku mupristi, no kupa chipo icho chaakavereketa Mosi, kuti chiite chapupu kwavari.”
Kurapwa kwo muranda wo nduna yo zana
(Ruka 7:1-10)
5Kwakati anghwina mu Kaperanaume, kwakaviya kwaari nduna yo zana yechimukumbira, 6yechiti: “Mambo, muranda wangu wakavata mu nyumba echihwara ngo kuoma muviri, echihwajihwa kukuru.” 7Wakati kwoiri: “Ndinozoviya, ndimurape.” 8Asi nduna yo zana yakapingura ikati: “Mambo, andisisiri kuti iwewe unghwine pasi podenga rangu; asi nangayi ngo izwi rega, no muranda wangu unozorapika. 9Ngokuti ininivo ndiri mundhu unotongwa, ndina masocha ari pasi pangu; neni ndinoti ku uwu, enda, naye unoenda; no kuna umweni, viya, naye unoviya; no ku muranda wangu, itayi ichi; naye unochiita.” 10Naapo Jesu azwa ichi, wakashama, wakati kwavari vayimutevera: “Zvirokwazvo andizivi kumbovona kugonda kukuru kwakadari, haiwa pikija no ku vaIsraeri. 11Neni ndinoti kwomuri kuti vazhinji vanozoviya kubva kumabvazuva, no kumavirira, vanozogara pasi na Abrahama, na Isaka, na Jakobe mu Umambo hwo mu gore. 12Asi vana vo Umambo vanozokhandihwa mu chidima chiri kunja; kunozovapo kuchema, no kukwetsana kwo mazino.” 13Na Jesu wakati ku nduna yo zana: “Enda, ngakuitwe kwouri kudari ngo kutenda kwako.” No muranda wakaponeswa ngo iyo nguva.
Jesu unorapa vatenda vakawanda
(Marku 1:29-34; Ruka 4:38-41)
14Naapo Jesu anghwina mu nyumba ya Pedru, wakavona vambiya vake vakavata vechihwara ngo kujiya muviri. 15Naye wakavapshasa ngo nyara yake, no muviri wakatondhora; navo vakamiruka vakamushandira. 16Kwoyita madekoni, vakaviisa kwaari vazhinji vayiva no mabzoka, naye wakambirimbija mweya iyo ngo izwi rake, wakarapa vese vaihwara; 17#Vonayi kuna: Isa. 53:4.kuti kuzarisike ukwo kwakavereketwa ndi Isaya muprofeti, echiti: “Iye ambhwine wakatora ndhenda jedu, wakatwara kuhwara kwedu.”
Mukoka wokutevera Jesu
(Ruka 9:57-62)
18Zvino Jesu echivona mbungano huru yechimutendeneja, wakavapanga kuti vaambuke mwombera. 19Kwakaviya kwaari mutari, wakati kwaari: “Mujijisi, ndinozokutevera apo pounoenda.” 20Na Jesu wakati kwaari: “Muhwe jina maguru, no shiri jo mu gore jino zvisaki; asi Mwana wo Mundhu aana no po kutsamira musoro wake.” 21No umwe wo vajiji wakati kwaari: “Mambo kutanga nditendere kuti ndiende ndichire baba wangu.” 22Asi Jesu wakati kwaari: “Nditevere, uregere vakafa kuti vachire vakafa vavo.”
Jesu unonyaraja bepo
(Marku 4:35-41; Ruka 8:22-25)
23Naanghwina mu ngarava, vajiji vake vakamutevera, 24vonayi, kwakabuda bepo guru mu jombe, ngokudaro ngarava yakadumaijwa ngo mavimbi; asi iye wayinga wakavata. 25Vakaviya kwaari, vakamumusa, vechiti: “Mambo, tiponese; tofa.” 26Naye wakati kwavari: “Munombotya ngenyi, imwimwi munokutenda kudodoko?” Naapo wakamiruka, akanyaraja bepo no jombe; kwakavepo kutura kukurutu. 27No vandhu vakashama, vechiti: “Mundhu uwu uri wakadini, kuti bepo no jombe zvinomupurukira?”
Kurapwa kwo vanarume vaviri vayiva no mweya yakashata
(Marku 5:1-20; Ruka 8:26-39)
28 # 8:28 Ndharaunda iyi inozwi Gadhara inowanika gumi ro makiromitha kapharamade ra kusi kwo gandhwa ro Tibheriadhe. Naapo waguma mwombera mu nyika yo vaGadhareni, kwakasongana naye vandhu vaviri vayiva no mabzoka vechibva mu makuva, vano ushungu hunotyisa, ngokudaro kwayinga kusina no mundhu waikhirira ngo iyo njira. 29Navo vakadanijira vakati: “Tinenyi newe, iwewe, Mwana wa Mwari? Waviya pano kutitambuja usati waguma mukuvo here?” 30Zvino kwayivapo mushambi wo nguruve zhinji jechihava pandharauko kubva kwavari. 31No mabzoka akamukumbira, akati: “Kudari wechitibudisa, titumeyi tinghwine mu mushambi wo nguruve.” 32Naye wakati kwaari: “Endayi!” Nao akabuda, akanghwina mu nguruve. Vonayi mushambi wese wakabzuka ngo pa gomokomo kuenda mu jombe, jakafa, mu kumwa. 33Avo vaihavisa vakatiza, vakaenda mu dhoropa vakaverenga zvese, izvi zvayinga zvakaitwa kuna avo vayiva no mabzoka. 34Vonayi, vo dhoropa rese vakabuda kwooshongana na Jesu. Kwakati vamuvona vakamuengerera kuti abve mu migano yavo.
Currently Selected:
Mateu 8: CINDAU NT
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Novo Testamento Cindau © Bible Society of Mozambique, 2023.