SAN LUCAS 17
17
Reꞌ take nahsil raj tahkanel i Jesuscurman chi naquicojom wachchi wilic rajawric
(Mt. 18.6-7,21-22; Mr. 9.42)
1Chiri̱j chic ruꞌ, reꞌ Jesus jeꞌ woꞌ chic wili xikꞌor queh cablaj chi nahsil raj tahkanel:
«Chiꞌnchel i hoj kehtꞌalim chi maꞌxta bih ra̱j chi maꞌ ta nak enwihꞌic reꞌ nyojbic reh capew-bal, xa reꞌ laꞌ hin nikꞌor aweh tak chi kꞌe̱ꞌ ntiꞌbic nicꞌux chiri̱j 2i hab wach jenoꞌ aj tijinel enyojbic ricapew-bal jenoꞌ queh take aj tahkem wi̱n wili reꞌ quikꞌochsam chic wach i ca̱mna jeꞌ ricab i jenoꞌ tꞌuch acꞌun, sakbih nak chi reh chi encuturic jok pa richamil haꞌ chi bacꞌlic chi ralak chiwach jenoꞌ maꞌ laj abaj ncamanic chi queꞌbal. Jeꞌ reꞌ nikꞌor maj kꞌe̱ꞌ woꞌ chic rinimal tiꞌcꞌaxic nariyeꞌeric china̱ ruꞌum i Dios maꞌ jeꞌ ta ti ricab i tiꞌcꞌaxic enbanaric reh jenoꞌ waj tahkanel. 3Jeꞌ reꞌ kꞌuruꞌ chawicꞌraj awi̱b tak. Ma̱yoj tak ricapew-bal awas acha̱kꞌ tak jeꞌ ricab wi xmahcanic chawach tak. Wi jeꞌ reꞌ xiban chawach tak, chakꞌil tak eh chacuy woꞌ tak rimahc naripahkaj ricuybal aweh tak. 4Jeꞌ ricab wi chiwach jenaj kꞌi̱j, wukpech ok nchel enchalic awu̱cꞌ tak chi ripahkaljic cuybal rimahc ruꞌum chi wukpech ok xmahcanic chawach tak, chacuy woꞌ tak rimahc ru̱cꞌ i juꞌjun pech eripahkaj ricuybal aweh tak, nqui Jesus queh.
5Naxquibiraj chi jeꞌ reꞌ take nahsil raj tahkanel, jeꞌ wili xquikꞌor reh:
«Ha̱w, reꞌ hat xoj-atoꞌbej chi ricojoric wach chi wilic awajawric. Ruꞌum aj reꞌ yuꞌna nkapahkaj aweh chi koj-atoꞌbej woꞌ chic chi enkacoj wach chi ruꞌum awajawric i hat enkaꞌn ribanaric i xakꞌor keh chiri̱j i cuyuj mahc, nqui take reh.
6Reꞌ Jesus jeꞌ woꞌ chic wili xikꞌor queh:
«Reꞌ hat-tak wi enacoj tak wach chi naca̱t woꞌ tak chic nitoꞌbem ru̱cꞌ wajawric, naribanam chi kꞌe̱ꞌ chic ransil akꞌorbal tak jeꞌ ricab ransil i tꞌuch rijaꞌquil i che̱ꞌ Mosta̱sa ribihnal. Reꞌreꞌ to̱b ta til tꞌuch ti nantiquiric jok til nqꞌuihic johtok cu rehtal riban jenaj nim laj che̱ꞌ. Jeꞌ aj woꞌ reꞌ encꞌuluric ru̱cꞌ akꞌorbal i hat-tak ru̱cꞌ nitoꞌbal, wi eta nak nakꞌor tak reh i che̱ꞌ sico̱moro wili chi erichuk je ri̱b reꞌ wilic wi̱ꞌ eh chi ar chic pan nim laj haꞌ eno̱j wihꞌok, enak tiribiraj tak, nqui Jesus queh.
Maꞌ jenoꞌ camanic raj banaricxa reh rakbal lokꞌil
7Chiri̱j i wili reꞌ Jesus jeꞌ woꞌ chic wili xikꞌor queh:
«Xa kakꞌor reꞌ hat-tak wilic ok jenoꞌ awaj tzꞌeꞌ wa̱ch tak cꞌahchiꞌ ok ricamanem cho pa̱m awabixba̱l tak on cꞌahchiꞌ ok rilom ponok awaca̱x tak. Nasoljok cho reh ricamaj jeꞌ na nak wili enakꞌor tak reh chi ricꞌuluric?:
‹Le̱y, toque̱n cho. Toque̱n nah me̱xa, chaꞌn awaꞌ, tiqui na nak tak reh?
8«Maꞌxta, majeꞌ? Reꞌ laꞌ nak enakꞌor tak reh jeꞌ wili:
‹Le̱y, chajal cho awi̱b. Toque̱n chi ritikꞌinjic niwaꞌ. Nok tiklic chic chiꞌnchel, chayew wi̱n nah me̱xa eh nok nicohlam chic niwaꞌ, cu reꞌ aj chaꞌn aweh i hat, nqui nak enakꞌor tak reh.
9«Chiri̱j chic reꞌ, niban aweh tak i birinic wili: Nok ribanam chic chiꞌnchel ricamaj pahkamaj reh aj camanom reꞌreꞌ, riwi̱ꞌ na chi reh ajabe̱s chi cu naritioxem ricamaj i raj camanom? Chi wi̱n hin maꞌxta. 10Wi jeꞌ reꞌ nbanaric xa ayuꞌ wach acꞌal, jeꞌ woꞌ reꞌ awu̱cꞌ hat-tak ru̱cꞌ i camanic niyew chana̱ tak, ma̱ban tak i camanic reꞌreꞌ chi xa ruꞌum ta nak chi nawa̱j chi enyeꞌeric alokꞌil tak. Raj nchel hat-tak, nachakꞌor tak ribiral acamaj xaꞌn tak jeꞌ wili chakꞌor tak:
‹Reꞌ hoj xa reꞌ woꞌ camanic riyeb chi kana̱ i Jesus chi raj camanom, xa reꞌ woꞌ reꞌ nkaꞌn ribanaric. Jeꞌ aj reꞌ ruꞌ maꞌ ricꞌul ta chi keh chi nariyeꞌeric kalokꞌil ru̱cꞌ kacamaj nkaꞌn, tiquirok tak, nqui Jesus queh.
Reꞌ Jesus xesaj lok i xilim chiqui̱jtake lajeb chi winak
11Naxicohlaj cahnok kꞌoric cu̱cꞌ riqꞌuihal tinamit quitahkanic reh, reꞌ Jesus xichop woꞌ chic ribe̱h chi ojic ar Jerusalen. Jeꞌ aj reꞌ nok cꞌahchiꞌ riqꞌuic ponok pan jenaj yeꞌa̱b reꞌ wilic chi quixilac riyukꞌul Sama̱rya chꞌi̱l Calile̱ya 12ar chi chi̱ꞌ lok ricꞌulaꞌt i yeꞌa̱b reꞌreꞌ, lajeb take winak xilim qui̱j naxquilow cho wach i Jesus, xichalic chi ricꞌuluric. Reꞌ take reꞌ xa cu naht cho ru̱cꞌ, xquipahba̱ꞌ cho qui̱b 13eh xquiqꞌuer cho quichi̱ꞌ chi jeꞌ wili:
«Jesus aj tijinel keh, chaquetelej ti kawach, nqui take cho reh.
14Chalic i Jesus naxilow je quiwach take winak reꞌreꞌ jeꞌ wili xikꞌor je queh:
«Hiy tak cu̱cꞌ aj kꞌahsem si̱ chiwach i Dios eh chacꞌuhtaj cho awi̱b tak chi quiwach ilbal reh chi maꞌxta chic ayaꞌbilal tak, nqui je queh.
Reꞌ take lajeb chi winak xilim qui̱j reꞌreꞌ xquicꞌam na̱ chaj bih xkꞌormojic queh ruꞌum Jesus eh nok cꞌahchiꞌ cojic wach be̱h, ar aj xelic lok quiyaꞌbilal. 15Jenaj queh take winak reꞌreꞌ naxilow chi jeꞌ reꞌ xcꞌuluric ru̱cꞌ xsoljic woꞌ chic cho ru̱cꞌ i Jesus chi xa qꞌueric chic chi̱ꞌ chi ritioxjic johtok reh Dios. 16Naxponic ru̱cꞌ xuhquic cok chiwach eh xoquic chi ritioxjic reh ricꞌsjic reh riyaꞌbilal. Ar ajic reꞌ Jesus xicoj rehtal chi aj Sama̱rya poꞌ i winak reꞌreꞌ. 17Chiri̱j chic ruꞌ reꞌ Jesus jeꞌ wili xikꞌor:
«Reꞌ hin lajeb take xwesaj lok i xilim chiqui̱j, raj take beleje̱b kꞌuruꞌ chaj bih xquicꞌul 18chi maꞌ hab ta chic wach queh xisoljic cho chi ritioxjic johtok reh Dios? Xa reꞌ ti wach i jenaj winak wili jeꞌ ru̱cꞌ maꞌ reꞌ ta ra̱ꞌ riꞌsil cho maꞌ Israhel xcꞌulic lok chi ritioxjic i chaj bih xbanaric ru̱cꞌ, nqui xikꞌor.
19Chiri̱j chic ruꞌ jeꞌ wili xikꞌor reh winak aj Sama̱rya:
«Ha̱w, reꞌ hat xiqꞌuic ayaꞌbilal maj xacoj wach chi wilic wajawric chi esenic yaꞌbilal. Yuꞌna kꞌuruꞌ tipa̱ꞌ johtok, tisoljen woꞌ chic je cu̱cꞌ take aj kꞌahsem si̱ chiwach i Dios eh chacꞌuhtaj queh chi maꞌxta chic ayaꞌbilal, nqui reh.
Reꞌ naricꞌuluric nachirak chorikꞌijil i kꞌatoj kꞌoric naribanam i Jesus
(Mt. 24.23-28,36-41)
20Chipam woꞌ i tinamit reꞌreꞌ, reꞌ take cow laj aj niminel reh Cꞌuhbal Yeꞌo̱j reh Moyses xquibiraj reh Jesus jaruj nponic rikꞌijil chi narikꞌatam kꞌoric i Dios chi quina̱ cꞌacharel. Reꞌ Jesus jeꞌ wili xikꞌor queh:
«Naponok rikꞌijil nok reꞌ Dios narikꞌatam kꞌoric chi quina̱ cꞌacharel maꞌ hab ta wach narikꞌoric aweh tak chi na̱tikꞌa̱b ta nak tak awi̱b ru̱cꞌ riponic. 21Ruꞌum chi maꞌ narak ta tak chiri̱j chi reꞌ Dios wilic chic chaxilac tak chi kꞌatal kꞌoric, maꞌ hab ta chic wach narikꞌoric aweh tak chi cꞌulic chic lok rikꞌijil chi reꞌ Dios xoquic chic chi kꞌatoj kꞌoric chi quina̱ tinamit, nqui queh.
22Chiri̱j ruꞌ jeꞌ woꞌ chic wili xikꞌor queh take quitahkanic reh:
«Chawach tak johtok nariwihꞌic take kꞌi̱j chi jaꞌxta pe chic awilom tak wach juncꞌam ok queh kꞌi̱j chi cꞌahchiꞌ chic qui̱n chi kꞌatoj kꞌoric i hin Acꞌunbe̱s reꞌ wilic wajawric chi quina̱ cꞌacharel, to̱b ta laꞌ xa nawa̱j nak tak chic chi na̱wilom tak wach jenoꞌ queh kꞌi̱j reꞌreꞌ. 23Chiwach aj take kꞌi̱j reꞌreꞌ, wilic take naquiyeꞌbic rehtal aweh tak chi jeꞌ wili naquikꞌorom:
‹Reꞌ Jesus ayuꞌ wilic, nqui naquikꞌorom.
«Wilic woꞌ toco̱m chic jeꞌ wili naquikꞌorom:
‹Maꞌxta, reꞌ Jesus wuluꞌ wilic, nqui naquikꞌorom.
«Coric, jeꞌ reꞌ naquikꞌorom ra̱j laꞌ hat-tak ma̱tahkej tak je take. 24Jeꞌ reꞌ nikꞌor maj jeꞌ ricab chi narirehpaj cho risakomil i cohok ar pan taxa̱j, cu nilmijic cho chi junsut wach acꞌal, jeꞌ woꞌ reꞌ naricꞌuluric wu̱cꞌ i hin Acꞌunbe̱s reꞌ wilic wajawric chi quina̱ cꞌacharel, chi reꞌ kꞌi̱j napꞌuhtok johtok wi̱ꞌ rikꞌijil nikꞌatbal kꞌoric chi quina̱ tinamit naricꞌuhtunic woꞌ chi quiwach chiꞌnchel cꞌacharel. 25Reꞌ cok ruꞌ reh chi naricꞌuhtunic lok wach i kꞌi̱j reꞌreꞌ, curman chi pe̱t nanikꞌahsjic pan quikꞌab take sol aj Ro̱ma cuꞌum take wich cꞌacharel jeꞌ ru̱cꞌ maꞌ xquicꞌul ta nicꞌuhbal eh nok wilqui̱n chic pan quikꞌab ruꞌ, naqui̱nquiyeb chi tiꞌcꞌaxic cu rehtal naqui̱nquicansam je.
26«Reꞌ aj reꞌ ruꞌ naricꞌuluric chi pe̱t. Chiri̱j chic ruꞌ cu rehtal riponic rikꞌijil nikꞌatbal kꞌoric chi quina̱ cꞌacharel i hin Acꞌunbe̱s reꞌ wilic wajawric chi quina̱ cꞌacharel, reꞌ take tinamit wach acꞌal naquicꞌacharic chi jeꞌ ricab xicꞌacharic cho take tinamit pa rikꞌijil cho ricꞌacharic i maꞌ Noheh. Jeꞌ reꞌ nikꞌor maj 27pa rikꞌijil cho ruꞌ, reꞌ take tinamit xa suk chic quicꞌux quiꞌiqꞌuic kꞌi̱j pan tak ninkꞌi̱j on pan tak caxarahil eh maꞌ xquicoj ta soꞌ rehtal chi chalic reh jenaj tiꞌcꞌaxic chi quina̱. Jeꞌ aj reꞌ xcaꞌn cu rehtal xoquic i Noheh chꞌi̱l take raj pan pa̱t chipam i jenaj maꞌ laj cano̱wa jeꞌ riwi̱ꞌ pa̱t eh chi jeꞌ reꞌ, naxchalic i jenaj rinimal jab chꞌi̱l buht haꞌ xelic cho pan acꞌal xisachabej quiwach chiꞌnchel take tinamit maꞌ xca̱j ta quicojom wach i kꞌoric xiban i Noheh.
28«Jeꞌ woꞌ reꞌ, reꞌ take tinamit ayuꞌ wach acꞌal naquicꞌacharic woꞌ jeꞌ ricab xicꞌacharic cho take aj Soro̱ma pa rikꞌijil cho ricꞌacharic i Lot maj pa rikꞌijil cho ruꞌ, reꞌ take tinamit reꞌreꞌ xa quikajic quijohtic woꞌ chic chi banoj tak ninkꞌi̱j, chi banoj tak cꞌa̱y, chi banoj tak lokꞌ, chi tikꞌinic tak pa̱t, jeꞌ woꞌ chi banoj tak tic eh maꞌ xquicoj ta soꞌ rehtal chi chalic reh jenaj tiꞌcꞌaxic chi quina̱. 29Jeꞌ aj reꞌ riwi̱ꞌ cꞌacharic ncaꞌn take aj Soro̱ma cu rehtal xelic je i Lot chipam i tinamit reꞌreꞌ chꞌi̱l take raj pan pa̱t. Ar aj ruꞌ naxikajic cho nimak tak kꞌa̱kꞌ pan taxa̱j chꞌi̱l rikꞌolil, xisachabej quiwach i tinamit reꞌreꞌ.
30«Ru̱cꞌ aj take qui̱b ribiral reꞌreꞌ, nkarak chiri̱j chi nicꞌ paꞌ wach cꞌacharic xcaꞌn cho take tinamit aj najtir kꞌi̱j reꞌreꞌ chi maꞌ xquicoj ta soꞌ rehtal i tiꞌcꞌaxic xchalic chi quina̱, jeꞌ woꞌ reꞌ cꞌacharic nacaꞌnam take tinamit ayuꞌ wach acꞌal cu rehtal rirak cho rikꞌijil i cꞌuhtbal reh rinimal wajawric wilic i hin Acꞌunbe̱s reꞌ wilic wajawric chi quina̱ cꞌacharel. 31Chi jeꞌ aj reꞌ naricꞌuluric chacoj tak rehtal i wili: Nachirak cho rikꞌijil i cꞌuhtbal reh wajawric, jeꞌ ricab wi wilic ok nchel jenoꞌ aweh tak rij ripa̱t wilic lok, maꞌ toquic tak chic cok chipam, on wi pan awabi̱x wilca̱t tak cho, maꞌ tisoljic woꞌ tak chic cho pan apa̱t tak chi ricꞌamaric paꞌ bih aweh tak. 32Til cꞌolok pan acꞌux tak nicꞌ wach xicꞌul rehqꞌue̱n i Lot naxiyew je ricapew-bal china̱ i paꞌ bih reh xicana̱ꞌ cho! 33Jeꞌ reꞌ ajic, chaꞌn tak jeꞌ ricab nikꞌor aweh tak maj hab wach reꞌ xa reꞌ wach i risiqꞌuiric i sukquil cꞌuxlis riyew wi̱ꞌ ricꞌux pa ricꞌacharic, reꞌreꞌ maꞌxta woꞌ rehcham i junelic cꞌacharic ru̱cꞌ i Dios, ra̱j nchel i maꞌ rikꞌor ta bihnal ricꞌuluric i tiꞌcꞌaxic nbanaric reh, reꞌreꞌ narehcham i junelic cꞌacharic.
34«Ruꞌum chi wilic take nquiyew quicapew-bal china̱ i paꞌ bih wilic queh, til coric maꞌ chiꞌnchel ta cꞌacharel naquesmejic take chiwach i tiꞌcꞌaxic reꞌreꞌ. Kakꞌor wi pan jenoꞌ ok chakꞌab enchalic i tiꞌcꞌaxic reꞌreꞌ, wi wilic quib ok chi cꞌacharel wiric ncaꞌn jenaj queh naresmejic chiwach i tiꞌcꞌaxic eh reꞌ jenaj chic naricanabjic cahnok chipam. 35Jeꞌ woꞌ reꞌ naricꞌuluric wi pan kꞌi̱j ok nchel enchalic i tiꞌcꞌaxic. Wi wilic quib ok chi ixok queꞌc ncaꞌn chi quichꞌi̱l qui̱b, xa jenaj woꞌ queh naresmejic je chiwach i tiꞌcꞌaxic eh reꞌ jenaj chic naricanabjic cahnok chipam. 36On wi quib ok chi winak camanic ncaꞌn pan abi̱x, jenaj queh naresmejic je chiwach i tiꞌcꞌaxic eh reꞌ jenaj chic naricanabjic cahnok chipam, nqui Jesus queh.
37Naxquibiraj chi jeꞌ reꞌ, reꞌ take quitahkanic reh jeꞌ wili xquikꞌor reh:
«Ha̱w, haj naricꞌulmujic i tiꞌcꞌaxic reꞌreꞌ? nqui take reh.
Chalic Jesus jeꞌ wili xikꞌor queh:
«Jeꞌ ricab nanehtꞌaljic chi haj paꞌ nquimol wi̱ꞌ qui̱b take cꞌuch, ar woꞌ wilic jenoꞌ camnak chicop, jeꞌ woꞌ reꞌ i tiꞌcꞌaxic reꞌreꞌ, paꞌ woꞌ tinamit nanikꞌahsjic wi̱ꞌ pan quikꞌab take sol aj Ro̱ma ar woꞌ naricꞌuluric, nqui Jesus queh.
Currently Selected:
SAN LUCAS 17: poh
ማድመቅ
Share
Copy
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2012, Wycliffe Bible Translators, Inc. All rights reserved.