KAHBHAO 6
6
Hangkulilei Mang
1Mechem kahdoknyü kü hangku dahen pangpa, yiükhathü bühteke, 2Kahvang hathüi hangkuli yiükha nela meipü ee, hatü jomi jepüthü mü shem yem. 3Hahepak kü Shembüpai, “Ngei shennyakthü kü den den nyuhen nehanpih; mehenangkü jomphongü dihen shennyakthü; jomei denü bong 120 mon nyuhen” shei e.
4Hathü nyih kü hatü haphei kao Nephilim am hapa kahdoknyülei nyu. Mechem Kahvang hathüi hangkulei yiükhathü touei peipa, jomi hathü mü hapeüthü büh. Jomü aivang mebü hampa hatü bümlong wong kohpü men-e shennyakthü nyuteke.
5Kahdoknyülei nyupü hangkulei mang ahshi longshi khih, hatü düngei jomei mongei ten mon deihnyüke shei Shembüpai veiteke. 6Kahdoknyülei büpai hangku lingei tuhpü nangkü Shembüpa mongshang, hatü büpalei mong kü tüngteke. 7Hanangkü Shembüpa i, “Kahdok shak kü ngei lingpü hangku, kahdokei kamteipü yemhimakthü hatü shangouthü thitei yaktükhen hih– ngei hathü lingpü nangkü ngei mongshangnyüke” shei e. 8Shejao Noah payü Shembüpa i monghahhen mü nyuteke.
Noah Jung
9Hathüyü Noahlei hühihathü: Noah-ü daülangshemshepü shennyak nyu, hatü büpa hepak kü hangku khongkü eela neshiüpü yangnyu, hatü büpa Kahvang mü kam. 10Noahlei hapeüthü jem nyu: Shem, Ham hatü Japheth.
11Shaang Kahvang touei kahdoknyü-ü mang monha jüteishangteipai maei nyu. 12Mekei kahdoknyü tendaipa, hangkuthü peü mang lem kü daikem. 13Hanangkü Kahvangi Noah kü, “Ngei hapa hangkuthü mahtükkemhen hih; mehenangkü kahdoknyü kü hathü homei jüteishangteipai madaiteke. Ngei hingmei hangku hatü kahdoknyü nyiphen dohtükhen. 14Hanangkü nüngi am shing pü#Hebrew shah kü pü men neleki nyüke. meipü yah-ei Jahas#Ai kü shennyak hatü yemhimakthü nenyuaokhen. Hanangkü Jahas shei lepnyüpa. hük lingtü halei dung lingtuh, hatü shakhimong kü müh-i shaoktuh. 15Nüngi hapakei lingtuh: Hapa jahas-ü feet 450 lushi, ba kü feet 75, shaopü kü feet 45 lingtuh. 16Hapa kü adok küptuh, hatü hapayü dok philei inch 18 aongei lingtuh, hatü haam lemei shaden hük jiampa jaan, hatü jaandokpa thahshi lingtuh. 17Ngei kahdoknyülei bünghiyang lenei vangsho phangkü nyupü yem, hatü halei nyupü peü mahtükhen vang keiphahen. 18Shejao ngei nüng mü vangpüshuwpü hük linghen; nüng, anyüha, hapeüthü hatü jomphongei nyühathü peü jahas mongei shütuh. 19Nüngi yemmü nyupü yemlem peü kübü bihibaong shei nüng mü yemmü nyuhen leituh. 20Oulem peü, yemhimak hatü kahdokei kamteipü yemhamakha peü nüng mü yemmü nyuhen peikahen. 21Nüngi hahying lemphü am shem hatü hathü hahhen shingvaishi kotuh” shei e.
22Kahvangi epükei Noah-i lemphü dük.
المحددات الحالية:
KAHBHAO 6: PHOMBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.