JOHAN 1
1
Akang Yu
1Adikehdi Yu licho, ko Yu tsü Tsingrangba te licho, ko Yu tsü Tsingrangba thsacho. 2Adikehdi abi Tsingrangba te licho. 3Abi khu Tsingrangba-nü lüpcho külüpcho; athrichola tusü abi müzehpü mükülüp. 4Abi chah akang licho, ko hiba akang tsü müyurü atsingse thsacho. 5Atsingse tsünü amala vire, ko ama tsünü hütsü khodesü mümehsohre.
6 #
Mat 3.1; Mrk 1.4; Luk 3.1-2 Tsingrangba chahnü müthehcho nyitsarü khüdu, anengnü Johan licho. 7Apümnü yusi tsü yuchi yudsisohnung nyitsarüte atsingse nengdang tsü yonung müthehcho. 8Abi atsingse tsü mah; abi atsingse nengdang yonung rocho. 9Yuje atsingse tsü limih la ro amüi tsurü atümung chah vijüre.
10Yu tsü limih la licho, ko abi khu limih tsü külüpcho, ta limihnü abi mümüdhecho. 11Abi apu limih yang rocho, ta anyitsarünü abi mükhyüchocho. 12Ta abi khyüchorü atümung, sürünü abi nengla yudsicho, arüh khyang abinü Tsingrangba tsurü kangnung zii jücho; 13sürü ashüh mahkhang shutsa mahkhang nyitsarü lümcho la müsuro ta Tsingrangba chahnü surocho.
14Yu tsü nyitsarü kangpü achomang ko yujenü jeng Ihsa yola licho; Au chahnü Atsudhre ahechi tsü Ihsanü nguko.
15Johan-nü abi nengdang chocho. Abinü züde yocho, “Abi I khanglang rore, ta abi I tenü adiuba, tunüo abi ‘Ih müsuro denü lijungcho ko sü nengdang Ihnü yocho, abi tsü hivie.’ ”
16Abi akükyüh achomang lanü Ihsa atümungnü amüwa khüdu khanglang khüdu nguko. 17Tsingrangba-nü Yuzeng tsü Mosa khu jücho, ta achomang ko yuje tsü Jisu Khrista khunü rocho. 18Sünüsü Tsingrangba khodesü müngudhing. Ta atsudhre, sü Au dreng chah liro, abinü mishajücho.
Baptijüba Johan Yusi
(Mat 3.1-12; Mrk 1.1-8; Luk 3.1-18)
19Jerusalem la Jihudarü zirünü Johan yanglang abi te, “Nüh süo” pü tsingdhingnung Bebürü ko Levirü khürü müthehcho.
20Johan-nü lalingnung mütütohnyünyeh, ta mishanü tsidsa yocho, “Ih Mesia tsü mah.”
21 #
Azk 18.15-18; Mal 4.5 Arühnü tsingcho, “Khang, nüh süo?” “Nüh Elija mah-o?”
Johan-nü lalingcho, “Ih mah.”
Arühnü tsingcho, “Nüh azikehrü#1.21 Azikehrü: Mesia ronung shulüm tsehleh sobho rorüh longdicho. tsü mah-o?”
Abinü lalingcho, “Mah.”
22Arühnü tsingcho, “Khang nüh sünang ihrü te young. Sürünü ihrü rosohcho arüh yang alalingba khüdu hiwünungbae. Nühnü nüpu nengdang tu yonung?”
23 #
Isa 40.3
Johan-nü Isaya azikehrü yu hironü lalingcho, “Lipilih la züdeba yuva tsü Ih, Abüdongba lang tsü müchongkhüti külüpm!”
24Hütsüde Farisirü-nü müthehba yusi hirü tsünü Johan te tsingdhingcho, 25“Nüh Mesiasü, Elijasü, ko azikehrüsü mahkhang, nühnü tuepü baptijüro?”
26Johan-nü lalingcho, “Ihnü kih la baptijüre, ta nührünü mümüdhepü nührü yola nyüh khüdu lile. 27Abi I khanglang tsehle, Ihlü abi jingkhüm lehchehnung mii müdekheng.”
28Hiri apüm Bethany la Johan-nü baptijo rachiba Jordan yongkhi khüulang tikehcho.
Tsingrangba Sanza
29Nyümong khüu tsü, Johan-nü Jisu abi yanglang rochi ngu yocho, “Alimih münyi hitsibong Tsingrangba Sanza tsü dhing! 30‘Abi I khanglang tsehle, ta abi I tenü adiuba, tunüo abi Ih müsuro denü lijungcho ko sü nengdang Ihnü yocho, abi tsü hivie.’ 31Abi sü donang Ihnü mii mümüdhe, ta abi Israelrü khyang müdhesohnung nengdang Ihnü kih la baptijo rocho.”
32Johan-nü yuzi hi jo yocho: “Anbü tsü mümüdhrü kyo ninglangnü jüro abi chah püm Ihnü ngucho. 33Ihnü ade yingcheh hütsü abiepü mümüdhe, ta Tsingrangba sünü kih la baptijünung Ih müthehcho, abinü Ite yocho, ‘Anbü tsü jüro nyüh khüdu chah püm nühnü ngunung; hütsü sünü Anbü Amüsa la baptijüro abi tsü lile.’ 34Johan-nü yocho, Ihnü hütsü nguko ko Ihnü nührü te abi Tsingrangba Tsurüepü yore.”
Akhudiba Jisu Monoti
35Nyümong khüu Johan hütsüla apu mono anyüh yola yacho, 36ko abinü Jisu tsicho ngu yocho, “Tsingrangba Sanza tsü dhing!”
37Mono anyüh tsünü abinü yocho tsü yuchi Jisu khanglang iiwücho. 38Jisu-nü ximüla arüh abi khanglang rocho ngu yocho, “Nührü tu yangchiro?”
Arühnü lalingcho, “Nüh khüde liro, Rabbi?” (Adüzü “Adorü.”)
39Abinü lalingcho, “Rung ko dhing.” (Hütsü anyüzehlang müyü mücheh licho.) Ko arüh abi iiwücho, ko abi lichah tsü ngucho. Hütsüla nyümong chang abi yola licho.
40Anyüh yola khüdu tsü Simon Peter ani Andreu thsacho. 41Akhudiba abinü amung Peter ngu abi te yocho, “Ihrünü Mesia tsü nguko” (adüzü “Khrista.”) 42Hütsüpü abinü Jisu yanglang Simon nowücho.
Jisu-nü abi chah dhing yocho, “Nüh Johan tsurü Simon, ta nüte Kefas#1.42 Kefas: Kefas pü dsiba tsü Aramaik yu; ko Petro, Petra, Peter: Hiri tsü Greek yu; ko anyüdingnü lung te dsire. pü dsinung.” (Adüzü “lung.”)
Jisu-nü Filip ko Nathanael Dsicho
43Nyümong khüu Jisu-nü Galil lang wünung dhrongchehcho. Abinü Filip shiro abi te yocho, “I yola rung!” 44(Filip tsü Andreu ko Peter nyüh liba Bethsaida town lanü licho.) 45Filip-nü Nathanael shiro abi te yocho, “Mosa-nü Yuzeng vakhala ko azikehrütinü sü nengdang thrahcho hütsü ihrünü nguko. Abi Nazaret lanü Josef tsurü Jisu.”
46Nathanael-nü tsingdhingcho, “Nazaret lanü mii lango atsa chürochehnung mah-o?”
“Rung ko dhing” Filip-nü lalingcho.
47Khode Jisu-nü Nathanael abi yangro ngucho, abinü abi nengdang yocho, “Hila Israelrü khung khüdu lile; abi chah tu mülang mühle!”
48Nathanael-nü abi te tsingdhingcho, “Nühnü khüta Ih müdhero?”
Jisu-nü lalingcho, “Filip-nü nüh müdsiede, nüh ngurüsih dong pohki pümdenü, Ihnü nüh nguchoe.”
49Nathanael-nü lalingcho, “Adorü, nüh Tsingrangba Tsurü! Nüh Israelrü yangthsaba!”
50Jisu-nü yocho, “Ihnü nüh ngurüsih dong pohki püm nguchoepü yochonü nühnü yudsirü mah-o? Hi tenü dee adiu nühnü ngunung!” 51#Lip 28.12Ko abinü arüh te yocho, “Ihnü nührü te yutsatsa yore: Ning khangthrupü Tsingrangba riwürüti Nyitsarü Tsurü michah jüroli-tuwüli ko nührünü ngunung.”
المحددات الحالية:
JOHAN 1: SANGBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.