SIEMCHILBU 12
12
Pasian in Abraham ahatna
1 #
Nasep. 7.2,3; Heb. 11.8 Tualeh Mangpa’n Abram kungah, “Na gam leh na tanaute leh napa innsung akipat pawt inlen, gam ka hing etsah ding langah pei in achi hi. 2Tualeh Nam thupitah in hing siem vangin, guol hing zawl vangin, na min suthupi vang, tualeh nang guolzawlna na hi ding. 3#Gal. 3.8Tualeh nang hing guolzawlte guolzawl vangin, nang hing hamsiette hamsiet vangin, tualeh nangma apat leitunga nam zousie guolzawl in umva uh,” achi hi.
4Tualeh Abram khu Mangpa’n akung a agen bangin akipankheta a, Lot in zong azui hi. Tualeh Haran a kipat apawtkhiet laiin Abram khu kum sawmsagi leh kum nga ahi. 5Tuachi’n, Abram in azi Sarah, anaupa tapa Lot leh anei alam zousie u’leh Haran khuo a ami neite zousie apui a, Kanaan gam a peiding in akipan kheta ua, tuachi’n Kanaan gam ahing tungta uhi. 6Tualeh Abram khum gamah Shekem mun tanin Moreh gangpising pouna dongin ahing peisuh a, tua hun lai in Kanaan mite tua gamah aum uhi. 7#Nasep. 7.5; Gal. 3.16Tuachi’n Mangpa Abram kungah akilah a, “Nahah na suonte kungah tam gam ka pe ding hi” achia, tuachi’n khummun ah, aman akunga kilah Mangpa dingin maitam a bawlta hi. 8Tualeh tua mun akipat in Bethel suolam muol khat ah akisuon a, khummun ah apuoninn ajahta a, tumlam ah Bethel aum a, suolam ah Ai khuo aum hi. Tuamun ah Mangpa dingin maitam abawl a, Mangpa min ahan hi. 9Tuachi’n Abram simlam zuon in akisuon nalai hi.
10Tualeh tua gam ah kiel atung a, khum gam a kiel akhawh seng ziehin, Abram Izipt gam a va um tadi dingin apei suhta hi. 11Tualeh hichi ahing ahia, Izipt a lutdia akisah lai in, azi Sarai kungah, “ngaivawi, numei melhoitah na hi chi ka thei hi. 12Tuaziehin hichi ahing hiding hi; Izipt miten ahing mu chiengun, tam minu azi ahi ang chi ding ua, kei ahing that ding ua, nangpen ahing hinkhawi ding uhi. 13#Siem. 20.2; 26.7Nang vanga hoitah a ka um theina ding leh najal a ka hin theina dingin, a sanggamnu ka hibou hi, hepitahin, hing chiin” achi hi. 14Tuachi’n hichi ahing ahi a, Abram Izipt gam ahing tunin Izipt miten numeinu khu amu ua, hoi asa mama uhi. 15Pharaoh milienten zong amanu amu un Pharaoh kungah ahoidan agen ua, tuachi’n numeinu khu Pharoah inn ah apuilut ta uhi. 16Tualeh aman, amanu ziehin Abram khu alim bawl a, tuachi’n Belamte, Bawngtalte, Sabiltungtalte suohpa leh suohnute, Sabiltungnute leh Sangawngsaute aneilawta hi.
17Hinanleh Mangpa’n Abram zi Sarai ziehin Pharoah leh a innkuonpite tungah gawtna atungsah ta hi. 18Tuachi’n Pharoah in Abram ahan a, ka tunga na silbawl bangchithu hita ahei? Amanu na zi ahi bang dinga hing hillou na hiei? achi hi. 19Bang dinga ka sanggamnu hibou nachi ahiei? Zi a na nei khamawh thei ka hi; tuaziehin tuin na zi tanah aum hi, zawpi inlen peimang tan achi hi. 20Tuachi’n Pharoah in atung thu ah amite thu apie a, tuachi’n ama khu azi toh anei alam zousie toh asawlkheta hi.
المحددات الحالية:
SIEMCHILBU 12: ZOUBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Zou CL Bible - LAISIENGTHOU
Copyright © 1992 by The Bible Society of India
Used by permission. All rights reserved worldwide.