ကမ္ဘာဦးကျမ်း 9
9
နောဧနှင့်ပဋိညာဉ်ဖွဲ့ခြင်း
1ဘုရားသခင်သည် နောဧနှင့် သူ၏သားတို့ကိုကောင်းချီးပေးလျက် “များစွာမွေးဖွား၍ တိုးပွားကြလော့။ မြေကြီးကိုပြည့်စေကြလော့။ 2တောရိုင်းတိရစ္ဆာန်ရှိသမျှ၊ မိုးကောင်းကင်ငှက်ရှိသမျှ၊ မြေပေါ်မှာတွားသွားသောသတ္တဝါရှိသမျှနှင့် ပင်လယ်ငါးရှိသမျှတို့သည် သင်တို့ကို ကြောက်ရွံ့ထိတ်လန့်ကြလိမ့်မည်။ ထိုတိရစ္ဆာန်တို့ကို သင်တို့လက်သို့ ငါအပ်ပြီ။ 3အသက်ရှင်၍ လှုပ်ရှားသွားလာတတ်သောသတ္တဝါရှိသမျှသည် သင်တို့၏စားစရာဖြစ်လိမ့်မည်။ စိမ်းလန်းသောအပင်တို့ကို သင်တို့အား ငါပေးသကဲ့သို့ ခပ်သိမ်းသောအရာတို့ကို သင်တို့အား ငါပေး၏။ 4သို့သော် အသက်တည်းဟူသော အသွေးပါရှိသည့်အသားကို မစားရ။ 5အကယ်စင်စစ် သင်တို့၏အသက်သွေးကြွေးကို ငါပြန်တောင်းမည်။ တောရိုင်းတိရစ္ဆာန်ဖြစ်လျှင်လည်း ၎င်းတို့၏အသက်ကိုငါပြန်တောင်းမည်။ လူအချင်းချင်းဖြစ်လျှင်လည်း ထိုလူ၏အသက်ကို ငါပြန်တောင်းမည်။ 6လူ၏အသက်ကိုသတ်သောသူသည် လူ့လက်ဖြင့်အသတ်ခံရမည်။ အကြောင်းမူကား ဘုရားသခင်သည် မိမိ၏ပုံသဏ္ဌာန်အတိုင်း လူကိုဖန်ဆင်းတော်မူ၏။ 7သင်တို့သည် များစွာမွေးဖွား၍ တိုးပွားကြလော့။ မြေကြီးပေါ်မှာ ပြည့်နှက်ကြလော့။ မြေကြီးပေါ်မှာ တိုးပွားကြလော့”ဟု မိန့်တော်မူ၏။
8တစ်ဖန် ဘုရားသခင်က နောဧမှစ၍ သူနှင့်အတူရှိသောသားတို့အား 9“ကြည့်ရှုလော့။ ငါသည် သင်တို့၌လည်းကောင်း၊ နောင်လာမည့် သင်တို့၏သားစဉ်မြေးဆက်တို့၌လည်းကောင်း၊ 10သင်တို့နှင့်အတူရှိသည့် သက်ရှိသတ္တဝါအပေါင်းတည်းဟူသော ငှက်များ၊ ယဉ်ပါးသောတိရစ္ဆာန်များမှစ၍ သင်တို့နှင့်အတူရှိသော တောရိုင်းတိရစ္ဆာန်အပေါင်းတို့၌လည်းကောင်း၊ သင်္ဘောထဲမှထွက်လာသောသူရှိသမျှနှင့် တောရိုင်းတိရစ္ဆာန်ရှိသမျှတို့၌လည်းကောင်း ငါ၏ပဋိညာဉ်ကို ငါတည်စေမည်။ 11သင်တို့၌တည်စေသော ငါ၏ပဋိညာဉ်မှာ ‘သတ္တဝါအပေါင်းတို့သည် ရေလွှမ်းမိုးမှုအားဖြင့် မည်သည့်အခါမျှ ဖယ်ရှားခြင်းခံရတော့မည်မဟုတ်။ မြေကြီးကိုဖျက်ဆီးမည့်ရေလွှမ်းမိုးခြင်းသည် မည်သည့်အခါမျှ ဖြစ်ပေါ်တော့မည်မဟုတ်’ဟူ၍ ဖြစ်၏”ဟု မိန့်တော်မူ၏။
12တစ်ဖန် ဘုရားသခင်က “ငါနှင့် သင်တို့ကြား၌လည်းကောင်း၊ သင်တို့နှင့်အတူရှိသော သက်ရှိသတ္တဝါအပေါင်းတို့ကြား၌လည်းကောင်း ခေတ်ကာလအစဉ်အဆက် ငါပြုသောပဋိညာဉ်၏အမှတ်လက္ခဏာမှာ ဤသို့ဖြစ်၏။ 13ငါ၏သက်တံကို မိုးတိမ်၌ ငါထား၏။ ထိုသက်တံသည် ငါနှင့်မြေကြီးကြား၌ပြုသော ပဋိညာဉ်၏အမှတ်လက္ခဏာဖြစ်လိမ့်မည်။ 14ငါသည် မြေကြီးအထက်မိုးကောင်းကင်၌ မိုးတိမ်တက်လာစေ၍ ထိုမိုးတိမ်၌ သက်တံထင်ရှားသောအခါ 15ငါနှင့်သင်တို့ကြား၌လည်းကောင်း၊ သက်ရှိသတ္တဝါအပေါင်းတို့ကြား၌လည်းကောင်း၊ ငါပြုသောပဋိညာဉ်ကိုအောက်မေ့သဖြင့် သတ္တဝါအပေါင်းတို့ကိုဖျက်ဆီးမည့် ရေလွှမ်းမိုးခြင်း ဖြစ်တော့မည်မဟုတ်။ 16မိုးတိမ်၌ သက်တံပေါ်လာသောအခါ ထိုသက်တံကိုငါကြည့်၍ ဘုရားသခင်နှင့် မြေကြီးပေါ်ရှိ သတ္တဝါအမျိုးမျိုးတည်းဟူသော သက်ရှိသတ္တဝါအပေါင်းတို့ကြား၌ ငါပြုသော ထာဝရပဋိညာဉ်ကို ငါအောက်မေ့မည်”ဟု မိန့်တော်မူ၏။ 17ထို့နောက် ဘုရားသခင်က “ဤသည်ကား ငါနှင့် မြေကြီးပေါ်ရှိသတ္တဝါအပေါင်းတို့ကြား၌ ငါတည်စေသောပဋိညာဉ်၏အမှတ်လက္ခဏာဖြစ်၏”ဟု နောဧအား မိန့်တော်မူ၏။
နောဧမိသားစုအကြောင်း ကြိုတင်ဟောပြောခြင်း
18သင်္ဘောထဲမှထွက်လာသော နောဧ၏သားများမှာ ရှေမ၊ ဟာမ၊ ယာဖက် တို့ဖြစ်ကြ၏။ ဟာမသည် ခါနာန်၏ဖခင်ဖြစ်၏။ 19ဤသူသုံးယောက်တို့သည် နောဧ၏သားများဖြစ်ကြပြီး သူတို့မှတစ်ဆင့် ကမ္ဘာမြေတစ်ခွင်လုံးသို့ လူတို့ ပြန့်ပွားသွားကြ၏။
20နောဧသည် စိုက်ပျိုးရေးသမားဖြစ်လာ၍ စပျစ်ခြံကို စိုက်ပျိုးလေ၏။ 21သူသည် စပျစ်ဝိုင်ကိုသောက်၍ယစ်မူးသဖြင့် မိမိတဲထဲ၌ ဝတ်လစ်စားလစ်နေလေ၏။ 22ခါနာန်၏ဖခင် ဟာမသည် မိမိဖခင်အဝတ်မပါအချည်းစည်းဖြစ်နေသည်ကိုမြင်၍ အပြင်မှာရှိသောအစ်ကိုနှစ်ယောက်တို့အား ပြောပြလေ၏။ 23ရှေမနှင့်ယာဖက်တို့သည် အဝတ်ကိုယူ၍ မိမိတို့ပခုံးပေါ်မှာတင်ပြီးလျှင် ကျောခိုင်းဝင်လာကြပြီး မိမိတို့ဖခင်အဝတ်မပါအချည်းစည်းဖြစ်နေသည်ကို ဖုံးပေးကြ၏။ သူတို့သည် မျက်နှာကိုလွှဲထားသည်ဖြစ်၍ မိမိတို့ဖခင်အဝတ်မပါအချည်းစည်းဖြစ်နေသည်ကို မမြင်ရပေ။
24နောဧသည် အမူးပြေ၍ မိမိအား အငယ်ဆုံးသားပြုသောအမှုကိုသိသောအခါ 25“ခါနာန်သည် ကျိန်ခြင်းကိုခံရပါစေ။ အစ်ကိုတို့၏ကျွန်တို့၌ ကျွန်ဖြစ်ပါစေ”ဟု ဆို၏။ 26တစ်ဖန် နောဧက “ရှေမ၏ဘုရားသခင်ထာဝရဘုရားသည် မင်္ဂလာရှိပါစေသော။ ခါနာန်သည် ရှေမ၏ကျွန်ဖြစ်ပါစေ။ 27ဘုရားသခင်သည် ယာဖက်ကို ကြီးပွားစေတော်မူပါစေသော။ သူသည် ရှေမ၏တဲတို့၌ နေရပါစေ။ ခါနာန်မူကား သူ၏ကျွန်ဖြစ်ပါစေ”ဟု ဆိုလေ၏။
28ရေလွှမ်းမိုးပြီးသည့်နောက် နောဧသည် အနှစ်သုံးရာ့ငါးဆယ်အသက်ရှင်၏။ 29နောဧသည် နှစ်ပေါင်းကိုးရာ့ငါးဆယ်အသက်ရှင်ပြီးနောက် သေဆုံးလေ၏။
المحددات الحالية:
ကမ္ဘာဦးကျမ်း 9: MSBU
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
MYANMAR STANDARD BIBLE©
Copyright © 2012, 2014, 2017, 2021 by Global Bible Initiative