Luka 20
20
Balenza kipfumu ki Yesu
(Matayi 21.23-27 ; Malako 11.27-33)
1Lumbu kimosi Yesu bu kaba longa batu mu nzo Nzambi, wuba kuba samunina Nsamu Wumbote ; zimbukila bapfumu banganga Nzambi, minlongi mi mina ayi bakulutu ba batu bayiza, 2banyuvula :
—Wutukamba mu lulendo mbi wulembu vangila mambu momo ? Voti nani wuvana lulendo beni e ?
3Yesu mamvandi wuba kamba :
—Minu mamvama kiuvu kimosi kidi yama mu kuluyuvula. 4Bika lukhamba : mbotokolo yi Yowani, ku diyilu yiba voti kuidi batu e ?
5Buna beka lembu kayindulanga mu bawu veka. Buna baniunguta : enati tutubidi ti : “Ku diyilu” buna maka tuyuvula “vayi bila mbi lusia kunwilukila ko e ?” 6Vayi enati tutubidi ti “kuidi batu” buna batu boso maba tuvondila mu matadi bila batu boso bazebi ti Yowani wuba mbikudi. 7Buna bavutula ti basi zaba ko kuevi kaba.
8Buna Yesu wuba vutudila :
—Minu mamvama, ndilendi kulukamba ko kani mu lulendo lu nani ndilembu vangila mambu mama.
Nongo yi bisadi bimbimbibi ndima yi vinu
(Matayi 21.33-46 ; Malako 12.1-12)
9Bosi wukamba batu nongi yayi :
—Mutu wumosi wukuna ndima yi vinu ; wuyekudila yawu minkuni#20.9 Minkuni : batu bobo bansalanga zitsola, bansadisanga zindima bawu beti tedilanga minkuni. muingi mimvananga ndambu yi mimbutu mu kadika mvu ayi wuyenda mu nzietolo mu mimvu miwombo. 10Mu thangu yimvelungu makundi ma vinu, wutuma kisadi kiandikimosi kuidi minkuni bi ndima muingi mimvana ndambu yi mimbutu mi vinu vayi minkuni mi ndima mintuta khuba ayi mimvutula mioko yi mioko. 11Wubuela fidisa diaka kisadi kinkaka. Mamvandi wututu khuba, wufingu ayi mimvutula mioko yi mioko. 12Pfumu yi ndima wubuela fidisa diaka kisadi kintatu vayi minkuni mi ndima minlueka ayi minloza ku nganda yi ndima.
13Buna pfumu yi ndima wutuba : A mbi ndieka vanga e ? Ndieka fidisamuanꞌama wu luzolo ; mananga bela kummona lukinzu bu bela kummona.
14Vayi minkuni mi ndima bu mimmona, mitubana bawu na bawu : “Tala mutu wela vinginina ndima, bika tumvonda muingi ndima beniyikituka yeto veka !”
15Buna minkoka ku nganda yi ndima ayi mimvonda !
Buna pfumu yi ndima mbi kela vangila minkuni mi ndima e ? 16Buna wela kuiz, wela vondisa minkuni mi ndima ayi wela yekudila ndima beni kuidi minkuni minkaka.
Batu bobo bawa, bamvutudila :
—Bulendi baka bu bela ko.
17Vayi niandi wuba tala ayi wuba kamba :
—Buna masonuku mama mbi mansundula :
Ditadi diloza mintungi dikituka ditadi di mfunu
diodi didi va fuma ki nzo
18 woso wela bua va yilu ditadi beni
wela keluka tsingu ayi
woso mutu ditadi beni diela builu wela kosakana.
19Bapfumu zi zinganga Nzambi ayi minlongi mi mina batomba mu thangu yina kaka, mu kunkanga vayi bamona batu tsisi bila basudika kuawu ti bawukavekula bu katuba nongo yoyi.
Ziphaka mu diambu di phaku yi Sezali
(Matayi 22.15-22 ; Malako 12.13-17)
20Buna batona kumfiela ; diawu bamfidisila batu mu diambu bamfiela. Batu beni baba kukimonikisanga batu basonga mu diambu bambuidila mu moso kuandi mambu kakuiza tubi muingi banyekula mu mioko mi zuzi ayi mu luyalu lu nyadi.
21Buna batubeni banyuvula :
—A Nlongi, tuzebi ti ngeyo weta tubila mu busonga ayi weta longila mu busonga. Ngeyo wutalanga bizizi bi batu ko vayi weta longila mu bukiedika nzila yi Nzambi. 22A buevi, minsua midi yetu mu futa phaku kuidi Sezali voti tuisi ko minsua e ?
23Bu kabakula mayuya mawu, buna wuba kamba :
24—Mbonisanu sengo kimosi ki denali ! Mfikula yayi yi nani ayi bisono biabi binani e ? Bamvutudila ti bi Sezali.
25Buna wuba kamba ti :
—Bika luvana bi Sezali kuidi Sezali bosi bi Nzambi kuidi Nzambi.
26Basia nunga ko kumbuidila mu mambu makatuba va meso ma batu. Basimina bu bawa mvutu andi ayi basia baka diaka diambu di tuba ko.
Bayuvula Yesu kiuvu mu diambu di mfulukulu
(Matayi 22.23-33 ; Malako 12.18-27)
27Ndambu Basaduki, batu bobo kaba kikininanga ko ti batu beti fuluka, bafikama ayi banyuvula kiuvu :
28—A nlongi, Moyize wutusonikina ti : enati mutu fuidi vayi kasia bika muana ko, buna khombꞌandi yi bakala kafueti vinginina nketo wowo kabikidi muingi kabutila khombꞌandi bana. 29Vayi vaba tsambudidi bakhomba zi babakala. Wutheti wukuela, wufuamu kambu bika muana, 30wummuadi, ayi wowo wuntatu bankuela. Buawu bobo buvangimina mu bawu boso, 31bawu tsambudi bafua mu kambu bika bana. 32Ku nzimunina bawu boso nketo beni mamvandi wufua. 33Mu thangu yi mfulukulu, wela ba nketo wu nani bila wuba nketo wu tsambudi di bakhomba ziozo e ?
34Yesu wuba vutudila :
—Bana ba ntoto wawu balembo kuedi ayi balembo kuedisa 35vayi bobo bela monika ti bafueni mu tula mu thangu yinkuiza ayi mu fuluka mu bafua balendi buela kuela ko ayi balendi buela kuedusu ko. 36Bila balendi buela fua ko bila beka banga zimbasi ayi beka banaba Nzambi, bana ba mfulukulu. 37Moyize wutelama kimbangi ti bafua bela fuluka mu nzila yi finti fiba lema. Bila kuna katedila Pfumu ti : Nzambi yi Abalahami, Nzambi yi Izaki, Nzambi yi Yakobi. 38Vayi niandi kasi Nzambi yi bafua ko vayi Nzambi yi batu banzinga. Bila kuidi niandi, bawu boso balembu zingi.
39Buna ndambu minlongi mi mina mitaba :
—A nlongi, vutudi bumbote.
40Basia buela kunyuvula kadi diambu dimosi ko.
Klisto widi muana nani
(Matayi 22.41-46 ; Malako 12.35-37)
41Buna Yesu wuba yuvula :
—A buevi beta tubila ti Klisto widi muana wu Davidi e ? 42Bila niandi veka Davidi wutuba mu minkunga :
Pfumu wukamba kuidi Pfumu ama :
Vuanda va koko kuama ku lubakala
43 nate ndimanisa tula bambeni ziaku
banga tetuku kiaku ki malu maku.
44Davidi wunkuntedila Pfumu, buna buevi kalenda buela bela muanꞌandi e ?
Yesu wutemina minlongi mi mina
(Matayi 23.6 ; Malako 12.38-40)
45Sumbu batu boso bawa, buna wukamba minlonguki miandi :
46—Lulubukila minlongi mi mina mimmonanga khini mu diatilanga mu mazuela ma mula ayi minzolanga baba vaninanga zimbote mu mazandu, minzolanga vuandanga mu bibuangu binzitusu mu zinzo zi zikhutukunu ayi mu minyengo. 47Minlongi beni mi mina minyibanga mu zinzo zi mafuola ayi mieta vunikisa sambila zitsambulu zi mula. Bawu bela baka thumbudulu yi lutidi ngolo.
المحددات الحالية:
Luka 20: YOM
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Nkanda wu Moyo, Nguizani Yimona ayi Minkunga
Copyright © 2002 mu dizina di Biblica, Inc.®
Yisadulu mu nsua wu Biblica, Inc.® Minsua mi tsadulu mikinzika.
Kiyombe Contemporary Version, New Testament and Psalms
Copyright © 2002 by Biblica, Inc.®
Used by permission of Biblica, Inc.®. All rights reserved worldwide.