Chivkeeb 2
2
1Lub ntuj, hab lub nplajteb, hab ib puas tsaav yaam yeej tsim tav taag lawm. 2Vaajtswv tub tsim txhua tsaav yaam tav taag lawm, nub xyaa nwg txhaj su hab tsi ua ib yaam num dlaabtsi le.#Hen 4.4,10 3Vaajtswv foom koob moov rua nub xyaa hab teem nub ntawd ua nub tseemceeb, rua qhov ib puas tsaav yaam kws nwg tsim tub tav taag rua nub ntawd lawm,#2.3 ib puas tsaav yaam kws nwg tsim tub tav taag rua nub ntawd lawm; lossis nub ntawd ib puas tsaav yaam kws nwg tsim tav taag lawm. nwg txhaj su tsi ua num dlaabtsi.#Tsd 20.11 4Vaajtswv tsim lub ntuj hab lub nplajteb lawv le tau has taag lug sau nuav lawm.
Lub Vaaj Edees
Thaus tug TSWV#2.4 Tug tswv: Phoo Henplais qhov twg kws muaj lub npe Yaves, lawv le kevcai mas sau ua Yehauvas, ces thoob plawg phoo ntawv nuav txhaj txhais ua tug TSWV kws yog sau tug tsaj ntawv luj. kws yog Vaajtswv tsim lub ntuj hab lub nplajteb, 5lub nplajteb tseem tsi tau muaj nroj tsuag xyoob ntoo hab tsi muaj ib yaam noob tuaj taug kaug le, rua qhov nwg tseem tsi tau tso naag lug, hab tseem tsi tau muaj tuabneeg tawm moog ua laj ua teb; 6tabsis dlej ca le txa huv nruab tivtxwv tuaj ntxaum dlaim aav nplajteb noo quas zaws thoob plawg.
7Tug TSWV kws yog Vaajtswv muab aav lug puab tau ib tug txivneej,#2.7 Aav… txivneej; Henplais cov lug “txivneej” hab “aav” has lub suab ib yaam nkaus. hab tshuab sav tshuab paa rua tug txivneej ntawd lub qhovntswg, ces tug txivneej ntawd txawm caj sa.#1 Klt 15.45
8Ces tug TSWV kws yog Vaajtswv tsim tau ib lub vaaj nyob rua saab nubtuaj huv Edees, hab nwg muab tug txivneej kws nwg puab lug nyob rua huv lub vaaj ntawd. 9Vaajtswv tsim txhua yaam ntoo tuaj zoo nkauj kawg nkaus rua huv hab txi txiv zoo kawg le. Nyob rua huv plawv vaaj muaj ib tsob ntoo kws cawm txujsa hab muaj ib tsob ntoo kws ua rua paub qhov phem hab qhov zoo.#2.9 paub qhov phem hab qhov zoo; lossis paub txhua yaam huv tuabsi.#Tsm 2.7; 22.2,14
10Muaj ib tug dlej txhawv huv Edees hab ndlwg moog ntxooj lub vaaj ntawd; tug dlej ntawd ncau ua plaub ceg ndlwg tawm huv Edees moog lawm. 11Ceg ib hu ua Pixoos, ceg dlej nuav ndlwg moog vij lub tebchaws Havilas. 12(Lub tebchaws ntawd muaj tej tseem kub, muaj tej roj ntoo tsw qaab hab muaj tej hlaws muaj nqes.) 13Ceg ob hu ua Kihoos, ceg dlej nuav ndlwg moog vij lub tebchaws Kuses.#2.13 Kuses (kws yog Mexuputamias); lossis Sudaas. 14Ceg peb hu ua Tikis, ceg dlej nuav ndlwg moog rua saab nubtuaj kws npuab rua lub tebchaws Axilias, hab ceg dlej plaub hu ua Efalates.
15Ces tug TSWV kws yog Vaajtswv coj tug txivneej kws nwg tsim lug nyob huv lub Vaaj Edees, kuas nwg zuv hab tu lub vaaj ntawd. 16Vaajtswv has rua nwg has tas, “Kuv pub koj noj txhua yaam txiv ntoo kws nyob huv lub vaaj nuav, 17tabsis kuv tsi pub koj noj tsob txiv ntoo kws ua rua paub qhov phem hab qhov zoo xwb. Koj yuavtsum tsi xob noj tsob ntoo ntawd cov txiv; yog koj noj nub twg, koj yuav tuag nub ntawd.”
18Ces tug TSWV kws yog Vaajtswv has tas, “Tsi tsimnyog ca tug txivneej nuav nyob tuab leeg. Kuv yuav tsim dlua ib tug lug nrug nwg nyob ua txwj nkawm paab nwg.” 19Yog le ntawd, Vaajtswv txhaj muab aav lug puab ua txhua yaam tsaj hab txhua yaam noog. Vaajtswv txhaj coj taagnrho tej tsaj hab tej noog lug rua tug txivneej ntawd tis npe; mas tej tsaj hab tej noog ntawd nyag txhaj muaj nyag npe lawv le tug txivneej ntawd tis rua. 20Nwg tis npe rua tej tsaj nyeg, tsaj qus, hab tej noog taag lawm, tabsis tej tsaj ntawd yeej tsi muaj ib tug kws paab tau nwg hab yuav nrug nwg ua tau txwj nkawm le.
21Tug TSWV kws yog Vaajtswv txhaj ua kuas tug txivneej ntawd tsaug zug heev, thaus nwg tsaug zug lawm, Vaajtswv txhaj muab nwg ib tug txhaa taav rhu tawm lug hab muab lub qhov nqaj ntawd foob nqawm rov zoo le qub. 22Vaajtswv muab tug taav ntawd lug tsim ua ib tug quaspuj hab coj tug quaspuj ntawd moog cob rua tug txivneej.
23Ces tug txivneej ntawd has tas,
“Nwgnuav, muaj ib tug
zoo le peb lawm hab lauj,
tug nuav tej txhaa yog kuv txhaa,
hab tej nqaj yog kuv nqaj.
Nwg lub npe hu ua ‘quaspuj’,
rua qhov yog rhu nwg tawm
ntawm txivneej lug.”#2.23 Quaspuj… txivneej: Henplais cov lug “quaspuj” hab “txivneej” lub suab has ib yaam nkaus.
24Tub yog vim le nuav tug quasyawg txhaj tso nwg nam nwg txiv tseg, hab moog nrug nwg tug quaspuj nyob, hab obtug yuav koom ua ib lub cev.#Mat 19.5; Mak 10.7-8; 1 Klt 6.16; Efe 5.31
25Tug txivneej hab tug quaspuj, obtug ob leeg puavleej labqaab, tabsis obtug ib leeg tsi paub txaajmuag rua ib leeg.
المحددات الحالية:
Chivkeeb 2: HNJ2000
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
© 2000 United Bible Societies. All rights reserved.