LUKE 7
7
Sepaih Zaheutu Sikha Hihdamna
(Matt. 8.5-13)
1Huan mipite zak a a thugen teng a khit in Kapernaum khua ah a lut lai in, 2Sepaih zaheutu kuahiam sikha deihtak china in, a si dekdek hi. 3Huchi in, Jesu tanchin a zaktak in a sikha hong hihdam ding a ngen ding in a kiang ah Juda upate a sawl hi. 4Amau Jesu kiang a va tung ua, limtakin a ngen uhi, 5“Amah zaw na hihsak tak ahi; ka nam uh a it a, ka kikhopnain uh leng amah hon lamsak ahi” a chi uhi.
6Huchi in Jesu amau toh a hongpai hi. A inn a tundek kuan in sepaih zaheutu’n a lawmte a sawl a, “Ka inn sung na lutna tak ahi kei, 7Huaiziak in na kiang a hongtakin leng ka kisim kei, thu leltak gen lechin, ka naupang a dam mai ding; 8Keileng mi thunuai a om ka hi a, ka nuai ah sepaihte a om ua; huai mipa, hiai mipa, Pai in, ka chih leh a pai a, midang kiang ah leng, hongpai in, ka chih leh, a hongpai a; ka sikha kiang ah leng, hiai hih in, ka chih leh a hih zel” a chi hi.
9Jesu’n huai thu a zak in lamdang a sa mahmah a, a kihei a, mipi amah zuite kiang ah, “K’on hilh ahi, Israelte lak ah leng hichi tel a ginna thupi ka mu kha kei,” a chi hi.
10Huan a misawlte inn ah a pai nawn ua, sikha dam in a muta uhi.
Meithai Tapa Hihdamna
11Huan sawtlouchik in khua khat Nain kichi ah a hoh a; a nungzuite leh mipi tampitak a kiang ah a hoh sam uhi. 12Khopi kongkhak kiang a tun in, ngai in, misi a hon zawngkhia ua, a nu tapa neihsun ahi a, amah lah meithai ahi ngal a; a khuamite tampi a kiang ah a om uhi. 13Toupa’n meithainu a muh in, a lainat mahmah a, “Kap ken” a chi hi. 14Huan a vanaih a, lang a va len hi; huchi in lang zawngte a khawlta uhi. “Tangval thou in, k’on chi,” a chi hi. 15Huan misi a tukhia a, a hong pauta hi. Huchi in Jesu’n a nu kiang ah a peta hi. 16Huan mi tengteng in a lau ua, Pathian a phat ua, “I lak ah zawlnei thupi a hong suakta, a chi ua, Pathian in a mite hong vehta” a chi uhi. 17Huan huai mi tungtang thu Judia gam tengteng leh a kiang vel gam teng ah a thangkheta hi.
Baptispa Johan Misawlte
(Matt. 11.2-19)
18Huan Johan nungzuite’n huai thu tengteng Johan a hilh uhi. 19Huchi in Johan in a nungzuite nih a sam a, Toupa kiang ah a sawl a, “Hongpai dingpa na hi hia, midang hungaih lailai ding ka hi uhia?” chi in.
20Huan a misawlte a kiang a hongtun un, “Baptispa Johan in, Hongpai dingpa na hi hia, midang hungaih lai ding ka hi uhia? chi in, na kiang ah kou a honsawl” a chi uhi.
21Huaitak in Jesu’n, damloute, hipi veite, dawimatte tampi a hihdam a, mittaw tampite leng a mit uh ahihvak hi. 22A kiang uah, “Pai nawnta unla, thil na muh uleh na zak uh Johan vahilh un; mittawte mit a hong vakta, khebaite khe in a paita ua, phakte hihsiang in om ua, bengngongte bil a hongvakta, misite kaihthohin a omta uh, a zawngte’n Tanchinhoih hilh a tangta uh. 23Huan kuapeuh ka tung a lunghihlouhna mulou a hampha hi” chi in, a dawng hi.
24Johan sawltakte a painung un Jesu’n mipite kiang ah Johan thu a gen a, “Bang en ding a gamdai a paikhia neita ua? Sialluang huih mut ling maw? 25Ahihkeileh, bang en ding pen a paikhia neita ua? Puannem silhmi maw? Ngai un, puan thupi silh leh mi nuamsate kumpipate in ah eive a om uh. 26Ahihkeileh, bang en ding pen in ahia na paikhiak uh? Zawlnei maw? Ahi tawk vaw oi, k’on chi ahi, amah zaw zawlnei sang a leng thupizaw ahi. 27‘En dih, ka thangkou na ma ah ka sawl ahi, aman na ma ah na lampi a bawlkhol ding, chi a, a tanchin kigelh, hiai mipa ahi.’ 28Numei suan lak ah Johan sang a thupizaw a omkei; himahleh Pathian lalgam a mi neupen leng amah sang in a thupizaw, k’on chi ahi” a chi hi.
29Huan mi tengteng leh siahkhon mite’n huai a zak un, Johan khut a baptisma tangsa ahihman un, Pathian siam a tangsak uhi. 30Pharisaite leh dan theimite’n bel a kiang a baptisma a na tangkei ua, amau ading a Pathian in a hoih dia a sehsak a deihkei uhi.
31Huchi in Jesu mah in, “Hiai khang bang toh ka teh diam aw? Bang toh bang ahi ua? 32Naupang dawlmun a tu a, ‘tamngai hon tumsak ung a, lam lou uchin a’; ‘sun ung a, nou kaptuan lou,’ chi a, kichi tuah bang ahi uhi. 33Baptispa Johan a hongpai a, tanghou a nekei a, uain leng a dawnkei a nou, Dawizawl eive, na chi uhi. 34Mihing Tapa a hongpai a, a ne in a dawn a, En dih uh, anhaipa, uain haipa, siahkhawnmite leh mikhialte lawm: na chi zel uhi. 35Himahleh pilna a ta tengteng in siam a tan uhi” a chi hi.
Pharisai Simon Inn a Jesu Thaunilhna
36Pharisaite lak a mi khat in a kiang a an ne din a deih hi. Huai Pharisai inn ah a lut a, an a um hi. 37Ngai dih, huai khua a numei khat om in Pharisai inn ah an umin a tu chih a theihtakin alabaster bawmin thau namtui a hontawi hi. 38A nung ah a khepek bul ah kapkawmin adinga, a khitui in a khepek a sukawta, a sam in a nul a, a khepek a tawp a, thau namtui a nuh hi. 39Huan a sampa Pharisai in huai a muh in, a lungsim in, “Hiai mi zawlnei ahihleh a khoihnu numei kua ahia, mi bangchi ahia, theihtuaktak hi a, mikhial ahi ngal a” a chi hi.
40Jesu’n a kiang ah, “Simon, na kiang ah thu kam khat gen ding ka nei” a chi a, a dawng hi. Aman “Bang ahia, Sinsakpa?” a chi hi.
41Jesu’n “Dangka leitawi sak kuahiam in leibami nih a nei a: khat in makhai za nga, khat in sawmnga a ba uhi. 42Huan a ditna ding a neikei ua, a ngaidam tuaktuak hi. Huai mite a kua in amah a it zaw ding a?” a chi hi.
43Simon in, “A ngaihdam tampen in hi in ka gingta” chi in a dawng hi. Aman a kiang ah, “Na chi dik” a chi hi. 44Huan numei lam a nga a, Simon kiang ah, “Hiai numei na mu hia? Na inn ah ka honglut a, nang ka khepek silna ding tui n’on pekei a, aman a khitui in ka khepek a sukawt a, a sam in a nul hi. 45Nang tawp himhim n’on tawp kei; aman ka honglut nungsiah ka khepek a tawp a tawlnga kei hi. 46Nang ka lutang ah thau n’on nilh kei a; aman ka khepek thau namtui a nilh hi. 47Huaiziak in k’on chi ahi, a khelhna tampi ngaihdam in a omta; aman nakpi’n a it hi; Himahleh, ngaihdam tawm in, neuchik in a it” a chi hi.
48Huaizoh in numei kiang ah, “Na khelhnate ngaihdam ahi ta” a chi hi.
49Huchi in a an umpihte’n, “Mikhialte nangawn ngaidam kua ahia eita?” a kichi uhi. 50Numei kiang ah, “Na ginna in a hon hondam hi” khamuangtak in paita in, a chi hi.
المحددات الحالية:
LUKE 7: PAITBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.