BINZEN 4
4
Kain lo Abel
1Adam le a-nu Eve zenkengüla, tsontsin a-le nyuphupfü lo njüo pechenyu nme nnyu shü. Tsüselo a-le, “Npugü kechenyu ale peche nme nnyu lo laso” tson-o a-zen pe Kain tholo.
2Lo tsüsiki a-le peche kecha nme Abel n nyu nilo. Abel le tanyü nkin lo Kain le lotsü hü. 3Tson tseo khenyüme Kain le a-lonyu hyukelo a-rasha senryü kershvu thyü pe Npugü tsüshü. 4Lo Abel le a-tanyü dan nyu nchelo kerigü dushvuo a-kegwatsin ka sen ryü Npugü rüshvu shü. Tsontsin Npugü le Abel lo a-kerüshvu shwi a-kenyü la. 5Ai a-le Kain lo a-kerüshvu lomvu la. Tsü genyu Kain le a-nyunta sao a-mhun gwamvu lola. 6Tsontsin Npugü le Kain ka, “Nle nyuthyüo n nyunta bin nla? Nyuthyüo nmhun gwa mvu bin nla? 7Nle kenjü gü thyü lolo nle nnyü bin nrün ai nle gwakemvu thyü kela genyu kemu le kakhin ka bin laso. Tsüle nso gon nyü bin nyo, ai nle tsünye kvulo mvu loshvu.”
8Tson-o Kain le a-sikezen gü Abel ka, “N nyi low ki tsüti le.” Tson-o au lownyu kehü ka Kain le a-sikezen gü when-o dushvula.
9Npugü le Kain ka, “Nsikezen gü Abel le diki hü nla?” tson shü.
Tsontsin a-le, “Ale shamvu, Ale asikezen gü kekhwe gü ole?” tsonla.
10Tsontsin Npugü le a-ka, “Nle nyuthyü la la? Nsikezen gü zi le kazü nyu nra ako bin laso. 11Lo kazü günyu n swetsü la so, tsüle a-mün kvupe nben nyu nsikezen gü zi lo kelo gü. 12Nle lotsü yatse-e, kazü gü le thame nyhun shü loha; n no kazü nyu nka ndio ho kehü nyu nme thyüti.”
13Tsontsin Kain le Npugü ka, “Shaja higü hile agenyu tsan ritsin laso. 14Nle nthu kazü gü nyu lo nmhundyü nyu ahü laso, lo ale nmhundyü nyu kebu kehüi so. Ale aka ndio ho kehü giso, lo ligü higü ahyu kelo gü le adushvu lati.”
15Ai Npugü le, “Nmvu. Ligü higü Kain dushvu laya tselo, tsü gü ge khün jüntseryü loti.” Tson-o Npugü le a-teno kelo nyu le adushvu lalo keshvu genyu zansü nme pe Kain ge shüla. 16Tson-o Kain le Npugü mhundyü nyu tinla tson-o gü Eden nphozin “Nod” kazünyu yhun tinla.
Kain Tsipwe Dan
17Kain lo a-nu au nyu peche nme nnyulo, lo a-zan pe Enok tholo. Tson-o Kain le nyida nme thyüshüo rünyi tsügü zantho pe a-nyugü zan thyülo. 18Enok nyu Irad tse kethyü peche nme le bin, Irad le Mehujael a-pvü, lo Mehujael le Methushael a-pvü, lo Methushael le Lamech a-pvü. 19Lamech le a-nu mihvu thyü nme le Adah lo kechagü zan le Zillah. 20Adah le Jabal nnyu shü, a-le senru nkin lo züphika nyu yhun kehü dan bon gü. 21A-sikezen gü le Jubal, lükhin lo Harp lo kheli sen-o lüthyü kehü aphu bon gü. 22Zillah le Tubal Kain nnyu shü, a-le lazo lo tegi pe kanyü karun kechacha aphu thyü shü. Tubal Kain lügi zan le Naamah.
23Lamech le a-nu hvu kazo, “Adah lo Zillah hai akhwe nyülo; selo nme le avü keshü genyu ale a-dushvu laso.
24Kain dushvu laya tselo a-khün keyhun ronzin
mitsenyü loti yatselo,
Ligü higü a dushvu laya tselo hentsenyüo tsenyü loti.”
Seth Lo Enosh
25Adam lo a-nu au le peche nme hyu lo. Ttsontsin a-le, “Sunggigü le Kain le dushvu kela gü Abel sunka peche nme khi nipe atsü shü laso,” tson-o a-zan pe Seth tholo. 26Seth le a-nyu peche nme nyulo, tson-o a-zan pe Enosh tholo. Tsügwenkho ka temi le Npugü zan ko-o rüshvu sola.
المحددات الحالية:
BINZEN 4: REGSBSI
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.