Jan 5
5
Jezi geri yon nonm paralize
1Apre sa, jwif yo te gen yon fèt nan tanp lan. Jezi moute Jerizalèm. 2Nan lavil la, bò Pòtay Mouton yo, te gen yon gwo basen dlo yo te rele nan lang ebre: Betzata. Te gen senk pòt ki te bay sou li. 3Devan pòt yo, te gen anpil moun ki te gen tout kalite maladi kouche la: gen sa ki te avèg, gen sa ki t'ap bwete, gen sa ki te paralize. [Yo tout yo t'ap tann lè dlo a pran bouyi. 4Paske tanzantan, yon zanj desann vin mete dlo a anmouvman. Premye malad ki desann lan, nenpòt maladi li te genyen, li te jwenn gerizon.] 5Te gen yon nonm la ki te malad depi tranntwitan. 6Jezi wè l kouche. Li vin konnen li te malad depi tout tan sa a. Li mande li:
— Eske ou vle geri?
7Malad la reponn li:
— Mèt, mwen pa gen pesonn pou mete mwen nan basen an lè dlo a anmouvman. Lè mwen fè sa pou m'ale, yon lòt gentan desann anvan mwen.
8Jezi #Mat 9.6 di li:
— Leve pran nat ou ale.
9Menm #Jan 9.14 llè a, nonm lan geri. Li ranmase nat li, li pran mache.
Men twouve, jou sa fèt la, se te yon jou saba. 10Jwif #Jer 17.21; Lik 6.2 yo di nonm ki te geri a:
— Jodi a se jou saba. Lalwa nou an pa pèmèt ou pote chay.
11Li reponn yo:
— Se moun ki geri m lan wi ki di m ranmase nat mwen, mache m ale.
12Lè #Lik 5.21 sa a, yo mande li:
— Kilès sa a ki di ou ranmase nat ou, mache ou ale a?
13Men, nonm ki te geri a pat konnen ki moun li te ye, paske te sitèlman gen moun la, Jezi te gentan pati al fè wout li.
14Pita, #Jan 8.11 Jezi kontre nonm lan nan tanp lan. Li di li konsa:
— Koute non. Kounyeya ou wè ou geri, pa fè peche, tande, pou bagay pi mal pa rive ou.
15Nonm lan al di jwif yo se Jezi ki te geri li. 16Se #Mat 12.14 poutèt sa jwif yo tanmen pèsekite Jezi paske li te fè sa yon jou saba. 17Men, #Jan 9.4 Jezi reponn yo:
— Se tout tan Papa m ap travay. Mwen menm tou, m'ap travay.
18Poutèt #Jan 7.30; 10.33 pawòl sa a, se pi rèd atò jwif yo t'ap chache touye li. Paske li pa te sèlman vyole saba, men li te di Bondye se papa li. Konsa li fè tèt li egal ak Bondye.
Pouvwa Pitit Bondye a
19Lè #Jan 3.11,32 sa a, Jezi reponn yo:
— Vrèmanvre, Pitit Bondye a pa fè anyen ki pa soti nan Papa a. Sa li wè Papa a fè, se sa li fè tou. Paske sa Papa a fè, pitit la fè li parèy. 20Papa a #Jan 3.35 renmen Pitit la, li devwale li tou sa li menm l'ap fè. Li gen pou li devwale li pi gwo bagay pase sa toujou. Lè sa a, nou va rete bouch be. 21Papa a fè moun mouri leve, li ba yo lavi ankò. Konsa tou, Pitit la bay moun li vle lavi. 22Papa a #Da 7.13,14; Tra 17.31 pa jije pèsonn, men li bay Pitit la tout pouvwa pou jije. 23Konsa, #Fil 2.10,11; 1 Jan 2.23; Lik 10.16 tout moun va gen onè respè pou Pitit la, menm jan yo gen onè respè pou Papa a. Moun ki pa gen onè respè pou Pitit la, li pa gen onè respè pou Papa a tou.
24— Anverite #Jan 3.16,18; 8.51; 1 Jan 3.14 moun ki koute pawòl mwen, ki mete konfyans yo nan moun ki voye mwen an, l'ap gen lavi etènèl. Yo yo p'ap kondannen li. Li deja soti nan lanmò, li antre nan lavi.
25— Anverite #Mat 8.22; Ef 2.5,6 gen yon lè k'ap rive, li deja rive, mò yo pral tande vwa Pitit Bondye a. Tout mò ki tande vwa a, yo pral reviv ankò. 26Papa a #Jan 1.1-4 gen pouvwa pou l bay lavi. Konsa tou, li bay Pitit la pouvwa pou bay lavi tou. 27Li #Da 7.10,14; Jan 5.22 bay Pitit la otorite pou jije, paske Pitit la, se Moun Bondye voye nan lachè a. 28Nou pa bezwen sezi. Lè a pral rive: tout mò ki nan tonm yo pral tande vwa li, 29yo #Jan 6.40; Da 12.2; Mat 16.27 pral leve sòti vivan nan tonm yo. Moun ki fè sa ki byen pral leve pou resevwa lavi ki p'ap janm fini an. Men, tout moun ki fè sa ki mal pral leve pou resevwa kondannasyon yo.
Siy Jezi gen pouvwa vre
30— Mwen #Jan 5.19; 6.38 pa kapab fè anyen tou sèl. Mwen jije dapre sa mwen tande. Jijman mwen rann se bon jijman. Paske se pa volonte pa mwen m'ap fè, men se volonte moun ki voye mwen an. 31Si mwen #Jan 8.14 pale byen sou tèt mwen, moun p'ap asepte sa m'di a pou verite. 32Men, #Jan 5.36,37; 1 Jan 5.9 se yon lòt k'ap pale byen sou mwen. Mwen konnen sa l'ap di sou mwen an, se verite. 33Nou #Jan 1.19-34 te voye moun bò kote Jan. Li te di nou verite a jan l ye a. 34Mwen menm poutèt pa m, mwen pa bezwen pèsonn pale pou mwen. Men, mwen di nou sa pou nou kapab sove. 35Jan #Lik 1.17 te tankou yon lanp yo limen ki klere byen bèl. Pou yon tan, nou te byen kontan pwofite limyè li a. 36Men, #1 Jan 5.9; Jan 1.33; 3.2 pou mwen menm, mwen gen yon lòt bagay ki pale an favè m ki pi bon toujou pase sa Jan te di sou mwen an. Se travay m'ap fè a, travay Papa m ban m fè a ki pale pou mwen. Sa fè wè se Papa a ki voye mwen. 37Papa #Mat 3.17; Det 4.12 ki voye m lan, li menm tou l'ap pale an favè mwen. Nou pa janm tande vwa l, ni nou pa janm wè figi li. 38Nou pa kenbe pawòl li yo nan kè nou, paske nou pa kwè nan moun li voye a. 39N'ap #Lik 24.27,44; 2 Tim 3.15-17; 1 Pyè 1.11 plede etidye sa ki ekri nan Liv la, paske nou mete nan tèt nou nou ka jwenn lavi ki pa janm fini an ladan li. Men, se Liv sa a menm ki pale sou mwen. 40Malgre sa, nou pa vle vin jwenn mwen pou nou ka gen lavi tout bon an.
41— Mwen p'ap chache lwanj nan men lèzòm. 42Men, mwen konnen ki moun nou ye: nou pa gen renmen pou Bondye nan kè nou. 43Mwen, #Mat 24.5 se Papa mwen ki voye mwen. Men nou pa resevwa mwen. Epi, kite yon lòt moun vin nan pwòp non li, n'ap kouri resevwa li. 44Epitou #Jan 12.43; Mat 23.5-7 kouman pou nou ta fè kwè a? Nou sitèlman renmen lwanj yonn nan men lòt. Nou p'ap renmen chache lwanj ki soti nan Bondye ki pa gen parèy la? 45Pa #Det 31.26 mete nan tèt nou mwen pral akize nou devan Papa mwen. Se Moyiz ki pral akize nou, Moyiz nou di ki tout espwa nou an. 46Si #Jen 3.15; 49.10; Det 18.15 nou te kwè tout bon nan Moyiz, nou ta kwè nan mwen tou, paske li ekri sou mwen tou. 47Men, #Jan 7.19; Lik 16.31 nou pa menm kwè nan sa Moyiz te ekri a, kijan pou n'ta kwè nan sa m'ap di nou?
المحددات الحالية:
Jan 5: HAT98
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Haitian Creole DC Bible © Societé Biblique Haïtienne, 1998.