GENESIS 18
18
Usa ka Anak nga Lalaki Gisaad Ngadto kang Abraham
1Ug ang Ginoo mipakita kang Abraham didto sa kakahoyan ni Mamre, samtang naglingkod siya dapit sa pultahan sa iyang tolda diha sa kainit sa adlaw. 2Giyahat niya ang iyang mga mata, ug mitan-aw siya ug nakita niya nga dihay tulo ka tawo nga nagtindog atbang kaniya, ug sa iyang pagkakita kanila, midagan siya gikan sa pultahan sa iyang tolda aron sa pagtagbo kanila ug siya mihapa sa yuta.#Heb. 13:2. 3Ug miingon siya, “Akong agalon, kon ako nakakaplag ug kahimuot diha sa imong atubangan, dili unta kamo mosaylo sa inyong ulipon. 4Magpakuha kita karon ug diyotay nga tubig ug manghugas kamo sa inyong mga tiil ug pahulay kamo sa landong sa kahoy 5samtang magkuha ako ug diyotayng pagkaon aron makapabaskog kaninyo ug human niana makapadayon kamo kay nakahapit na man kamo sa inyong ulipon.”
Ug sila miingon, “Buhata ang imong gisulti.” 6Ug si Abraham midali pagsulod sa tolda ngadto kang Sarah, ug miingon kaniya, “Dali, pagkuha ug tulo ka takos nga pinong harina, masaha kini ug himoa nga pan.” 7Ug midagan si Abraham ngadto sa panon sa mga baka, ug mikuha siya ug usa ka nating baka nga humok pa ug maayo, ug gihatag niya sa sulugoon nga midali sa paghikay niini. 8Mikuha usab siya ug keso ug gatas, ug ang nating baka nga gihikay ug iyang gidulot sa atubangan nila ug siya nagtindog duol kanila ilalom sa kahoy ug nangaon sila.
9Ug sila miingon kaniya, “Hain ba si Sarah nga imong asawa?” Ug mitubag siya, “Anaa siya sa tolda.” 10#Rom. 9:9. Unya siya miingon, “Mobalik gayod ako kanimo kon moabot na ang panahon ug tan-awa, si Sarah nga imong asawa makabaton ug usa ka anak nga lalaki.” Ug si Sarah naminaw didto sa pultahan sa tolda nga diha sa likod ni Abraham. 11Karon si Abraham ug si Sarah tigulang na sila kaayo. Mihunong na kang Sarah ang naandang kinaiya sa mga babaye. 12#1 Ped. 3:6. Busa mikatawa si Sarah sa iyang kaugalingon nga nag-ingon, “Karon na hinuon nga ako tigulang na, ug ang akong bana tigulang na usab, aduna pa ba akoy kalipay?” 13Unya ang Ginoo miingon kang Abraham, “Nganong mikatawa si Sarah nga miingon, ‘Tinuod ba gayod nga ako manganak, karon nga tigulang na ako?’ 14#Luc. 1:37. Aduna bay mga butang nga lisod alang sa Dios? Sa gitakda nga panahon mobalik ako kanimo, sa tingpamulak, ug si Sarah makabaton ug usa ka anak nga lalaki.” 15Unya si Sarah milimod nga nag-ingon, “Wala ako mokatawa,” kay nahadlok man siya. Siya miingon, “Dili, mikatawa gayod ikaw.”
Nag-ampo si Abraham Alang sa Sodoma
16Unya ang mga tawo mitindog gikan didto ug milantaw ngadto sa Sodoma ug si Abraham mikuyog sa paghatod kanila ngadto sa dalan. 17Ang Ginoo miingon, “Itago ba nako gikan kang Abraham ang akong buhaton, 18nga si Abraham mahimo man gayod nga usa ka dako ug lig-on nga nasod, ug diha kaniya panalanginan ang tanang mga nasod sa yuta?#18:18 ug…yuta: o ug ang tanang kanasoran sa yuta maghangyo kanako sa pagpanalangin kanila tungod kaniya. 19Dili, kay gipili nako siya aron magsugo sa iyang mga anak ug panimalay nga sunod kaniya aron magsubay sila sa dalan sa Ginoo, pinaagi sa pagbuhat sa pagkamatarong ug sa hustisya, aron ang Ginoo magpadangat kang Abraham niadtong gisaad kaniya.”
20Ug ang Ginoo miingon kaniya, “Tungod kay ang singgit batok sa Sodoma ug sa Gomora dako kaayo, ug tungod kay ang ilang sala hilabihan gayod ka bug-at, 21molugsong ako karon aron sa pagsusi kon gibuhat ba gayod nila ang tanan sumala sa singgit nga miabot kanako ug kon wala, mahibaloan ra nako.”
22Unya ang mga tawo miliko gikan didto ug mipaingon sa Sodoma apan si Abraham nagtindog pa sa atubangan sa Ginoo. 23Unya miduol si Abraham ug miingon kaniya, “Laglagon ba usab nimo ang mga matarong uban sa mga daotan? 24Pananglit adunay 50 ka matarong sa sulod sa siyudad, laglagon ba diay nimo ug dili nimo sayloan ang dapit tungod sa 50 ka matarong nga anaa sa sulod niini? 25Malayo unta kanimo ang pagbuhat sa ingon niana nga patyon nimo ang mga matarong uban sa mga daotan, ug nga sa ingon niana ang mga matarong mahisama sa mga daotan. Malayo unta kana kanimo! Dili ba nga ang Maghuhukom sa tibuok nga yuta magbuhat man sa matarong?” 26Ug ang Ginoo miingon, “Kon makakita ako sa Sodoma ug 50 ka matarong sulod sa siyudad, sayloan nako ang tibuok nga dapit tungod kanila.” 27Si Abraham mitubag, “Ania karon, ako nangako sa pagsulti sa akong Ginoo, bisan ako abog ug abo lamang. 28Pananglit, ang 50 ka matarong makulangan ug lima, laglagon ba nimo ang tibuok tungod niadtong lima nga nakulang?” Ug siya miingon, “Dili nako laglagon kon didto adunay 45.” 29Ug miusab siya sa pagsulti kaniya ug miingon, “Pananglit may makita didto nga 40.” Ug mitubag siya, “Dili nako kini buhaton tungod lamang sa 40.” 30Ug miingon siya, “Dili unta masuko ang akong Ginoo, ug ako mosulti. Pananglit may makita didto nga 30.” Ug siya mitubag, “Dili nako buhaton kini kon adunay 30 nga makita didto.” 31Ug miingon siya, “Tan-awa, nangako ako sa pagsulti sa akong Ginoo. Pananglit may 20 nga makita didto.” Siya mitubag, “Dili nako kini laglagon tungod sa 20.” 32Ug siya miingon, “Dili unta masuko karon ang akong Ginoo kon mosulti ako sa makausa na lang. Pananglit may napulo nga magkaplagan didto.” Mitubag siya, “Dili nako kini laglagon tungod sa napulo.” 33Ug mipadayon ang Ginoo sa paglakaw human siya makigsulti kang Abraham, ug si Abraham mipauli sa iyang dapit.
المحددات الحالية:
GENESIS 18: ABCEB
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
©Philippine Bible Society, 2011