SAWLTAHTE 15
15
Jerusalem-a Thu Kikupna
1Tua ciengin Judea gam panin mi pawlkhat a hawsuh vua, “Moses’ ngaina tawh kizui-in na tep uh na tan sih uleh note in hutdamna na nga thei sih ding uhi,” ci-in amate in sanggamte thu a hil uhi.#Siem 12:3 2Paul le Barnabas in amate tawh nahpitahin kinielna le kiselna a nei zaw ciengun, tam thudawhna tawh kisai-in sawltahpite le upate tawh Jerusalem ah peito-in thu kikum dingin Paul, Barnabas, le adang pawlkhat kise hi. 3Tuaci’n hlattuom pawlpi in lampi-ah amate a va hla ta vua, Phoenicia gam le Samaria gam a kantan kawmun Gentile-te a kikhelna uh thu a zasah vua, tuaci’n amate in thu um#15:3 Gk “sanggamte” mi zosie a nuomsah mama uhi. 4Jerusalem a tun ciengun hlattuom pawlpi mite, sawltahpite, le upate in amate a na dawn vua, amate tung tawnin Pasien’ nasepna zosie a zasah uhi. 5Ahi vangin Pharisee pawlte sung panin thu um mi pawlkhat ding to-in, “Amate in Moses’ thukham zui-in a tep uh a tan nadingun thu i pieh uh kul hi,” a ci uhi.
6Tami thu a lungngai dingin sawltahpite le upate a kikhawm uhi. 7Sawtveipi a kisel zaw ciengun Peter zong dingto a, “Sanggamte aw, kei tung panin Gentile-te in lungdamna thu za-in thu um mi a suo thei nadingun sawtveipi lai panin note lahah Pasien in kei ei teelna thu na thei uhi.#Siem 12:3 8Mihingte’ lungtang sung a thei Pasien in eite tunga ei pieh bang lienin amate tungah zong Hlagau Siengtho a piehna tawh teci a pang zo hi.#Sawl 2:4; 10:44 9Amate le eite kikalah khentuom nei loin upna tawh amau’ lungsim a siengthosah hi. 10Tua ahi ziehin nuazuite ngawngah i pu i pate le eite in i puoh zawh lo uh hahkol suonin bang dingin Pasien ze-et ding i hi ahei? 11Tua bang ding ahi sih hi. Topa Jesu’ hepina ziehin eite ei kihundam ding hi, ci-in i up ma bangin amate zong kihundam ding hi,” a ci hi.
12Paul le Barnabas in ama gel tungtawnin Pasien in Gentile-te lahah lim le na lamdang a bawlsa zosie a gen laitahun a kikhawm mihon vannuoi in sip dide-in a ngai uhi. 13A thugen uh a man zaw ciengin James in, “Sanggamte aw, ka thugen na ngai un. 14Pasien in a min adingin amate sung panin kimkhat a teelkhiet nadingin, a masa-in bangci bangin Gentile-te tungah maipha pie ahei ci thute Simeon in ang gen zo ta hi. 15Kamsangte’ thugente tam tawh kituoh hi.
16‘Tua zaw ciengin kang peikia ding a,
a puasa David’ tenna inn ka lam kia ding hi;
a kisiesate panin ka lamkia ding a,
ka tungding kia ding hi,
17tuaci’n midangte le ka mina kihlan
Gentile-te zosie nangawn in Topa a sui ding uhi,
18ci-in tanglai peh panin tam thute ei theisah Topa in a gen hi,’ ci-in kigiel hi.#Amos 9:11-12
19Tua ahi ziehin kote in Pasien lamah ang kihei Gentile-te suhbuoi lo zawh ding khensatna ka nei vua, 20tuale mahin amate in milim biehna, numei-pasal pahtatna, lawlmeh sa popo le sisan nehnate panin amate a kibuasah lo nadingun lai hlahzaw leih pha ka sa hi.#Pei 34:15-17; Siem 17:10-16; 18:6-23 21Bangzieh ahei cile sabbath nisielin kikhopna innte-ah Moses’ thukhamte ma a gingin kisim ngitnget a, tanglai peh panin zong khuo cin tengah ama’ thugente ma hil penin kinei hi,” a ci hi.
Thu um Gentile-te tunga Thukikumte’ Laihlah
22Tua ciengin sawltahpite, upate le hlattuom pawlpi buppi in amate sung panin mi pawlkhat teelin Antioch khuo ah Paul le Barnabas peitonsah dingin a khensat uhi. Amate in sanggamte lahah makai ahi Barsabbas a kici Judas le Silas a sawl vua, 23tam bangin lai gielin a puosah uhi: “Sanggamte aw, sawltahpite le upate in Antioch khuo-a kipanin Syria gam le Cylicia gama om Gentile mi-a pieng thu um mite#15:23 Gk “sanggamte” kang hopi uhi. 24Ko sawl lopi-in ko kung panin mi pawlkhat a piekhie vua, no buoi nading thute genin na lungsim uh#15:24 Adang tang laibute ah “Na tep uh tanin thukham na zui uh kul hi, a ci hi,” ci-in kibelap hi. ang amsah zo uhi, ci thu ka na za uhi. 25Kote in na kung vua kang sawl ding uh tangmite#15:25 Gk “mite’ ka teel vua, tuale Barnabas le Paul tawh ang zawhton dingin lungkimtahin ka khensat zo ta uhi. 26Ama gel pen i Topa Jesu Khris’ min ziehin a hinna uh a pie ngamte ahi uhi. 27Tua ahi ziehin amate mama in a kam utawh tam thute ma ang gen dingin Judas le Silas kang sawl uhi. 28Azieh pen kote in tam thupoimawte sanga a gihzaw vangih dang note tunga kang guonbe lo nading uh, Hlagau Siengtho le kote in hoi ka sa uhi. 29Tua a kisam thute in: Milim kithoina ante, sisan, a kilawlmeh sa,#15:29 Adang tang laibute ah “lawlmeh sa” ci om lo hi. le numei-pasal pahtatnate na tan ding uh ahi hi. Tam teng na tan zawh nah po uleh note adingin hoikhop ta lel hi. Na damta un,” ci-in lai a hlah uhi.
30Tuaci’n amate sawlin Antioch khuo ah a peisuh uhi. Amate in mipi a kaikhop zaw ciengun tua laihlah a pie uhi. 31Pawlpi mite in laihlah a sim ciengun hanthawtnate ziehin amate lungdam mama uhi. 32Amate mama zong kamsang ahi Judas le Silas-te in thu tampitah a gen vua, thu um#15:32 Gk “sanggamte” mite hanthawnin a thakhausah uhi. 33Tua tahah amate bakhat sung a tam zaw ciengun thu um mite#15:33 Gk “sanggamte” in amate a sawlkhie mite kungah lungnuom tahin a peisahkia uhi. 34Hinanle tua munah Silas a tam lai ding hoi a sa uhi.#15:34 Adang tang laibute in tami tang 34 pen a belap uh ahi hi. 35Ahi vangin Antioch khuo ah Paul le Barnabas-te a tam vua, amate in midang tampite tungah Topa’ thu a tangko uhi.
Paul le Barnabas Kikhen
36Ni phabep khat zaw ciengin Paul in Barnabas kungah, “Hing pei in, peikia vai-in, Topa’ thu i hilnasa khuopi zosie-a om thu um mite#15:36 Gk “sanggamte” kungah haw-in bang a ci vuoi mah va en tavai,” a ci hi. 37Barnabas in Mark kici John zawpi nuom hi. 38Ahi vang in Paul in Pamphylia khuo ah amate nuasie-in a nasepna vua a zui nuom lo mipa zawpi lo dingin a khensat hi.#Sawl 13:13 39Kinah niel luo uh ahi ziehin a kikhenlaw vawt uhi; Barbabas in Mark a zawpi a, tembaw tawh Cyprus tuikul ah a pei uhi. 40Hizongle Paul in Silas teel a, Topa’ hepina sungah thu um mite#15:40 Gk “sanggamte” in ama apin a kuonkhie uhi. 41Syria gam le Cilicia gam nawhin ama pei-in hlattuom pawlpite a thakhausah hi.
المحددات الحالية:
SAWLTAHTE 15: ZBOTF01
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Zo Bible © Bible Society of Myanmar, 2018.