SAWLTAHTE 5
5
Ananias le Sapphira
1Ahi vangin Ananias kici pasal khat in a zi Sapphira’ thukimna tawh a neisa uh khat a zua hi. 2Ama in a zi’ thei-in sum kimkhat hendap a, halkhat beh peipi-in nuazuite’ keng phungah a lui hi. 3Peter in, “Ananias aw, Hlagau Siengtho sol ding le na logam zua man sum pawlkhat a hendap dingin Satan in bang dingin na lungsim kizosah na hei? 4Na zua masangin nangma-a’ hi a, na zua zaw ciengin zong nangma-a’ ma hi lo amah? Bang dinga tua banga gamtat ding hanciem na hei? Kote#5:4 Gk “mite” ei sol na hi sih a, Pasien sol na hi hi,” a ci hi. 5Ananias in tam thu teng a zah behin puasuhin a si hi. Tam thu a za zosie zong a zau mama uhi. 6Tangvalte pei-in puon tawh a luong a tun vua, tua ciengin ama puo-in a vui uhi.
7Tua zaw nai thum bang ciengin a zi zong thupieng teng thei loin a lut hi. 8Peter in tua nu kungah, “Nang le na pasal in na logam uh tamza ma na khawh uh amah, ei gen in,” ci-in dong hi. Tua nu in, “Hi hi, tua za ma hi,” a ci hi. 9Tua ciengin Peter in ama kungah, “ Topa’ Hlagau ze-et dingin bang dinga hici kithukim gel na hi uh ahei? En in, na pasal vuite kot lamah om hi, nang zong ang puokhie ding uhi,” a ci hi. 10Thakhatthu-in a keng phungah tua nu puasuhin a si pai hi. Tangvalte a lut ciengun a sisa-in ama a mu vua, tuaci’n amate in puodawhin a pasal gei-ah a vui uhi. 11Hlattuom pawlpi buppi le tami thu a za zosie a zau mama uhi.
Sawltahpite in Mi Tampi Damsah
12Tu-in sawltahpite tungtawnin mite lahah lim le na lamdang tampi a pieng hi. Tuale Solomon’ Talap ah amate a omton uhi. 13Koima dang in amate a kipawlpi ngam sih vua, ahi vangin mite in amate a pimu mama uhi. 14Ahi vangin thu um mi numei le pasalte a tam semsem vua, nidang sangin Topa sungah mi a kibelaplap hi. 15Tuaci’n Peter in tua mun nawhin a pei ciengin amate kimkhat tungah a hlim a tuh khah nadingin, lampi-ah cinate puo-in lupna tung le pheh tungah a siel uhi. 16Jerusalem kima a om khuote panin zong mi tampi kisutuo-in cinate le hlabua in a bawlsiet mite a peipi vua, a unpi-un damna a nga uhi.
Sawltahpite Kibawlsie
17Tua ciengin siempu lien pa in na sep a sawm ta hi; ama le a kipawlpi zosie in (Sadducees pawlte a ci na) hazatna tawh a kidim ziehun, 18sawltahpite manin taangpi thong sungah a khum uhi. 19Ahi vangin zan lai-in Topa’ vantungmi khat in thong kotte hongin amate a hladawh a, 20“Pei-in biehinnpi sungah ding unlen, mite tungah hinna thu bucing va hil ta un,” a ci hi. 21Tam thu a zah ciengun khuova behin biehinnpi sungah lutin a thuhilna maban a zom uhi.
Siempu lien pa le a pawlte a tun uh ciengin, amate in biehna uliente le Israel upa buppi kikhawmsahin amate hlakhie dingin thong sungah a sawl uhi. 22Ahi vangin khumnah biehinncing palihte a tun ciengun thong sungah amate a mu sih uhi. Tua ahi ciengin a kilekia vua, amate in, 23“Thonginn kot hoitahin kikilin kot mai-a ding thongcingte ka mu vua, ahi vangin kot ka hon ciengun a sungah koima ka mu sih uhi,” ci-in thu a zasah uhi. 24Biehinnpi uhpa le siempu liente in tam thu bang ang suoh diei izaw! ci-in a lungmang uhi. 25Tua ciengin mi khat ang tung a, “En un, thong sunga na khum uh mite in biehinnpi sungah dingin mite thu a hil uhi!” ci-in a kiko hi. 26Tua ciengin biehinnpi uhpa le palihte in amate bangma bawlsie loin a zawpi uhi, azieh pen mite in amate suong tawh a se khah ding a zau uhi.
27Amate a tunpi zaw ciengun biehna uliente mai-ah a dingsah uhi. Siempu lien pa in amate thu dong a, 28“Tam pa’ min tawh thu na hil nawn lo nadingun khautahin thu kang pieh hi napi na thuhilna un Jerusalem khuo sung teng na dim zo ta vua, ko tungah tam pa’ sisan ang tun nadingin zong na hanciem uhi,” a ci hi.#Mat 27:25 29Ahi vangin Peter le nuazuite in, “Mihing’ thu sangin Pasien’ thu ka man uh kulzaw ding hi. 30I pu i pate’ Pasien in singkhuom tunga na khailia pa uh Jesu a thokiasah zo hi. 31Pasien in Israel-te tungah kisiana le mawmaina a pieh nadingin a zietlamah Lamkai pa ding le Hundam pa dingin ama a tawisang zo hi. 32Tam thu-ah kote teci ka hi vua, Pasien in a thu a mang mite tungah a pieh Hlagau Siengtho zong teci ahi hi,” ci-in a dawng hi.
33Amate in tam thu a zah ciengun a lungthah mama vua, sawltahpite tha a sawm uhi. 34Ahi vangin biehna uliente sung panin mi zosie in a zatah Gamaliel a kici thukham hil sie Pharisees-te khat ding to-in bakhat sung tua mite a pusuo nadingun thu a pie hi. 35Tua ciengin ama in tua mite kungah, “Israel-te aw, note in tam mite tunga na bawl dingte uh pilvangin kidawm un. 36Bangzieh ahei cile masang lai khatin kei zong mi khat ma ka hi hi, a kici Theudas ang khang a, mi zali bang in ama a pawlpi uhi; ahi vangin tua pa kithat a, tuale ama a zui zosie kithezahin a mangthai sieng uhi. 37Ama’ nua, mi phaza a kisim hun sungin Galilee mi Judah ang khang leuleu a, ama in zong nuazui ding mi a nei hi; ama a si ciengin a nuazui zosie zong a kithezah uhi. 38Tuaci’n tulaitah i thu tawh kisai-a kang gen nuom ah, amate pel-in hici opsah phot lel un; azieh pen tami gelna le sepna pen mihing pana ang kipan ahile ang kisie lel ding hi; 39ahi vangin Pasien tung pana ang kipan ahile lah na zo sih ding vua, tami thu-ah Pasien tawh kido-in ang kimu zaw ding uhi!” a ci hi.
Amate in tua pa thugen a sang thei vua, 40inn sungah sawltahpite hlanin a satziel uhi. Tua ciengin Jesu’ min tawh thu a gen nawn lo nadingun amate thu a pieh zaw ciengun a hlakia uhi. 41Biehna uliente kung pan a peikhiet ciengun amate in ama’ min ziehin mindaina thuoh tah sa-in a lungdam mama uhi. 42Nisimin biehinnpi sung le inn#5:42 Ahi sihle “inn khat zaw inn khat” sungah Jesu, Messiah#5:42 Ahi sihle “Khris” ahi hi, ci-in khawl loin thu hilin a tangko uhi.
المحددات الحالية:
SAWLTAHTE 5: ZBOTF01
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Zo Bible © Bible Society of Myanmar, 2018.