JOHN 5
5
Sabbath Ni in Jesu in Cina Damsah
1Tua zaw ciengin Jew mite’ pawi khat om a, Jesu zong Jerusalem ah a peito hi.
2Jerusalem khuo-a Tuu Tunkot gei-ah Hebrew#5:2 Tua khu Aramaic ham a cinopna ahi hi. hamin Beth-zatha#5:2 Adang tang laibute ah “Bethesada”; adangte ah “Bethsaida” ci-in kigiel hi. a kici buol tuikhuh khat om a, tua buol in talap nga nei hi. 3Tua talapte sungah mittaw, khelbai, phalsi-a kipanin a dammaw mi tampitah in 4tui kilaw ding ngahin a lum uhi; bangzieh ahei cile buolah Topa’ vantungmi khat kumsuhin a hunhunin tua tui a lawh thei zel hi; tua tui a kilaw zaw ciengin a sunga a kumsuh masa penpen mipa in bangbang natna vei tale a dam pai lien hi.#5:4 . Tang laibute in tami tang 4 pen a buppi-in ahi a, khen khatin ahi zongin a belap uh ahi hi. 5Khum sungah kum sawm thum le kum giet sung a cina khat a om hi. 6Jesu in tua sunga a lum mipa a mu ciengin ama in a lup zaw a sawt zo lam thei a, tuale ama in tua pa kungah, “Na dam nuom ei mah?” ci-in a dong hi. 7Cina pa in, “Siepa aw, tui a kilaw ciengin buol sungah ei koi ding mi koima ka nei sih hi; tuale ka pei ciengin ka masangah midang khat a na kumsuh paipai hi,” ci-in a dawng hi. 8Jesu in tuapa kungah, “Ding in, na lupna la inlen pei in,” a ci hi. 9Tuapa zong thakhatin dam a, a lupna la-in a pei pai hi.
Khum ni pen Sabbath ni ahi hi. 10Tuaci’n Jew mite in damna nga pa kungah, “Tuni pen Sabbath ni ahi hi; na lupna puoh pen thukham tawh kituoh lo hi,” a ci uhi.#Neh 13:19; Jer 17:21 11Ahi vangin ama in amate kungah, ‘Kei ei damsah pa in na lupna la inlen pei in,’ ei ci hi,” ci-in a dawng hi. 12Amate in, ‘Na lupna puo inlen pei-in,’ ang cipa koi ahei?” ci-in ama a dong uhi. 13Tua munah a om mihonte lahah Jesu peimang zieu ahi ziehin#5:13 Ahi sihle “nuasie zo ahi ziehin” a kidamsah pa in a damsah pa koi ahei, ci a thei ta vanuh sih hi. 14Tua zaw ciengin Jesu in biehinnpi sungah tua mipa mu a, ama kungah, “En in, na dam sieng ta hi! Na tungah a siezaw khat ang tun lo nadingin mawna bawl nawn sin,” a ci hi. 15Mipa pei-in ama a damsah pa Jesu ahi hi, ci-in Jew mite kungah a gen hi. 16Sabbath ni-in Jesu in tam bang nate a sep ziehin Jew mite in ama bawlsiet ding a kipan uhi. 17Ahi vangin Jesu in amate kungah, “Ka Pa in tudong na sem lai a, ke’n zong ka sem lai hi,” a ci hi. 18Tam bangin Jesu in sabbath ni a sietsah tham loin, Pasien pen a Pa hisah a, ama le Pasien pen a kikimin a koi ziehin Jew mite in ama tha dingin a sui semsem uhi.
Tapa’ Thuneina
19Jesu in amate kungah, “A tahtah a kang ci-in, Tapa in ama thu-in bangma bawl thei lo a, Pa’ bawl a mute beh a bawl hi; azieh pen Pa’ sep teng ma Tapa in zong sem hi. 20Pa in Tapa it a, a silbawl zosie Tapa tungah lah hi; note in lamdang na sah dingun Pa in tamte sanga a lienzaw sep dingte Tapa tungah a lah ding hi. 21Pa in misite thosahin hinna a pieh ma bangin Tapa in zong a deisahte hinna a pie hi. 22Pa in koima tungah thu a khen sih hi, ahi vangin ama in Tapa tungah thukhenna zosie a ap hi. 23Mi zosie in Pa a zatah bangin Tapa zong a zatah nadingin Pa in koima tungah thu khen loin thukhen nading thu zosie Tapa a pie hi. Tapa a zatah lo mi poma in ama a sawlpa Pa zong a zatah lo ahi hi. 24A tahtah a kang ci-in, koipo in ka thu za-in keima ei sawlpa a up leh kumtawn hinna a nei zo ta a, thukhenna thuoh nawn loin sina pan peikhie-in hinna ah a tung zo hi. 25A tahtah a kang ci-in, misite in Pasien Tapa’ aw a zah ding uh hun le a za tapo a hin nading uh hun ang tung ding a, tu-in zong ang tung zo ta hi. 26Azieh pen Pa in ama sungah hinna a nei ma bangin Tapa in zong ama sungah hinna a nei thei nading thu a pie hi. 27Ama Mihing Tapa ahi ziehin Pa in ama tungah thukhen thei nading thuneina a pie hi. 28Tami thu-ah lamdang sa sih un; azieh pen han sunga om zosie in ama’ aw za-in hansung panin ang pusuo ding uh hun ang tung ding a, 29tuale a hoi a gamtate in hinna nga dingin ang thokia ding a, sietna a bawl mite zong thukhenna thuoh dingin ang thokia ding uhi.#Dan 12:2
Jesu ading Tecite
30Keima’ thu-in bangma ka bawl thei sih hi. Ka zah bangin thu ka khen hi; ka thukhenna a dih hi, azieh pen keima’ deina ka sui sih a, kei ei sawlpa’ deina ka suizaw hi.
31“Keima tawh kisai teci pang leng ka teci panna man lo ding hi. 32Keima adingin teci a pang midang khat a om a, ama in keima dinga a teci panna pen dih hi, ci ka thei hi. 33Note in John kungah mi na sawl vua, ama in thuman thutah thu teci a pang hi.#Jhn 1:19-27; 3:27-30 34Tua banga mihing’ teci pannate ka sang hi, ka cina hi loin note in hutdamna na nga thei nadingun tam thute ka gen ahi zaw hi. 35Ama pen meivah bangin kuongin a tang pimpem a, note in ama’ khuovah sungah bakhat sung nopsah ding na nuom uhi. 36Ahi vangin John’ teci panna sanga a lienzaw teci panna khat ka nei hi. Pa in ka man sieng dinga ei pieh nasepte le tu-a ka septe in Pa pen keima ei sawlpa ahi lam keima tanga teci a pang ahi hi. 37Tuale keima ei sawlpa ahi Pa mama in zong kei tangin teci a pang zo hi. Note in ama’ aw na za ngai sih vua, a lim a mel zong na mu ngai sih uhi.#Mat 3:17; Mrk 1:11; Luk 3:22 38Ama a sawlpa na up lo ziehun ama’ thu zong na sung vuah a teng sih hi.
39“Lai Siengtho simna tawh tawntung hinna kinga thei ding na sah ziehun Lai Siengtho na lim-et mama uhi; tuate khu keima’ thu teci pang ahi bo hi. 40Hizongle note in hinna na nei nadingun keima kungah nang pei nuom sih uhi. 41Keima in mihingte tung panin minthanna ka sang sih hi. 42Ahi vangin note in Pasien’ itna lungsim na nei lo uh ka thei hi. 43Ka Pa’ min suonga kang pei vangin nei sang sih uhi; ama’ min suongin midang khat ang pei hileh na sang ding uhi. 44Khatlekhat kiphatna sang napi ucin, Pasien khat beh tung pana ang pei phatna na sui lopi uh na bangci up thei ding uh ahei? 45Pa mai-ah note ang mawsah dingin ei ngaisun sih un; note ang mawsah pen na kinepna pa uh Moses ahi bo hi. 46Moses um na hi uleh, kei zong nei up ding uh ahi hi, bangzieh ahei cile ama in keima’ thu a giel hi. 47Note in a laigielte na up sih uleh ka thugente na bangci up thei ding uh ahei?” a ci hi.
المحددات الحالية:
JOHN 5: ZBOTF01
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Zo Bible © Bible Society of Myanmar, 2018.