Iruuku 2
2
A mẹmẹ ma Ijeesu
(Imt 1.8-25)
1Ịnị ụmẹ ọnọọ, Ọgọsịtọsị ohinọyị Aniroomi ộ mẹ̀ ọda ka à chẹrẹ avaba anẹhẹ. 2Ọnọọ ọ vị ọyịchẹrẹ aza ịpaapa, Íkiriniyu mẹ̀ vị ịgọvọnọ tụ́ ẹtẹ Isiriya nị. 3Dị ọzọza nọ ẹkụra anị ka à na chẹrẹ ẹnị nị. 4Ijosẹẹhụ ọnị ọ rẹ hụrẹ ẹkụra Ịnazarẹtị ịnị ẹtẹ Igariri nọ Ijudiya, dị ọ nọ ẹkụra Ịbẹtịrẹhẹmị ịzị a yà ma Idevidi ohinọyị nị. Ijosẹẹhụ ộ nọ ịzọọ, agụvị ka ini ovwoovu Idevidi ọ chị hụrẹ vẹ nị. 5Ọnịrị Imeri ọ zị na ka à na chẹrẹ ẹnị nị. Imeri vị oni Ijosẹẹhụ nyị tụ́ oze. Ịjọnọọ, Imeri ee zyẹẹ.
6Ẹnịnị mẹ̀ yà Ịbẹtịrẹhẹmị, ụhwẹ ọ sị gụ Imeri ana a vọrọ ka ọ̀ sị ma ozi. 7Dị ọ ma ozi ịpaapa anị ọnọrụ nị, dị ọ sị ịta para a, dị ọ sị ọọ tụ́ ịzị ịsụpaā yàa rị ịsa nị. Ẹnịnị e yi re aha yà ini irehi ọnị ọzọgaā chí.
Oseratẹmẹ ọnịrị anggẹẹrị nịnị
8Â nyị oseratẹmẹ ẹnyị aanị ịnị ẹkụra ọnọọ. Dị ẹnịnị hi ịnị avị ịrahụ, di eyee sere atẹmẹ ẹnịnị nị. 9Dị anggẹẹrị Ohomorihi vana hụrẹ hi wa nị; dị igirima Ohomorihi aa zẹtẹẹ kara wa nị. Dị angwa ee hí wa ẹtẹẹtẹrẹ nị. 10Dị anggẹẹrị ọnọọ kà a yị wa ka, “Asị u rè hí angwa nịnị! Enube ọyịza mị va kà wụ nịnị nị, ọnị ọ vị ka ịnẹ avaba aza vee hine ẹtẹẹtẹrẹ. 11A sị ozi ọnya ma yị wụ nịnị ajịnị tụ́ ịnị ẹkụra Idevidi. Ozi ọnọọ ọ vị Ọdọzaha nị, ọnị ọ vị Ikirisiti Ananyị yị nị. 12Wáá yẹ ịsị ụ va sị yẹ ozi ọnọọ nịnị? U vee re ozi ọnọọ nịnị ka â sị ịta para a, dị a sị ọọ hụtụ ịzị ịsụpaā yàa rị ịsa nị.”
13Kẹnẹ, dị anggẹẹrị ọrụrụ-ọrụrụ jịnẹ hụrẹ ẹbẹẹba ve tù anggẹẹrị ịsọọnị nị. Dị ẹyaa jị ahẹ ga Ohomorihi, dị ẹ ka: 14“À vẹ yaa sị ụbanyịị yị Ohomorihi ana yà ẹbẹẹba keekere, ọ vaa sị ẹngwọọrọ yị aza ene hi ịnị ẹhẹ ana ayị anị hine tù.”
15Ịjị anggẹẹrị ẹnẹẹ sị hụụ ịdị ẹnịnị varẹma nọ ẹbẹẹba, di oseratẹmẹ ẹnẹẹ kà a yị ẹngụ ka, “À vẹ vị ya yịị nọ Ịbẹtịrẹhẹmị booro aanị, di ye ne re ịsa ana mẹ, oni Ohomorihi Ananyị yị va kà yị aanị.”
16Dị ẹ wụsẹ zwe na, di e ne tù Imeri ọnịrị Ijosẹẹhụ beri ozi ọnọọ ka â sị ọọ hụtụ ịzị ịsụpaā yàa rị ịsa nị. 17Ịjị e si oo re, ẹnịnị ệ kà ịrẹyị ọnị anggẹẹrị kà yị wa ini oze ozi ọnọọ. 18Avaba aza ana wụ́ ịrẹyị oni oseratẹmẹ ẹnẹẹ kà, ô hí wa irenu ẹtẹẹtẹrẹ. 19Dị Imeri sị ịrẹyị ẹnẹẹ tụ́ ịnị ayị anị, di ee ro o nị. 20Di oseratẹmẹ ẹnẹẹ varẹma aa na, dị ẹyaa kụ́ Ohomorihi avọ, dị ẹ rẹ yaa sị ụbanyịị yọ nị agụvị avaba ịsa ene e re dị ẹ rẹ wụ́. Ánggẹẹrị ọnọọ mẹ̀ yị kà a yị wa gẹdẹ-gẹdẹ ọ vị nị.
 yị Ijeesu ịrẹha
21 #
Ire 12.3;
Irk 1.31
Ịhị ẹkụhị ịhịnta sị gụ, ana a vọrọ ka à jị ozi ọnọọ ụvẹvẹnẹ, dị a hị́ ịrẹha anị Ijeesu nị. Ịrẹha ana anggẹẹrị yị ọọ, di Imeri ve zyẹẹ anị ọ vị ọnọọ nị. 22Ẹkụhị ọ sị gụ ana a vọrọ ka Imeri ọ̀ sị na nyịna ẹngụ anị anka ọda oni Imosiisi mẹ, dị ẹ sị ozi ọnọọ nọ Ijerusarẹmị ka ẹnị ẹ̀ sị na yị Ohomorihi nị. 23#Kụra 13.2,12Â maanị chẹrẹẹ tụ́ ịnị ọda Ohomorihi ka, “Ozi ịpaapa ọnyẹnẹẹ, ọ̀ọ vị ọnọrụ, vị ọ vaa sị ọọ tụ́ irenyii yị Ohomorihi nị.” 24#Ire 12.6-8Ẹ rẹ na ka ẹnị ẹ̀ na sị arekuku ẹẹva, àa vị ezi arivadi ẹẹva, dị ẹnị ẹ̀ sị mẹ̀ ịsọvọ, anka ọ́da Ohomorihi mẹ̀ rẹ kà a.
25Â nyị ọnọrụ ọnya aanị Íjerusarẹmị ọnị ịrẹha anị rị Isimiyọnị. Ọnịzẹyịza ọ vị nị, dị ọ rẹẹ̄ hẹkẹ Ohomorihi nị. Ee zí eyi ka Ohomorihi ọ̀ va kụ́ Anisirẹrị vavẹ udi ẹnịnị. Ụhwẹ Ọnịnị yà ịnị ayị anị. 26Ộ vịdị sị zụ̀ ọ ka o yi vee sú pooro di ò re Ikirisiti oni Ohomorihi aa tụ́ụ vẹ ẹhẹ. 27Aza ana ma Ijeesu ệ sị ọọ nọ ini irehi Ohomorihi ka ẹnị ẹ̀ na mẹ̀ ịsa ọnị ọda Imosiisi kà. Ịhị ọnọọ, Ụhwẹ Ọnịnị ộ mẹ̀ ka Isimiyọnị ọ̀ nọ ini irehi Ohomorihi. 28Dị Isimiyọnị sị ozi ọnọọ rị ụvọ, dị aa sị ụgaa yị Ohomorihi nị, dị ọ ka: 29“Ananyị mị, ẹmị ozi ahụ awụ ọ̀ọ kụkụ aa na booro aanị, ẹngwọọrọ ọ vị nị, agụvị ka ịsị ụ ka waa mẹ, wa sị ọọ mẹ. 30Ma raà sị eyi amị re ẹdọha 31oni u reè tenyi tịtẹ éyi avaba aza. 32#Ayị 42.6; 49.6; 52.10Ọnị ọ va ẹtohweyi ana vaa sị oze zụ̀ Anigiriki nị, dị ọ raa sị ụbanyịị yị Anisirẹrị ana vị aza awụ.”
33Ịrẹyị oni Isimiyọnị vavọọ kà ini oze Ijeesu aanị, ô hí Ijosẹẹhụ ọnịrị ọnyị Ijeesu irenu. 34Dị Isimiyọnị rẹ mẹ̀ aduwa yị wa nị. Dị ọ kà a yị Imeri ọnyị Ijeesu ka, “Ohomorihi ọ sị ozi ọnọnị nyị ka ini oze anị aza ẹnyị ịnị Anisirẹrị nịnị vaa yàa hyẹdụ, dị aza ẹnyị rẹ varẹma kwẹẹtẹ nị. Ohomorihi ọ raà sị ọọ mẹ apọtẹrẹwa ọnị aza ẹnyị vee yii tịtẹ; 35dị ọ sị ịsị aza ọrụrụ-ọrụrụ were ee roo tụ́ ẹhẹ. Ẹwụ ọnyị anị, ayị awụ vee du anka èe rere jị ụhwọ ngụ ọza ayị avọọ.”
36A rẹ nyị ọnịsẹ ọnẹẹ ọnya aanị ana aā hị́ Aana; ozi Ịhwanụwẹẹrị ọ vị nị. Ovwoovu Aseri ọ chị hụrẹ vẹ nị. Ọ sị vị ọzọkụ ẹtẹẹtẹrẹ. Ọ mẹ̀ hụrẹ hụ orihi, ịrayị ịhịmba ọ́nịrị ọva anị ra vị nị. 37Dị ọ kụkụ vana aa mẹ osoku hụrẹ ịrayị ẹbẹẹna tụra ẹẹna nị. Ọ mā hụụnị irehi Ohomorihi pooro. Dị aa ba awẹ, dị ọ raa mẹ̀ aduwa, ọ màa hẹkẹ Ohomorihi ọọdụ ọnịrị ịrahụ nị. 38Ụmẹ ana a sị Ijeesu vẹ gẹdẹ-gẹdẹ, dị ọnị rẹ vẹ, dị ọnị raa kụ́ Ohomorihi avọ nị. Dị ọ kà ịrẹyị ini oze ozi ọnọọ yị avaba aza ene ee zí Ohomorihi eyi ka ọ̀ va dọ Ijerusarẹmị tụ́ nị.
39 #
Imt 2.23
Ịjị ẹ sị avaba ịsị ọda Ohomorihi ka à mẹ mẹ, dị ẹ varẹma nọ Igariri, dị ẹ nọ ẹkụra ẹnịnị ana vị Ịnazarẹtị nị. 40Dị ozi ọnọọ aa hụ nị, dị aa nyị ụkata nị, ọ raa yẹ ịrẹyị ẹtẹẹtẹrẹ. Dị Ohomorihi aa mẹ ọyịzaa yọ nị.
Íjeesu mẹ̀ vị ozweyi, ộ nọ ini irehi Ohomorihi
41 #
Kụra 12.1-27; Ọda 16.1-8 Aza ana ma Ijeesu vị anaā nọ Ijerusarẹmị ịrayị-ịrayị, dị ẹ̀ na rị Eche Ọyịparahu. 42Íjeesu mẹ̀ sị gụ ịrayị ẹwụrẹva, di e dudu zị nọ Ijerusarẹmị, anka ẹ mẹ̀ vịdị yị mẹ nị. 43Ịjị eche ta, dị ẹyaa nọ eehi, dị Ijeesu ọnị jẹẹ Ijerusarẹmị nị; ama aza ana ma a ẹnị ẹ yị yẹ. 44Agụvị ka ê ro ka vị Ijeesu yà ịnị akakana aza nị, ẹ sị ụsẹ ẹkụhị ọnya zị, di e kuku vee sì ọọ ngụ ịnị akakana anda ẹnịnị ọnịrị ọta ẹnịnịị zị nị. 45Ịjị è yi re e, dị ẹ varẹma raa nọ Ijerusarẹmị, di eyee sì ọọ nị. 46Ịhyẹgwẹta anị, di e ve ne tù ọ ini irehi Ohomorihi nị. Di e ne tù ka ộ yaayịtẹ ịnị akakana ọzwọzịsa nịnị di aa wụ́ ịrẹyị ẹnịnị, dị ọ raa họ̀ wa use ịrẹyị nị. 47Avaba aza ana wụ́ ịrẹyị anị, ô hí wa irenu ịnị ẹngụ ịrẹyọyẹ ọnị ọ nyị ọnịrị ohi ana aa tụ́ wa.
48Ịjị aza ana ma a re e, ayị ẹnịnị ẹ sị vazi. Dị ọnyị anị kà a yọ ka, “Ho! Ozi emi, sị ẹ vẹ dị ụ maanị mẹ yị aanị? Wee re, ayị ẹmịrị ada awụ ẹ yị nẹtẹ vụrụ-vụrụ, i mèe sì wu zị.” 49Dị Ijeesu kà a yị wa ka, “Sị ẹ vẹ di u wee sì mi nịnị? Aanịka wẹ yị yẹ nịnị ka â vọrọ ka ma yà ini eehi Ada amị?” 50Ama ẹnịnị ẹ yị yẹ ịrẹyị oni Ijeesu kà yị wa. 51Dị Ijeesu saasa wa varẹma nọ Ịnazarẹtị nị. Ijeesu ộ ká ịrẹsụ hi yị wa. Dị ọnyị anị sị ịrẹyị ẹnẹnị tụ́ ịnị ayị anị nị.
52 #
1 Ịsa 2.26; Ụhị 3.4 Ijeesu aa vịra, aa yẹ ịrẹyịị hu avọọ, ọ raa hụ. Ohomorihi ô sì ịrẹyị anị, aza eni ree sì ịrẹyị anịị hu avọọ bẹẹ.
المحددات الحالية:
Iruuku 2: EBTP
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Ebira First Bible © Bible Society of Nigeria, 2014.