LUKA 1
1
Teihpüi Theophilus aw:
1Mikmi ah yum nak ung dang pyi ciah a mawng tung gui cu chang akda naw aknipi ah gu ne pyang pyi ci gui. 2Cun ah ami guk cu akhtük ung hmuhmat ci gui la pyeinsak ci gui ah m’thein m’kan ba gui ah kyak ci. 3Cun ah kyasei shin ah mawng gui cu, kei naw va tün ne teng kheng netah, na hmat thei vai ah guk ung nik khai ah ngai ne ka guk nei. 4Shin cu nang naw na hmuh ng’yak man phung akcang ah küm khai ah na shüm hmat vai ah ka guk ah kyak ci nei.
Tuihnim Johan Ang Tüi Vai ah Mawng Shäu Nak
5Judea kho ung Herod ghangpughang naw a uk sang ung Taigü kyong chang Zechariah ming nak ciah taigü om ci. Ak chu cun phi taigü kyong ungka Eliyabeth ming nak ciah kyak ci. 6Ngani cu Khanpughi ah ng’yak hlü ah om ni ne, Bawipa ah thukhän shaitaak cun phi läk ci goi. 7Ngani cu ghi law pyi ci goi, Eliyabeth kä hta sei ani hta kä om ci.
8Hnüüp ät ung Zechariah cu Taigüim kyong ah taigü ah bi cu bi ba ci. 9Taigü gui ah thung man ah mangkiang ung phyuh vawi khai ah ghü u sei, Bawipa ah Taigüim ah hteit ci. 10Ani naw kyong ah vawihpeh vai m’khih ne ak phyuh theh yah ung chang gui akpung ah taigü ci gui.
11M’khih ne vawihpeh nak mangkiang k’patlam ung Bawipa ah khankho chang dang law sei; 12Zechariah naw hmu netah cäi ne kyik ci. 13Cun ung phi khankho chang naw, “Zechariah aw, kä na kyih vai nei, Khanpughi naw na k’taigü cu ng’yak ci, na k’chu Eliyabeth cu pamihta ah hta lawk khai, ang ming cu Johan ah na sui vai. 14Ani ang tüi law ung a i hlawk ah na yeikyai khai ang? na püipaw gui mä a i hlawk ah yeikyai tuk khai gui ang? 15Ani cu Khanpughi lam ah chang m’gäi ah kya ci. Awktat man phung kä ei awk khai, anu puk ge ung Mumcha Theing awn kümbe khai. 16Ani naw Israel chang van cu ami Bawipa Khanpughi ah law püi ba gui khai. 17Ani cu Bawipa ah lam ung lam ma ciah kya ne, profet Elijah ah mäih ah khüighaat ne hlüngtai khai. Ani naw pa la hta atäng ah om ba sak goi khai; ani naw ng’thu kä ngai ciah chang gui düng ciah lu ng’lang nak ung ng’hlah law ba sak gui khai; Khanpughi ah hmawk ah ng’düi ge khai gui ah Bawipa ah chang gui cu ana m’cäi gui khai,” cine pyein ci.
18Zechariah naw khankho chang-am, “Cun ah a kyak vai cu a i hawk cha ka hmat khai ang? Kei phi ka ghi lawk ci, ani phi ghi lawk ci” cine pyein ci.
19Khankho chang naw, “Kei cu Khanpughi ah ma ah ng’düi ciah Kabriel nei; shin ah ng’Thu Ni nang-am ka ning m’thein khai ah Khanpughi naw ana tüih law nei. 20Cun ung phi akhin a khüm law ung bä khai ah ng’thu kei ah pyein cu nang naw kä na yum ci. Cun kä na yum ah hmawk ah nang cu na aang khai, kei ah ng’thu bä ne kä ang dang pha güt käng thu phung ah na om khai” cine pyen nak ci.
21Cun ah khin pum ung Zechariah cu chang gui naw ging law yai u netah, a i haw ne shin güt leng leng pum im kyong ah a ding ang? ci ne cäicat ci gui. 22Ani cu a luh law ba ung kä ng’thu ba thei ci. Cun ah kya sei ngami naw Taigüim kyong ah mikhmuk ciah ah hmat ci gui. Kä ng’thu ba thei netah a kut awn nüt püi gui ci.
23Taigüim kyong ah taigü nak a khin ng’pyi sei, Zechariah cu a im ah hteit ba ci. 24Cun kawn ah shou hta khätah Eliyabeth cu m’gai law ne cha hma ung kä luh law ah om ci. 25Eliyabeth naw, “Khanpughi naw kei cu nam gein pyi ci, Chang ah ma ah lü ng’aa nak ungka nak phiawn pyi ci” cik ci.
Bawipa Jesuh Ang Tüi Law Vai ah Mawng Ami Shäu Nak
26Eliyabeth am gai nak ak cha chuk nak ung, Khanpughi naw khankho chang Gabriel cu Kalile kho Nazaret gawnu ah tüi lawk ci. 27Khankho chang naw David ghangpughang ah ng’shon Josef ah k’chu vai ami beit ah Mari-am ng’thu m’thein lawk ci. 28Khankho chang naw Mari ah ma ah, “Na khan ah ding gei nak om sä, Bawipa naw a täng ah ning om püi ne, küikyang ciah hrilham ning k’be sä!” pyen nak ci.
29Mari cu khankho chang ah ng’thu ng’ya ne cäicat netah, “A i a pyein ni mä” cine ngai ci. 30Khankho chang naw, “Mari awi, kä kyikyawk ä, Khanpughi naw ning m’hlüngtai pyi ci nei. 31Nang cu m’gai ne pami hta ah na hta lawk khai. 32Ang ming cu Jesuh ah na sui vai. Ani cu hlüngtai ne hlüngtai pi ciah Khanpughi ah hta ah kyak ci. Ani cu David ghangpughang ah ang shon ah kyasei, Khanpughi naw ghangpughang ah ngoh sak ba khai. 33Ani cu Jakob ah hta ng’shon ung ngawi yä ghangpughang ah kiak khai, a uknak cu kä düt hlawt khai” cine pyein ci.
34Mari naw khankho chang-am, “Kei cu ng’lamihta nei shin ah na pyein gui cu a i hawkcha ah kya thei khai ang?” cine ng’shik ci.
35Khankho chang naw Mumcha Theing nak khan ah gawk lawk khai, Khanpughi ah hlüngtai nak phi nakkhan ah gawk lawk khai. Cun na kia sei theingthap ciah ak hmaw cu Khanpughi ah Htapa ah ming khai. 36Na paw Eliyabeth ah mawng cu ngai shüm ä, ng’yüü ciah ami pyein, ghi law pyi ciah chang ani cu, tuhbäi cha chuk m’gai pyi ci nei. 37Khanpughi ah kä m’khüt a i kä om ci nei” cine pyein ci.
38Mari naw, “Kei cu Khanpughi ah changshäm ah ka kyak ci, na pyein ah mäih ah kya sä” ci khätah, khankho chang cu maih ba ci.
Mari cu Eliyabeth ah Hteit ci
39Cun kawn ah Mari cu pawng m’hteim ne, Judea kho, khosiip lam gawnu tumat ah hteit ci. 40Mari cu Zechariah ah im ah hteit ne Eliyabeth cu yavaih nak ci. 41Eliyabeth naw Mari ah yavaih nak ang yak sang ung a puk kyong ah ak hmawhta cu hnün ci. Eliyabeth cu Mumcha Theing awn be netah, 42“Nang cu hnumi gui nüng ung hlüngtai nak om pi bäih ci, na hta law nak vai ah ak hmaw cun phi hlüngtai nak om ci! 43A i ah kya ne, kei ah khan ah shin ah hlüngtai nak gui a gawk law ang? 44Ka Bawipa ah anu cu kei ah gawk lawk ci nei. Nang ah yavaih nak kang yak vai-am kei ah puk kyong ah ak hmaw cu yeikyai ne hnün ci nei. 45Khanpughi ah ng’thu akcang ah bä lawk khai cine, na yum ah hmawk ah nak khan ah yeikyai nak om ci nei” cine m’lau ne pyein ci.
Mari ah M’hlüngtai nak Ng’Äi
46Mari naw,
Ka m’lung naw Bawipa m’hlüngtai ci;
47Khanpughi Hunbawi hmawk ah ka mümcha yeikyai ci,
48Ani naw yoken ciah akchang shäm cu na shüm ci nei,
Tuhbäi tün ne chang van naw yeikyai chang ah na khü
Khai gui nei,
49A i ah kyasei ci ung hlüngtai säih ciah Khanpughi
naw kei ah hmawk ah aküikyang cu bi pyi ci nei.
Ani ah Ming cu theingcim ci;
50Ani m’tamkhah ci gui ah khan ah ang shon päng ung
am gein nak cu dang sak ci.
51Am gäi nak ah a kut awn am lung m’däm ci gui cu,
m’taai gui yawp ci.
52M’gäi ciah ghangpughang gui mangkiang ung kaa
yuk chah gui ne, yoken ciah chang gui han chaang
gui ci.
53Cawigha ci gui-am tuihlim ci tumbei gui ne, bämang ci
gui cu ami yüng ah hteh sak gui ci.
54Pupa gui ah ma ah a shaitaak cu kümbe sak ne, ak chang
shäm Israel chang gui cu m’htei gui khai ah law
pyi ci nei.
55Ani naw Abraham am am dang ah am gein nak cu, hta ng’shon
ung dang lä ci nei” cine ng’äi ci.
56Mari cu Eliyabeth ni ah cha thum om tu netah, a im ah
hteit ba ci.
Tuihnim Johan ah Ng’tüi Nak
57Eliyabeth cu akcha küm law sei pami hta ah hta lawk ci. 58A im ng’phei la a mätyah gui naw, ani ah khan ah Khanpughi naw cäicat vai abi cu hmu u netah, ani awn a täng ah yeikyai tuk ci gui.
59Ak hmawhta hnüüp chih lüng sei, vun-ah pawi ami bi nak ung law tuk ciah chang gui naw, apa ah ming, Zechariah bä ah sui ba vai ah ng’ya hlük ci gui. 60Cun ung phi anu naw “Johan ah sui vai nei” cik ci.
61Ngami naw “Nangmi ung cun ah ming kä om man ci” cik ci gui. 62Cun kawn ah apa naw a i ah a sui hlü ah nüt ne ng’shik ci gui.
63Zechariah naw guk nak vai k’thäh gui netah, “Aming cu Johan nei” cine gu khätah, chang gui cu cäicat ci gui.
64Acun vai-am Zechariah cu ng’thu law ba thei netah, Khanpughi cu m’hlüngtai ci. 65Ami im ng’phei gui cu ami van kyikyawk ci gui. 66Cun ah a mawng gui cu Judea kho, khosiip lam avan ung thang yawp ci. Cun ah mawng ng’ya tuk ciah chang gui naw, “Cun ah ak hmaw cu a i ah mäih chang ah kya lawk khai ang?” cik ci gui. Cun ah ang htei kawn ah Bawipa ah hlüngtai nak cu ani ah khan ah om ci.
Zechariah ah Ng’cä Nak
67Johan ah pa Zechariah naw Mumcha Theing awn be netah,
Khanpughi ah ng’thu a pyein cu:
68“Israel gui ah Khanpughi Bawipa cu m’hlüngtai tu vä,
Ani cu akchang gui m’htei gui khai ah law ne,
phiawn sak gui pyi ci nei.
69Ak changshäm David ah hta ng’shon ung, hlüngtai ciah
Hunbawi cu dang sak pyi ci nei.
70Cau theingthap ciah profet gui-am shaitaak nak a peit
gui ah mäih ah,
71Ani naw ga ah kut kyong ungka la, na thüi na gui ciah
kut kyong ungka na hun gui pyi ci nei.
72Ani naw mi pupa gui am gein nak gui cu pyein ne,
ang thu khän theing cun phi shüm ci nei.
73-74Mikmi cu ga ah kut ung nak phiawn gui ne, kä kyikyawk
ne abi mi bi vai ah mipa Abraham ah ma ah
shaitaak nak pe pyi ci.
75Cun ah kyasei mikmi cu theingcim nak la düng nak awn
Khanpughi ah ma ah mi ghin nak chuih mi om khai.
76“Nang, kei ah chang hmaw, a hlüngtai säih Khanpughi ah
profet ah ning khü vai nei.
Nang cu Bawipa ah ma ung law ne, ani ah hmawk ah
lam na pyang khai.
77 Bawipa ah ak chang gui-am, ami katnak m’gein gui sei,
hun nak ami gah vai ah mawng m’thein gui khai nei.
78Mikmi ah Khanpughi cu m’gein nak la k’dük nak awn
be ci.
Ani naw a hun nak ah akdei cu mi khan ah ng’shü law
sak ne,
79Sihnak ah ang hnim ka ah om ci gui ah khan ah
khankho ah akdei cu khang lawk khai,
mikmi-am phi ding gei nak lam nam shüm gui khai” ciah kyak ci.
80Ak hmaw cu däm ng’vai law ne pumsa, mümcha avan ung kümbe lawk ci. Ani cu Israel chang gui ah ng’lung ah dang khai ah bi kä abi pha güt ung kho ng’gau kho ah om cang ci.
المحددات الحالية:
LUKA 1: CBC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Cho Bible Common Language © Bible Society of Myanmar, 2016.