Suluet 14
14
Abarama a lwöggu Loto
1A ko gwe sona i perok ti Amerapela mor lo Sinar, ko Ariok mor lo Elasar, ko Kedorlaomer mor lo Elam, se ko Tidala mor lo Goyim.
2Kilo moran a lo ’kin i mörö ko Bera mor lo Sodoma, ko Biresa mor lo Gomora, ko Sinaba mor lo Adema, ko Simeber mor lo Seboim, se ko mor lo Bela. (Bela a Soar.) 3Kilo liŋ a mora i pirit na geleŋ i pirit na ’dir nagon a Sidim, nagon tör nagon ti ’dokon nagon piöŋkanyit a ’balaŋ parik gwon nyu. 4Kilo moran a gwon a ’dupi ti Kedor-laomer kiŋajin puök wot murek, ama i kiŋa topuök wot musala, a se renyani sara ko lepeŋ. 5A i kiŋa topuök wot Iŋwan, a Kedor-laomer se ko moran lo gwon ko lepeŋ kulu poŋdi po, a se te ’yi Ŋutu ti Repa Aseterot-karnaim yu, a te ’yi Ŋutu ti Juja Ama yu, a te ’yi Ŋutu ti Eme Sawe-kiritayim yu,
6a te ’yi Ŋutu ti Kori i mere lose Seir yu, tojo ko Ele-paran nagon diŋö ko yöbu na sese. 7A se yitöni bot, a ’duröki Ene-misapat. (Misapat a Kadesa.) A se te ’yi jur liŋ lo Ŋutu ti Amalek, ko a te ’yi utu ti Amori Köti logon si ’da Kasason-tamar yu kulu. 8A kirut mor lo Sodoma, ko mor lo Gomora, ko mor lo Adema, ko mor lo Seboim se ko mor lo Bela (Bela a Soar), a kilo moran iti kaŋo a ’dakaki i möro ko se i pirit na ’dir na Sidim. 9a se möröni ko Kedor-laomer mor lo Elam, ko Tidala mor lo Goyim, ko Amerapela mor lo Sinar, ko Ariok mor lo Elasar, kilo a moran Iŋwan lo moro ko moran mukanat. 10Nyenagon a pirit na ’dir na Sidim gwe ko diliö jore, kine diliö gwon ko ŋo gwoso meme; nyena a na wöggiri mor lo Sodoma ko mor lo Gomora nu, a kulye kase iŋge ’do ’do nyin, a pitönö kase iŋge wokön tojo i mere. 11A se momorgi toro ’bo liŋ ti Sodoma ko ti Gomora, se ko kinyojin kase, a iti tu; 12a se Köti morgi Loto ŋuro lo luŋaser Abarama, logon si ’da Sodoma yu lo, a se iŋge momokara toro ’bo kanyit liŋ, a se iti tu.
13A i nu diŋit Abarama Eberetyo si ’dani nyona ko kaden logon a rinö ti Mamure Amorityo; a lele ŋuto lo poŋdi lwökuŋdyö mugun, a takiŋdye Abarama kine kulya. Mamure a luŋaser Esekola ko a luŋaser Aner; kilo a Ŋutu logon a teteŋdya tomoret kase Abarama. 14A na yinge Abarama adi karutyo lonyit aje mökaji nu, a nye momori Ŋutu kanyit miajin musala ko puök wot budök logon a yuŋwe kanyit i ’baŋ ko a todiniki mörö kulo, a se kebbi bot na lepeŋat teŋ ko Dan. 15A Abarama korakiŋdye Ŋutu kanyit i mörö ko lepeŋat i tukwaje, a lepeŋ se ko kölipönök kanyit iŋge te ’ya lepeŋat, a kepoddi se tojo Koba, i swöt lo lobot lo Damaseke. 16a nye nyökuŋdye toro ’bo liŋ, a nye Köti nyökuŋdye karutyo lonyit Loto ko toro ’bo kanyit, ko Ŋutu wate, se ko kulye Ŋutu.
Melekisedek a ’boroja Abarama
17A na yitwe ’i Abarama i teladdu na Kedor-laomer se ko moran lo gwon ko lepeŋ kulu nu, a mor lo Sodoma poni kaŋo i torumbö ko lepeŋ i pirit na ’dir na Sawe (Sawe luŋu a pirit na ’dir na mor.) 18#Eb 7.1-10A Melekisedek mor lo Salem joŋdi ambata ko binyo; lepeŋ a koane lo ŋun Katoŋanit lo ki liŋ 19A nye ’boroji lepeŋ adi,
Ti Ŋun Katoŋanit lo ki liŋ monye lo ki ko kak, ’boroji do Abarama,
20ko ti Ŋun Katoŋanit lo ki lio, logon a tiŋdu merok kulök konut i könin lo, ti lepeŋ bulani bula.A Abarama tiŋdi lepeŋ swöt topuökit na ŋo liŋ.
21A mor lo Sodoma kulyani ko Abarama adi, Tiki nan kilo Ŋutu, ama joŋgi toro ’bo a kunok. 22Ama a Abarama kulyani ko mor lo Sodoma adi, Nan a ’doggu könin liŋ ki ko MATAT Ŋun Katoŋanit lo ki liŋ monye lo ki ko kak, 23adi, ’Diri ’diri, nan ti wu nene ŋo ma ’di geleŋ to, ma ’di ko a ket, kode a pata toret na kamuka, kode nene ŋo inot, an do ko kulya adi, Nan a tukwörieŋdu Abarama. 24Nan de ti joŋga nene ŋo kwoŋ, ama tuŋ ŋo nagon teton a nyö kune, se ko koret nagon tiki Ŋutu logon a tu ko nan i pirit na geleŋ kulo; ti Aner, ko Esekola, se ko Mamure ti lepeŋat joŋgi koresi kase.
المحددات الحالية:
Suluet 14: BBE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bari Bible © United Bible Societies, 1979.