Suluet 16
16
Agara ko Yisamaele
1A Sarai nakwan na Abarama gwe a ko yuŋwekiŋdyo lepeŋ ŋwajik. A nye gwe ko nene kölipönit Ejipetotyo nagon karin kanyit a Agara;
2a Sarai kulyani ko Abarama adi, Mete, MATAT aje teŋgu nan i yuŋwe nio; nyena böŋö ti do lupöni ko kölipönit nio yu; kode anyen nye böŋö pipilukiŋdya nan ŋwajik. A Abarama yiŋge gworo lo Sarai. 3A i mukök nagon Abarama aje si ’da i jur lo Kanana ko kiŋajin puök nu, a Sarai nakwan na Abarama joŋgi Agara Ejipetotyo nagon a kölipönit nanyit na, a tiŋdi Abarama lalet lonyit ŋina kölipönit i gwon a nakwan nanyit.
4A nye mori ko Agara, a Agara piŋge pigga; a nye ko dene mugun adi nye gwe ko pele, a nye lau lu ŋote nanyit.
5A Sarai kulyani ko Abarama adi, Ti toron na konaki nan na ti morgi do. Nan a tiŋdu kölipönit nio konut i könin, a lepeŋ ko dene mugun ko pele a nye lau lu nan. Ti MATAT ’duŋge kine kulya i kiden nikaŋ ko do! 6A Abarama kulyani ko Sarai adi, Mete, kölipönit inot gwon konut i könin, konaki lepeŋ ŋo nagon do ’de ’deggi kune. Nyena a Sarai konakiŋdye lepeŋ arabat, a Agara wöki wokon.
7A malaikatat lo MATAT ryeji lepeŋ nyona ko kinat lo pioŋ i yöbu yu, lo ’lo kinat lo pioŋ gwon i kiko lo tu Sur. 8A nye pipije adi, Agara kölipönit na Sarai, do po ya? Do tu da? A nye waddi adi, Nan wöwökun koi ko ŋote nio Sarai i komor. 9A malaikatat lo MATAT kulyani ko lepeŋ adi, Yitöni bot ko ŋuti yu, tokoyoggi mugun ko lepeŋ i komor.
10A malaikatat lo MATAT lo kulyani ko lepeŋ adi, Nan mo tutuŋdi nyakwariat kulok, a se tine bulö kena kogwon se jore. 11A malaikatat lo MATAT lo kulyani ko lepeŋ adi, Mete, do gwon ko pele, a do mo ta ’duuŋdye ŋuro lulalet; a do mo gwije lepeŋ a Yisamaele, #16.11Yisamaele Karin ti Yisamaele kweja adi Ŋun yiyiŋga kogwon MATAT aje yiŋga delya inot. 12A nye mo gwe gwoso kijakutat lo mu ’dio; lepeŋ mo totogworokolon ko Ŋutu liŋ, a Ŋutu liŋ mo möröni ko lepeŋ; a nye mo diŋöni ko karu kanyit liŋ. 13Nyena a Agara gwije MATAT lo kulya ko lepeŋ lo adi, Do a Ŋun logon a met nan; kogwon Agara pija mugun adi, Nan ’diri ŋona a meddya Ŋun a gwe jorun i mukök na meddi nan lepeŋ nu le? 14Nyena a Ŋilu kidi gwiyöni a Ber-lakai-roi;#16.14 Ber-lakai-roi Karin ti Ber-lakai-roi kweja adi Kidi lo nye gwon jorun logon memet nan lepeŋ gwon i kiden na Kadesa ko Berede.
15 #
Gal 4.22
A Agara yuŋwekiŋdye Abarama ŋuro lulalet; a Abarama gwije ŋuro logon Agara a yuŋwekin lepeŋ lo a Yisamaele. 16A Abarama gwe ko kiŋajin merya budök wot buker nagon Agara ayuŋ wekiŋdye nye Yisamaele nu.
المحددات الحالية:
Suluet 16: BBE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bari Bible © United Bible Societies, 1979.