Suluet 20
20
Abarayama ko Abimelek
1A Abarayama ŋiöro nyu tojo i jur lo Loki, a nye si ’dani i kiden na Kadesa ko Sur; a nye mönuŋdye Gerar yu. 2#Sul 12.13; 26.7 a Abarayama kulyani i kulya ti Sara nakwan nanyit adi, Nye a kiaser nio. A Abimelek mor lo Gerar soŋdi Ŋutu i joŋga na Sara. 3Ama i tukwaje a ŋun poki ko Abimelek i rudwe, a kulyani ko lepeŋ adi, Mete, do ŋilo twatwan, kogwon kulya ti ŋuto nagon do aje joŋ na; lepeŋ a nakwan na leŋe. 4Ama Abimelek a ko nyuŋ ’bo ’yu lepeŋ, a nye pipije adi, Pon MATAT, do ŋona de tatatu ma ’di Ŋutu logon ’bak kulya le? 5Lepeŋ ko mugun a ko takin nan le adi, Nye a kiaser nio? Na ŋuto Köti ko mugun a kulya adi, Lepeŋ a luŋaser liŋ. Nan a koŋdya kine kulya ko töili lo rigwo ko könisi loke. 6A Ŋun kulyani ko lepeŋ i rudwe adi, lye, nan a kurun adi do a koŋdya kine kulya ko töili lo rigwo, nan koti aje göja do i toroŋdya na nan; nyena nan a ko kölökiŋdyö do i ’bo ’yu na lepeŋ. 7Nyenagon soŋinana nyököki ŋilo ŋuto nakwan nanyit; kogwon ŋilo ŋuto a nebi, a nye de momo ’yi ko do, a do de rune ru. Ama ko do a ko nyökökin lepeŋ bot, dene den adi do ’diri de twatwan, do se ko Ŋutu kulok liŋ. 8A Abimelek ŋine ŋien ko ’bure kobubut, a luŋgi kölipönök kanyit liŋ, a nyönyökökiŋdye lepeŋat kine kulya liŋ; a kilo Ŋutu kujönöni kujönö parik. 9A Abimelek luŋgi Abarayama, a pipije lepeŋ adi, Kune ŋo a nyo nagon do aje konakin yi kune? Nan a toroŋdya do i nyo, na jakiŋdye do nan se ko tumatyan nio ŋina toron duma? Do a konakin nan ŋo nagon agu ködyö ti bulö kona. 10A Abimelek pipije Abarayama adi, Do a timuŋdya nyo nagon do koŋdya ŋina ŋo? 11A Abarayama waddi adi, Nan koŋdya ŋina ŋo kogwon nan a timuŋdya adi Ŋutu ti na pirit ti kujönö Ŋun kwöŋ, a se mo tatuje nan kogwon kulya ti narakwan nio. 12Köti nye ’diri a kiaser nio, ŋuro na baba, ama ko ŋote kaŋ ka ’de ka ’de, nyena a nan iŋge yemun lepeŋ a nakwan nio. 13A ko gwe sona, i diŋit nagon Ŋun a tiŋdu nan i ŋiörö kaŋo ko baba midi yu nu, a nan kulyani ko nakwan nio adi, I piritön liŋ na ’durökiŋdye yi kune, do ködyö kwekiŋdya nan ’busan i jambu adi nan a luŋösur. 14A Abimelek ’dumuŋdye yidin ko dwönin, ko kölipönök lulyan ko nawate, a tiŋdi Abarayama, a nyökökiŋdye lepeŋ Sara narakwan nanyit bot. 15A Abimelek kulyani adi, Mete, jur liŋ gwon konut i komor; si ’dani i pirit nagon do ’de ’dekan.
16A nye kulyani ko Sara adi, Mete, nan a robba luŋösur ko pödöjin aliŋ geleŋ;#20.16 podojin aliŋ gelen Keri lose lalaet gwon sona, ama likaŋ kweja adi lalai ko ŋo lo rima anyen lalaarikin do i komor na Ŋutu liŋ lo gwon ko do i pirit na geleŋ kilo; a kulya kunök tetenakin gwogwo ko Ŋutu liŋ i komor. 17A Abarayama momo ’yi Ŋun; a Ŋun lwöggi Abimelek ko narakwan nanyit, se ko kölipönök kanyit nawate, nyena a se yuŋweni ŋwajik. 18Kogwon MATAT aje ’dija yuŋwe na wate liŋ ti mede na Abimelek kogwon kulya ti Sara na kwan na Abarayama.
المحددات الحالية:
Suluet 20: BBE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Bari Bible © United Bible Societies, 1979.