Oluka 21
21
Ofaodi ba ashe-eshaku
1Eyesu a zhiŋ a ka moare la a wo angyiŋ a shri ofaodi mo a shri a ygi angongo Anyuŋ-akulu. 2Ambo a ka ashe-eshaku la a wo la ekŋe a gre eshri, a shri anini aha a ygi angongo lo. 3Eyesu a nyuŋ moare a lu mi le, Ame e lu e da gimi, ashe-eshaku he lo la a wo la ekŋe egyagi a mbo, a fa a da Ahogbrẽ a gre areyaŋ a mbo. 4Moahwõ a fa ofa angyiŋ eshki ekplo nzenze ba moa a wo la alo ma, ambo ashe-eshaku hi, la a wo la ekŋe, a shri ekplo baŋ a wo la alo ma pyeŋ angyiŋ a shri a di.
Eyesu a lu ba moa á kypi Anyuŋ-akulu
5Moakyeŋ eshki mo a lu odlo eshri Anyuŋ-akulu, eka ba alo a wo adzadzi a gre eshri, okyku ézhim ba moa a mbdzi lo e wo ozba nzenze. Nga moa a sa a lu odlo eshri ofaodi ba moare a la a shri a da Ahogbrẽ okyku lo. Eyesu a lu mi le, 6Ayakplo he pyeŋ ba agimi e ka he, omba o yi ó ba ba ezhim ekyeŋ a mbo é ba e ra é fki la eŋa okro he mbo. Moa á kypi lo pyeŋ á ygi obiŋ.
Ewu andandandim
7Moa a zhĩ Eyesu a lu mi le, Andakʼpo, ohe lo ó kpo ombayaŋ? Egŋeyaŋ é ba e tsa ba edgu ayakplo he lo é ba e kpo?
8Eyesu a tno mo ma a lu mi le, Agimi e nyuŋ e ka, okyku o da mo a bile gimi mbo. Okyku eshi moare nzenze á ba eshko me nga á lu mi le, Ame angyiŋ e wo Emisiya, nga le, Omba lo o kpo. Agimi e bmi pa la moare edgu he lo mbo. 9E kpo eyli omba bimi e gno moa a ta eko nga moa a kpo ambgu mbo. O dzu omgbybi ba edgu ayakplo he lo á ba a kpo ayga, ekakahelo a mbo, omba ba obiŋ hi ó kso angyiŋ o kpo a wo mbo. 10Eyesu a lu mi le, Obiŋ ó ta eko ta la obiŋ, oreŋ nga ó kpo ambgu ta la oreŋ. 11Obiŋ hi ó zhga ara nzenze. Embyle, ta la ololo ó kpo moare ewu ayaŋ a mbo. Ayakplo la a gbu eyli á kpo, nga moa á ka ayakplo egbregbre ahrẽ.
12Omba ba edgu ayakplo he lo a kpo a wo mbo, moa á vu gimi, nga á kpo gimi ewu, nga moa á shri gimi á di okyku o da mo a sõ gimi ombgu anwyeakulu, nga moa á shri gimi á ygi aku. Nga moa á vu gimi á shri á ba okro moareŋ okyku eshko me. 13Omba he lo ó dzu ozhẽ angyiŋ okyku o da gimi e lu Oshpaodzadzi e da mo. 14Omba he lo agimi e tne aga eka ekplo bimi é ba e lu okyku o zgi eshri bimi mbo. 15Okyku eshi omba he lo ame é shri edgu odlo bimi é ba e lu é da gimi. Nga ame é shri okaobmye é da gimi, nga moafpu gimi á kpo á gre gimi a gbu mbo, nga á tla odlo bimi a gbu mbo. 16Moadigimi, pa la moanigimi, pa la moa ba ogu bimi, pa la moa la a ri ekpom ka la gimi, moa á kpyi gimi. Nga moa á bga moakyeŋ eshki bimi. 17Areyaŋ a mbo á tla gimi okyku bimi e lu me ma. 18Ekakahelo a mbo, ekplokyeŋ tsitsi a mbo é kpo gimi mbo. 19E da egʼba e shki gimi ami mbo, okyku eshi, ozhẽ he lo sha angyiŋ, agimi é ba e gro.
Ekplo la é ba e kpo ta la Orushalima
20Omba ba agimi e ka moanwyeakyuŋ a ta Orushalima a kpaŋ le, omba he lo agimi e ka e bmye ba moa á ba a kypi lo. 21Omba he lo, o raŋ o gre ba areyaŋ a mbo, a zgi obiŋ ba Eyahuda a knye a yi akukũ. Areyaŋ a mbo la a wo osku lo eshyẽ, á knye á zgi. Areyaŋ a mbo la a wo okrokyeŋ omba he lo le, a bla a ba osku lo eshyẽ mbo. 22Omba he lo o wo omba ba ewu angyiŋ. Ohe lo ó kpo okyku o bli ekplo ba Ahogbrẽ a lu. 23Ó dzu ekplo eyli nzenze omba he lo pa la moashe la a wo onyi, pa la moashe la a shri moanwye able! Ayakplo ba ayiekŋe á kpo ta la obiŋ hi, nga Ahogbrẽ á kpo moarehwi he lo ewu. 24Moa á bga moarehwi la ákõ, nga moa á vu mo eka moawaghrẽ á shri á yi ebiŋ andandandim. Nga omba he lo moa la a wo moaEyahuda mbo moa á kpo ekʼpo Orushalima o tsa ba omba mo o khwo.
Oba-ba ba Anwye Arehivĩ
25Moa á ka egŋe nzenze olulum ta la ohwa, ta la eyi enzo. Obiŋ hi pyeŋ ó wu okũ, nga ó kpo eyli ba akyuŋ ba anyuŋ-ondzu a kpo, ta la eka ba ami ba alo fa ksa, a fa ksa. 26Moarehwi moa á yla la eyli, omba moa a ka ayakplo ba moa a gno oshpa ba alo a kpo obiŋ hi pyeŋ. Omba he lo ayakplo egbregbre la e wo ahrẽ, moa á gʼbu á sku ezhẽ mo. 27Omba he lo angyiŋ, Anwye Arehwĩ á ba a gnyu. Á ba la etabro, la ekʼpo egagre, pa la ayimom ba esesla. 28Omba ba edgu ayakplo he lo a zga esĩ a kpo le, e ka ayi ozhẽ okyku eshi omba oshla bimi o wo osusku a mo.
Onyenye eshri esĩ ebro
29Ambla he nga Eyesu a ta egŋe he pa la mo, a lu mi le, Agimi e nye eda eshri esĩ ebro ta la asĩ aki ahwõ. 30Omba ba moa a hwom aya le, agimi e ka e tspi ma ongʼbo o wo osusku a mo. 31Okyku eka he nga, omba ba agimi e ka edgu ayakplo he a kpo le, agimi e ka e bmye ba Oreŋ Ahogbrẽ o wo osusku a mo.
32Agimi e gno! Ohe lo pyeŋ ó kpo ayga, areyaŋ a mbo la a wo ma obiŋ hi ohuhuhi á ba a kpu. 33Ongyeŋ ta la obiŋ hi moa á bre á yi, ambo odlo me ó bre ó yi ku-ku mbo.
E nyuŋ eshri bimi e zga
34Agimi e nyuŋ eshri bimi e zga! Agimi e da oriabgo, ta la owa-ami, ta la ogroayi ba anzho ba obiŋ hi o bile gimi mbo, o mbo le onda mi lo ó ba o gnyu gimi ó gnyu. 35Onda mi lo ó vu moarehwi okroyaŋ a mbo obiŋ hi, eka ba amgbaŋ ba moa a ta. 36Ambo agimi e dzu e kʼpu ombamba pyeŋ, nga e fa olu okyku o da gimi e hwiŋ oshye bimi e ba e kpo e gre edgu ayakplo la á ba a kpo, nga e tspi egi ayi ba Anwye Arehwi.
37Eyesu a nye moare Anyuŋ-akulu omba he lo. La olum-ore a la a zgi a yi Akũ Olivi nga a la a kpo okyukyku pyeŋ ahe lo. 38La endigigiŋ nga moare mvye a kʼpi a gre okyku o yi o gno onyenye baŋ Anyuŋ-akulu.
المحددات الحالية:
Oluka 21: EGONT74
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Eggon New Testament © United Bible Societies, 1974. Bible Society of Nigeria