KUPUTUKA 12
12
1Jino #Vili. 7.3. Yehova ambile kuli Apalama ngwenyi, Fuma kulifuci lyove nakuli vausoko wove nakuzuvo yaiso, uyenga kulifuci lize nangukakulweza.
2Nangukakulingisa kupwa umuyaci waunene, nangukakuwahisa, nakufumakanyisa lijina lyove, kahove upwenga umuka-kuwahisa vakwenu.
3Nangukakisula vaze navakakukis-ulove, kahou mwakakwangulove nangukamwangula. Kaha #Vili. 3.25; Ngale. 3.8.muli ove vaka-jitanga jahamavu vosena navakamona kutokwa.
4Ngoco #Hepe. 11.8.Apalama akatukile, nge omu vamulwezele kuli Yehova, kaha ayile naLote. Apalama apwile namyaka makumi atanu naavali namyaka yitanu haze akatukile kuHalane.
5Apalama ayile napwevo lyenyi Salai, naLote mwanayayenyi walunga, navikumba vyavo vyosena vize vahetele, navatu vosena vaze vahetele kuHalane. Vakatukile vaye kulifuci lyaKanane, kaha vahetele kulifuci lyaKanane.
6Apalama ahicile mulifuci palanga nakuXekeme, kuze kumutelevinde uze uli kuMole. VaKanane vapwile makumbi aze mulifuci.
7Yehova alisolwele kuli Apalama nakumwamba ngwenyi, Lifuci lino #Ngale. 3.16.nangukalihana kutanga yove. Kaha kuze Apalama amutungilileko Yehova lijiko lyakulumbila, Uze alisolwele kuli ikiye.
8Alukile kuze, ayile kupili yize yili kumusamuko, kuhambakana Mbetele, kaha atungile mbalaka yenyi kuze, naMbetele kumuyakumbi, naAi kumwizakumbi. Kaha kuze amutungilileko Yehova lijiko lyakulumbila, asanyikile Yehova halijina lyenyi.
9Apalama atambukilenga, cayanga lika nakutwala kuSulo.
Apalama mwazuzumana kuEjipitu
10Jino kulifuci lize kwaholokele zala yakalombolombo, kaha Apalama ayile kuEjipitu nakuzuzumana kuze, mwomwo zala yakalombolombo yize yapwile yayinene mulifuci lize, xikaho.
11Kaha casolokele, omu alingile hanahete lyehi kwakamwihi numbengile muEjipitu, ambile kuli pwevo lyenyi Salai ngwenyi, Tala jino, ngunatacikiza ngwami, ove kukutala kumeso upwevo wamwaza.
12Kaha nacikasoloka, omu navakakumona vaEjipitu, navakalyamba ngwavo, Ou pwevo lyenyi. Kaha navakangujihami, oloze navakakulamove umutonyi.
13Ngunasakwila mwane, ukamba ngwove, Ngundumbwenyi, manganami ngukamone kuwaha hali ove.
14Kaha casolokele, omu ahetele Apalama muEjipitu, vaEjipitu vamwene pwevo lyenyi ngwavo, wamwaza cikuma.
15Vilolo jaFwalo vamumwene, vamusangejekele kuli Fwalo. Kaha vamwingixile pwevo muzuvo yaFwalo.
16Fwalo amulingilile Apalama mwamwaza hali uze pwevo, kaha Apalama ahetele mikoko navangombe navimbulu vavikuji navandungo vamalunga navava vamapwevo navimbulu vavipwevo navangamela.
17Oloze Yehova avijixile Fwalo misongo yayinene navaze vakuzuvo yenyi nawa, hali Salai pwevo lyaApalama.
18Kaha Fwalo asanyikile Apalama, amwihwile ngwenyi, Eyi unangulingi ika? Ikaze wakanyinanga kungulweza? ngwove, Ikiye pwevo lyami.
19Ikaze wambilanga ngwove, Ikiye ndumbwami? numba ngumutambule kupwa pwevo lyami. Xikaho jino, tala pwevo lyove, mutambule, muliyilenga kwenu.
20Fwalo avahanyine vatu jenyi luximbi lwakumuvuluka, kaha vamukatwile, napwevo lyenyi navyosena vize ahetele.
المحددات الحالية:
KUPUTUKA 12: LUE70
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Luvale Bible © Bible Society of Zambia, 1970.