JUAN 6
6
Jesosaa 5.000 huisome dejjacuana bobiacapoa
(Mt 14.13-21; Mc 6.30-44; Lc 9.10-17)
1Majoya aje quijje Jesosa majo ejjachichaqui anicacuana huohuijeyomajje o shajja-ajjajji poanicuananijje besapoquiapoa Galilea bae ojjemijiyasijje. Galilea bae bajjani beca poa Tiberias bajjani pea-ai. 2Queahuisocuaa Jesosaa dejjaja ajjima'neineicuana acapoquije bacapoa. Emano jaacacuana queahuiso ohua jja-ajaquimeecaje'yo bacapoa cuaa. Jamajojoya aje queahuisocuana Jesosanijjetii nequipoquiapoa. 3Majoya Jesosa, o shajja-ajjajji poanicuananijje pea-ai eyiyo nequiyasijje jaasohuaquiapoa. Cuamaya anioqueñaquiapoa. 4Quijjepishana judiocuana jjachichaquicaje'yo Jerusalén meshiyasijje fiesta poechipi'yajo eshahuaba'yojji ma yahuajonei Eyacuiñajjiya oja etiiquianaja bacuacuana nahuecapoajo. 5Majoya aje Jesosaa queahuisoneeneecuana oque jjachichaquicaje bamajje jama huohuime acapoa Felipe ba'a: —¿Achacua acuae che bobi jjeshecajji ojjaña jiquio anicacuana bobiajji?—
6Jamaya Jesosaa Felipe acapoa yajja saja-ame Felipeya acaje ebajji. Jesosaja ca ebatii poa ajeo quijje ohuaya bobiacaje queahuisoneecuana. 7Felipeya oya saja-acapoa jama ba'a: —¡De! ¿yajja yajji? ¡Queahuisoneeneecuana anica de! Jiquio ojjañacuana bobiajji yajji queasosehuisoneenee pome. Doscientos huisome eso'dojjo sosejje bobi jjeshecajji jiquio anica queahuisoneenee bobiajji.—#6.7 Nota: Oe eso'dojjo oe epojja echacochacojji sosejje poa.*
8Majo nequi pea dejja Jesosa shajja-ajjajji poani pea-ai Andrés bajjani, Simón Pedroja chahua jama poa ba'a: 9—Jiquia aje oe esho'i yani. Ojaya cinco huisome pahui, beca nahuoosisi pea-ai ejaa. Jamatii comaya oepojjineinei de. Dejjacuana ca queahuisoneenee nequica.—
10Majoya Jesosaa o shajja-ajjajji poanicuana jama acapoa ba'a: —Ojjañacuana anioquemeecue siponebiajje.—
Ma meshijo sipone queahuisonee aniapoa. Jamajjeya ojjañacuana anioquecapoa ma siponebiajjetii. Queahuisoneenee dejjacuana aniapoa ma meshijo ba'a: 5.000 huisome dejjacuana esico. 11Majoya Jesosaa pahui cinco huisome jjeshemajje Eyacuiñajji bihuiacapoa. Majoya o shajja-ajjajji poanicuana pahui quiameecapoa ojjaña ma eanioque anicacuanaja eijjiajji. Jama pea-aiya acapoa nahuoo. Jamajjeya ojjaña ma eanioque anicacuana jejjecapoa.#6.11 Nota: O shajja-ajjajji poanicuaa quiacapoquijejotii pahui, nahuoocuana pea-ai Eyacuiñajjiya jjahuisomeecuajiquicapoquiapoa ojjañacuanaja ijjiajji.* 12Ojjaña majo anicacuana jejjeajo Jesosaa o shajja-ajjajji poanicuana huohuicapoa jama ba'a: —Chicha'yocue joya ojjañaja ijjiajeyojjima ani bobi. A'a joya bobi jeana'yojji majotii ani eihuijeajji.—
13Jamajjeya o shajja-ajjajji poanicuaa bobi chichaca'yapoa ma onaja ijjiajeyojjima ani bobi, eshaja-aiyasijje biocapoqui'yapoa. Queahuisonee poa, 12 eshaja-ai cuatajeameecapoa cuaa ma oepojjinei cinco pahui huisome poanaje pahuiya. 14Jamaya Jesosaa dejjaja ajjima'neinei acapoa. Cinco mil dejjacuana bobiacapoa oepojjinei bobijo. Ma bamajjeya dejjacuana queahuiso ojee mimimimicapoa jama ba'a: —E'ejojonei jiquio Jesosa Eyacuiñajjija huoojeanei ese sohuihuohuijji poani. Ma yahuajonei Moisesya tehuecapoa dejjajo maya jjeya poeyanaje.—
15Jamajjeya ma ejjachichaqui anicacuaaya Jesosa edojojji nisho a-ajjacapoa oja emeshimese enequimeejji. Jesosaja ebatii poa macuanaja ejjashahuabaquijji ojo oya macuanaja emeshimese epojjijo, jamajjeya oya jaasohuaquio'oyapoa eyiyo nequiyasijje oenei aniya.
Jesosa bae enabiajje jeojeoapoa
(Mt 14.22-27; Mc 6.45-52)
16Majoya aje quijje sinepoquianijo Jesosa shajja-ajjajji poanicuana poquiapoa bae-aisahuahuasijje. 17Majoya bishe'aiyasijje anisohuaquiapoa cuana ojjemijiyasijje besapoquiya Jesosa poe'yojjimahuajo siñajo. Capernaúm meshiyasijje o shajja-ajjajji poanicuana besapoquianijo eshequi oquequiapoa, jjamisiquiapoa. 18Majoya aje beni queaquemonee poecuajiapoa. Enashajo queaquemonee anicuayameecapoa beni pajijiya. 19Seis kilómetros hueshame bae-ai enabaeyiyesamaneijo yobesa-ajjacapoquiapoa cuaa. Majoya aje Jesosa enabiajje oquiquishijji jeojeojebeje bishe'aiyasijje bacapoa cuaa. Jesosa jama poeje bamajje ojjañacuana queameteneenee poa. 20Jamajjeya Jesosaa jama acapoa cuana ba'a: —¡A'a quiana oe queamete pojji! Eya ca iña quio Jesosaya.—
21Jesosa mimije shajja-ajjamajje queaquijijjijajinee po'yapoa cuana. Majoya bishe'aiyasijje Jesosa nequisohuaquiapoa. Oya nequisohuaquijeahuajo bishe'ai bae ojjemijiyasijje ba'eñacuajinanaquiapoa ma o poquisapoa meshi ejeojjiyasijje.
Queahuisocuaa Jesosa sa-ajjacapoa
22Majoya aje pea pojjajo ma Jesosaa bobiacanajecuaa oya sa-ajjaca'yapoa. Bacapoa cuaa ma oenei ba'enaje bishe'aijo Jesosa shajja-ajjajji poanicuananei besapoquinaje, Jesosanijje pojjeama. 23Majoya aje peacuaa pea bishe'aicuana Tiberias ejeojjijo ba'e yebesacapoa. Oja bishe'aicuana ba'eñaquiapoa ma Jesosaa Eyacuiñajji bihuiamajje queahuisoneeneecuana bobiacanaje meshichipineiyasijje. 24Jamajjeya Jesosa, o shajja-ajjajji poanicuana pea-ai chama' bamajje ojjaña majo anicacuana bishe'aicuanahuasijje nequisohuapea-aiquiapoa ma pea besajebenajecuananijje. Majoya ojjañacuana Capernaúm meshiyasijje besapoquiapoa Jesosa sa-ajja'yohua.
Jesosa eba'etiitii'yojji pahui jayojja poani
25Majoya aje ojjemijiyasijje besapoquimajje Jesosa baca'yapoa cuaa. Jesosa huohuiajjacapoa cuaa jama ba'a: —Esohuihuohuijji, ¿acheshono acuae mi jiquiacua poeyanaje so'o?—
26Jesosaa saja-acapoa cuana queayenohua jama ba'a: —Miquianaya ejo jjashahuabaquiajja jama ba'a: “E'e, Jesosaa dejjaja ajjima'neineicuana acani, jamajjeya oya e'ejojonei Eyacuiñajjija huoojea ojjañacuana nahue'yojji epojji.” Chojja, miquiaaya ca eya sa-ajjao'oyaña bobijonei miquianaya queajejje poanajeyajjejojoya. 27A'a bobi eijjiapoquiajjijoneitii chacochacopoquijji. Miquiaaya ijjiajeyoajje bobicuana oe poani. Pea bobi jayojjajo chacochacopea-aicue eba'etiitiipoqui'yojji bobijo. Eyacuiñajjiya eya dejjaja ajjima'neineicuana ameecani ojjañacuanaja e queaja'a ebajji oja huoojea poani. Jamajjeya eyaya e'ejojonei Dejjapojji poaniya jiquio bobi eba'etiitiipoqui'yojji quiana quiaje.—
28Ma ejjachichaqui anicacuaa Jesosa huohuiajjacapoa jama ba'a: —¿Yajja ecuanajaya acajji Eyacuiñajjijo echacochacojji?—
29Jesosaa saja-acapoa cuana jama ba'a: —Eyacuiñajjiya jama sacani ba'a: Miquiana oja huoojea dejjajo mi nahue'yojji epojjijo, ejoya, jjashahuabaquimee'yosa-acani.—
30Jamajjeya oya huohuiajjacao'oyapoa cuaa jama ba'a: —¿Ache dejjaja ajjima'neinei jjeyanei miyaya aje ecuanaja ebajji mijo ejjashahuabaqui'yojji? ¿Ache miyaya che ame jjeya? 31Ecuanaja etiiquiaa se-ejjama' meshijo aniya pahuisisi eyajje oque ijjiacapoquianinaje. Eyacuiñajjija esohui yahuajonei tehuecapoa jama ba'a: “Ohuaya eyajje oque pahuisisi quiacapoquiapoa cuana” jamaya etehue jaa.—
32Jesosaa saja-acapoa cuana jama ba'a: —Eyaya quiana e'ejojonei huohuiaña. Moisesya pojjeama judiocuana quiacapoquiapoa pahuisisi eyajje oque, Eyacuiñajjiya caca oe pahuisisi quiacapoquiapoa. Jjeya ecue Chiiya Eyajje nequioque pahui eba'etiitiipoqui'yojji e'ejojonei miquiana quiacani. 33Jiquio pahui Eyacuiñajjija quia e'ejojonei Eyajje poeapoa ojjaña meshijo ba'ecacuana ba'etiitiimee'yojji epojji Eyahuasijje.—
34Majoya Jesosa huohuiajjacao'oyapoa cuaa jama ba'a: —Emeshimesenei, ecuana che comaya pahui quiapoquiacue ojjaña pojjajo.—
35Jesosaa saja-acapoa cuana jama ba'a: —Eya caca iña quio pahui eba'etiitiimee'yojji poani pahui. Ojjaña joya e'ejojonei ejo jjashahuabaquije'yocuana queashoe epobeca'yojjitii pojjeama poaje'yo. Ojjaña joya ejo e'ejojonei jjashahuabaquije'yocuana queanabataja epobeca'yojjitii pojjeama pea-ai poaje'yo. 36Eyaya quiana huohuio'oyaña. Miquiaaya eya baña ecojjaa, jamatii ejo jjashahuabaqui'yojjimatii ba'eya. 37Ojjaña jiquio e ecue Chiiya quiacaje huisotiicuana ejo jjashahuabaquicaje'yo. Jamajjeya ecuea cajaatii eajji pojjeama poaje comacuana ojjaña joya ejo jjashahuabaquije'yocuana. 38Eya Eyajje poeapoa ecueanei ejjashahuabaquijji aa pojjeama. Eya caca oe poeapoa ecue Chiija, e huoojeajji epoja ejjashahuabaquijji aa. 39Ecue Chii e huoojeajji epo ejo jjashahuabaquianitii ojjaña oja quia huisotiicuana ecuea enahue'yojji. Oya jjashahuabapea-aiquiani ojjañatii oja quiacuana emano'yo jaa ecuea eshequimee'yojji pea-ai Eyajo eba'etiitii'yojji epojja oe-ejjenei apoa poajo. 40Ecue Chii jjashahuabaquiani ojjaña joya oja Bacuaejja bajji poanicuana, ojjaña joya ojo e'ejojonei jjashahuabaqui'yanicuana ba'etiitiije'yo Eyajo. Jamajjeya eyaya emano'yo jaacuana ojjaña ma ejo ejjashahuabaqui'yo poacuana shequimeeje'yo epojja oe-ejjenei apoa poajo.— Jamaya Jesosaa acapoa cuana.
41Ohua jama huohuime acajje: “Eya ca iña quio pahui Eyajje nequioque” judío etii poanicuana queaquenepishana jjaniñebaquiapoa Jesosajo. 42Ojee mimimimiapoa cuana jama ba'a: —Jiquio caca Jesosa Joseja bacuaejjaya. Esejaya eba oja chii, oja nae pea-ai. ¿Yajjajje shai oya jama poani ba'a: “Eya Eyajje nequioque jiquio meshiyasijje?”—
43Majoya Jesosaa jama acapoa cuana ba'a: —A'a ejo queaquene quiana jjaniñebaquijji. 44Ecue Chiiya e huoojeajji epo oeneiya dejjacuana, eponacuana pea-ai poemeesahuacani eque, oyaneitii pojjeama poeani cuana. Majoya quijje epojja oe-ejjenei apoa poajo eyaya ma ejo ejjashahuabaqui'yo poacuana emano'yo jaa shequimeeje'yo Eyajo eba'etiitii'yojji. 45E'e, Eyacuiñajjija esohuihuohuijji poacuaa yahuajonei esohui tehuecapoa jama ba'a: “Eyacuiñajji ojjañacuana huohuipoquiajji poaje” jamaya tehuecapoa. Jamajjeya ojjaña joya Eyacuiñajjija esohui shajja-ajjajji poanicuana, ojjaña joya oja esohuijo queaja'a jjashahuabaquijji poanicuana pea-ai e'ejojonei eque poeje.
46—Chama'neinei jiquio meshijo ba'ecacuanaja Eyacuiñajji oja ecojjaja eba. Ecueanei caca oe oja Eyajje huoojeaja oya eba. 47E'ejojonei eyaya quiana huohuiaña jama ba'a: Ojjaña joya ejo jjashahuabaqui'yanicuana e'ejojonei ba'etiitiije'yo Eyajo. 48Eya ca iña quio eba'etiitiimee'yojji poani pahui jayojja. 49Miquianaja etiiquiaa yahuajonei eyajje oque pahuisisi ijjiacapoquiapoa se-ejjama' meshijo aniya. Majoya quijje ojjañatii manojeyocapoqui'yapoa. 50Eyaya caca miquianaya huohuiaña pea pahuijo Eyajje nequioquejo. Ma yahuajo se-ejjama' meshijo aniapoa pahuisisi jama pojjeama. Miquianaya jiquio pahui ijjiamajje ba'etiitiije'yo Eyajo. 51Eya ca iña quio pahui eba'etiitiimee'yojji poani Eyajje nequioque jiquio meshiyasijje. Miquianaya jiquio pahui ijjiamajje ba'etiitiije'yo Eyajo. Jiquio eya quiaje pahui ecuea eyaminei poani. Ecuea eyami quiaje ojjaña meshijo ba'ecacuana eba'etiitii'yojji Eyajo— jamaya Jesosa poa.
52Majoya judío etii poanicuana onijje etii poaninijje jjamimicuiajeanobiaquiapoa oja esohuijo jama ba'a: —¡Cheje! ¿Achajjajo acuae ohuaya ojaya eyaminei eseya ijjiameesa-acani? ¡Chojja de!—
53Jesosaa huohuicao'oyapoa cuana jama ba'a: —E'ejojonei eyaya quiana huohuiaña. Ecuea, Dejjapojji epoja, ecue yami ijjiajjimajo, ecue na' ishijjimajo pea-ai Eyajo eba'etiitii'yojji pojjeama quiana poaje. 54Ojjaña joya ecuea eyami ijjiajji poajecuana ecuea ena' ishijji poajecuana pea-ai ba'etiitiije'yo Eyajo. Eyaya ojjaña jama epocuana emano'yo jaa shequimeeje'yo eba'etiitii'yojji Eyajo epojja oe-ejjenei apoa poajo.#6.54 Nota: Jiquio oja yami ijjiajji poajecuana esohui jama poanijje ba'a: Oya Jesosajo e'ejojonei jjashahuabaquije'yo. Oja yaminei pojjeama ijjiacaje cuaa. Oja na'nei pojjeama ishicaje cuaa. Jama poanijjeya.* 55Ecuea eyami bobi e'ejojonei poani. Ecuea ena' e'ejojonei eishijji poani pea-ai. 56Ojjaña joya ecuea eyami ijjiajji poajecuana ecuea ena' ishijji poajecuana pea-ai ecuea'yo poani, enijjetii jjapeequipoquije'yo, eya onijjetii jjapeequipoquije'yo pea-ai. 57Ecue Chii eshetii nequiya e jiquio meshiyasijje huoojeajji epohua eya nequitiitiimeecapoquiani. Eya Eyacuiñajjijotii nequitiitiipoquiani. Jiquio ecua eya Eyacuiñajjijotii nequitiitiipoquiani jama pea-ai ecuea eyami ijjiajji poajecuana ba'etiitiipoquije'yo ejo. 58Yahuajonei miquianajaya etiiquiaa eyajje oja oquemee pahuisisi ijjiacapoquiapoa. Majoya quijje ojjañatii macuanaya manojeyocapoqui'yapoa. Eyaya quiana huohuiaña pea Eyajje nequioque pahuijo. Jiquio pahui caca pea, ma pahuisisi yahuajo miquianajaya etiiquiaa ijjiacapoquiapoa jama jayojja pojjeama. Jiquio pea pahui ijjiamajje ca quiana e'ejojonei ba'etiitiije'yo.—
59Jiquio esohuicuana Jesosaa huohuicanequiapoa Capernaúm meshijo ani judiocuanaja equi-ai ejjachichaquijjijo nequiya.
O equijje ajji poajjapoacuaa Jesosa cajaa aca'yapoa
60Majoya aje oja esohui shajja-ajjamajje queahuisocuana ma Jesosanijje poquinequinajecuana jama poa ba'a: —Ojaya esohui queacamajanee esejaya yajji. ¿Achajja jjashajja-ajjaquime acuae se poaje ojaya esohuijo? ¡Yajja epojji queataaa!—
61Jesosaja ma dejjacuanaja ejjashahuabaquijji queaquehua ebatii poa. Jamajjeya Jesosaa huohuiajjacapoa cuana jama ba'a: —¿A'a quiaa ecuea esohui shajja-ajjamajje cajaa aje miquianajaya queacamajanee poanijojoya? 62Miquianajaya eya e'ejojonei Dejjapojji epo Eyahuasijje ba'esohuaquije'yo ebajojjemo, ¿achajja jjashahuabaquime quiana pome ejo? 63Eyacuiñajjija Edojjoshahuapame ese eshe nequimeejji poani. Eseja eyamineitii ese eshe nequimeeajja. Eyaya quiana esohui huohuiaña Eyacuiñajjija Edojjoshahuapamejo. Miquiana ba'etiitiipoqui'yojjijo pea-ai esohui aña. 64Jamatii quiana becacuana ejo jjashahuabaqui'yojjimatii ani— jamaya poa Jesosa. Yahuajonei Jesosaja ebatiipoa ache huisocuana ojo jjashahuabaqui'yojjimatii poaje. Ojaya ebatii pea-ai poa ache o shajja-ajjajjinisho poani dejjaa oya iñameesahuacaje quijje emanomee'yojji. 65Jesosaa huohuipea-aicapoa cuana jama ba'a: —Jamajojoya eyaya miquiana oya esohuiya huohuinaje. Ecue Chiiya quiana jjashahuabameequi'yojjima acanijjemo ejo ejjashahuabaqui'yojji pojjeamatii pome. Jamaya eyaya quiana huohuinaje— jama acapoa cuana Jesosaa.
66Jamajjeya queahuiso ma onijje poquinequinajecuaa Jesosa cajaa aca'yapoa. Onijje poquipajea'yapoa cuana. 67Majoya aje Jesosaa oja babaca dejjacuana ona sohuihuohuiquinequijji epojji, doce huisometii, huohuiajjacapoa jama ba'a: —¿A'a quiaa iña cajaa apea-aije'yo?—
68Simón Pedrohua oya saja-acapoa jama ba'a: —Emeshimesenei, miquea esohui caca oe e'ejojonei poani eba'etiitii'yojji. Chama' peaja esohui jiquio ecua miquea jama. ¿Aeque epoquijji ecuana? 69Ecuana miquea esohuijo e'ejojonei jjashahuabaqui'yonaje. Ecuanaja ebanei miya Eyacuiñajjija huoojea e'ejojonei poani, mimishima'nei.—
70Jesosaa Pedro saja-acapoa jama ba'a: —Eyaya miquianaya 12 huisome dejja babacanaje ona sohuihuohuiquinequijji epojji. Jamatii miquianaya oe jiquiojo nequi dejja enijje edosiquianaja epeejjitii poani.—
71Jesosa jamaya poa Judasjo, Simón Iscarioteja bacuaejjajo. Oya nequipea-aiapoa ma pea 11 huisome dejjanijje Jesosaja babaca dejjacuananijje. Quijje ohuaya Jesosa iñameesahuacaje bejjo sosejje.
المحددات الحالية:
JUAN 6: ESE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Copyright Mision Nuevas Tribus, 2006