Génesis 9
9
Papang Noé karak pramis yamna
1Papang yaklauwi Noé yak dawak walanbis balna yak bik blisin diawi aput yulna: “Manna walamanabis mahni yakta sau adika bahngtanauh.#Gn 1:28. 2Sau akat tinglau balna dawak asangpas dini balna manna yamamana duwi diyukwarang. Di balna wing yakat kidika balna, sau yakat, kuma yakat, dawak manna parasmana dinit yakat dutamana kidika balna bitik. 3Sipmana kasnamna tinglau balna dawak asangpas dini balna bitik, dawak di minik balna bitik kaskih manawa kidika. Kidika laih yang lawik manatayang. 4Kaunah di as ki kidika laih sip-awaski kasnamna: di muihni ā duwa kidika, kat ā yakat sangnika kidika sakbahang.#Lv 7:26-27; 17:10-14; 19:26; Dt 12:16,23; 15:23. 5Muih bitik yakat as as dilaihna awaki, dawak tinglau balna kaput bik asangpas dini balna yakat bik, manna āmana yulni. Dawak muih balna bitik yakat as as dilaihna awaki, witing wanaihni sangnika yulni.
6“Muih as kat wanaihni yak iwarang kat,#Ex 20:13.
muih ūk yaklauwi witing yak iwarang,
kat muih kidika laih Papang wayani kapat yamna bahang.#Gn 1:26.
7Kaunah manna laih, ¡walamanabis mahni yaktanauh
walamanabis dawak kidika kau sau bahngtanauh!”#Gn 1:28.
8Papang yaklauwi Noé dawak walanbis ahal balna yakat bik diyulna: 9“Talnauh, yang manna karak pramis yamkiki dawak sulamana balna kau bik, 10dawak tinglau balna manna karak bangkidika bitik, dawak asangpas dini balna kuring nuhni kaupak kalalahna kidika bik: di lawani balna, tinglau balna, asangpas dini balna, dawak sau akat di balna bangkidika bitik kau bik. 11Yang pramiski kidika laih satuk kalwas karang: dawak wattik muih kidika itas awaki, tinglau dawak asangpas dini balna bik, was nuhni atik. Dawak watwi was nuhni ānin ūk dis karang, sau adika daukalpamna atnin yulni. 12Adika ki pramis sainni ban kaput atnin yamtayang kidika manna karak, tinglau dawak asangpas dini balna karak bik: 13yang wayaukili kidika mukus balna pasyak ānayang, kidika laih sau karak pramis yamtayang kidika sainni as karang; 14yang lawik kalating sau minit yakat mukus kaiwarang kat, kidika pasyakat wayaukili bik kalahna karang. 15Bahang kaput laih yang manna karak pramis yamnayang kidika isingkatna karang, dawak tinglau, kaput bik asangpas dini balna karak pramis yamnayang kidika bik, kaput laih watwi was nuhni āwi daukalwas karang. 16Wayauli kidika mukus pasyakat kalahwarang kat, yang talik isingkatki ban kaput atnin pramis yamnayang kidika muih dawak, tinglau, kaput bik asangpas dini balna karak bik, sau bitik yakat bangkidika. 17Adika sainni kuduh yang lawik ātayang kidika muih ahal bitik yakat sau akat di balna bangkidika bitik yakat.” Kaput Papang kalyulna dai Noé yakat.
Noé dawak walanbis ahal balna
18Noé walanbis balna kuring nuhni paskaupak kalalahna balna dai kidika Sem, Cam, Canaán papangni, dawak Jafet. 19Adika balna kuduh Noé walanbis ahal bās dai kidika dawak witingna walaninabis balna yayakna kaupak watwi sau adika muih manah dana dai.
20Noé witing sau yak di dahna dai, bahang witing wain yanimak as yamna dai. 21Ma as kat Noé witing wain diwi wasak dauna, dawak witing wahdis ūni labanni pasyakat bukna dai, sau yakat. 22Cam, yuldarangkat Canaán papangni, witing papangni wahdis tuskat talwi, usnitkat ahni yakat kalahwi wirahni balna bu yakat diyulna. 23Kaput laih Sem dawak Jafet karak witingna asna muknin dini as salahnina yakat ilwi dawi duwi uiwi mumukna papangnina yak. Bahang wahdis kidika talnin-awas yulni, dangsani lapakwi miniknapa kidika pa ūk yakat talwinah uiwi mumukna.
24Dawak Noé, wanisak bayak dawak sahmuwi isning-aiwi kaldakana witing walanibis binkauh ais witing yakat, 25dawak yulna:
“¡Canaán laih dutni palni karang!
¡Witing laih muih dinina yamyangtanit sau kau kulna kidika karang
wirahni ahal bu kidika dinitna yakat!”
26Usnit kat baisa minit lakwi kalyulna:
“Dawan yaklauwi Sem yakatblisin kalana karang,
dawak Canaán laih witing diniyamyang karang.
27Papang yaklauwi kalawak Jafet kidikabaisa nuhni kalna karang;
dawak Sem uni labanni yakatyalahna karang,
dawak Canaán kidika witing diniyamyang karang.”
28Was nuhni āna usnit yakat Noé kidika baisa kurih 350 sangka dai; 29kaput laih witing dauna kurih 950 laihna manikat.
المحددات الحالية:
Génesis 9: SUMU
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Biblia Sumo
Texto © Sociedad Bíblica de Nicaragua 1998