Matius 1
1
Yesus Kristus opa lak itaklarik wagoukha wene
(Lukas 3:23-38)
1At Yesus Kristus Abraham nen, Daud nen, ina'but etnogo opa lak erlo baga nen itaklarik wagoukha meke inetaga yi o.
2At Abraham nen Ishak itakhik,
Ishak nen Yakub itakhik,
Yakub nen Yehuda agarumi inom itaginakhik,
3at Yehuda nen he Tamar waganhikhesik nen,
Peres inom, Zerah inom, ipisak itaginakhik,
nen, at Peres nen Hezron itakhik,
Hezron nen Ram itakhik, hagakhikhe.
4Nen, Ram nen Aminadab itakhik,
Aminadab nen Nahason itakhik,
Nahason nen Salmon itakhik, hagakhikhe.
5Nen, Salmon nen he Rahab waganhikhesik nen,
Boas itakhik,
Boas nen he Rut waganhikhesik nen, Obed itakhik,
Obed nen Isai itakhik, hagakhikhe.
6Nen, Isai nen, ap Daud etagapogot etnogo itakhik,
at Daud nen Uria age tilogo wolok dukhisikhesik
nen, Salomo itakhik, itithogon itaklarik
wagoukha.
7Nen, Salomo nen, Rehabeam itakhik,
Rehabeam nen Abia itakhik,
Abia nen Asa itakhik, hagakhikhe.
8Nen, Asa nen Yosafat itakhik,
Yosafat nen Yoram itakhik,
Yoram nen Uzia itakhik, hagakhikhe.
9Nen, Uzia nen Yotam itakhik,
Yotam nen Ahas itakhik,
Ahas nen Hizkia itakhik, hagakhikhe.
10Nen, Hizkia nen Manasye itakhik,
Manasye nen Amon itakhik,
Amon nen Yosia itakhik, hagakhikhe.
11Nen, Yosia ap Yahudi meke o Babel wogosik
lagoukha eta higit, at Yekhonya agarlak lak
inom itaginakhik, itithogon itaklarik
wagoukha.
12Nen, akhuni Yahudi meke o Babel wogosik
lagoukhama dogolik, yabokane at Yekhonya
nen Saeltiel itakhik,
Saeltiel nen Zerubabel itakhik, hagakhikhe.
13Nen, Zerubabel nen Abihud itakhik,
Abihud nen Elyakim itakhik,
Elyakim nen Azur itakhik, hagakhikhe.
14Nen, Azur nen Zadok itakhik,
Zadok nen Akhim itakhik,
Akhim nen Eliud itakhik, hagakhikhe.
15Nen, Eliud nen Eleazar itakhik,
Eleazar nen Matan itakhik,
Matan nen Yakub itakhik, hagakhikhe.
16Nen, Yakub nen Yusuf, he Maria agun etnogo
itakhik,
he Maria nen Yesus, nit nen Kristus ekhe lago
etnogo itakhik, erloma nenat itaklarik
wagoukha.
17Itithogon itaklarik wagoukha iti, ap Abraham itaklageikhe hurli nen, ap Daud itaklageikhe iti hurli baga inopa lak inebe 14 hurli nen itaklarik wagoukha. Nen, Daud itaklageikhe hurli nen, akhuni Yahudi meke wogosik o Babel lagoukha iti hurli baga inopa lak 14 hurli nen yabokane itaklarik wagoukhaat. Nen, ap Yahudi meke o Babel wogosik lagoukha hurli nen, Kristus itaklageikhe iti baga, inebe 14 hurli nen yabokane itaklarik wagoukhaat iti.
Yesus Kristus itaklageikhe wene
(Lukas 2:1-7)
18At Yesus Kristus itaklageikhe iti ebe yigithogonat itaklageikhe. Agosa Maria iti, ap Yusuf ebe waganhidek, inom huto warek werekma, Allah Agoreke nen eak akmatdisikhe. 19Akmatdisikhemo at Yusuf obabut hano etnogo nen, at akla nen,
“An he iti akhuni inil oba here'isaumo ekarli asinogo nen, limago here'isagein,” iluk, akla apekhe lageikhe. 20Itithogon apasi werekma, hibako noge isinem at malaikat Allah nen pogot oba nen yoko usa'isa agarek meke ageikhe oba wageikhesik nen, men yogokhikhe,
“Yusuf Daud a'but yi. Hat horlak Maria iti waganu na'it, iluk hakla apugun o. Eak iti Allah Agoreke nenat akmatdekhemo. Halok he, waganino. 21Eak iti ebe abat itasigin o. Itasumo re, at nen oe agot weak hagariogei meke korogo waganiluk tilinabigin o, iluk etaga Yesus thalino” iluk yogokhikhe. 22Itithogon hagasugun iluk ninopase Allah Etagapogot nen, ap ageikhe haganeat ayoko 'bisikhemo wene yogeisekhe dogolik, holal waganogo 'bisikhe meke tak-tagat hagatlasuagaluk isikhe iti. 23#Yesaya 7:14At iti nen,
“Horlak ageikhe eak akma atluk, eak abat itasigin o.
Itaklaga halok, nit ninane baga, Allah ninom
welago, u hak, etaga Imanuel ekhe dogogun,”
iluk holal waganogo 'bisikhe meke tak-tagat hagatlageikhe iti.
24Iti re, at Yusuf iluk ageikhesik, malaikat Allah nen la'i ageikhemo yogokhikhe meke etnogo tak-tagat, age etnogo waganhikhesik 25ipisak noge igidek welagoukhasik nen, eak abat itakhikhemo, etaga Yesus thalhikhe.
المحددات الحالية:
Matius 1: LAIDNT
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول