KEJADIAN 29
29
Yakub Laban aiba arat lagaikhe wene
1At Yakub a'nogo laga lagaikhesik, o Kanaan mo wulibi wagarek higit lagaikhe. 2Laga logolik, o leimo i mogo habuli'mo hinagaisogo nenggarek oba ekhe were'ma eilenggen hasikhe. I andi helep hokho mene te'met fesukwama re, wam kambing inom, domba inom, i mogo habuli'mo yonggo palek nenggarek oba i andi wogotunem nenggere'ma nogo nen he, esa henagan i era'lu andoma wengik welagaukwa. 3It wam kambing inom, domba inom, andi arat andogorogo wagu halok, it ap wam konharek mene nen helep yagarek mene a'nogo lenggakhogo lakfuluk i wogetunem, wam kambing inom, domba inom, andi arat nunggu halok, i andi hobuk kwe yagati lagaukwa. 4A'nogo it ap wam konhi lagaukwa mene andi andoma were'ma, at Yakub en he, mel yagaisasikhe: ”Nagaila'lak, hit hinaiba koma mene,” iluk heinok wogisasikhemo, iren he, ”Ninaiba o Haran mene,” iluk yagatukwa. 5A'nogo yagatukwama, at Yakub en he, ”At Nahor amlogo Laban a'nogo hinelu a?” iluk heinok wogisasikhemo, iren he, ”Ninelu o,” iluk yagatukwa. 6A'nogo yagatukwama, aren he, ”At yogondak he, oba ninggi'nogo werek,” iluk heinok wogisasikhemo, iren he, ”Oba fano werego,” iluk yagatukwasik, ”Yethan, at a'logo enu Rahel en wam kambing inom, domba inom, eisena mene yonggo palek waluk weri'logo a'li o,” iluk yagatukwa. 7A'nogo yagatukwama, at Yakub en he, ”Wam kambing inom, domba inom, aiba yagasugun oba o mo oan werek kwelek meneat he, i wogoti'lek engga nunggu kwelek herakfisegepsik welagep andi nenahalok,” iluk yagaisasikhe. 8A'nogo yagaisasikhemo, iren he, ”Nit he, wam kambing inom, domba inom, mondogat yonggo palek andogosi wagunem, i helep oba yagarek mene yi lenggakhogo lakfugu halok i wogotorek oba yoma welago o,” iluk yagatukwa.
9At Yakub wene ane inom a'nogo ugu were'ma, at hele Rahel eisena anggo kambing inom, domba inom, yonggo palek ferinarek welagaikhe mene woginarek inoba wagaikhe. 10A'nogo wagunem, at Yakub en, hele Rahel anggo yonggo palek waluk wagunem eilenggen yethasikhesik he, i mogoma a'nogo lagaikhesik, helep i kwe yagarek a'nogo lenggakhogo lakfesikhesik he, wam omanogo i hinagaisogo wogotikhe. 11Wogetikhesik, at Yakub endawinggen heisel hikhemo re, Rahel hai ambe saluk watikhesik, obaget le hokhorogo agaikhe. 12Le agaikhesik, Rahel mel yagatikhe: ”An he hat heisena erei, Ribka eak,” iluk yagatikhe. A'nogo yagatikhemo at Rahel a'nogo wene yagatikhe mene andi eisena yagasigiluk aiba fumusek lagaikhe. 13Lagaikhesik, mel yagatikhe: ”Heak Yakub wagasik yi'nogo werek,” iluk yagasi lagaikhemo, esanggo holhikhesik, emberek ambi asuogeluk fumusek wagaikhe. Wagaikhesik emberek ambi agaukwasik he, agoumo felikhogo wanhikhesik hai ambe saluk watikhesik he, aiba waluk lagaikhemo, at Yakub en wene pilingisogo Laban yagatikhemo, 14at Laban nen he, ”Wene andi eberogoat mondok egen o. Hat hebe nit ninenggenma mene aro,” iluk yagatikhe. A'nogo yagatikhemo, at Yakub inom andoma tugi misik hambukhogo welagaukwa.
At Yakub en helime Rahel inom, Lea inom, woginabigiluk Laban eabu hilingiti lagaikhe wene
15Inenggi ekhe sambul he, at Laban nen Yakub mel yagatikhe: ”Hat hebe an noe nagot meneat he, hendawimo nen he an yabu weat hilingiti logogin anggagain lek. We, hat henggi onggo nena mene wokhesigin hamolo,” iluk yagatikhe. 16At Laban a'logomi inebe pire welagaukwa. A'logo manggusa mene re, enu Lea, nen ombo'ne mene enu re, Rahel. 17Lea eil agura welagaikhe meneat he, Rahel enek he, ebe inom, elokhonggen inom, fano mondok welagaikhe. 18Were'ma re, at Yakub endawimo nen he, hele Rahel amolo anggasikhesik he, Laban mel yagatikhe: ”Nami, ha'logo Rahel an heak wo'nesigin halok he, an hat heabu 7 tahun hilingiti logogin o,” iluk yagatikhe. 19Yagatikhemo, at Laban nen he, ”An nen hele Rahel yi it ap alek mene wogisagain he nabit. Harat wokhesumo fano. Halok, nemberegat yoma logouwogo,” iluk yagatikhe. 20A'nogo yagatikhemo, at Yakub hele Rahel amolo nen yabu 7 tahun hilingitikhe meneat he, endawimo nen he, ”Nenggi we endebat hilingisu hak hilingiti,” anggasikhe.
21A'nogo yabu hilingitikhesik, Laban mel yagatikhe: ”Yabu 7 tahun arat hilingiti. Halok nami. Ha'logo ikhesigin iluk isigin a'nogo wanigen he, ikne'nogo,” iluk yagatikhe. 22Yagatikhemo re, at Laban nen a'logo Yakub igeti logolik pesta hilingisigiluk, afuni o kota andoma mene mondogat inayonggo fesikhe. 23A'nogo igetikhe meneat he, o hubanggo a'logo Rahel wogosigin ha'ma nen he, Lea wogotikhemo emberek nogo isukwa. 24A'nogo wogetikhesik, at Laban en amingmingengge hele enu Zilpa Lea lebethikhi logouwageluk wogotikheat. 25Ohealekwe nen, at Yakub eilenggen Lea hasikhesik he, endawimo nen he, ”Laban a'logo Lea wo'netemo higi,” iluk elu agaikhesik Laban oba lagaikhesik he, mel yagatikhe: ”An heak a'nogo lalnafen andi nenahalok. An ha'logo Rahel wo'ne'nogeluk heabu wokheti lagi a'nogo re. Heak nenahalok lalnafen,” iluk yagatikhe. 26A'nogo yagatikhemo, at Laban nen he: ”Nit o yoma hilingitorek he, inogogwi oan iginafi'lek werek kwelek, inagoromi tak iginaforek mondok lego. 27Ma re, po'logoino, hat yabu an faget hobuk 7 tahun at hilingiti logogin hamolo anggegen halok he, seni he itho yi faget ninenggi 7 nen nilik laga logombigen, na'logo Rahel wokhesigin aro,” 28iluk yagatikhemo, at Yakub en, ”Fano,” iluk isikhemo, seni a'nogo arat nasukwasigen, at Laban nen Rahel a'nogo igetikheat.
29Igetikhesik, amingmingengge hele enu Bilha Rahel lebethikhi logouwageluk wogotikhe. 30Rahel a'nogo igetikhemo, Yakub emberek nogo isukwaat. A'nogo nogo isukwasik, Yakub agwe Lea abel marogo logolik, Rahel endawi tulemhogo welagaikhe. A'nogo logolik, yabu 7 tahun hilingitu welagaikheat.
Yakub againafuri taginafikhe wene
31At nineisena Tuhan, Yakub agwe Lea abel marogo logolik, Rahel enek he, endawinggen tulemhogo were'ma eilenggen hasikhesik, ”Lea eagwi taginafi logouwak,” iluk isikhe. Meneat he, Rahel eagwi takhigi'lek welagaikhe. 32A'nogo isikhemo, at Lea omalik a'ma agaikhesik, eak ap takhasikhe. A'nogo takhasikhesik mel isikhe: ”Neisena Tuhan an weak welagi mene eilenggen niikhesik neak wo'netemo takhigi andiba nagun endawi neagain o,” iluk isikhesik, eak andi enu Ruben salhikhe. 33Nen, hobuk Lea omalik a'ma agaikhesik he, eak abat takhasikhe. Takhasikhesik, mel isikhe: Neisena Tuhan, an nagun nen abit abelmat nobagali'logo andi esanggo holhesik, neak abat ekhe wo'nete,” iluk isikhesik eak andi enu Simeon salhikhe. 34Nen, hobuk Lea omalik a'ma agaikhesik, eak abat takhasikhesik mel isikhe: ”An yogondak neak abat henagan takhigi andi nen, nagun nemberek fano logogun,” iluk isikhesik eak andi enu Lewi salhikhe. 35Nen, hobuk Lea omalik a'ma agaikhesik he, eak abat takhasikheat. Takhasikhesik, mel isikhe: ”An hobuk neak takhigi yiba re, neisena Tuhan fogerasigin o,” iluk isikhesik, eak andi enu Yehuda salhikhe. A'nogo taginafikhesik, hobuk eak taginafi'lek welagaikhe.
المحددات الحالية:
KEJADIAN 29: inohap
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول