KEJADIAN 30
30
1A'nogo meneat he, he Rahel eak takhigi'legat welagaikhe. A'nogo welagaikhe andi nen, oe emberek mondok heksek logolik, Yakub mel yagatikhe: ”An neak ekhe wo'nom o. Wo'neti'lek halok an nebe wa'lasigin o,” iluk yagatikhe. 2A'nogo yagatikhemo, at Yakub en he, he Rahel wenagati logolik mel yagatikhe: ”An nebe yi Allah fugo. Arenat hat heak takhanogeluk hilinghabi'lago o,” iluk yagatikhemo, 3at he Rahel en he, ”An namingmingengge Bilha yi werego. At eak ekhe tasuagen hemberek nogo ini o. Nen omalik andi tasumo agaisa re, anat asigin o,” iluk yagatikhe. 4Andi yagatikhesik hele Bilha a'nogo Yakub wogotikhemo emberek nogo isukwa. 5Emberek nogo isukwama, at Bilha omalik a'ma agaikhesik he, eak ap takhasikhe. 6Takhasikhemo he Rahel en he, mel isikhe: ”Allah nen nobaget higithogo hilingnafemo, neak ap wo'nete o,” iluk isikhesik enu Dan salhikhe. 7A'nogo salhikhemo, hobuk at Bilha omalik a'ma agaikhesik eak ap ekhe takhasikheat. 8Takhasikhemo, at he Rahel en mel isikhe: ”An noe nemberek weak logolik, wene ninom palhi lago a'nogo an arat nomame agi o,” iluk isikhesik omalik andi enu Naftali salhikhe. 9Ariginhikhemo, at he Lea ogore, omalik hobuk tatu aple elo'lek agaikhemo futfesikhesik, amingmingengge hele Zilpa at Yakub agwe asuageluk wogetikhe. 10Wogetikhemo, at Zilpa omalik a'ma agaikhesik eak ap tatikhe. 11Takhasikhemo, at Lea nen he ”An arat saburigi o,” iluk isikhesik, omalik andi enu Gad salhikhe. 12Salhikhemo re, hobuk at he Zilpa omalik a'ma agaikhesik, eak ekhe abat tatikhe. 13A'nogo tatikhemo, at he Lea nen he, mel isikhe: ”Hemi mondogaren he, He Lea endawimo agaiyek hakhoago, iluk yaganesugun andi nen he, an nendawimo nagaiyek anggikhi lagi o,” iluk isikhesik, omalik andi enu Asyer salhikhe.
14Salfuluk, gandum enggen iterek sambul enggen palhunem at Ruben o leimo afuni le'ma lagaikhesik, obat awi yago were'ma hasikhesik waganogo agaisa Lea wogosi wagaikhe. Wogosi wagaikhemo, at he Rahel en Lea mel yagatikhe: ”Hat heak en obat awi yago mene heratesik wokhesi waga mene andi endebat halok an ekhe wo'nom o,” iluk yagatikhe. 15A'nogo yagatikhemo, at he Lea nen mel yagatikhe: ”Hat an nagun ebe wanhen andi elo'lek anggegen a? Hobuk obat awi yago mene ekhe wokhesuageluk egen yoma ri!” iluk yagatikhe.
Andi yagatikhemo, at Rahel en he, ”Obat awi hat heagen waluk waga andi wo'neten halok, yogondak hat Yakub hemberek nogo ini o,” iluk yagatikhe. 16A'nogo yagatikhemo, were'ma, o hu'mokwe at Yakub o leimo afuni le'ma nen wagunem, he Lea nen at Yakub ebe hai warogo wanhikhesik he, mel yagatikhe: ”O yogondak hubanggo hat an nemberek nogo uogeluk obat an neagen waluk waga mene onggo palhiri'mo re, nemberek nogo uogo,” iluk yagatikhemo, Yakub at emberek nogo isukwa.
17Nogokhi logolik, at Lea samban isikhe mene Allah esanggo holhikhemo re, he Lea omalik a'ma agaikhesik eagwi attak mene inebe 4 en taginafikhesigen ekhe inom taginafikheat. 18A'nogo taginafikhesik he, at he Lea nen he, mel isikhe: ”An nen Zilpa nagun wogoti andi nen, Allah nen onggo wo'nete o,” iluk isikhesik, omalik andi enu Isakhar salhikhe. 19Hobuk Lea omalik a'ma agaikhesik, eagwi inebe 5 nen mene attak taginafikhesigen ekhe takhasikheat. 20A'nogo taginafikhesik mel isikhe: ”Allah nen neak fano mene wo'netemo, neagwi ap inebe 6 en takhigirik andi nen, nagun nen ane agaukhogo yaganeti logogin o,” iluk isikhe. A'nogo isikhe andi nen omalik andi enu Zepulon salhikhe. 21A'nogo arat taginafikhesik, hobuk eak hele ekhe tatikhesik enu Dina salhikhe.
22Hobuk at Allah nen, he Rahel oba ebetikhesik, samban isikhe mene ane esanggo holhikhesik he, ”At eak higit takhoak,” iluk anggasikhe. 23A'nogo anggasikhemo, at he Rahel a'nogo eak a'ma agaikhesik eak ap takhasikhe. Takhasikhesik mel isikhe: ”Afuni nen an inendawimo seramet nobagagarek mene Allah nen legetfisikhe o. 24Legetfisikhesik, neisena Tuhan nen neak ap wo'neteat,” iluk isikhe andi nen eak andi enu Yusuf salhikhe.
Hun Yakub Laban inom inane lakfigik-wakfigik isukwa wene
25At he Rahel en Yusuf arat takhasikhemo Yakub en hun Laban yagati logolik, ”An naiba nanggweang oba lan iluk yaganom o. 26An yoma yabu alonghogo hilingiti lagagi aple a'nogo nami harogo helurek, andi halok he hat hoba yabu hilingitunem helasigi mene inom, an nagagwi inebe pire inom, nagainafuri inom, helaluk lan iluk yaganom o,” iluk yagatikhe.
27Andi yagatikhemo, at Laban en ikhi logolik, ”Hat hesanggo holin! An he hat halisikhogo Tuhan en an fanoet nobagakhi laga, iluk ebet laga. 28Arigini'mo re, ebe ti nen namolo iluk yaganomo,” isikhe. 29Andi isikhemo at Yakub en onggo yagati logolik, ”An yabu mondok hokhorogo hilingiti lagagi mene inom, hat hanggo an nen halinafi lagagiba hilingik welagaikhe aple inom he hat nami mondogat helu o. 30An oan yoma wagi'le'ma hat hangge yi mene ti mene we wenagaisogo miren mene hangge hilingik welaga, oba nen he, yogondak an nalisikhogo Tuhan nen hat fanot hobagagunem hat henggi werek mene agenma re yogondak halok he an nonggwarek ogo nagwe nagainafuri faget yabu hilingisuba asi waga,” iluk yagatikhe. 31A'nogo yagatikhemo at Laban en ikhi logolik, ”Andi halok an nen hat nenamene wokhesigin?” iluk heinok wokhasikhemo at Yakub en ikhi logolik, ”Haren yi mene ti mene wo'netu aple andi herakfisan. An he, hat hanggo halhi logogin enggere hat nami nen fano anggegen halok, an nen igin mene yi holin. 32An nen onggo namolo menere wam domba eak esi sing mene inom, kambing eak ket mene esi hesesengge palek mene inom, lel fenggenek mene inom, haren an domba, kambing, omanogo anggele'ma yogondak yi sambul lambik onggo andi hela lagain en, i o, iluk yaganom. 33Ekhe sambul hat wesimbik an onggo helagain mene andi kumut hikhi logolik domba esi singsek lek mene inom kambing esi lel fenggenek mene inom hesesengge palek mene inom were'ma heilenggen haluk fena andi hinate he a, helu asigin. Andiba hobuk inom helu aga logolik, an higithogo hilingite a, lega, iluk helu asiginat,” iluk yagatikhe.
34Yagatikhemo an Laban en ikhi logolik, ”Andi fano egen! Enggere, nit haren egen mene ari higithogo nek hilingisugun!” isikhe. 35A'nogo isikheba nen linggene a'nogo sambul at hun Laban en kambing ai meneba nen esi lel fenggenek mene inom, hesesengge waganek mene inom, kambing holou mene esi lel fenggenek mene inom, hesesengge palek mene inom, agap oba kurengge enegenggerogo hilingik mene inom, domba esi sing mene inom, lenogo fesikhesik at amlogomi nen hali loageluk lakfisasikhe. 36Lakfisasikhemo, abu'nengge endebengge aremnogo nek at Yakub halhu kwelek, it a'nogo nen wam omanogo silogo waluk Yakub eil omanogo iluk yatma inenggi linggene henagan nogolik lagaikharek oba andoma waluk lagaukwa.
37It a'nogo lagaukwama, at Yakub en e hawar enggi inom, e badam inom, e berangan enggi inom, wanhikhesik agap fena fikhit enek ibil fesikhemo hesesengge palek mene hak agaikhe. 38A'nogo hilingfesikhesik it wam andem he inagai nenggarek oba laluk wam ai mene inom, holou mene inom, misi'mo sebeti lagaukwaba at Yakub en e enggi omanogo waluk it inagai nenggarek mene era'lukwe omanogo fei wagaikhe. 39Fei wagaikhemo it kambing omanogo e enggi were'ma era'lu omanogo nen inom sebetu halok he, eak ta'lagu mene esi hesesengge palek mene inom, lel fenggenek mene inom, pemia mene inom, ta'laga lagaikhe. 40At Yakub en a'nogo hilingiti lagaikhe andiba re, at onggwaregen mene iluk hokhorogo helikhi logolik, at Laban en meneba nen enhigik fakhikhi lagaikhe. A'nogo, fikhi logolik domba omanogo wokhigik kambing sing mene inom, hesesengge palek mene inom, inera'lu e enggi omanogo fikhi lagaikhe. 41It kambing, domba omanogo nen oak omame mene ekhe holou mene inom, ai mene inom, ai nunggu halok he, e enggi agap ibilik mene omanogo waganogo inagai nenggarek oba inelokhoma omanogo fikhi lagaikhe. 42Oba nen he, wam omame lek mene inom ai nunggu halok he, e enggi omanogo fei lagou aple hebisikhi lagaikhe. Nen, wam omame lek mene andoma re at Laban nen mene iluk he inesi kutsek welagaikhe. Nen esi sing mene inom, hesesengge palek mene inom, pemia mene inom, omame werek mene inom, andoma re at Yakub en mene welagaikhe. 43A'nogo hilingiti lagaukwama at Yakub enggiwerek agaikhasik, enu werek agun logolik anggo kambing, domba, unta, keledai inom, uluk pambialhogo hilinglagik, amingmingengge hokhorogo hilinglagik isikhe.
المحددات الحالية:
KEJADIAN 30: inohap
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول