Luka 5
5
Jesũ gwĩta arutwa ba mbere
(Mat 4.18-22; Mar 1.16-20)
1Ntukũ ĩmwe Jesũ nĩarũngamĩte rũteere rwa ĩria rĩa Genesareti. Nabo antũ nĩbatindĩkanaga bamũrigicĩrĩtie, bakĩenda kwĩgua ntũmĩĩri ya Ngai wega. 2Akĩona matarũ maĩrĩ au rũteere rwa ĩria, na ene matarũ nĩbathambagia neti irĩa batũmagĩra gũtega samaki. 3Agĩtũa ĩtarũni rĩmwe rĩrĩa rĩarĩ rĩa muntũ wetagwa Simoni, akĩmwĩra agendagendie ĩtarũ riume akuĩ na ndĩ mpũmũ. Jesũ agĩkara ndĩ ĩtarũni, akĩrutana antũ.
4Rĩrĩa athiririe kũrutana akĩĩra Simoni, “Gendagendia ĩtarũ rĩrĩ rĩtonye kũrĩa kũrĩ na rũjĩ rworokeru, bũgere neti rũjĩni bũgwatie samaki.”
5Simoni akĩmũcokeria, “Mwathi wakwa, tũrere tũgĩtega na kĩĩo ũtukũ bunde na gũtĩ gĩntũ tũragwatia. Ĩndĩ nĩũntũ ũkuuga bu rĩ, nĩnkũigera rũjĩni.” 6Bakũgera neti rũjĩni bakĩgwatia samaki nyingĩ mũno nkinya neti ikĩenda gũtuĩkanga nĩ kũritũa. 7Bakĩeneria antũ barĩa barutithanagia wĩra nabo barĩ ĩtarũni rĩu rĩngĩ nĩkenda bathi kũbatetheeria. Bakĩthi bakĩjũria matarũ mo maĩrĩ samaki, nkinya makĩambĩĩria kworokera. 8Rĩrĩa Simoni Petero onire ũgu, agĩturia maru mbere ya Jesũ akĩmwĩra, “Mperera Mwathani. Niũ ndĩ muntũ mwĩyia!”
9Simoni na barĩa bangĩ baarĩ nawe nĩbarigariirue mũno nĩ wingĩ bwa samaki irĩa bagwatirie. 10O najio ndaka jia Zebedii ta bo Jakubu na Johana, barĩa barutithanagia wira na Simoni nĩbamakire. Jesũ akĩĩra Simoni, “Ũtĩkamake; kuuma ũmundĩ ũrĩcoka gũtegaga antũ.”
11Na rĩ, bakũrĩkia gũcokia matarũ rũteere rwa ĩria nĩ batiganĩĩrie into jiao jionde, bakĩmũthingata.
Jesũ kũragithia muntũ warwarĩte mũrimũ wa mũtigiri
(Mat 8.1-4; Mar 1.40-45)
12Kagiita kamwe Jesũ nĩ arĩ taũni nene ĩmwe. Rĩu muntũ ũmwe warwarĩte mũrimũ wa mũtigiri akũmũona nĩ athiire kĩrĩ we, akĩgwĩthia ndĩ mbere yae, akĩmũkaĩra akĩmwĩra, “Mwathani, ũnkĩenda no ũnderie#5.12 ũnderie: Mũrimũ wa mũtigiri warĩ mũgiro, ĩndĩ muntũ nĩ arombagĩrwa nĩ muntũ wa Ngai na akaragia. .”
13Jesũ agĩtambũrũkia njara akĩmũtonga, akĩmwĩra, “Nĩnkwenda, thera!” Mũrimũ ũu wa mũtigiri ũkĩthira o rĩo. 14Jesũ akĩmũkania akĩmwĩra, “Ũtĩkeere muntũ o na ũrĩkũ nteto ino. Thi wĩonanie kĩrĩ mũthĩnjĩri Ngai, ũcoke ũrute kĩgongoana gĩa kũtherua, o ta bũrĩa Musa aathanire na nĩkenda antũ betĩkia ũkũthera.”
15Ĩndĩ rĩu nkuma ya Jesũ ĩkĩthi mbere gũtamba nkũrũki, na antũ baingĩ bakĩthi kũu aarĩ nĩkenda bamũthikĩĩria na baragithua mĩrimũ ĩrĩa baarĩ nayo. 16Ĩndĩ we Jesũ nĩ abatigaga akathi rwanda kũromba.
Jesũ kũragithia muntũ wakuĩte jiĩga jia mwĩrĩ
(Mat 9.1-8; Mar 2.1-12)
17Ntukũ ĩmwe Jesũ nĩ arutanaga, nao au arutanagĩra nĩ gwekarĩte Afarisai na arutani ba Watho barĩa baumĩte tũtũrani tunde twa Galili na Judea, o na bangĩ bakauma Jerusalemu. Nawe Jesũ nĩ aarĩ na inya ya kũragithania kuuma kĩrĩ Mwathani. 18Na rĩ, antũ bakĩja na muntũ wakuĩte jiĩga jia mwĩrĩ bamũkamatĩte na mũgeka.#5.18 mũgeka: Matĩrĩci ya gũtuma na mathangũ ma mũtĩ wĩtagwa mũkĩndũ. Bendaga kũmũthũngĩria nyomba bamwige mbere ya Jesũ, 19ĩndĩ gũtaũmbĩkire nĩ bũrĩa kwarĩ na antũ baingĩ. Bagĩtũa ĩgũrũgũrũ rĩa nyomba, bakimbũra tũiga tũrĩa twaimbĩte, bakĩmwĩmanĩĩria au mwanyani arĩ o mũgekani, bakĩmwiga mbere ya Jesũ, gatagatĩ ga antũ. 20Na rĩrĩa Jesũ onire bũrĩa wĩtĩkio wao warĩ mũnene akĩĩra kĩonje kĩu, “Mũcoore, ũkũrekerwa meyia maku.”
21Arutani ba Watho na Afarisai bakĩambĩria kũrania, “Nĩka muntũ ũũ arĩ ũ ũkũruma Ngai? Nĩ muntũ ũrĩkũ ũmba kũrekanĩra meyia tiga Ngai wenka?”
22Rĩrĩa Jesũ amenyire bũrĩa beciragia akĩbaũria, “Nĩmbi ĩgũtũma bũgĩa na meciria ta mau nkoroni jienu? 23Nĩ bũrĩkũ bũthũ; nĩ kuuga, ‘Ũkũrekerwa meyia maku’ kana nĩ kuga, ‘Ũkĩra wĩthiĩre’? 24Ĩndĩ nĩkenda bũmenya atĩ Mwana wa Muntũ arĩ na inya gũkũ ndĩ ya kũrekanĩra meyia,” akĩĩra muntũ ũu warĩ kionje, “Ndakwĩra atĩrĩ, ũkĩra, jũkia mũgeka waku wĩnũke.”
25Muntũ ũu warĩ kĩonje agĩũkĩra o rĩo antũ barĩa baarĩ o bakĩonaga, akĩjũkia mũgeka wae akĩnũka agĩkumagia Ngai. 26Antũ bonde bakĩrigara na bakĩĩjũrwa nĩ ũkĩri, na bagĩkumia Ngai bakĩĩranaga, “Ũmundĩ tũkwona maũntũ ma kũrigaria!”
Jesũ gwĩta Lawi
(Mat 9.9-13; Mar 2.13-17)
27Jesũ akũthiria kũrũtha ũgu nĩ aumire kũu akĩthi akĩona mũrutithia goti wetagwa Lawi ekarĩte obisini yae, akĩmwĩra, “Ndingata.” 28Lawi agĩũkĩra, agĩtiga into jionde akĩmũthingata.
29Rĩu Lawi akĩrũthĩra Jesũ kĩrugo kĩnene mũno kwae mũjiĩ. Kĩrugoni kĩu nĩ kwarĩ na arutithia goti baingĩ, o na antũ bangĩ baarĩ o, bakĩrĩjanagĩra amwe. 30Afarisai na arutani bao ba Watho bakĩambĩĩria kũnuguna bakĩũragia arutwa ba Jesũ, “Nĩmbi ĩgũtũma bũrĩjanĩra na bũnyunyanĩra na arutithia goti na eyia?”
31Jesũ akwĩgua bakĩnuguna akĩbacokeria akĩbeera, “Antũ barĩa batĩ arwaru batĩbataraga ndagitarĩ, nĩ barĩa aruaru bamũbataraga. 32Ntĩjĩte gwĩta antũ barĩa bagĩru; mbĩjĩte nĩkenda eyia berire.”
Kĩũria kĩgiĩ kwĩima
(Mat 9.14-17; Mar 2.18-22)
33Afarisai na arutani bao ba Watho bakĩĩra Jesũ, “Arutwa ba Johana Mũbatithania nĩ beimaga kũrĩa na kũnyua kaingĩ, na bakĩromba. O na arutwa ba Afarisai nĩbarũthaga o ũgu. Ĩndĩ baku no kũrĩa barĩjaga na bakanyua.”
34Nawe Jesũ akĩbaũria atĩrĩ, “No bũũmbe kwĩra antũ barĩa betĩtwe ũikini beime kũrĩa irio rĩrĩa mũikania arĩ amwe nabo? 35Ĩndĩ rĩ, kagiita nĩ kejĩte rĩrĩa mũikania akajũkua aume kĩrĩ bo. Kagiita kau nĩrĩo bakeima kũrĩa.”
36Agĩcoka akĩbaa ngerekano ĩno: “Gũtĩ muntũ ũtambũraga kĩraka kuuma nguoni ĩrĩa njerũ nĩkenda agĩkĩra nguoni ĩrĩa nkũrũ. Akarũtha ũgu, akathũkia nguo ĩrĩa njerũ, o na kĩo kĩraka kĩu gĩtĩbuĩra nguoni ĩrĩa nkũrũ. 37O na kaĩrĩ gũtĩ muntũ wĩkagĩra ndibei ĩrĩa mbĩthĩ#5.37 mbĩthĩ: ya gũkimwa o rĩo. ithirini irĩa nkũrũ. Akarũtha ũgu, ndibei ĩu ĩgatũmũra ithiri iu na ĩĩtĩke, najio ithiri ikue. 38Antũ a ũgu, ndibei ĩrĩa mbĩthĩ no ĩkĩĩrwe ithirini irĩa njerũ. 39O na rĩ, muntũ ũkundĩte ndibei ĩrĩa nkũrũ atĩenda kũnyua ndibei ĩrĩa mbĩthĩ, nĩkwĩthĩrwa augaga, ‘Ĩrĩa nkũrũ nĩyo mbega.’” #5.39 Mandĩko mangĩ ma tene nĩ maugaga: “mbegaega.”
المحددات الحالية:
Luka 5: LUKA
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
God's word open for all
©Bible Society of Kenya, 2021