LUKAS 22
22
Rencano utuk munuak Yesus
(Mat. 26:1-5; Mrk. 14:1-2; Yoh. 11:45-53)
1 #
Kel. 12:1-27
Bilai rayo Ruti coa ade Agai, de senbut Paskah, sudo pa'ok. 2Imem-imem kepalo ngen gu'au-gu'au agamo mesoa dalen, awei ipe tobo'o dapet munuak Yesus seca'o diem-diem, sebab tobo'o saben ngen tun dau.
Yudas mianat Yesus
(Mat. 26:14-16; Mrk. 14:10-11)
3Mako masukba Iblis moi lem Yudas, de genne Iskariot, suang kunei keduai belas penotoa Yesus. 4Lajau lalauba Yudas ngen imem-imem kepalo ngen kepalo pengawal Umeak Tuhan ngen berunding ngen tobo'o, awei ipe si dapet semreak Yesus ngen tobo'o. 5Tobo'o kembiak riang ngen mupakat utuk melei sejumlah caci ngen si. 6Si tujau, ngen muloi kunei waktau o si mesoa kesempatan de baik utuk semreak Yesus ngen tobo'o ngen coa ade tun dau namen.
Semiap utuk mbuk Paskah
(Mat. 26:17-19; Mrk. 14:12-16)
7Mako sapeiba Bilai Rayo Ruti Coa ade Agai, adeba bilai neak ipe tun arus sembeliak bebirai Paskah. 8Lajau Yesus meluak Petrus ngen Yohanes, nadeak-Ne, “Lalauba, seniapba kembuk Paskah utuk ite!”
9Nadeak tobo'o ngen Si, “Neak ipe Ko kenlok keme semiapne?”
10Jawab-Ne, “Amen udi masuk moi lem kota, udi bakea temma suang de mbin gerigik bisai bioa. Tenotoaba si moi lem umeak de nasukne, 11ngen nadeakba ngen tuan umeak o, ‘Gu'au temnai ngen udi: Neak ipe penan Uku sesamo ngen penotoa-penotoa-Ku bakea mbuk Paskah?’ 12Lajau tun o bakea temunjuk ngen udi debuak bilik das de lai de sudo lekep, neak di ba udi arus semiapne.”
13Mako berakatba tobo'o ngen tobo'o temmau kute awei de nadeak Yesus ngen tobo'o. Lajau tobo'o semiap Paskah.
Tuhan temtep jamau
(Mat. 26:26-30; Mrk. 14:22-26; 1Kor. 11:23-25)
14Ketiko sapei waktaune, Yesus temot mbuk serpok ngen penotoa-penotoa-Ne. 15Nadeak-Ne ngen tobo'o, “Uku kembiak indau mbuk Paskah yo serpok ngen udi, ayok Uku saro! 16Sebab Uku madeak ngen udi: Uku coa bakea mbukne igai sapei si dapet gemnepne lem Dunio Blau Allah.”
17Sesudo'o Si mok makuk anggur, mucep syukur, lajau madeak, “Mokba dio ngen nagiakba neak antaro udi. 18Sebab Uku madeak ngen udi, muloi kunei uyo yo Uku coa bakea menem igai anggur sapei Allah meriteak sebagai Rajo bi teko.”
19Lajau Yesus mok ruti. Sesudo mucep syukur, Si memecuakne ngen meleine ngen tobo'o, nadeak-Ne, “Dioba awok-Ku de senreak bagiak udi; neaba dio utuk minget Uku.” 20#Yer. 31:31-34 Awei'o kulo nea-Ne ngen makuk anggur sesudo mukmei; Si madeak, “Makuk anggur yo adeba perjanjian belau de nsah ngen daleak-Ku, de tenupeak bagiak udi.”
21 #
Mzm. 41:10
“Tapi, keliak, tangen tun de semreak Uku, ade sesamo ngen Uku neak mija yo! 22Sebab Anok Manusio memang bakea lalau awei de bi tentep, tapi celakoba tun de muker gen-Ne!”
23Lajau muloiba tobo'o betanye-tanye do ngen de luyen, api kunei antaro tobo'o de bakea menea hal o.
Betekea tetang api de lebiak lai
24Neak antaro penotoa-penotoa Yesus betekea, kerno tobo'o lok namen api de nanggap lebiak lai neak antaro tobo'o. 25#Mat. 20:25-27; Mrk. 10:42-44 Yesus madeak ngen tobo'o, “Rajo-rajo bangso-bangso meriteak rakyat tobo'o ngen tun-tun de maneu kuaso das tobo'o senbut ‘Pelindung Rakyat’. 26#Mat. 23:11; Mrk. 9:35 Tapi udi coaba awei'o, sebelekne de lebiak lai neak antaro udi lokba jijai awei de lebiak uai ngen pemipin awei pelayan. 27#Yoh. 13:12-15 Api de lebiak lai: tun de temot mukmei, jano de melayan? Paset tun de temot o. Tapi Uku ade neak tengeak-tengeak udi awei pelayan.
28Ko ba de tep tinggea sesamo ngen Uku lem kute cubo de Uku meding. 29Ngen Uku temtau hok-hok Kerajaan bagiak udi, serai awei Bapa-Ku temtaune bagiak-Ku. 30#Mat. 19:28 Bahwo udi bakea mukmei ngen menem do mija ngen Uku neak lem Kerajaan-Ku ngen udi bakea temot neak das takhta utuk makim keduai belas sukau Israel.”
Nubuat bahwo Petrus bakea muker Yesus
(Mat. 26:31-35; Mrk. 14:27-31; Yoh. 13:36-38)
31“Simon, Simon, ti'uk! Iblis bi nelei izin utuk ngujai udi, awei gelpung cen'ei kunei kaleakne. 32Tapi Uku bi bedu'o utuknu, supayo imennu jibeak lemuak. Ngen udi, amen ko sudo insaf, kenuetba pasuak-pasuaknu.”
33Jawab Petrus, “Tuhan, uku besedio masuk sel ngen matei sesamo ngen Ko!”
34Nadeak Yesus, “Pecayoba Petrus ayok monok bekokok bilai yo, ko telau kilai muker Uku.”
Dupet, katung jano pedang
35 #
Mat. 10:9-10; Mrk. 6:8-9; Luk. 9:3, 10:4 Lajau Si madeak ngen tobo'o, “Ketiko Uku mbo udi ngen coa mizin mbin dupet, sangau ngen sepatu, jano ade de ku'ang ngen udi?”
Jawab tobo'o, “Coa!”
36Nadeak Yesus, “Tapi uyo yo, api de temuan dupet, lokba si mbinne, awei yo kulo de temuan sangau; ngen api de coa temuanne lokba si jemuoa jubahne ngen temukua pedang. 37#Yes. 53:12 Sebab Uku madeak ngen udi, bahwo ayat Kiteb Sucai yo arus gennep pado-Ku. Si bakea te'itung neak antaro pembrutak-pembrutak. Sebab jano de tetulis tetang Uku gidong gennep.”
38Nadeak tobo'o, “Tuhan, dio duai pedang.”
Jawab-Ne, “Sudo gennep.”
Yesus bedu'o neak Tebo Zaitun
(Mat. 26:36-46; Mrk. 14:32-42)
39Lalauba Yesus moi luea kota ngen awei ipe biaso Si temujau Tebo Zaitun. Penotoa-penotoa-Ne kulo temotoa Si. 40Sesudo sapei neak penan o Si madeak ngen tobo'o, “Bedu'oba supayo udi jibeak beduso amen udi cenubo.”
41Sesudo Si me'uak dirai kunei tobo'o kekiro seke'uak butau neluk, lajau Si sujud ngen bedu'o. 42Nadeak-Ne, “Au Bapa-Ku, amen Ko lok, mokba saro yo kunei pado-Ku; tapi isoba kelok-Ku, tapi kelok-Nuba de tejijai.” [ 43Mako suang malaikat kunei lenget kemten dirai ngen-Ne utuk kemuet Si. 44Yesus kembiak saben ngen kembiak sesungguak bedu'o. Eteng-Ne awei daleak temtik moi taneak.]
45Lajau Si klongon kunei du'o-Ne ngen belek ngen penotoa-penotoa-Ne, tapi Si temmau tobo'o gidong tidua kerno ibo. 46Nadeak-Ne ngen tobo'o, “Getai udi tidua? Klongonba ngen bedu'o, supayo udi jibeak us moi lem cubo.”
Yesus tenakep
(Mat. 26:47-56; Mrk. 14:43-50; Yoh. 18:3-11)
47Waktau Yesus masiak miling, tekoba dekaben tun, Yudas suang kunei keduai belas penotoa o, paneu neak adep tobo'o. Yudas ma'ok Yesus lajau semium-Ne. 48Mako nadeak Yesus ngen si, “Hoi Yudas, ko semreak Anok Manusio ngen semium?”
49Ketiko penotoa-penotoa Yesus kemliak jano de bakea tejijai, tobo'o madeak, “Tuhan, keme semrang tobo'o ngen pedang!” 50Ngen suang kunei tobo'o mabeak hambo Imem Lai sehinggo putus ti'uk kanenne.
51Tapi Yesus madea, “Sudoba do'o!” Lajau Si megong ti'uk tun o ngen kema'enne.
52Mako Yesus madeak ngen imem-imem kepalo ngen kepalo pengawal Umeak Tuhan serto tetuai de teko utuk temakep Si, nadeak-Ne, “Ko sako Uku perapok, mako udi teko lekep ngen pedang ngen gado? 53#Luk. 19:47, 21:37 Padohal tetiep bilai Uku ade neak tengeak-tengeak udi neak lem Umeak Tuhan, ngen udi coa temakep Uku. Tapi dioba saat udi, ngen dioba kuaso kegelapan o.”
Petrus muker Yesus
(Mat. 26:57-58, 69-75; Mrk. 14:53-54, 66-72; Yoh. 18:12-18, 25-27)
54Lajau Yesus tenakep ngen nembin kunei penan o. Si ni'ing moi umeak Imem Lai. Ngen Petrus temotoa kunei uak. 55Neak tengeak-tengeak latet umeak o tun mpek opoi ngen tobo'o temot gemlungne. Petrus kulo temot neak tengeak-tengeak tobo'o. 56Suang hambo selawei kemliak si temot pa'ok opoi; si kemliakne, lajau madeak, “Kulo tun yo sesamo ngen Si.”
57Tapi Petrus muker, nadeakne, “Iso, uku coa kenal ngen Si!”
58Coa kedau an sesudo'o suang tun luyen kemliak si lajau madeak, “Ko kulo suang kunei tobo'o!”
Tapi Petrus madeak, “Iso, uku coa!”
59Kekiro dejam sesudo'o suang luyen madeak ngen tegas, “Sungguak, tun yo kulo sesamo ngen Si, sebab si kulo tun Galilea.”
60Tapi Petrus madeak, “Iso, uku coa namen jano de udi nadeak.”
Saat o kulo, sementaro si madeak, bekokokba monok. 61Lajau Tuhan jemling ngen demnong Petrus. Mako tingetba Petrus bahwo Tuhan bi madeak ngen si, “Ayok monok bekokok pado bilai yo, ko bi telau kilai muker Uku.” 62Lajau si lalau moi luea ngen ngindoi ngen ibone.
Yesus neliam ngen nokoa
(Mat. 26:67-68; Mrk. 14:65)
63Ngen tun-tun tema'en Yesus, meliam ngen mokoa Si. 64Tobo'o temutup matai-Ne ngen temnai, “Cuboba nadeak api de mokoa Ko?” 65Ngen dau igai kecek mimok de nucep tobo'o ngen-Si.
Yesus neak adep mahkamah agamo
(Mat. 26:59-66; Mrk. 14:55-64; Yoh. 18:19-24)
66Sesudo bilai pueng pemipin-pemipin Yahudi, imem-imem kepalo ngen gu'au-gu'au agamo bekopoa lajau Yesus nembin moi adep Mahkamah Agamo tobo'o. 67Nadeakne, “Amen Ko adeba Mesias, nadeakba ngen keme.”
Jawab Yesus, “Sekilai kulo Uku madeakne ngen udi, tapi udi coa masai. 68Ngen amen Uku temnai ngen udi, tapi udi coa bakea jemawab. 69Muloi uyo Anok Manusio sudo temot neak depeak kanen Allah De Mahokuaso.”
70Nadeak tobo'o kute, “Amen awei'o, Ko yo Anok Allah?”
Jawab Yesus, “Ko suang madeak, bahwo Ukuba Anok Allah.”
71Lajau nadeak tobo'o, “Utuk jano ite perlu saksai igai? Ite yo bi temi'ukne kunei bibia-Ne suang.”
المحددات الحالية:
LUKAS 22: REJ
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
@ LAI 2011 Indonesian Bible Society (Lembaga Alkitab Indonesia)