Génesis 9
9
Cohamacʉ “Noano wahajaro” ni payoha Noére
1Cohamacʉ Noére, ã jichʉ to pohnare õ sehe niha:
—Noano wahajaro mʉsare. Payʉ pohna ti, paró ji siterʉcʉ sʉga ahri yahpare. 2Jipihtina wahiquina mʉsare cui dʉcaahca. Jipihtina wʉina, yahpa macaina, ã jichʉ co puhichapʉ macaina cʉ̃hʉ mʉsa doca macaina cjihti cũja. 3Jipihtina wahiquinare mʉsa chʉ duainare chʉ masina. Ahrire jipihti mʉsa chʉhti cjihtire cũja. 4Cʉ̃no dihtare, di tia dihire mʉsa ne chʉ masierara. Tíre chʉ duana, dire noano cohã pahño mʉhtaga. Mʉsa chʉhtina di mehne catiro cjʉara. Ã jina tíre ne waro mʉsa chʉ masierara.
5‘Ã yoa cʉ̃iro masʉno, o cʉ̃coro masono pairo masʉnore ti wajãchʉ, wajãrinare wajã cahmano cahmana. Tuhsʉ, dohse jiriro wahiquiro masʉno sehere to wajãchʉ, tiro cʉ̃hʉre wajã cahmano cahmana. 6Masare yʉ bajuamehneinare yʉ jia tiare cũi. Ã jiina jichʉ, cʉ̃iro masʉno o cʉ̃coro masono pairo masʉnore to wajãchʉ, wajãrinare wajã cahmano cahmana.
7‘Ã yoa mʉsa sehe ahri yahpare payʉ pohna ti, masa putiga. Ahri yahpare paróre ji sahserʉcʉ sʉga mʉsa —niha Noére, ã jichʉ to pohna cʉ̃hʉre.
8Ã yoa Cohamacʉ Noére, to pohna cʉ̃hʉre õ sehe ni namoha:
9—Mipʉre quihõno waro mʉsare cũihtja. Yʉ yahuhtire sohtori tiihtja mʉsare, tuhsʉ, mʉsare ji nʉnʉ tihtina cʉ̃hʉre. 10Ãta yoaihtja wahiquina mʉsa mehne jiinare, wʉinare, nuinare, nʉcʉ macainare, bʉainare, chichõinare, jipihtina dohoriapʉ mʉsa mehne yʉhdʉrinare. Tuhsʉ, baharopʉ cʉ̃hʉre dohse jiina jipihtiri yahpai catiro cjʉahtinare quihõno yoaihtja. 11Ne mʉsare yʉ õ sehe ni yahuare cohtotasi. Ne pari turi jipihtina masare, ã jichʉ wahiquina cʉ̃hʉre ñano yoa, mio wajã pahño namosi. Jipihtiri yahpare ne pari turi mio dojomehne namosi.
12‘Ã yoa õ sehe jirohca yʉ mʉsare, ã jichʉ wahiquina cʉ̃hʉre mipʉ yʉ yahua cjirire, “Potocãta jira” ni, mʉsa ã masirucuhto sehe. 13Yʉ ya buhini soro coro tjurupʉ bajuarohca. Yʉ õ sehe niri cjirire ã wacũ quihõrucuhti soro jirohca tó, mʉsare, ã yoa jipihtina wahiquina cʉ̃hʉre. 14Yʉhʉ sehe coro tjururire mʉja tachʉ yoaihtja. Tópʉ ya buhini soro bajuarohca. 15To ã bajuachʉ ñʉi, mʉsare, ã jichʉ jipihtina wahiquinare michapucacã yʉ yahuare wacũihtja. Ne pari turi jipihtiri yahpare miono mehne buhiri dahre namosi. 16Ã jicʉ tí sorore coro tjururi watoi to bajuachʉ ñʉi, yʉhʉ sehe wacũihtja. Yʉhʉ masare, ã jichʉ wahiquina cʉ̃hʉre yʉ michapucacã ã niare wacũihtja. Yʉhʉ tíre ne tʉhotu cohtotasi. 17Jipihtina masare, ã jichʉ wahiquina cʉ̃hʉre tí soro mehne yʉ niriro seheta yoariro yʉ jirore masi mʉjachʉ yoaihtja —ni yahu batoaha Noére.
Ahri quiti Noé, ã jichʉ to pohna mʉa ya quiti jira
18Ã yoa tiro Noé pohna sehe dohoria mehne yʉhdʉrina Sẽ, Jafe, ã jichʉ Cã wama tiina jiha. Mʉa dihta jiha tina. Cã jiha Canaã pʉcʉro. 19Ahrina tiaro masa jipihtiri yahpa macaina, masa curuaripere ji dʉcahtina cjihti jiha.
20Ã yoa ti pʉcʉro Noé sehe se toa dʉca mʉhtariro ji, se wese cjihtore yoa, toaha. 21Cʉ̃ nʉmʉ se core sihni, tiro cahaa wahaha. To wʉhʉ, wahiquina cahsari mehne to yoari wʉhʉi tiro ne suhti marieriro caha cahaa wahaha.
22Ã yoa to macʉno Cã, Canaã pʉcʉro sehe Noére to suhti marieriro jichʉ ñʉno, to wahmisʉmare yahu sitero wahaha. 23To ã nichʉ tʉhoa, Sẽ, Jafe, tina pʉaro sehe suhti cahsarore na, ti comapariacari buipʉ tí cahsarore cjã payoroca boro, du siti wahcã, ti pʉcʉrore moha cũha. Ti ã moha cũno wato, tina pa sehepʉ ñʉrocaha, suhti marierirore ñʉ duaera.
24Ã yoa tiro Noé sehe, tirore caha parĩni baharo, wahcã wihiha. Wahcã wihi, tiro tʉhoha to macʉno Cã, dʉhsariropʉ, tirore to yahu siteriro cjirore. 25Ã tʉhoriro jiro, Cã ya buhiri to panamino Canaã sehere, ã jichʉ tirore ji nʉnʉ tihtina cʉ̃hʉre Cohamacʉre õ sehe ni sini payoha:
—Cohamacʉ ñano wahachʉ yoajaro Canaãre,
ã jichʉ tirore ji nʉnʉ tihtina cʉ̃hʉre.
Cã wahmisʉmata cahamaca tijaro tina cʉ̃hʉre —ni sini payoha
Noé Cohamacʉre.
26Tuhsʉ, Sẽ sehere õ sehe ni sini payoha:
—Yawe yʉ Cohamacʉ noano wahachʉ yoajaro Sẽre.
à yoa tiro Canaã cʉ̃hʉ sehe,
Sẽ cahamaca cjihti waro tjuajaro —ni siniha.
27Tuhsʉ, Jafe sehere õ sehe ni, sini payoha:
—Cohamacʉ noano wahachʉ yoajaro Jafere.
Payʉ pohna ti,
masa putichʉ yoajaro.
Pjiri curua wahachʉ yoajaro tirore.
à yoa Sẽ ya macari watoi jijaro tiro.
à yoa Canaã, ã jichʉ tirore ji nʉnʉ tihtina cʉ̃hʉ
Jafe cahamaca tjuajaro —ni sini payoha ti pʉcʉro,
to pohna tiarore.
28Ã yoa tiro Noé sehe tresciento cincuenta cʉhmari cati namoha, jipihtiri yahpa miniri baharore. 29Tiro noveciento cincuenta cʉhmari cjʉaro, yariaa wahaha.
المحددات الحالية:
Génesis 9: GVC
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Todo os direitos são reservados a:
©Missão Novas Tribos do Brasil
Rua Itália, Qd. 57 L. 5-7 – Santa Isabel
75083-310 Anápolis, GO