Éxodo 1
1
Wi'ix ijty yë Israel ja'ayëty jap y'ëyowtën Egiptë
1Yaa yë xyëëw myintë yë Israel ja'ayëty, yë Jacob yë y'u'unk y'ëna'k mëti'ipë ojts jap nyëjkxtën Egiptë, nitu'ukjaty aakmëët ja y'u'unk tyo'oxytyëjkëty. 2Rubén, Simeón, Leví, Judá, 3Isacar, Zabulón, Benjamín, 4Dan, Neftalí, Gad, Aser. 5Yë Jacob yë y'u'unk y'ëna'k, jä'ä nyiwinë'ajtë nitëkë'px majk, e yë José täpyëm ënety yajpatnë Egiptë.
6Yë José myëkä'äxtëjk jënu'un ënety mëët tyu'knaxëtyën, ojts ja y'o'ktaaynyëtë. 7Yë Israel ja'ayëty janty nimayëty yë y'u'unk y'ëna'k myiintë naaxwiiny naaxkëjxy, jëtu'un'äämpy ojts yajxon nyimayëtë ets y'awinpijtë tu'uk mëj kajpn jap Egiptë ets mapaat yë Egiptë kajpn tnitänën yë naax kam, aakyë'ë ënety yë Israel ja'ayëty yajpatnëtë oymyaajëty.
8Komjeky ojts wiinkpë tyëkë yë mëj'ënä'ämpë, mëti'ipë ënety ka'ap të t'ixy'ätyën yë José, ënät ja nyaax kyajpn t'ënëmaay: 9Ëk'ixtë, yë Israel ja'ayëty ni'ikyë yowë nyimayënëtë ets myëktaknëtë këtiinëm ëëts'ajtëmë. 10Paaty tyam kopkpëky ko tu'uk yë winma'any n'ëxtä'ämyëty tii mëpaat ntu'unëmën ets këtiipë nëkooyë y'ëknimayënëtëty. Jä'ä ko pën ëëtsajtëm tsiptu'unëm jëna'a pën mëët, tsojk yë'ëjëty ja mëtsip t'ëkpuwa'kënëtëty ets ëxëëk xy'ëktu'unënëty, e je'eyë ënety ëxëëk të xytyu'unëmë tääts nyëjkxnëtëty.
11Ënet ojts ja Egiptë ja'ayëty tpëjkta'aktë ja tuunpëwintsën mëti'ipë nyi'ënä'ämëtëpën mëktä'äky ja tuunk ma ja Israel ja'ayëtyën ma jam ja tuunk tyajtu'uye'eytyën. Ojts atsip tyukojëtë mäjtsk ja kajpn mëti'ipë txëëwajtëpën Pitón ets Ramsés, jam ijty tii winë tpëjkë'ëky ja mëj'ënä'ämpë mëti'ipë jap yajkutujkpën Egiptë. 12E mëk jyayajtuunëtë yë'ëjëty je'eyëm ojts nyimayëtë'ëtstë. Paatykyëjxm ojts ja Egiptë ja'ayëty ja tsë'ëkë tyuktëkëtë.
13Paaty ni'ikyë mëk tuunkmooytyë ets tyaj'ëyoowtë. 14Mëk tyajtëëy tyajyaxtë mëët ja tuunk ëyo'on mëkëtypë, yajxon ja naax mo'onts tuunk'ajtë mëti'ipë ja muutsy tyukyajkojtëpën, näjyëtu'un ja mëti'ipë ojts jam tyuntën kamwinm tu'uwinm, mëk ojts y'ëyowtë mëët ja tuunk ëyo'on ëxëëkpë tsaatsypë oy myaa'ajnë jap Egiptë. 15Yë yajkutujkpë ojts näjyëtu'un t'ënëëmë yë Sifra ets Puá, mëti'ipë ijty kyëwent'ajtëpën ja to'oxytyëjktëjkëty, hebreo ja'ayëty ko ja u'unk maay tyajmina'an tyajja'ta'antë naaxwiiny ets t'ënëmaay:
16Ko jam xypyutëkëtëty yë to'oxytyëjkëty yë hebreo ja'ayëty, ma jam tyajmintën naaxwiiny yë y'u'unk myääyëty, yajxon xytyim'ixtëty, pën to'oxytyëjk yajwë'ëmtë wä'än tjuuky'äty, e pën ye'etyëjkts ënätyë xyaj'ooktëty.
17E ja to'oxytyëjkëty, mëti'ipë ja'axtëpën mëti'ipë ja myëto'oxytyëjk kyëwent'ajtëpën, ojts ja Dios tsë'ëkëtë, ka'ap jëtu'un tuuntë tä ënety ja mëj'ënä'ämpë të jyanë'ëmxëtën mëti'ipë jap Egiptë tuunpën. Yë'ë ojts tyajwë'ëmtë ja yä'äy ëna'k u'unkëty ets jyuuky'atëty. 18Ënet ja mëj'ënä'ämpë ojts myëkajpxëtë ja japë Egiptë yajkutukyën ets y'ënëmaayëtë:
¿Wi'ix ko të xyajwë'ëmtë yë mëxu'unktëjk, mëti'ipë yä'äy'ëna'këtyën ets jyuuky'atëty?
19Tyaa y'ixëty, yë to'oxytyëjktëjkëty, mëti'ipë hebreo ja'ayëtyën ka'ap yë jyëtu'un'atë tä yaa yë Egiptë to'oxytyëjkëtyën, yë'ëjëty mëk ets kumëjaaw yë oyëty. Paaty koos ëëtsëty njamiinëtë ets jeexyë nputëkëtës, yë y'u'unk myääyëty tëë tnayajmiinëtë naaxwiiny.
20-21Jëtu'un'äämpy ojts yë Israel ja'ay yë nyaax kyajpn myëjë kyëjääjë ets yajxon nyimayëtë ets myëktaktë. E näjyëtu'un ënät ja to'oxytyëjktëjkëty mëti'ipë ja'axtëpën mëëtkyëjxm ko ojts ja Dios tsë'ëkëtë, ojts ja Dios mëj këjää kyënu'kxëtë jyëkyäpëtë ets nimay ja u'unk ëna'k näjyëtu'un myooyëtë. 22Yë yajkutujkpë ojts t'ëne'emy yë ja'ay ets t'ënëmaay: Nëjkx nëëkujëpijpta'atë yë mëxu'unktëjk, mëti'ipë yä'äy ëna'këtyën, yë'ë jëtu'un yë hebreo ja'ayëty y'u'unkëty, tu'kë'ëyë jëtu'un tyimmintën naaxwiiny, yë to'oxy ëna'k'u'unkëty myajwë'ëmtëp, wä'än tjuuky'atë.
المحددات الحالية:
Éxodo 1: QUETZMIXE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Biblia Dc en Mixe de Quetzaltepec, Oaxaca México © Sociedad Bíblica de México, A.C.