Éxodo 13
13
1Ënet ja Dios ojts tmëkäjpxy ja Moisés ets t'ënëmaay:
2Ëpëky pëjkta'ak nitëkokyë yë m'u'unk m'ëna'këty mëti'ipë kä'äxkopkëtyën. Jä'ä ko yë Israel ja'ayëty yë kyä'äxkopkëty ëjts yë njä'äniwäämpy, näjyëtu'un yë jyëyujk kä'äxkopkëty.
3Ënet ja Moisés t'ënëmaay ja nyaax kyajpn: Mja'amyätstëp jëtu'un xëmë ya'atë xëëw, ma Wintsën ojts mjuutëtën, mëët yë myëk'ajtën mëjpë këjääpë jap Egiptë ma ënety je'eyë mëtuntën m'ëyowtën. Ko ya'atë jëtu'unpë ja xëëw po'o tpaatëty winjëmëjt, ka'ap mëpaat xykyäytyë ja tsajpkääky mëti'ipë tsooymyëëtën. 4Miitsëty ya'atë xëëw jëtu'un yaa mtso'ontë, ma y'änyën ja po'o mëti'ipë xyëëwajtypyën Abib. 5Ya'atë po'o nëjkx mxëëwtuntë, ko jam myajpatnëtëty, ma ënety ja Dios të mwoownëjkxëtën, ma ja jë'kxy pëky ka'ap y'ëmaaytyä'äkyën. Jam ma tsyëënëtën yë Canaán ja'ayëty, Hit ja'ayëty, Amor ja'ayëty, Heve ja'ayëty ets Jebús ja'ayëty, mëti'ipë ojts tukwinwanën ja aptëjk, ko miitsëty mo'oja'anëtë. 6Wëxtujk xëëw tkaytyëty ja tsajpkääky ka'apë tsyooymyëëtëtyën, e ko wyëxtujkxëëwpätëty jää tu'uk yë mëj xëëw xytyuntëty ma ja Wintsën yajmëjjawëtyën. 7E jëtu'un y'itëty wëxtujk xëëw, jää xykyäytyëty ja tsajpkääky mëti'ipë ka'ap tsyooymyëëtëtyën, oy jëtu'un tyimmaa'itëty, maajaty yë Israel ja'ay tnitänën, nimaa yë tsooy kyayajpaatëty ëkë tsajpkääky mëti'ipë tsooymyëëtën. 8Jä'ä xëëw nëjkx yë m'u'unkëty m'ëna'këty xytyukmëmëtya'aktë. Ya'atë yajtunyën yë'ë yajtukja'amyäjtsp ko ojts ja Dios mëj këjää winë tuny tkäjpxy ma ëëtsëtyën, koos jap xyajpëtsëëmtë ma Egiptë kajpnën. 9Jëtu'un ja'amyetsy xëmë xyaj'itëty tä jeexyë jam tu'uk yë ijxpäjtën xymyëët'atën mkë'ëkëjxmëty ëkë mwinpokëjxmëty, ya'atë ijxpäjtën xëmë mtukja'amyätsëtëp ets xëmë xykyajpxtëty xymyëtya'aktë ja ënä'ämën tëyajtën mëti'ipë ja Dios të tyajwë'ëmyën, mëti'ipë ojts mjuutëtën jap Egiptë mëët ja myëk'ajtën. 10Paaty miitsëty winjëmëjt ya'atë xëëw xytyuntëty ma ënety tpaatyën.
11Ko yë Dios jam të myajja'tëtë ma Canaán ja'ayëty yë nyaaxjotmëtyën, yë'ë jëtu'un n'antijpyës ko ënety yë'ë të mkë'ëmooyënëtë ja naax kam, mëti'ipë ojts mtukwinwanëtën ets mëti'ipë tyukwinwa'anëyën ja m'ap m'okëty. 12Yë Dios yë'ë kopkpëky mtukmëyoxtëp yë m'u'unkëty m'ëna'këty mëti'ipë më''ëka'any miintëpnëm naaxwiiny, ets näjyëtu'un ja mjëyujkëty mëti'ipë ënety më''ëka'any mëxu'unk'ajtëpën yë Wintsën jyä'ä'atëp. 13E yë krukts ko më''ëka'any y'u'unk tyajmëxu'unk'atëty, yë'ë mtukutëkats'atëp tu'uk yë tsajppax ëkë tu'uk yë kupixyny, yë'ë wintsë'kën'atëp mëët ko ënety më''ëka'any tu'uk ja y'u'unk të tyajmëxu'unk'aty. Ko xykyayaka'antëty ja kupixyny, tääts nëjkx ja krukts u'unk xytyimyaj'ooktë, yo'kwiity nëjkx xyaj'ooktë. Näyjyëtu'un ënät ko tu'uk më''ëka'any myëxu'unk'atëty ja m'u'unkëty m'ëna'këty, nëjkxëp tu'uk ja wintsë'kën xyaktë, mëti'ipë mtukutëkats'atëpën. 14E ko nëjkx jëna'a yë m'u'unkëty m'ëna'këty myajtëwëtë: ¿Wi'ix jëtu'un ya'atë nyiwijy? Tääts xy'ëtsowtëty: Yë Wintsën ojts jap xyjyuutës Egiptë mëët yë myëj'ajtën kyutujkën ma ënety ëëtsëty nmëtun n'ëyowtën. 15Ko yë yajkutujkpë ka'ap kyäjpxyjyä'äykyujkëy ets ka'ap xy'ëxmatsantës, yë Dios yë'ë ojts tyaj'o'kta'ay yë kä'äxkopktëjk ma Egiptë ja'ayëtyën ets näjyëtu'un ja jyëyujkëty ja y'u'unkëty mëti'ipë më''ëka'any mëxu'unk'ajtën. E paaty jëtu'un ëëts ja Dios ntukwintsë'ëkëtë tu'kë'ëyë yë jëyujk, mëti'ipë ëka'any miintëpën naaxwiiny ets mëti'ipë yä'äyëtyën, jëtu'un ja Dios nmo'otës mëti'ipë ja n'u'unkëtyës kyutëkats'ajtypyën, mëti'ipë më''ëka'any mëxu'unk'ajtëpën, ja ye'etyëjkpë. 16E ya'atë xëëw yë'ë mtukja'amyätsëtëp wi'ix ojts ja Dios jap mjuutëtën Egiptë mëët ja myëk'ajtën, jëtu'un tä jeexyë tu'uk ja tsa'ayajtën xymyëët'atën mkë'ëkëjxmëty ëkë mwinpokëjxmëty.
Ja Tios ja myëk'ajtën jëtu'unpë kyëxë'ëkyën tä yë yootsën xëëny ets tä jëënën koots
17Ko yë Egiptë mëj'ënä'ämpë ojts t'ëwatsë yë nyë'ë tyu'ujëty yë Israel ja'ayëty, ka'ap ojts jamtsow yë Dios yajnëjkxëtë ma filistejë ja'ayëty yë nyaaxjotmëtyën, ma ja tu'u nyäxyën mëti'ipë jaak'akonën. Jä'ä ko tyaa ojts myäy tyäjy, ko ja Israel ja'ayëty ka'ap ja tsyiptuna'antëty ets tsojk ja wyimpita'antëty jatëkok jap Egiptë. 18Paaty ojts jamtsow yaj'ëwtitëtë ma ja të'ëts'it të'ëtsjotmën ets jamtsow jya'ajtë ma tu'uk ja mëjmejyën mëti'ipë xyëëwajtypyën Tsaptsmejy.
Yë Israel ja'ayëty jëtu'un jap Egiptë myäytsyo'ontë waatswitsy tä yë maytsyiptuunpë tsyoontën. 19Moisés ojts tmënëjkxy ja José ja wyääy pyajk, jä'ä ko ma ënety ja José y'ookanën ojts tuk'ëne'emy ja Israel ja'ay ets jëtu'un tuntëty. Jëtu'un y'ënëmaayëtë: Tëy jëtu'un ko yë Dios yë'ë mniminanëtëp ets mputëkëja'anëtë. Ko ënety jëtu'un tyunyë jyätyë mëtsoontëp yaa yë nwaay npajkës.
20Yë Israel ja'ayëty jam tsyo'ontë Sucot ets jya'ajtë jam Etam, ma ojts jam wäänë y'itën. Jam Etam ëka'any tsyo'ontä'äky ja të'ëts'it. 21Ko xyiinyäjty, yoots ojts mëët yë Dios tyu'uwinwowëtë, e ko kyootsajty tu'uk yë jëën kyutë'kxëtë. Paaty tjëkyejpy ets nyë'ëye'ey tyu'uye'eytyëty xëëny koots. 22Ja yoots jä'ä ënety xëmë jëwyiin nëjkxp ko xyiiny'äty, e ja jëën jä'ä jëyëjp nëjkxp ko kyoots'aty.
المحددات الحالية:
Éxodo 13: QUETZMIXE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Biblia Dc en Mixe de Quetzaltepec, Oaxaca México © Sociedad Bíblica de México, A.C.