Éxodo 16
16
Tios tyäky ja ka'ayën ukën
1Tëkokyë yë Israel ja'ayëty ojts tsyo'onta'atë jam Elim ets ojts nyëjkxtë jam ma tu'uk të'ëts'it txëëwatyën Sin, itkujky yajpaaty mëët yë Sinaí ets Elim. Majkmokx ënety y'äny ja po'o ja mëmäjtskpë mëët ma ënety të tsyoontën jap Egiptë. 2E ko jam jya'ajtë ma ja të'ëts'itën, ënätyë tnimëtyaktëjkëtyë wiinkjaty ja Moisés ets ja Aarón. 3Y'ënantë:
Nikë oy jeexyë yë Dios të xytyimyaj'o'këmë jap Egiptë, yajxon ijty jap yë kaaypyäjn nwinkuwä'tsëmë ujts mëët yë tsu'utsy ets ijty njanty jyë'kxëmë koonëm yajxon nkuxëmë, e miitsëty koos yaa të xywyoowmiintëpë jëtu'un tpatnë o'kën tëko'oyën yowë të xytyuknimintës.
4Ënet ja Dios t'ënëmaay ja Moisés:
Ntuknikäxantëp yam yë ka'ayën ukën may'äämpy mëti'ipë tso'onpën tsajpjotm, winjopy yë ja'ay tpëjkmujkojtëty yë jyi'kxy pyikyëty, jëtu'un tä t'a'ixëtën naje'eyë nyipaatëty tu'kxëëw. Ëjts n'ixäämpyës pën jyänty kuuytyuuntëp jëtu'un tääjës yam nikäjpxyën. 5Komtëtujk xëëw ko xynyipëjktaakëtëty mëti'ipë mënëjkxantëpën ma mjëën mtëjkëtyën, jaakni'ikjawë ja mjë'kxy mpëky xypyëjkmuktëty, ka'ap jyëtu'unëty tä xëmë winjëpom xyajmuktën je'eyë tu'kxëëwkay, jä'ä xëëw jä'ä xypyëjkmuktëty mäjtsk xëëw kay.
6Ënet yë Moisés ets Aarón t'ënëmaaytyë yë Israel ja'ayëty:
Tyam ko jyënäkyxyëëw'atëty jää ënät xynyijawëtëty ko yë Wintsën yë'ë ojts mjuutëtë jap Egiptë. 7E ko jyopy'atëty, jää xy'ixtëty yë Dios yë myëj'ajt y'oyajtën, yë'ë wa'ats të tmëtoy ko miitsëty wiinkjaty të xynyimëtya'aktë. ¿Jä'ä ko ëëtsëty tii mëj'ajtën n'ëkmëët'ajtëpës etsës xynyi'oj xynyiyaaxëtëty?
8Tä yë Moisés ojts jyaakëna'any:
Ko jyënäkyxyëëw'atëty jää yë Dios mo'oja'anëtë yë tsu'utsy mëti'ipë mtukkaytyëpën, e ko jyopyëp'atëty yë'ë mo'ojanëtëp yë tsajpkääky mëjwiin këjää, jä'ä ko yë'ë tëë tmëtoy ko miitsëty wiinkjaty xynyikajpx xynyimëtya'aktë, ëëtsëty ¿tii mëj'ajtënës n'ëkmëët'ajtëp? Ko miitsëty wiinkjaty të m'ëna'antë, ka'ap jëtu'un y'ëëtsëty të xytyijtë, Dios jëtu'un wiinkjaty të xytyijtë.
9Ënet yë Moisés t'ënëmaay yë Aarón:
Ënëëmë tëkokyë yë Israel ja'ayëty, wä'än tmëwinkontë yë Dios, jä'ä ko yë'ë tëë tmëtoy ko tëkatsyëty yë aaw ayuk të nyipëtsëmyë.
10Ma ënety jam jëtu'un ja Aarón myëtyä'äkyën mëët yë Israel ja'ayëty, ënät jam nyajts'ijxëtyääytyë të'ëts'itum ets ojts ja Wintsën t'ijxëtë ja myëj'ajt y'oyajtën yootsjotm. 11Ënet ja Dios ojts tmëkäjpxy ja Moisés ets t'ënëmaay:
12Tëës nnijawë ko yë Israel ja'ayëty je'eyë wiinkjaty myäytyë tyajtë. Paaty tyam kopkpëky ko xymyëkajpxëty ets xy'ënëëmëty: Ko jyënäkyxyëëw'atëty, ja tsu'utsy jää mtsu'utstëp, e ko jyopyëp'atëty yë tsajpkääky jää mkaytyëp, koonëm yajxon m'utstëty. Jëtu'unts xynyijawëtëty ko ëjtsë jëtu'un Wintsën mëti'ipë Tios'ajtpën.
13Jä'ä xëëw ma ënety të yaj'akäjpxyën, ko jyënäkyxyëëwajty myäymyiintë ja muuxy ets tyajwintujktaaytyë ja tsënaaytyakn ma ja Israel ja'ayëty jam tsyëënëtën, komjopy jëtu'un yaj'ixy tä nëma'ajën. 14E ko ojts pyojë'ktaaynyë ja nëma'a, ënät jam yaj'ijxy tä yë tip kyä'äyën naaxkëjxy jam të'ëts'itjotm. 15Yë Israel ja'ayëty ka'ap tnijawëtë tiitën jä'ä, ko t'ijxtë tääts nyäyajtëëwëtë aak yë'ëjëty: ¿Tiitën ya'atënë? Tää ja Moisés y'ëtsoowëtë:
Yë'ë tsajpkääky mëti'ipë ja Dios mooyëtëpën ets xyjyë'kxtëty xypyëktëty. 16Tëë Dios tu'uk ja ënä'ämën tyäky: Ko nitu'ukjaty xyajmuktëty ya'atë tsajpkääky, jënu'un tä xy'a'ixëtën naje'eyë myëta'akëty ma ja mjëën mtëjkëtyën ets ninu'un jap mjuuky'atën, jä'ä nëjkx xyajmuktë ya'atë jë'kxy oy mäjtsk'a'ukën ja tu'ukpë ja'ay tjë'kxëtyën.
17Jëtu'un tjantyuuntë ja Israel ja'ayëty. Pënëty ojts wäänë tyajmuky ja jyi'kxy pyiky, pënëty mëti'ipë ojts may tyajmukyën ja jyä'ä. 18Jëtu'un ijxtëm ënety të yajtuk'ëwaanëtën tyajmuktëty, jëtu'un ojts tjanty yajmuktë, mëti'ipë ja jyä'ä may pyëjkmujkën ka'ap ojts tii nyatëkë, e ja mëti'ipë wäänë ja jyä'ä yajmujkën, nän ka'ap ojts tii myëyajtxëty; jä'ä ko nitu'ukjaty ja ja'ayëty jëtu'un ënety të tyajmuktë, tä tyajmëyatën.
19Ënet ja Moisés ojts näjyëtu'un y'ënë'ëmxëtë:
Ni pën mëpaat tii tkayajwë'ëmy ets y'ënaanpëty komjëpom tjë'kxa'any.
20Ka'ap pën tyëkoy'äjty, mëti'ipë ka'ap tja'akyujkëyën, mëti'ipë ja Moisés ojts tjanikäjpxyën, ojts ja tyajwë'ëmy ja jyi'kxy ets komjëpom nyätyukjëjp'ijxyë. Ja mëti'ipë ojts tyajwë'ëmtën, ko komjëpom t'ijxpatë tëë ënety nyatënë'këtyääynyë ets xu'knëp. Ënet ja Moisés ojts mëk y'ëwa'antä'äky ko jëtu'un y'ëtëtstë.
21Nitu'ukjaty ja ja'ayëty tsojk ijty tyajmujkojtë ja jyi'kxyëty ko jyopyëp'aty, jëtu'un tä ënety këëkjä'ä tyajmëyatën, jä'ä ko ja xëëw pyajnë tääts jyiiywya'kxtaaynyë. 22E ma tyëtujkxëëwpetyën jää ijty may tyajmuktë tä mëpaat naje'eyë mäjtsk xëëw tni''itën. Jä'ä tpaaty taxknëë'a'ukënjaty tu'kja'aypyë, e ko jëtu'un t'ijxtë ja kopktëjkëty ma ja naax kajpnën, ënät ojts ja Moisés tuk'ëwaanëtë, 23ets ja Moisés y'ënäny:
Jëtu'un yë Dios të tni'ënä'ämë, ijxtëm xynyijawëtën po'kxënxëëw jopy, tu'uk ja po'kxënxëëw mëti'ipë ja Dios yajtukmëjja'awëpën, paaty oytyuntë tyam yë mjë'kxy mpëkyëty, mëti'ipë jyëkyejpy tyam xynyipëjktaakëtëtyën. E mëti'ipë ënät tyam natëkëpën, yë'ë jëpom mnätyukjëjp'ixëtëp.
24Jëtu'un tä ënety ja Moisés të tni'ënä'ämën, ojts jëtu'un tjantypyëjkë'ëktë ja jyi'kxyëty pyikyëty, mëti'ipë ënety të nyatëkën. Jä'ä komjëpom nätyukjëjp'ijxëtë ja mëti'ipë ojts tpëjkë'ëktën, niwi'ix ojts kyajaty, ka'ap ojts tyënë'kë ets ka'ap ojts wi'ix xyuuky jyoky. 25Ënet ja Moisés y'ënäny:
Tyam je'eyë jëtu'un timjë'kx timpëktë, jä'ä ko ya'atë po'kxënxëëw, yë'ë yë Dios mëpaat yajtukwintsë'ëkë, ya'atë xëëw katii jam tyam xykyapaatëty kamjotm tu'ujotm. 26Jyëkyäpëp xypyëjkmuktëty yë mjë'kxyëty mpëkyëty tëtujk xëëw jëtu'un y'itëty, e ma wyëxtujkxëëw'ajnën po'kxënxëëw jäänë, ka'ap jää tii y'ita'any.
27Tam mëti'ipë ojts jyatsoontën ets ja jyi'kxy tjayajmuka'antë, ka'ap ojts tii tpaatë. 28Ënet ja Dios ojts t'ënëëmë ja Moisés:
¿Jëna'a jëtää mja'akyukëja'antë, miitsëty xëmë yowë je'eyë xykyäjpxykyutëjanëtë yë n'ënä'ämënës ntëyajtënës ets n'aaw n'ayukës? 29Yë'ë yajxon mtimyjä'äymyätstëp, ko ëjts, mëti'ipë Wintsën'ajtpën, tëëjës tu'uk nnikäjpxy yë xëëw, mëti'ipë mpo'kxtëpën. Paatykyëjxm ma tyëtujkxëëwpetyën nmo'otë miits yë mjë'kxy mpëkëty mëti'ipë naje'eyë mni''itëpën mäjtsk xëëw. Ko ënät wyëxtujkxëëwpety, jam myajpaatëty ma mjëën mtëjkëtyën ets ni pën kyatsoonëty.
30Ënet ja ja'ayëty ojts ya'atë xëëw tjantypyo'kxtë ma wyëxtujk xëëwpetyën.
31Ja Israel ja'ayëty jä'ä ojts tijtë maná mëti'ipë ënety winjopy yajmujktëpën. Ya'atë maná jä'ä ënety y'ixëty poop ets jëtu'un kyëxë'ëky tä yë tsajpmokën ets pya'akëty jëtu'un tä yë tsajpkääkyën cerëpa'akmëëtpë.
32Ënet ojts ok ja Moisés y'ënä'äny:
Ya'atë jëtu'un ënä'ämën'ajtp mëti'ipë yë Dios të tyäkyën: kijpxtë ëpëky mäjtsk nëë a'ukën yë maná, mëti'ipë yë'ë mtuknipëjkë'ëkëtëpën ja m'u'unk m'okëty. Yë'ët nëjkx t'ixtë ets nijawëtëty wi'ix ojts miitsëty ja ka'ayën ukën nmo'otën nkäxtën të'ëts'itum, ko nyajpëtsëëmtë jap Egiptë.
33Ënet näjyëtu'un t'ënëmaay ja Aarón:
Ix tu'uk yë katsy ets ënät jap xy'apëkëty yë maná oy mäjtsk nëë a'ukën, tä ënät ok xytyukwintsë'ëkëty yë Dios. Japts wyë'ëmëty pëjkë'ëky, yajtuknipëjkë'ëkëtëty ja m'u'unk m'okëty.
34Jëtu'un tä ja Dios ënety të tmo'oyën ja ënä'ämën ja Moisés, ojts ja Aarón tu'uk ja katsy tjanty'ixy ets ojts jap tpëjkë'ëky ja maná, jap tkupëjkëy ma ja Dios ja kyaaxën ets jap ja maná ojts pëjkë'ëky wyi'imy.
35Yë Israel ja'ayëty jä'ä ja maná tkaaytyë t'uktë wëxtyikxy jëmëjt, koonëm ojts jam jya'të ma ja naax kajpnën, ma ja tsyëpa'an nyäxyën ja Canaán itjotm.
36Ja kijpxën mëti'ipë yajtijpën gomer, jä'ä ënety jye'emtyëty tu'kpëky je'eyë ma ja majk pëkpyën.
المحددات الحالية:
Éxodo 16: QUETZMIXE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Biblia Dc en Mixe de Quetzaltepec, Oaxaca México © Sociedad Bíblica de México, A.C.