Éxodo 20
20
Ja majkpë ja ënä'ämën tëyajtën
1Ënet ojts ja Dios kyäjpxy ets tnikajpxtaay ya'atë aaw ayuk:
2Ëjts jëtu'un Wintsënajtp, mëti'ipë mijts mTios'ajtypyën, mëti'ipë ojts mjuutyën jap Egiptë, ma ënety mmëtuny m'ëyoyën.
3Ka'ap wiinkpë tios xymyëët'atëty ets ënät ëjts xy'ëxtijnëty.
4Ka'ap tii kë'ëm xyajkojëty ëkë xyajnikojtu'utëty mëti'ipë jam tsajpjotm ijtpën, ëkë mëti'ipë naax pa'tkë'pën, ëkë mëti'ipë jap nëëjotyën naaxpa'tkë'pë yajpaatyën. 5Ka'ap jëtu'unpë xywyinkoxtänëty, ëkë xymyëjjaw xyjyäänty jyawëty. Jä'ä ko ëjts jëtu'un mWintsën Dios, mëti'ipë ni'äkë'ajtp ets tmo'oy ja tëytyu'unën ja taak teety ja y'ëxëëktu'un y'ëxëëkkajpxën ma ja u'unk ëna'kën ets ma ja ok'u'unk ok'ëna'kën ets ma ja ok'u'unk ok'ëna'kën ja y'u'unk y'ëna'këty, tëkëëk ets taxk najtskä'äxë paat. 6E mëti'ipës xytsyojkp xyjya'apën ets tpatuny ja n'ënä'ämënës ntëyajtënës, mëj këjääjës yë ntsoky njawë ets winë xëëw winjëmëjt n'oyjyawëja'anyës.
7Ka'ap yë mWintsën Dios yë xyëëw ëëwpäjn kajpxpäjn je'eyë xywya'anëty, jä'ä ko yë'ë ka'ap jëtu'unyë tnayajninaxa'any mëti'ipë ënety nëkoo ja xyëëw tyuk'ëyë'këpën.
8Mja'amyätsëp xëmë yë po'kxënxëëw ets jää yë Dios xymyëjjaw xyjyäänty jyawëty. 9Tëtujkxëëw mtunëty mye'eyëty ets jää xytyuunta'ajëty mëti'ipë ënety mtunäämpyën. 10E ja mëwëxtujkxëëwpë po'kxënxëëw jäänë, mëti'ipë ja mWintsën Dios yajtukwintsë'ëkëpën. Nitituunk mëpaat xykyatuny jä'ä xëëw, näjyëtu'un yë mmaank, yë mnëëx, yë mtuunpë ye'etyëjkpë, to'oxytyëjkpë; yë mjëyujk ets jaaypyaat jaaypyo'kxy ka'ap mëpaat jää nitituunk tuntë. 11Jä'ä ko yë Dios tëtujk xëëw ojts t'oytyuny yë tsajp ets naaxwiinyëtë, yë nëëmejy ets tëkokyë mëti'ipë yajpatpën ma yë'ëjëtyën ets ojts pyo'kxy kom wëxtujk xëëw. Jëtu'un'äämpy ojts ja Dios tkënu'kxy yë po'kxënxëëw ets ojts tnikäjpxy ko wya'atsëty.
12Mwinkutsë'ëkëp yë mteety mtaak ets jëtu'un jeky mjuuky'atëty yaa naaxwiiny naaxkëjxy, ja juukyajtën mëti'ipë yë mWintsën Dios mmooyëpën.
13Këtii myajja'ay'ookëty.
14Këtii xyajwintsë'këntëkoyëty yë pëjkën ukën.
15Këtii mtonëty mmäätsëty.
16Këtii ëxëëkjaty tëkatsyjyäty xynyikajpx xynyimëtya'akëty yë mjëëky mëku'uk.
17Këtii xy'atsojkëty yë mmëku'uk yë jyëën tyëjk, këtii xy'atsojkëty yë tyo'oxytyëjk, këtii xy'atsojkëty yë myëtuunpë kyupëjkpë ye'etyëjkpë, to'oxytyëjkpë ets ni xykya''atsojkëty yë tsyajpkaa ets kyërukts ets tëkokyë ma tmëët'atyën winë.
Yë Israel ja'ayëty tsë'ëkëtë Tios
18Nitëkokyë yë Israel ja'ayëty y'ijxtaaytyë ko ojts ja ënääw wëtsuk y'ëti'itsy y'ënä'äny, ko ja pujxnxuxn mëk jyänty xyuxy ets ko ja jëënjok tyajnitujktaay ja tun kopk. Ojts ja ja'ayëty may tsyë'ëkëtë ets ka'ap ojts nëkooyë wyinkontë ma kopkën. 19Paaty t'ënëmaaytyë ja Moisés:
Mijts ëëts mëëtmëtyaktëk ets npatuntëtyës tëkokyë, mëti'ipë ënety mnikäjpxypën. Ka'apës ntsoktë ets Dios yë'ë xymyëkajpxtëtyës, jä'ä ko tsojkës xy'ëkyaj'o'ktaaynyëtëty.
20Tä ja Moisés y'ëtsowëtë:
Këtii mtsë'ëkëtë, Dios yë'ë y'ixäämpy wi'ix miitsëty ja jot winma'any xymyëët'atën ets yë'ëkyëjxm xytsyë'ëkëtëty, këtiipë mpokytyuntëty.
21Ja mayjyä'äyëty tam ënety jëkäm yajpaatë ko ja Moisés tmëwinkoony ja yoots nëma'a mëti'ipë je'eyë akëxë'këpën yëkëm, jam ma ënety ja Dios yajpaatyën.
Ja wintsë'këntyakn ja nyitëyajtën
22Ënet yë Dios t'ënëmaay yë Moisés:
Jëtu'un xy'ënëëmëty yë Israel ja'ayëty: Miitsëty wa'ats xynyijawëtë, ko ëjts tëëjës jam tsajpjotm nkäjpxy ets miitsëty të nmëmëtya'aktë. 23Nitii awinax xykyayajkojtëty, mëti'ipë oytyunyën mëët yë pu'ts pujxn, mëët yë poop pujxn ets xy'ëwtatëty ijxtëm jeexyë ëjts xy'ëwtatën. 24Paaty yam n'ënëëmëtë ets xy'oytyuntëty tu'uk yë wintsë'këntyakn, yë naax mtukpotstëp ets jamts xymyo'otëtyës yë mjëyujk mtsajpkaajëty ets xynyino'oktëty, jëtu'un'äämpy ntu'unmëty ja nay'ëëw'oy näykyajpx'oyë.
Ëjts minaanpës ma miitsëtyën ets nkënu'kxa'antë, oy jëtu'un tyimmaa'atëty maas ënety ntsokyën etsës ja nxëëw mëj jaanty y'itëty. 25E pën m'oytyuuntëp yë wintsë'këntyakn mëti'ipë tsaajën, këtii yë'ë xyajtuntëty mëti'ipë tëë yajpuxy yajtsetsyën. Jä'ä ko yë tsaa mëti'ipë tëë yajpuxy yajtsetsyën ka'ap yë y'ëkwa'ats'ajnë ets tu'uk yë wintsë'këntyakn yajtuk'oytyunëty. 26Yë wintsë'këntyakn ka'ap mëpaat yajwääpy ja nyitënaaypyäjn, këtiipë kyëxë'ëkëty ja mnini'kxëty niwa'ats ko ënety jam mpatë.
المحددات الحالية:
Éxodo 20: QUETZMIXE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Biblia Dc en Mixe de Quetzaltepec, Oaxaca México © Sociedad Bíblica de México, A.C.