Éxodo 22
22
Ja nyitëyajtën wi'ix winë yajyajktëkatsëtyën
1Ko ënety pën të twijtske'eky tu'uk yë tsajpkaa, ëkë tu'uk yë kupixyny ets tyaj'ookëty ëkë tookëty. Ko nëjkx tkëpäjnë, jä'ä nëjkx tyajknë mëkoxk ja nyitsajpkaa ja tu'ukpë ënety të tmeetsyën ets taxk ja nyikupixyny ja tu'ukpë ënety të tmeetsyën.
2Ko tu'uk yë mä'tspë pën pyaatëtëty ma ënety jam myeetsyën ets yajtsëtyutëtëty ëkë tyimyaj'ookëtëty, ka'ap ja jëtu'unpë yajnipaye'eyëty, tä tu'uk yë ja'ayën mëti'ipë tsoky yajja'ay'o'kpën. 3E pën jääts ënety të y'ooky ma të xyiinyënën, jä'ä nëjkxëp ja yajnipaye'ey.
Ja mëti'ipë ënety të tyony të myeetsyën, kopkpëky ko tkujuuytya'ajëty, ja mëti'ipë ënety të tmeetsyën. E ko ja meeny tkamëët'atëty mëti'ipë tyukujuyëpën kë'ëm nyätyookëtëty ets jëtu'un tkëpätëty ja mëti'ipë ënety të tmeetsyën.
4E pën jam ja jyëyujk tmëëtëty ma tyëjkën ets juuky jam tyajtänë, jä'ä nëjkx tkëpäjnë kujkwä'kxy tyajni'ikënëty, oy ënety yë'ëjëty yë tsajpkaa ëkë krukts ëkë kupixyny.
5Pën yë jyëyujk nyajtsmajtsëp ets nëjkx tyajjë'kxë'ëka'any ets muum tyëkëty ja'ay kyamjoty, ko kyëtyeyëty jä'ä nëjkx tkëpäjnë ja këtyey mëët ja kyë'ëm kam ëkë ja kyë'ëm tsatsymkyam.
6Ko pën yë toyëjëën tyajkä'äkëty ets muum tyoyëty yë tsajpmokam, ëkë mëti'ipë muum nipëjkpety yajpatpën, ëkë mëti'ipë jam je'eyë yoonpnëmën. Ja ja'ay mëti'ipë ënety të yajtoyëke'ekyën, yë'ë nëjkx tkëpäjta'ay ja pëjktä'äky, mëti'ipë ënety të wyintëkoyën.
7Pën yë myëku'uk tyukmëët'ajtyp yë wyit myeeny, ëkë oytyiijëty mëti'ipë tsoowpaatyëtyën ets yajmäätsëty jam ma ja jyëën tyëjkën. Ja mä'tspë kwanë ko tkujuuytya'ajëty mëti'ipë ënety të tmeetsyën ets kujkwä'kxy tyajni'ikëty, pën yajpatp. 8E ko ja mä'tspë kyayajpaatëty, ënät yajwoownëjkxëty Dios wintum ja ja'ay mëti'ipë kutëjk'ajtpën ets yaj'ixëty pën ka'ap yë'ëjëty të tyu'utsy mëti'ipë ja myëku'uk jyä'ä'ajtypyën.
9Pën jyä'äniwäämpy tu'uk yë tsajpkaa, ëkë krukts, ëkë kupixyny, ëkë wit tujkxy, ëkë oy tyimtiijëty, mëti'ipë të tyëko'oyxyëtyën ets y'ëna'anëty ko yë'ë tjä'äjëty, tääpë nimäjtsk yë ja'ayëty mëpaat yajwoownëjkxtë jam Dios wintum ets jam yajnijawëty pën pokykya'ap; e mëti'ipë ënety pokykya'apën kujkwä'kxy nëjkx tnikujuuypyäjnë ja mëti'ipë ënety yajtsiptaktëpën.
10Pën yë myëku'uk tyukmëët'ajtyp tu'uk yë krukts, ëkë tu'uk yë tsajpkaa, ëkë tu'uk yë kupixyny, ëkë oy tyimtiijëyujkëty ets muum tsyëtyutëty wyintëkoyëty; ëkë wi'ix jyatëty kyëpätëty, ëkë yajmäätsëty ets ka'ap pën t'ixëty. 11Ja ja'ay mëti'ipë ënety jëtu'un të y'ëyo'onpaatyën, nëjkxëp tmëëtmëtyä'äky ja kujëyujk ets Dios tyukkajpxpätëp, ko ka'ap ënety wi'ix ja jëyujk të tuny, mëti'ipë ja myëku'uk tukmëët'ajtëpën. Ja mëti'ipë kujëyujk'ajtpën ja'akyukëp näjyëtu'un ets kyupëkëp tä ënety yaj'ënëëmën ets ja tu'ukpë ka'ap nitu'kjënu'un tkujuyëty. 12E pën tëë tja'ixy ma ënety jam ja jëyujk yajmeetsyën, kopkpëky ko nëjkx tkujuuyë ma ja jëyujk ja nyiwintsënën. 13Pën tääpë jëyujk ëwa'anjëyujk ënety të yaj'ookyë ets të tsyu'utsyë, ets ka'ap tkujuyä'äny ja jëyujk'ooky, yë'ë myënëjkxëp ja jëyujk tsu'tstuk jam ma ja kujëyujkën.
14Pën y'amëtoopy ënu'kxy tu'uk yë jëyujk ets y'o'kxëtëty, ëkë tsyëtyutëty wyintëkoyëty, ma jam ka'ap yë wyintsën y'ixyën. Ja ja'ay mëti'ipë ënety të jyëyujk'ënu'kxyën, nëjkxëp tnikëpäjtu'uty ja jëyujk ma ja wyintsënën ko ënety të tsyëtyuty të wyintëkoy. 15E pën jamts ja nyiwintsën y'ixyë, ko tsyëtyutëty wyintëkoyëty, yë'ë ka'ap nitu'kjënu'un tkujuyëty. Pën ja jëyujk je'eyë ënety të yaj'ënu'kxy, je'eyë nëjkx tmëjuy, mëët ko ënety të pyutëkëty.
Ja tëyajtën wi'ix mëpaat yë jot winma'any oy yajmëët'atyën ets wi'ix mëpaat yë Tios yajwinkutsë'ëkën
16Pën tu'uk ja ye'etyëjk mye'tsyp ja to'oxy'ëna'k mëti'ipë ka'ap yë ye'etyëjk tmëët'atynyëmën ets ka'ap pën yë jyämyëët'ajtpënëm ets t'atsip'atëty ets tmëët'ata'anëty, kwanë ko nëjkx tkuyäky ets mëët pyëkëty. 17Oy ënety ja tyeety ka'ap jyayaka'anyë, ja ye'etyëjk kwanë ko tkuyakëty ja to'oxytyëjk, jëtu'un ijxtëm ënety ja to'oxy'ëna'k tu'uk yajkukëpetyën mëti'ipë ka'ap ja ye'etyëjk tmëëtsëënënëm.
18Këtii xyajwë'ëmëty juuky yë to'oxytyëjk, mëti'ipë kajpxpojkpën, myaj'ookëp ënätyë.
19Pën mëët yë jëyujk y'ijtmuky ets jëtu'un tmëët'ataanpëty tä tu'uk yë ye'etyëjkën, ëkë to'oxytyëjkën, yë jëtu'unpë ja'ay nitëjkëyëp ets y'ookëty.
20Pën myoopy yë wyintsë'kën yë wiink tios, jëtu'un tä jeexyë yi'iyë atu'uk yajmo'oyën yë Wintsën, yë jëtu'unpë ja'ay nän nitëjkëyëp y'ookëty.
21Këtii nëkoo ëxaty xytyimtunëty yë jaaypyo'kxyjyä'äy, yë'ë ja'amyäts ko mijts ojts mjaaypyo'kxy'äty jap Egiptë.
22Këtii ëxëëk xytyunëty yë ku'ookytyo'oxy ets ku'ooky'u'unk. 23Jä'ä ko pën jamëtën ëxaty xytyuny ets t'amëtow tpëjktsowtëty ja putëjk pupäjtën maas ëjtsën, ëjts ninëjkxäämpyës yë'ëjëty etsës mputëkëja'antë. 24Ets mëët tu'uk yë mëkjoot'an nëjkx mijts nyaj'ook nyajtëkoytyë, jëtu'un tä tu'uk yë ja'ay yajkupuxyën mëët yë tëypyujxn, jëtu'un nëjkx ja ëyo'on wyimpity ma miitsëtyën, ja mto'oxytyëjkëty jä'ä nëjkx ku'ooky wyë'ëmtë ets ja m'u'unk m'ëna'këty jä'ä nëjkx wyë'ëmtë ku'ooky u'unk ku'ooky ëna'k.
25Pën mtuk'ënu'kxyp yë mmëku'uk yë wit meeny, mëti'ipë ëyoop jotëkoopyën, këtii jëtu'un mnäyajnaxëtëty tä ja'ayën mëti'ipë yajnu'kxpën ets ni yë'ë xykyapatëkëty pën tëë tyaj'u'unk'aty tkayaj'u'unk'aty. 26Pën tääpë ja'ay mooyëp yë wyit tyujkxy mëët ko ënety ja wit meeny xytyuk'ënu'kxy, ënätyë jatëkok xymyooywinpijtkojnëty jä'ä xëëw, ma ënety ka'ap jyajmonyëmën. 27Jä'ä ko wi'ix nija'awëmëty wä'änxyëp ënety yi'iyë tu'uk twit'aty, mëti'ipë nätyukniju'uxëpën e ko xykyamo'ojëty ¿tii nëjkx tnatukma'ay? Ko nëjkx xy'amëtoy xypyëjktsoy ja putëjk pupäjtën, yë'ë nëjkxëp mputëkë, jä'ä ko ëjts nnija'apës wi'ix ja'ay pya'ëyoy nyajts'ëyowën.
28Ka'ap yë Dios nijëna'a xy'ëxëëktijëty ëkë xypyokëty, näjyëtu'un ka'ap nijëna'a xy'ëxëëktijëty ëkë xypyokëty ja mëti'ipë nyikutuunk'ajtypyën yë mnaax mkajpn.
29Ka'ap xymyëpo'kxëty yë m'ayajk m'ako'onën ets mpëjktä'äky mëti'ipë mmëminëpën ma ëjtsën.
Yë m'u'unk mmaay, mëti'ipë ënety më''ëka'any mëxu'unk'ajtpën, ëjts xymyo'ojëp. 30Näyjyëtu'un ja më''ëka'anypë tyajja'tyën ja y'u'unk myääy ja mtsajpkaato'oxy, ëkë mtsajppax mkupixyny nëjkx xymyo'oyës. Jyëkyäpëp je'eyë wëxtujk xëëwën myëët'atëtëty yë tyaak, e ma ënety tuktujk xëëw y'apäjnë, jää xymyooynyëtyës.
31Miitsëty wa'ats mëpaat m'itë maas ëjtsën, këtii xytsyu'utstëty yë jëyujk, mëti'ipë muum ja jëyujk ëxëëk të tyunyën, ëkë të yaj'ookyën, yë'ë tëy mo'otëp yë uk, wä'än tsu'utsy.
المحددات الحالية:
Éxodo 22: QUETZMIXE
تمييز النص
شارك
نسخ
هل تريد حفظ أبرز أعمالك على جميع أجهزتك؟ قم بالتسجيل أو تسجيل الدخول
Biblia Dc en Mixe de Quetzaltepec, Oaxaca México © Sociedad Bíblica de México, A.C.